Roma 7 - ꞌRe Ihâimana Uꞌâsi Mono Zadawa Wasuꞌu

Imro'õ norĩ mrozém na rowasu'u na isimiré

¹ Ĩsisãnawã norĩ, 'Re ihâimana u'âsi mono nhimiroti 'rata na rob'ui'éré hã aima waihu'u pese za'ra wa'aba di. Tahawa, ãhã na ĩnhimi'ui'éré na te aima irowasu'u za'ra wa'aba zé hã, aima waihu'u pese za'ra wa'aba di za duré. Ni'wa hã ti'ai ãma 're hâimana mono ré, te za 'Re ihâimana u'âsi mono nhimiroti hã pire na tãma 're hâimana, ti'ab ré 're idanomro mono zém na roti hã. Tane nherẽ, dâ'â wamhã oto, tãma 're hâimana mono õ di za oto, isarina 're ihâimana mono zéb da hã. E marĩ wa. Dâ'â wa oto.

² Ãne na wa za aima romnhimiré'é za'ra wa'wa. Pi'õ norĩ hã imro hã tiwi 're dâ'â za'ra mono õ ré, 'Re ihâimana u'âsi mono nhimiroti 'madâ'â sina, te te 're rẽme waihu'u za'ra mono õ di za. Imro tiwi 're dâ'â za'ra mono wapsi, te za oto 're mro za'ra, 'Re ihâimana u'âsi mono nhimiroti zarina, aimawi aibâ na, pi'õi wi imro 're dâ'â za'ra mono wa, timro na te te 're sahu tõ za'ra mono da, te te ãma roti õ wa, 'Re ihâimana u'âsi mono hã.

³ Tane nherẽ, pi'õ norĩ hã imro hã tiwi 're dâ'â za'ra mono õ nherẽ, aibâ aimawi ré 're hâimana za'ra mono wamhã, 'Re ihâimana u'âsi mono nhimiroti zarina 're hâimana za'ra mono õ wa, te za ipo're'õ hã da te ãma 're sa'ra za'ra, pi'õ norĩ ãma hã, tihâiba na tiwasédé te te 're 'manharĩ za'ra mono wa. Imro tiwi 're dâ'â za'ra mono wapsi, te za oto 're mro za'ra, aibâ aimawi na. Tawapsi tihâiba na tiwasédé hã te te 're 'manharĩ za'ra mono õ di za, apâ 're mro za'ra mono wa. Ãne hã aima waihu'u pese za'ra wa'aba di.

⁴ Ĩsisãnawã norĩ, tane duré, a norĩ wa'wa hã. Cristu hã wedepo'o nhonhi'rãmi na asada dâ'â za'ra wa'aba wa, ma tô isiré 're atâ'â za'ra wa'aba mo. Tahawa, 'Re ihâimana u'âsi mono nhimiroti 'rata na rob'ui'éré hã asina tãma ãma 're i'uwaimrami za'ra wa'aba mono zéb zarina, aiwasédé hã te te oto ai'ãma 're ab'madâ'â aba mono tõ da, 're asi'madâ'â za'ra wa'aba mono õ di za. Tâibâ oto. 'Re ihâimana u'âsi mono te te ihâiwa'utu nhib'a'uwẽ si, wa oto 're wanomro, taha ma si, wa te oto 're romhuri za'ra mono da, iwẽ na si. Pi'õi wi, imro tiwi 're dâ'â za'ra mono wamhã, isimiroti hã te te 're wapari za'ra mono õ di za oto. 'Re mro zahu za'ra mono wapsi, te za duré timro tém nhimiroti hã te te 're 'madâ'â pese za'ra apâ. Tane hã 'Re ihâimana u'âsi mono nhimiroti 'rata na rob'ui'éré hã asina tãma ãma 're i'uwaimrami za'ra wa'aba mono zéb zarina, 'Re ihâimana u'âsi mono, aiwasédé hã te te oto ai'ãma 're ab'madâ'â aba mono tõ da, 're asi'madâ'â za'ra wa'aba mono õ di za oto, pi'õi wi imro 're dâ'â za'ra mono wa, isimiroti te te oto 're i'madâ'â za'ra mono õ ne. Tâibâ oto. Cristuhu ãma si, te za oto 're anomro aba mo, pi'õ hã apâ 're imro zahu za'ra mono norĩ, timro tém nhimiroti te te 're iwapari pese za'ra mono ne.

⁵ Wahâimana wasété na 're wahâimana za'ra mono ré, wa tô marĩ iwasété zô si, wa te 're rob'ruiwapari za'ra aré. Taha ré, 'Re ihâimana u'âsi mono nhimiroti 'rata na rob'ui'érézé hã, wawasété ãna 're iwanomro mono zé waihu'uzéb da, wama 're hâimana za'ra mono nherẽ, duré wama waihu'u pese za'ra nherẽ, taha upana si, wa tô marĩ iwasété zô si, wa te 're rob'ruiwapari za'ra, tô õhõ zô si, 'Re ihâimana u'âsi mono te te wawi 're i'azawi mono zô si. Taha zarina wa tô aré wapẽ'ẽ 're, wadâ'â u'âsi ne 're wahâimana za'ra, 'Re ihâimana u'âsi mono nhiti.

⁶ Tane nherẽ, 'Re ihâimana u'âsi mono hã ma tô te te wama 're apisutu oto, isimiroti na rob'ui'éré 'rada hã wa te wasina tãma ãma 're i'uwaimrami za'ra mono zéb zarina, wawasédé hã te te wa'ãma 're i'ab'madâ'â mono zéb da, 're wasi'madâ'â za'ra mono tõ da oto. Isimiroti na rob'ui'éré 'rada hã wa te wasina tãma ãma 're i'uwaimrami za'ra mono zéb zarina, te te 're iwa'anho'reptui mono zéb zô, 're wanhopré mono sina, wa te oto tãma 're romhuri za'ra mono õ di, 're iwahâimana 'rata za'ra mono zém na hã. Ipẽ'ẽzani hã te te wama 're i'aroti mono zéb zarina si, wa oto wa te tãma 're romhuri za'ra, 're iwahâimana za'ra mono zép tém na si.

'Re ihâimana u'âsi mono nhimiroti, da te oto 're iwaihu'u za'ra mono zarina, dawasété na 're idasiwaihu'u za'ra mono zé wasu'u

⁷ Tawamhã e 'Re ihâimana u'âsi mono nhimiroti 'rata na rob'ui'éré hã wasété di, Mozési te te ãma irob'ui'éré na hã. Mare di. Wasété õ di. Ãhã wasu'u hawi, wa tô wa hã ĩwasété na ĩsiwaihu'u, 'râwi. Ãne, 'Re ihâimana u'âsi mono nhimiroti 'rata wasu'u hã: “Marĩ iwẽ hã dawi 're 'ruiwapari za'ra wa'aba mono õ di za.” Ãne hã te waihu'u õ 'wa'âhã, aré ĩwasété na ĩsiwaihu'u õ di, marĩ te ĩsima i'ruiwaparizém na hã.

⁸ Ãhã wasu'u na te oto waihu'u wamhã, marĩ hã te dawi 're i'ruiwapari mono zéb da si, wa tô te ĩsima 're rosa'rata u'âsi, 're ĩhâimana wasété mono zéb zarina. 'Re ihâimana u'âsi mono nhimiroti 'rata na rob'ui'éré hã dama waihu'u za'ra õ wa, dawasété na 're dasisãmri waihu'u za'ra mono õ di. Wa hã bété. 'Re ihâimana u'âsi mono nhimiroti 'rata wasu'uzéb zarina si, wa tô ĩsiwaihu'u, ĩwasété na hã.

^9-10 Duréihã 'Re ihâimana u'âsi mono nhimiroti 'rata na rowasu'u hã te waihu'u õ nherẽ, wa tô aré ĩsi'ãma rosa'rata na te 're upa. Ĩwasété na 're ĩsi'madâ'â mono ãna, wa tô 're ĩhâimana. Tane nherẽ, isimiroti 'rata na rob'ui'éré wasu'u hã te oto waihu'u wamhã, ãne na te oto ĩsi'ãma 're rosa'rata mono õ di. 'Re ihâimana u'âsi mono ma, ĩwasété na aré 're ĩhâimana mono zém na hã wa tô ĩsi'ãma waihu'u. Ĩdâ'â u'âsi, wa tô aré 're ĩhâimana, ĩpẽ'ẽ 're. 'Re ihâimana u'âsi mono hã ma tô tinhimiroti 'rata na rob'ui'éré hã wama sõmri za'ra, wa te wasina tãma 're i'uwaimrami za'ra mono zéb zarina, rowẽ uptabi na ãma 're wanomro wẽ mono da. Tane nherẽ, te ĩsina tãma uwaimrami õ di, wa hã. Tahawa, wa tô aré ĩdâ'â u'âsi 're ĩhâimana u'âsi, 'Re ihâimana u'âsi mono nhiti.

¹¹ 'Re ihâimana u'âsi mono nhimiroti 'rata si te 're i'madâ'â pese mono na, ĩwasédé hã te te oto ĩ'ãma 're 'madâ'â tõ mono da, te te sima ĩ'ãma roti da newa, wa tô aré ĩnhimiza'rese ãna 're ĩhâimana. Taha zarina, wa tô aré ĩpẽ'ẽ 're, ĩdâ'â u'âsi 're ĩhâimana, 'Re ihâimana u'âsi mono nhiti hã.

¹² Ta hã, isimiroti 'rata na Mozési te te irob'ui'éré hã wẽ uptabi di. Isarina si te wama 're hâimana za'ra, iwẽ uptabi si.

¹³ E tawamhã, 'Re ihâimana u'âsi mono nhimiroti 'rata na rob'ui'éré hã wẽ uptabi nherẽ, e taha zarina, wa tô aré ĩpẽ'ẽ 're, ĩdâ'â u'âsi 're ĩhâimana. Mare di. Ĩwasété na 're ĩhâimana 'rata mono zéb zarina si, wa tô aré ĩdâ'â u'âsi 're ĩhâimana. Taha zarina, wa tô 're ĩhâimana wasété mono zém na ĩsina waihu'u. Uburé marĩ iwasédé hã da te 're i'manharĩ za'ra mono zé hã iwasété uptabi na wa tô duré waihu'u.

Paulu hã 'râwi tinhimirosa'rata wasété na isi'wapézé wasu'u

¹⁴ 'Re ihâimana u'âsi mono nhimiroti 'rata na Mozési te te ãma irob'ui'éré hã e ma hawimhã. Ipẽ'ẽzani hawip si. Tane nherẽ, ta hawimhã, wa hã 're ĩhâimana mono õ di. Wa hã a'uwẽ hâiba na 're ĩmorĩ wa, wa ĩhâimana nhib'uware na 're ĩhâimana, ĩsi'uihâ na ĩsina 're ĩnhiptete waihu'u mono õ na hã. 'Re ĩhâimana wasété mono zé ma si, wa tô ĩhâiba hã te 're sõmri u'âsi.

¹⁵ 'Re ĩsisa'rese mono õ di, marĩ te 're i'ab'manharĩ mono zém na hã. Uburé marĩ iwẽ si te 're ab'madâ'â mono da nherẽ, taha si te 're 'madâ'â mono õ di. Uburé marĩ hã te 're ab'manharĩ tõ mono da, te ĩsiwi 're awẽ'õ mono nherẽ, wa tô te 're ab'manharĩ tô, iwẽ upana.

¹⁶ Uburé marĩ hã te 're ab'manharĩ tõ mono da, te ĩsiwi 're awẽ'õ mono nherẽ, iwẽ upana te 're ab'manharĩ mono wamhã, wa ĩsina te 're waihu'u, 'Re ihâimana u'âsi mono nhimiroti 'rata na rob'ui'éré, iwẽ si 're ihâimana mono na hã, isarina si.

¹⁷ Uburé marĩ iwasédé hã te 're ab'manharĩ mono da, te ĩsima 're awẽ mono õ nherẽ, ĩwasédé hã ĩpẽ'ẽ 're, ĩma 're ihâimana mono zéb zarina, wa te te 're ab'manharĩ u'âsi tô, te ĩsiwi 're awẽ'õ waihu'u mono ãna.

¹⁸ Marĩ iwẽ hã ĩpẽ'ẽ 'remhã ĩma 're hâimana mono õ di. Ãne hã ĩma waihu'u pese di. Uburé marĩ iwẽ si te 're ab'manharĩ mono da, te ĩsima 're awẽ mono nherẽ, te ĩsina 're uwaimrami waihu'u mono õ di, ĩsi'uihâ na hã.

¹⁹ Uburé marĩ iwẽ si te 're ab'madâ'â mono da nherẽ, taha si te 're 'madâ'â mono õ di. Taha upana, wa iwasété si te 're ab'manharĩ, ãne hã te 're ab'manharĩ tõ mono da, te ĩsiwi 're awẽ'õ mono nherẽ.

²⁰ Uburé marĩ iwasédé hã te ĩsima 're awẽ'õ mono nherẽ, te 're ab'manharĩ mono wamhã, e ĩsi'uihâ na te ĩsima iwẽzéb zarina, wa te te 're ab'manharĩ. Mare di. Ĩwasédé hã ĩpẽ'ẽ 're, ĩma 're ihâimana u'âsi mono zéb zarina si, wa tô te 're ab'manharĩ tô.

²¹ Ãne hã wa tô uburé ĩsina waihu'u, 're ĩhâimana mono zém na hã. Marĩ iwẽ si te 're ab'manharĩ u'âsi mono da, te ĩsima 're wẽ mono nherẽ, wa i'upana marĩ iwasété zô si 're ĩsipizari, te ĩsiwi 're awẽ'õ waihu'u mono ãna.

²² Wa hã 'Re ihâimana u'âsi mono nhimiroti wẽ wasu'u na hã 'râwi wa tô te ĩsima 're wẽ u'âsi, ĩpẽ'ẽ 'remhã.

²³ Tane nherẽ, aimawi 're ĩhâimana mono zéb da hã, te ĩma 're hâimana u'âsi, ĩpẽ'ẽ 'remhã, ĩnhimirosa'rata wasédé hã. Ĩpẽ'ẽ 'remhã ĩnhimirosa'rata wasédé hã, ĩnhimirosa'rata wẽ me hã te 'râwi nherẽ, 're si'wapé u'âsi zahuré, ĩwasédé hã te 're i'manharĩ mono zéb da hã, duré te ĩsima 're iwẽ mono zéb zarina, iwẽ hã te 're i'manharĩ mono zéb da hã. Ni'wam norĩ hã danhimiwada'uri zarina si 're hâimana za'ra mono wamhã, marĩ hã te te sima 're iwẽ za'ra mono zéb zarina, te te 're 'manharĩ waihu'u za'ra mono õ di. Tane duré, wa hã marĩ iwẽ si te 're ab'manharĩ u'âsi mono da, te ĩsima 're wẽ mono nherẽ, marĩ iwasédé hã ĩpẽ'ẽ 'remhã ĩma 're ihâimana mono zarina, wa marĩ iwasédé hã te 're ab'manharĩ tô.

^24-25 Wa hã ĩwasété u'âsi 're ĩhâimana mono zém na, 'râwi 're ĩsipo're pu'u mono wa, wa 're ĩsiwẽ'õ u'âsi. 'Re ihâimana u'âsi mono nhimiroti zarina si 're ĩhâimana u'âsi mono da, te ĩsima 're rosa'rata wẽ u'âsi mono nherẽ aré, tane nherẽ, ĩpẽ'ẽ 're, ĩwasédé hã ĩma 're ihâimana u'âsi mono zéb zarina si, wa 're ĩhâimana u'âsi tô. E 'wa hã te za ãne wamhã, ĩnho'reptu, ĩpẽ'ẽ 're, ĩdâ'â u'âsi 're ĩhâimana mono zém hawimhã. 'Re ihâimana u'âsi mono si te za ĩnho'reptu, ĩdâ'â u'âsi 're ĩhâimana mono zém hawi, Wanhib'apito Zezu Cristuhu nhimipawaptobzéb zarina hã. Tahawa, wa oto taha ãma si 're ĩwata u'âsi.