Roma 5 - ꞌRe Ihâimana Uꞌâsi Mono Zadawa Wasuꞌu

Cristuhu zazei'wa, toi u'âsi 're inomro mono zé wasu'u

¹ Wanhib'apito Zezu Cristu hã ma tô te te sima 're wa'awẽ, wa te wasina 're i'umnhasi za'ra mono zéb zarina. Tahawa, 'Re ihâimana u'âsi mono hã ma tô te te sima wa'ãma 're aroti, wa te 're isazei pese za'ra mono na, wawasédé hã te te oto wa'ãma 're ab'madâ'â tõ mono da, taha zarina si te te duré 're wa'awẽsãmri mono da, wawasété na 're wanomro mono nherẽ, te te 're wa'ahâ za'ra mono tõ da. Tahawa, rowẽ u'âsi, wa oto ãma 're wanomro, 'Re ihâimana u'âsi mono ãma hã.

² Zezusi hã wa te wasina 're umnhasi za'ra mono wa, te 'Re ihâimana u'âsi mono hã iwẽ si te te wama 're ab'madâ'â. Taha na si, wa oto wa norĩ hã 're wahâimana za'ra. Niwapsi te za 'Re ihâimana u'âsi mono hã te te wama 're apisutu, iwaihu'u pese zarina ihâiba na rowa'a za'ẽtẽ na isiré 're wahâimana u'âsi za'ra mono da, rowẽ uptabi na. Tahawa, wato sina, wa sô 're wanhimipari za'ra, wa te 're sazei utõrĩ za'ra mono ãna.

³ Duré Cristuhu zazei'wa, 're wanomro mono 'ru te, da te wama 're rob'manharĩ za'ra mono wa, wa te 're robzépata za'ra mono ré, wa za watoi u'âsi 're wahâimana za'ra, wa te 're irobzépata za'ra mono zéb zarina, õhõ ãma si wanhiptete sina 're iwahâimana za'ra mono zéb da hã, wa te wasima ãma 're sa'ẽtẽ za'ra mono wa. Ãne hã wa te wasina 're waihu'u pese za'ra mono wa, wa za watoi u'âsi 're wahâimana za'ra.

⁴ Ropire nherẽ, danhimi'ẽ na 're idahâimana za'ra mono na, te 'Re ihâimana u'âsi mono te te sima da'ãma 're arowẽ. Duré te te sima da'ãma 're i'arowẽ mono zéb zarina, te za 'Re ihâimana u'âsi mono nhimiropisutuzéb zô dato sina 're danhimipari za'ra, da te 're sazei utõrĩ za'ra mono ãna.

⁵ Ãhã zô, taré sô 're wanhimipari baba za'ra mono õ di za. E marĩ wa. 'Re ihâimana u'âsi mono hã Tipẽ'ẽzani te te wama 're i'anhomri mono na, tinhimizawi pese zé hã te te wama 're awaihu'u mono wa. Tahawa, taré sô 're wanhimipari za'ra mono õ di za, marĩ iwẽ hã te te wama 're i'apisutu mono zéb zô hã.

⁶ Duréihã 're idahâimana za'ra mono na'rata zém hawimhã, marĩ da te 're i'manharĩ wẽ za'ra mono zém na hã 'Re ihâimana u'âsi mono te te da'ãma sima 're aroti mono õ di, taha zarina dawasédé hã te te oto da'ãma 're ab'madâ'â tõ mono da, duré dapo're'õ nherẽ, te te 're da'ahâ za'ra tõ mono da. Ta hawim haré, dahâimana wẽ zém na 'râwi 're dasi'madâ'â waihu'u za'ra mono õ di, dawasédé hã te te da'ãma 're i'ab'madâ'â mono õ zarina, te te 're ida'awẽsãmri mono zéb da hã, 'Re ihâimana u'âsi mono hã. Taha ré, ma tô Cristu hã dazada dârâ, uburé dawasété na 're idahâimana za'ra mono norĩ zada, 'Re ihâimana u'âsi mono, bâdâ te te ãma ipisutuzé hã iwa iwaptã'ãzém na.

⁷ Ni'wa hã uburé danhimiroti wẽ hã te te 're 'madâ'â pese mono nherẽ, taha upana ida'matâ'â da hã, mare di. Ni'wa hã da'ãma 're isiwamri mono, 're 'maihâimana mono wamhã, taha upana si ida'matâ'â da hã, ãté te za 're si'madâ'â za'ra.

⁸ Tanei õ di, 'Re ihâimana u'âsi mono nhimizawizé hã. Wa norĩ hã wawasété na 're wahâimana za'ra mono nherẽ, ma tô Cristu hã pisutu, wazada dâ'â da, wa'upana. Ãne hã ma tô 'Re ihâimana u'âsi mono hã te te wama 're awaihu'u, te te 're iwa'azawi pese mono zém na hã.

⁹ Zezusi wazada idâ'âzém na, ma tô 'Re ihâimana u'âsi mono hã te te 're wa'awẽsãmri, wawasédé hã te te oto wa'ãma 're i'ab'madâ'â mono õ zarina. Ãne wa, te za duré Zezusi hã tidâ'âzém na te te 're wa'anho'reptu, 'Re ihâimana u'âsi mono nhimihâzé wi, ro hã za isi'utõrĩzéb ãma hã.

¹⁰ 'Re ihâimana u'âsi mono nhitob'ru, wa aré 're wanomro. Tane nherẽ, ti'ra dâ'âzém na ma tô wa'ãma 're siwadi za'ra oto. Tawamhã isiwadi oto 're wahâimana za'ra mono wa, te za tô oto Zezusi hã te te 're wa'anho'reptu, dâ'â nherẽ, apâ hâiwa'utu wa, dâ'â ãna 're hâimana u'âsi mono wa za oto.

¹¹ Tane nherẽ, taha si õ di. 'Re ihâimana u'âsi mono ãma, wa duré watoi u'âsi 're wahâimana za'ra, Wanhib'apito Zezu Cristu dâ'âzém na, wa'ãma 're siwadi za'ra mono wa oto.

Adãhã wasu'u, Cristuhu wasu'u me

¹² Dawasédé ma tô tizébré na'rata, Adã iwasétézém hawi. Ta hawimhã ma tô duré dawasédé hã te te ropé, uburé dapoto mono bâ. Ta hawim haré, te aihĩni pese oto 're dadâ'â za'ra, dawasété na 're danomro mono wa.

^13-15 Dawasété ãna 're idahâimana za'ra mono zéb da, 'Re ihâimana u'âsi mono nhimiroti hã dama 're hâimana za'ra mono õ nherẽ, dawasédé hã te te da'ãma 're aza'ra mono õ di, 'Re ihâimana u'âsi mono hã. Tane nherẽ, duréihã Mozésihi ma, tinhimiroti hã te te waihu'u õ ré, duré te te rob'ui'éré õ ré, te dawasété na si 're dahâimana u'âsi za'ra. Isimiroti na rob'ui'éré hã dama 're hâimana za'ra mono õ nherẽ, dawasété na si 're dahâimana za'ra mono wa, ma tô Adãhã wasété na'rata hawim haré 're dadâ'â u'âsi za'ra, 'Re ihâimana u'âsi mono nhimiroti hã dapẽ'ẽ 're, dama 're hâimana za'ra mono nherẽ, da te dasina tãma ãma 're uwaimrami za'ra mono õ wa. Mozésihi ma, za oto 'Re ihâimana u'âsi mono, tinhimiroti te te iwaihu'uzéb u hã, dawasété na si 're danomro u'âsi mono wa, ma tô 're dadâ'â u'âsi za'ra. Adãhã wi, 'Re ihâimana u'âsi mono, rob'rã te te sawi nherẽ, te te sadawa 'madâ'â ãna, ma tô tiwasédé hã 'manha. Ãne hã Adãhã wasété ne, aiwa da te 're 'manharĩ za'ra mono õ nherẽ, ma tô aihĩni 're dadâ'â u'âsi za'ra, 'Re ihâimana u'âsi mono te te dama irotizé hã, sõ'awi dama 're hâimana za'ra mono õ nherẽ. Adã hã wasédé sãna'rata wamhã, ma tô ipire uptabi hã 'manha, tiwasédé hã. Taha uirĩ na si, ma tô Zezusi hã marĩ ipire uptabi hã 'manha duré iwẽ hã, ti'ai ãma 're morĩ ré. Tahawa, Zezusihi ne Adã hã, marĩ isine ipire hã te te 'manharĩ wa. Tane nherẽ, aiwab õ di, isimi'manharĩzé hã. 'Re ihâimana u'âsi mono hã iwẽ te te dama 're i'anhomri mono hã, Adãhã wasété nei õ di. Adã hã tiwasédé te te i'manharĩzém hawi, ma tô oto uburé 're dadâ'â u'âsi za'ra, tô sena. Tane nherẽ, 'Re ihâimana u'âsi mono iwẽ hã te te dama 're i'ab'manharĩ mono zé hã pire uptabi di, Adã hã tiwasédé te te i'manharĩzém nhipai u. Wẽ uptabi di. E marĩ tawamhã, 'Re ihâimana u'âsi mono, iwẽ hã te te dama 're i'ab'manharĩ mono zé hã. Zezusi hã sisawi ãna tihâiba na te te 're ida'azawi pese mono na, ma tô te te dama 're ab'manharĩ wẽ, tinhoprubzéb zarina.

¹⁶ Adã hã tiwasédé te te i'manharĩzém hawim haré, te dawasédé hã da te 're 'manharĩ u'âsi za'ra oto. Taha zarina, ma tô 'Re ihâimana u'âsi mono hã te te siwi 're da'awẽ'õ pese, dawasédé hã te te da'ãma 're i'awaihu'u mono zéb zarina. Tane nherẽ, ta hawim haré, dawasédé hã da te 're 'manharĩ u'âsi za'ra mono nherẽ, dama isõprubzém na te oto da'ahâ na te te 're da'awẽsãmri 'Re ihâimana u'âsi mono hã, i'ra dazada idâ'âzém na. Ãne wa, 'Re ihâimana u'âsi mono, dama 're isõpru mono zé hã, pire uptabi di, Adãhã nhimi'manharĩzé ma hã.

¹⁷ Tô sena aibâ hã misi, tiwasédé te te i'manharĩ na'rata hawi, ma tô oto 're dadâ'â u'âsi za'ra. Tane nherẽ, Zezu Cristu hã aibâ misi nherẽ, isimi'manharĩzé hã pire uptabi di, aibâ tiwasédé te te i'manharĩ na'rata zém nhipai u. Wẽ uptabi di. 'Re ihâimana u'âsi mono hã iwẽ uptabi hã te te tãma 're i'apisutu mono norĩ si, te za hâimana pire na isiré 're hâimana u'âsi za'ra, tinhoprubzé hã te te tãma 're i'anhomri mono norĩ si. Isõprubzé hã te te 're ida'awẽsãmri mono zé, te wasu'u. Cristu idâ'âzém na te za dahâimana pire na isiré 're dahâimana u'âsi za'ra.

¹⁸ Aibâ hã misi tiwasédé hã te te i'manharĩzém hawi, ma tô 'Re ihâimana u'âsi mono hã uburé te te 're da'awẽ'õ pese, dawasédé hã te te da'ãma 're i'awaihu'u mono zéb zarina. Tane, misi Zezusihi nhimi'manharĩ wẽ zém na, te za oto 'Re ihâimana u'âsi mono hã te te 're da'anho'reptu, dapẽ'ẽ 're, dadâ'â u'âsi ne 're idanomro mono zém hawi, i'rata 're dahâimana u'âsi za'ra mono da oto.

¹⁹ Aibâ hã misi nherẽ, 'Re ihâimana u'âsi mono te te iwapari õ hawimhã, ma tô oto uburé dawasété na si 're dahâimana za'ra. Tane duré, aibâ hã misi nherẽ, 'Re ihâimana u'âsi mono te te iwapari pese zém hawi te za oto 'Re ihâimana u'âsi mono hã te te 're da'awẽsãmri, Zezu Cristu te te iwapari pese zém hawimhã.

²⁰ Duréihã 'Re ihâimana u'âsi mono ma tô Mozésihi ma tinhimiroti hã waihu'u, te te ãma rob'ui'éré da, ãma 're dasipo're pu'u za'ra mono wa, dawasédé hã da te oto dasina 're waihu'u za'ra mono da. Tane nherẽ, ma tô dawasédé hã da te dasima 're sa'ẽtẽ u'âsi za'ra. Tane nherẽ, dawasédé da te dasima 're isa'ẽtẽ za'ra mono zém nhipai u, ma tô 'Re ihâimana u'âsi mono hã te te dama 're arob'manharĩ wẽ, da'ãma 're isiwamri u'âsi mono zéb zarina.

²¹ Ãne na rowasu'u na, wa za oto aima 'rãsutu za'ra wa'wa. Dawasété na si 're danomro u'âsi mono wa, ma tô aré dapẽ'ẽ 'remhã, dadâ'â ne 're dahâimana u'âsi za'ra, 'Re ihâimana u'âsi mono nhiti. Tane nherẽ, tinhimizawi pese zéb zarina, ma tô 'Re ihâimana u'âsi mono hã Wanhib'apito Zezu Cristu dâ'âzéb zarina te te sima 're wa'awẽ, taha zarina si rowẽ uptabi na 're wanomro u'âsi mono da oto.