Roma 15 - ꞌRe Ihâimana Uꞌâsi Mono Zadawa Wasuꞌu

Isazei'wa norĩ, prédup sina 're isipawaptob za'ra mono zé wasu'u

¹ Wa norĩ hã wanhiptete sina, Wanhib'apito ãma, wa te 're isasõmri u'âsi za'ra mono norĩ hã, marĩ, wa te wasima 're iwẽ za'ra mono zéb zarina si, wa te 're 'manharĩ za'ra mono õ di za. Wasiré isazei'wa nherẽ, hâimana nhib'uware na 're ihâimana za'ra mono norĩ hã, wa za wa te 're pawaptob za'ra, hâimana nhiptete na wasiré ãma 're hâimana u'âsi za'ra mono da.

² Wasiré isazei'wa norĩ hã marĩ te te sima 're iwẽ za'ra mono zéb zarina, wa za wa te ãma 're sazei pese za'ra, marĩ iwẽ na si, wa te ãma 're pawaptob u'âsi za'ra mono da, hâimana prédub sina oto ãma 're hâimana u'âsi za'ra mono da.

³ Cristu hã bété, ti'ai ãma 're morĩ ré hã, e sima si ma tô tihâimanazéb da hã 're si'madâ'â. Mare di. 'Râwi tihâimanazém na si, 're si'madâ'â mono õ di. Ãne na duréihã ma tô ni'wa hã iwasu'u na ãma rob'ui'éré siro: “Ĩmama, ni'wam norĩ hã te te ai'ãma 're iwasété za'ra mono norĩ hã ma tô ai'u'âbâ ĩ'ãma zama te te 're wasété za'ra. Tane nherẽ, aimawi 're ĩhâimana mono zéb da hã, te ĩsima pisutu õ di, ĩsi'uihâ na hã.”

⁴ Uburé 'Re ihâimana u'âsi mono nhimiroti 'rata na rob'ui'éré hã, e taré ma tô tinhimiroti hã te te dama 're apisutu, da te ãma 're irob'ui'éré za'ra mono zéb da hã. Mare di. Taré te te dama 're apisutu mono õ di. Isimiroti hã wa te 're waihu'u pese za'ra mono da, ma tô ãne hã te te dama 're apisutu. 'Re ihâimana u'âsi mono nhimiroti 'rata na rob'ui'éré hã wa te 're sõré u'âsi za'ra mono wamhã, wanhiptete sina wa za ãma 're wahâimana u'âsi za'ra, marĩ na uburé wa te 're robzépata za'ra mono nherẽ. Wa te 're sõré u'âsi za'ra mono wamhã, te za wama 're rowẽ za'ra, wawi 're robzei'õ za'ra mono ãna, 're iwahâimana za'ra mono zéb da hã. Õhõ umnhasi sina, wa za tô ãhã zarina si 're wahâimana za'ra, 'Re ihâimana u'âsi mono 'rata 're iwahâimana u'âsi za'ra mono zéb zô, wasina 're wanhimipari za'ra mono sina.

⁵ 'Re ihâimana u'âsi mono si dapisutu'wa hã, uburé marĩ na da te 're robzépata za'ra mono nherẽ, danhiptete sina ãma 're idahâimana u'âsi za'ra mono da hã. Taha si te te sina dama 're i'arowẽ zani mono hã, dawi 're robzei'õ za'ra mono ãna, ãma 're idahâimana za'ra mono zéb da hã. Tahawa, wa tô ĩsima te 're aiwẽ za'ra wa'wa, ta hã aihĩni te te 're aipawaptob za'ra wa'aba mono da, asiré isazei'wa norĩ hã simisutu asimirosa'rata na 're asisazei pese za'ra wa'aba mono da oto, Cristu Zezusi 're imorĩ wẽ zéb zarina.

⁶ Asimirosa'rata na 're asisazei u'âsi za'ra wa'aba mono wapsi, te za 'Re ihâimana u'âsi mono ãma Wanhib'apito Zezu Cristuhu mama ãma simisutu u'âsi, ãma 're aiwata za'ra wa'aba mo.

Zudeu'õ norĩ hã, Cristuhu wasu'uwẽ te te oto iwaihu'u za'ra zé wasu'u

⁷ Cristu hã sitẽme te te 're i'aiwaibui wa'aba mono ne, te za asisô 're atob'uzu za'ra wa'aba mo, 're asisawi pese za'ra wa'aba mono sina. Taha zarina, 'Re ihâimana u'âsi mono ãma 're dawata u'âsi za'ra mono da, te za ãne asima 're i'manharĩ wẽ u'âsi za'ra wa'aba mo.

⁸ Cristu hã ma tô we ti'ai u datẽme mo, zudeu norĩ hã te te 're apawapto mono da, duréihã zudeu norĩ hi'rata ma, dama ipire za'ra norĩ ma, 'Re ihâimana u'âsi mono te te tãma 're iropisutu za'ra mono zéb zarina, te te dama ãma 're a'uwaimrami mono da, duré uburé 'Re ihâimana u'âsi mono te te dama ãma 're i'a'uwaimrami mono zém na, tô sena na da te ãma 're waihu'u pese za'ra mono da.

⁹ Duré zudeu'õ norĩ hã 'Re ihâimana u'âsi mono, da'ãma 're ipẽ'ẽzé mono zé hã te te oto sina 're waihu'u za'ra mono wa, ãma 're wata za'ra mono da, ma tô we Cristu hã zudeu norĩ u satõ, 'Re ihâimana u'âsi mono hã. Duréihã ãne rob'ui'éré na iwasu'u hã: “Wa hã zudeu'õ norĩ siré 're ĩhâimana mono ré, wa za isiré za'ra, ai'ãma 're ĩwata u'âsi. Ĩnho're na zama, wa za duré ai'ãma 're ĩwata u'âsi.”

¹⁰ Duré rob'ui'éré amo na iwasu'u hã, ãne: “A norĩ wa'wa hã zudeu'õ na 're aihâimana za'ra wa'aba mono norĩ, ma'ãpé simisutu asiré atoi uptabi na, ãma 're aihâimana za'ra wa'aba mono, 'Re ihâimana u'âsi mono nhib'a'uwẽ norĩ siré.”

¹¹ Duré rob'ui'éré amo na iwasu'u hã, ãne: “Zudeu'õ na 're aihâimana za'ra wa'aba mono norĩ, ma'ãpé Wanhib'apito ãma si 're aiwata u'âsi za'ra wa'aba mono, uburé aipoto mono bâ 're aihâimana za'ra wa'aba mono norĩ hã.”

¹² Izaia hã ma tô duré ãne na ãma rob'ui'éré siro: “Niwapsi te za Zéséhé nhihudu hã we datẽme wi, apito Dawihi mama nhihudu hã. Wei wisi wapsi, te za 'Re ihâimana u'âsi mono hã tãma pisutu, zudeu'õ norĩ nhib'apito, 're hâimana mono da oto, daro mono bâ. Tawamhã ta norĩ hã te za te te siwi 're umnhasi, marĩ iwẽ hã te te tãma 're ipisutu za'ra mono zéb zarina, za te te tãma ãma 're i'uwaimrami za'ra mono zém na hã.”

¹³ 'Re ihâimana u'âsi mono hã waihu'u pese wa, te za te te 're wa'apawaptob u'âsi, marĩ iwẽ hã te te wama 're ipisutu za'ra mono zéb zarina, za te te wama ãma 're i'a'uwaimrami mono zéb zô, wa te wasiwi 're umnhasi za'ra mono sina, sô 're wanhimipari u'âsi za'ra mono da. Tahawa, wa ai'ãma tãma 're ĩmreme u'âsi za'ra wa'wa, atoi uptabi na 're aihâimana u'âsi za'ra wa'aba mono da, duré rowẽ si te te aima 're pisutu za'ra wa'aba mono da, asina 're i'umnhasi za'ra wa'aba mono paramhã. Ipẽ'ẽzani nhimipawaptobzéb zarina, marĩ iwẽ uptabi hã 'Re ihâimana u'âsi mono, za te te aima 're isõmri za'ra wa'aba mono zéb zô, asiwi 're umnhasi za'ra wa'aba mono sina, sô 're asimipari za'ra wa'aba mono zém na, 'râwi asima ãma 're sa'ẽtẽ za'ra wa'aba mono da, wa tô te ĩsima 're aiwẽ za'ra wa'wa.

Paulu hã, 'Re ihâimana u'âsi mono nhimipawaptobzém na te te 're ida'apawapto mono zé wasu'u

¹⁴ Ĩsisãnawã norĩ, wa hã wa tô ai'ãma waihu'u pese za'ra wa'wa, asimizawi pese sina oto 're i'anomro wẽ wa'aba mono zém na hã. Duré aima waihu'u pese za'ra wa'aba di oto, 're aihâimana wẽ za'ra wa'aba mono zéb da hã. Ãne hã wa tô duré ai'ãma waihu'u pese za'ra wa'wa, Wanhib'apito nhimiroti na oto asima 're iroti waihu'u pese za'ra wa'aba mono zém na zama.

^15-16 Tane nherẽ, ãhã na ĩnhimi'ui'éré na, wa tô sõ'awi aima rowasu'u za'ra wa'wa, ĩsina ĩpahi ãna, rowasu'u ahâ na te ãma aipo're pu'u za'ra wa'aba da. Te aiwi udâ waihu'u za'ra wa'aba ãna, wa tô ĩnhimi'ui'éré na hã aima rowasu'u pese za'ra wa'wa, 'Re ihâimana u'âsi mono hã sõprum na te te ĩpisutu wa, Cristu Zezusihi ma si te oto 're romhuri mono da, zudeu'õ norĩ hã te tãma 're apawapto mono da. Sasedoti norĩ hã 'Re ihâimana u'âsi mono ma, te te da'ãma 're iromhuri za'ra mono ne, wa duré wa hã zudeu'õ norĩ ãma te 're romhuri u'âsi, 'Re ihâimana u'âsi mono ma, Zezusihi wasu'uwẽ na te 're pawaptob za'ra mono wa, te te 're isaze za'ra mono zéb zarina, 'Re ihâimana u'âsi mono te te 're wẽsãmri za'ra mono da. 'Re ihâimana u'âsi mono pẽ'ẽzani nhimipisutuzéb zarina, ta norĩ hã isib'a'uwẽ oto 're nomro mono wa, 'Re ihâimana u'âsi mono te te 're iwẽsãmri za'ra mono zéb da hã, wa ãne na hã te tãma 're romhuri u'âsi.

¹⁷ Cristu Zezusihi ãma si oto 're ĩhâimana mono wa, wa 're ĩsi'uze, 'Re ihâimana u'âsi mono ma si, te 're iromhuri mono zém na hã oto.

¹⁸ Te 're irowasu'u wẽ mono zéb zarina, duré te 're iromhuri wẽ mono zéb zarina ma tô zudeu'õ norĩ hã te te 're wapari pese za'ra, 'Re ihâimana u'âsi mono hã. E tawamhã ĩsi'uihâ na ĩwaihu'u pese na te 're i'ab'manharĩ wẽ mono na, wa za dama ĩsina 're ĩwata. Mare di. Ãne hã i'uwaibaba õ di. Cristuhu nhimipawaptobzéb zarina si, wa tô te tãma 're romhuri u'âsi za'ra, iwasu'uwẽ na hã.

¹⁹ 'Re ihâimana u'âsi mono pẽ'ẽzani hã tiwaihu'u pese na te te 're ĩpawapto mono zém na si, wa tô marĩ dama i'manharĩ waihu'u'õ hã te dama 're ab'manharĩ, zudeu'õ norĩ hã tô sena te te 're saze za'ra mono da, ta norĩ hã. Zeruzalẽ hawi, Iliriza u 're ĩmorĩ ré, wa tô daza'rui mono bâ te dama 're rowasu'u, Cristuhu wasu'uwẽ na hã.

²⁰ Wa hã wa tô ãne hã te ĩsima 're rosa'rata u'âsi, Cristuhu wasu'uwẽ hã zahadu dapo're na da te 're iwapari za'ra mono õ norĩ u si, 're ĩmorĩ da, daza'rui mono bâ iwasu'uwẽ na te ãma 're da'apo're pu'u mono da. Wanhib'apito wasu'uwẽ na danhimi'u'ẽi 'rata u 're ĩzasi tõ mono da, wa tô ãne na te ĩsima 're rosa'rata u'âsi.

²¹ Duréihã Izaia hã ma tô ãne na Cristuhu ãma rob'ui'éré: “Niwam norĩ ma, niwa iwasu'uwẽ hã da te tãma 're iwaihu'u za'ra mono õ norĩ hã te za oto 'râwi 'madâ'â za'ra, iwasu'uwẽ hã da te oto tãma 're wasu'u za'ra mono wa. Te te 're wapari za'ra mono ãna, aré 're ihâimana za'ra mono norĩ hã te za oto 'râwi si'ãma te te 're waihu'u pese za'ra, 're ihâimana wẽ za'ra mono zém na hã.”

Paulu hã, timreme te te sisõwa isõmrizé wasu'u, Roma u morĩ da

^22-24 Wa hã wahub ahâ na, wa tô te ĩsima 're rosa'rata u'âsi, te ĩsima 're irowẽ mono zéb uwaibaba, atẽme ĩmorĩ za'ra wa'aba da, te asabu za'ra wa'aba da. Tane nherẽ, zahadu ãmemhã ĩma romhuri ahâ di. Tahawa, nimahã na hã ãma atẽme ĩwatobro waihu'u za'ra wa'aba õ di. Tane nherẽ, ãhã na hã ĩnhimiromhuri hã ãmemhã te oto 'rãsutu wamhã, atẽme ãma ĩmorĩ aba da si, wa tô ĩsima waihu'u. Tahawa, wa tô ĩsima pisutu pese, Espãnha na romnhisi u ĩmorĩ ré, te asabu za'ra wa'aba da. Ãne wa tô duré ĩsima rosa'rata, atẽme ãma ĩwisi za'ra wa'aba wamhã, niha bâtâ na a'â ai'rata ĩnhamra za'ra wa'aba da, ĩma irowẽ zarina, duré marĩ na asiwi ĩpawaptob za'ra wa'aba da, Espãnha u ĩmorĩzéb da hã. Taha parip si, wa za oto aihawi ĩmorĩ 'wa.

²⁵ Tane nherẽ, wa za a'â Zeruzalẽ u si mo, ã awa'awi hã, tame 'Re ihâimana u'âsi mono nhib'a'uwẽ 're isi'ubumroi mono norĩ hã te duré pawaptob za'ra da a'â.

²⁶ Masédonia na danhipti'a nho'õmo nhisi ãma, duré Ataza na danhipti'a nho'õmo nhisi ãma, zudeu'õ isazei'wa na oto 're ihâimana za'ra mono norĩ hã ma tô sima wẽ za'ra, rob'uiprazé hã te te siwi ubumro da, Zeruzalẽ ãma isazei'wa norĩ te te siwi ãma pawaptob za'ra da, simarĩ ãna 're ihâimana za'ra mono norĩ hã, zudeu norĩ hã. Ta norĩ nhoprub za'ra zé hã, ĩsi'uihâ na te tãma âri za'ra da Zeruzalẽ u, taha da, wa za a'â tamomop si hã mo.

²⁷ Ta norĩ hã zudeu'õ isazei'wa norĩ hã si'uihâ na ma tô sima pisutu za'ra, te te siwi ãma ipawaptob za'ra zéb da hã, zudeu norĩ hã. Ãne hã tô i'uwaibaba ma tô siwi ãma pawaptob za'ra. E marĩ wa. Duréihã zudeu norĩ ma, ma tô 'Re ihâimana u'âsi mono hã tiwasu'uwẽ na tãma siwaihu'u na'rata za'ra, tipẽ'ẽ na robzei u'âsi ãma 're nomro mono da. Taha na ma tô zudeu'õ norĩ hã te te siwi ãma 're pawaptob za'ra iwasu'uwẽ na, aiwapsi oto õhõ ãma si 're hâimana za'ra mono da. Ãne wa'rãmi, te za tô zudeu'õ norĩ hã tinhimarĩ na te te siwi 're pawaptob za'ra, zudeu norĩ hã, tô isarina si.

²⁸ Tawamhã ãme ĩnhimiromhuri te 'rãsutu parimhã, rob'uiprazé, da te dasiwi i'ubumro hã ubuni na isazei'wa norĩ ma, te ãwisi wẽ parip si, wa za oto mo, Espãnha u ĩmorĩ da hã. Tawapsi, wa za aiwa'wai baba za'ra wa'aba ĩmorĩ pese ré, asabu za'ra wa'wa oto.

²⁹ Tawamhã atẽme ĩwisi za'ra wa'aba wamhã, Cristuhu nhoprubzém na, sa'ẽtẽ uptabi na te za aihĩni wama ãma tirowẽ pese za'ra.

³⁰ Ĩsisãnawã norĩ, wa za oto aiwi rowaptẽrẽ za'ra wa'wa ĩsi'ãma, 'Re ihâimana u'âsi mono ma, asiptete sina ĩ'ãma 're aimreme zusi aba mono zéb da na hã. Wanhib'apito Zezu Cristuhu zazei'wa, wasiré oto 're wahâimana za'ra mono wa, duré 'Re ihâimana u'âsi mono pẽ'ẽzani nhimipawaptobzéb zarina, oto 're wasisawi pese uptabi za'ra mono wa, wa ãne na aiwi rowaptẽrẽ za'ra wa'wa.

³¹ E marĩ da. Zudéa ãma isazei'õ'wa norĩ 're ihâimana za'ra mono norĩ hã, niha te te ĩma rob'manharĩ za'ra tõ da, te za ĩ'ãma tiwi 're irowaptẽrẽ u'âsi za'ra wa'aba mo. Duré Zeruzalẽ ãma 'Re ihâimana u'âsi mono nhib'a'uwẽ 're ihâimana za'ra mono norĩ hã, ta norĩ hã zudeu na iwamri za'ra wẽ te, zudeu'õ norĩ nhoprubzé hã za te ãma i'âri hã te te siwi wẽ'õ za'ra tõ da, te za duré ta norĩ ãma zama ãma aimreme zusi u'âsi 'wa.

³² Ĩtoi uptabi na ãma atẽme ĩwisi za'ra wa'aba da, te za duré ĩ'ãma aimreme zusi u'âsi 'wa. 'Re ihâimana u'âsi mono, ĩmorĩzé hã te te ĩma pisutu wapsi, wa za tô ãma atẽme ĩwisi za'ra wa'wa. Tawapsi ĩma rowẽ uptabi di za, wasiré isazei'wa norĩ hã 'râwi wasisabu za'ra wẽ te. Duré te ãma wazere wapsi hã, wa za a'â ai'rata ĩwa'utu za'ra wa'wa za.

³³ 'Re ihâimana u'âsi mono hã wama rowẽ nhomri'wa hã 'râwi asiré 're hâimana u'âsi za'ra wa'aba mono da, wa tô te ĩsima 're aiwẽ u'âsi za'ra wa'wa. Tane tô.