Roma 14 - ꞌRe Ihâimana Uꞌâsi Mono Zadawa Wasuꞌu

Isazei'wa nherẽ, sib'uware na 're inomro mono norĩ wasu'u

¹ Isazei'wa nherẽ, sib'uware na 're inomro mono norĩ zô, te za asitẽme sô 're aihãsi aba mo. Isimirosa'rata za'ra hã aimawi nherẽ, aiwab õ nherẽ, tãma 're nharĩ wasété za'ra wa'aba mono õ di za. Tane nherẽ, te za tô sô 're atob'uzu za'ra wa'aba mo.

² Ni'wam norĩ hã isazei'wa norĩ uburé te tisazéb zô si hã sima sô 're sõpré, te te sô 're huri za'ra mono da, romnhi zô zama, 'Re ihâimana u'âsi mono te te tiwi 're isawi za'ra mono õ na, 'râwi 're isisaze za'ra mono zéb zarina. Tane nherẽ, ni'wam norĩ hã isazei'wa nherẽ, te za romnhi hã te te siwi 're wẽ'õ za'ra, te te 're huri mono tõ da, 'Re ihâimana u'âsi mono te te tiwi 're sawi za'ra mono newa.

³ Tahawa, ni'wam norĩ hã uburé romnhi te te 're ihuri mono norĩ hã te te siwi 're wẽ'õ za'ra mono õ di za, romnhi na dame 're isaihuri mono õ norĩ hã. Duré ni'wam norĩ, romnhi na dame 're isaihuri mono õ norĩ zama, te te siwi 're wẽ'õ za'ra mono õ di za, uburé siwa'ru romnhi te te 're ihuri mono norĩ hã. E marĩ wa. 'Re ihâimana u'âsi mono hã ma tô te te 're awẽsãmri õ norĩ hã, romnhi na dame 're isaihuri mono õ norĩ me.

⁴ E a norĩ wa'wa hã isib'apito za'ra wa'aba bâ, te za marĩ tiwi 're iwẽ'õ za'ra wa'aba mo, isib'apito upana. Taha si te za te te 're waihu'u za'ra, ihâimana wasété na, duré ihâimana wẽ na zama. Tawamhã isazei'wa norĩ hã te za siptete u'âsi 're hâimana za'ra. E marĩ wa. Wanhib'apito 'Re ihâimana u'âsi mono hã tiwaihu'u pese na te te 're siptete u'âsi za'ra mono wa.

⁵ Ni'wam norĩ hã isazei'wa norĩ te 'râwi te te si'ãma 're rosa'rata za'ra, nima hã bâdâ hã romhuri'õzé hã iwa 're irere'e mono sidâpâsi, bâdâ dama 're ipire za'ra mono zém na hã. Duré ni'wam norĩ, isazei'wa norĩ hã te te da'ãma 're rosa'rata za'ra asa, aiwapsi bâdâ hã uburé dama 're hâimana za'ra mono nherẽ, ãma 're idahâimana za'ra mono zéb da hã. Tahawa, ate wa'aba mono bâ romhuri'õzé bâtâ mono na asimirosa'rata mono bâ te za asiptete sina ãma 're aihâimana za'ra wa'aba mo, tô õhõ na si.

⁶ Ta norĩ hã nimahã bâdâ hã romhuri'õzé hã dama 're ipire za'ra mono zém na te te si'ãma 're irosa'rata za'ra mono norĩ hã, Wanhib'apito ãma 're wata za'ra mono da, te ãne te te 're 'manharĩ za'ra. Duré ni'wam norĩ hã uburé siwa'ru romnhi te te 're ihuri mono norĩ hã te ãne te te 're 'manharĩ za'ra, Wanhib'apito 'Re ihâimana u'âsi mono ãma 're wata za'ra mono da, dasa na dama 're sõpru mono wa. Duré ni'wam norĩ hã romnhi na dame 're isaihuri mono õ norĩ hã, te ãne duré te te 're 'manharĩ za'ra aiwa, 'Re ihâimana u'âsi mono ãma 're wata za'ra mono da, waihu'u pese wa, duré sõprub uptabi wa.

^7-8 Wasi'uihâ na misi wahâiba na hã 'râwimhã ãma 're wahâimana waihu'u za'ra mono õ di za. Wanhib'apito te te wama 're i'apisutu mono zéb zarina si, wa tãma 're wahâimana za'ra. Duré wasi'uihâ na bâdâ 're iwadâ'â za'ra mono zéb da hã wa te wasima 're pisutu waihu'u za'ra mono õ di za. Wanhib'apito te te wa'ãma 're i'apisutu mono zéb zarina si, wa za 're wadâ'â za'ra, õhõ ma. Tahawa, wahâiba ré 're wahâimana za'ra mono ré, duré oto 're wadâ'â za'ra mono wamhã, isib'a'uwẽ na, wa za tãma 're wahâimana u'âsi za'ra, simisutu.

⁹ Cristu hã dâ'â nherẽ, ma tô apâ hâiwa'udu, hâiba ré 're ihâimana za'ra mono norĩ nhib'apito da hã, duré 're idâ'â za'ra mono norĩ nhib'apito da zama. Uburé isazei'wa norĩ nhib'apito da, ma tô hâiwa'udu apâ. Tahawa, wa isib'a'uwẽ 're wahâimana u'âsi za'ra oto, simisutu.

¹⁰ Tane nherẽ, e marĩ wa, te bété asisãnawã norĩ hã 're iwẽ'õ za'ra wa'aba mo, asiré isazei'wa 're anomro aba mono nherẽ. E marĩ wa, te 're i'ruiwapari u'âsi za'ra wa'aba mo, asisãnawã nherẽ. Niwapsi wa za uburé 'Re ihâimana u'âsi mono nho're aimasam ni, te te wa'awaihu'u da, wahâimana wẽ na, duré wahâimana wasété na zama. Tamep si za te te da'awẽ'õ na dâ'âsina, asi'uihâ na 're asiwẽ'õ pese za'ra wa'aba mono õ di za, ti'ab ré.

¹¹ Duréihã 'Re ihâimana u'âsi mono zadawa 'mahârâ'wa, ma tô ãne na ãma rob'ui'éré, imreme na: “Wa hã uburé Danhib'apito, tô sena 're ĩhâimana mono zé hã aima waihu'u pese za'ra wa'aba di. Duré tô sena aima ĩsiwasu'u za'ra wa'aba zéb zarina, wa duré tô sena aima ropisutu za'ra wa'wa. Ãne, wa aima ropisutu za'ra wa'wa. Niwapsi te za a'uwẽ mono bâ dahi'rãtitõ ĩnho're ĩma asimro ni, dama ĩpire uptabi wa. Tawamhã tame dapoto mono bâ te za ĩnhisi za'ra ni, ĩnhisi na 'Re ĩhâimana u'âsi mono na.”

¹² Tamep si, wa za oto wasi'uihâ na tãma wasiwasu'u za'ra ni wahâiba mono bâ, ti'ab ré wahâimanazém na, uburé marĩ hã wa te 're i'manharĩ za'ra mono zém na hã.

¹³ Tahawa, wasiré isazei'wa nherẽ, 're iwasiwẽ'õ za'ra mono zé hã wa za oto rẽme pese za'ra ni. Ãne zô si, te za asina 're asõpré wa'aba mo, marĩ iwẽ hã 're i'manharĩ za'ra wa'aba mono zéb zô. Marĩ hã 're 'manharĩ za'ra wa'aba mono ré, asiré isazei'wa norĩ hã te te 're ai'madâ'â za'ra wa'aba mono wa, asarina wa'aba tiwasété na 're si'marõpãrĩ tõ za'ra mono da, te za marĩ iwẽ si 're i'manharĩ u'âsi za'ra wa'aba mo.

¹⁴ Wa hã Wanhib'apito Zezusihi ãma 're ĩhâimana mono wa, wa tô ĩsina waihu'u sena na, uburé dasa iwẽ na hã, duré iwasété õ na. Tane nherẽ, ni'wam norĩ hã te za ãne hã te te ãma 're rosa'rata upa za'ra: “Ã hã romnhi hã, wasétére di. 'Re ihâimana u'âsi mono ma hã wẽ õ di, wa te 're ihuri mono da hã.” Ãne hã ni'wam norĩ hã te te ãma 're rosa'rata za'ra mono wamhã, õ norĩ ma si, romnhi hã wasété di tô. Tane nherẽ, te te siwi 're wẽ'õ za'ra mono nherẽ, te te 're huri mono wamhã, dawasédé te wasu'u.

¹⁵ Ãté marĩ dasa hã te za 're ihuri aba mo, asiré isazei'wa norĩ te te siwi 're iwẽ'õ za'ra mono hã. Tawamhã 're huri aba mono wamhã, 'Re ihâimana u'âsi mono te te dawi 're awẽ'õ mono newa, ãté te za ãne na tiwi 're irobzei'õ za'ra wa'aba mo, tô õ norĩ wi hã. Ãne wamhã, asimizawi pese zé hã tãma ãma 're uwaimrami za'ra wa'aba mono õ di za. Tãma sawi uptabi za'ra wa, ma tô Cristu hã sada tidâ'â za'ra. Tahawa, romnhi hã asiré isazei'wa norĩ te te 're iwẽ'õ za'ra mono hã, 're huri aba mono õ di za, 're huri aba mono wa, ta norĩ hã asa na tiwi 're irobzei'õ za'ra mono zéb zarina, tiwasété na 're isi'marõpãrĩ za'ra mono na 're si'utõrĩ tõ mono da.

¹⁶ Ãne hã marĩ hã aima wasété aba õ nherẽ, 're 'manharĩ za'ra wa'aba mono õ di za, da te 're aiwasu'u wasété za'ra wa'aba mono tõ da.

¹⁷ E marĩ wa. 'Re ihâimana u'âsi mono hã isazei'wa norĩ ãma 're isib'a'uwẽ mono zé hã, dasa hã da te 're iwẽ'õ za'ra mono zé, te te wasu'u õ di. Uburé marĩ hã da te 're i'âhuri mono zéb zama te te wasu'u õ di duré. E marĩ te wasu'u tawamhã, 'Re ihâimana u'âsi mono, da'ãma 're isib'a'uwẽ mono zé hã. Ta hã 'Re ihâimana u'âsi mono nhimiroti zarina 're idanomro wẽ mono zé, te wasu'u. Duré 'Re ihâimana u'âsi mono, Tipẽ'ẽzani na te te 're ida'apawapto mono zéb zarina, rowẽ uptabi na 're idanomro mono zé, te wasu'u, dato sina.

¹⁸ Ãne na ni'wam norĩ hã Cristuhu ma, te te 're romhuri wẽ za'ra mono wamhã, 'Re ihâimana u'âsi mono ma, te za te te sina 're rowẽ zani za'ra, uburé 're ihâimana wẽ za'ra mono zém na. Tawamhã te za duré da te 're wẽsãmri za'ra, ti'ai ãma ré.

¹⁹ Tahawa, rowẽ na wasiré 're iwahâimana za'ra mono zéb zô si, wa za wasima 're wanhopré. Wanhib'apito ãma wahâimana nhiptete u'âsi 're wanomro mono da, 're iwasipawaptob za'ra mono zém na, wa za duré 're wanomro u'âsi.

²⁰ Tawamhã dasa siwa'ru 're huri aba mono wa, 'Re ihâimana u'âsi mono, danhiptete sina ãma 're idanomro mono zéb da, te te da'ãma 're iromhuri wẽ mono zé hã tiwi 're uprosi za'ra wa'aba mono tõ da, ãté 're huri aba mono õ di za, siwa'ru dasa na, romnhi hã. Tô sena uburé dasa hã iwẽ si da te 're ihuri mono da hã. Tane nherẽ, dasa hã siwa'ru 're huri aba mono ré, asiré isazei'wa nherẽ, sib'uware na 're inomro mono norĩ hã te te 're ai'madâ'â za'ra wa'aba mono wa, asarina wa'aba tiwasété na 're si'marõpãrĩ za'ra mono wamhã, tawamhã, aiwasédé te za tô 're i'manharĩ za'ra wa'aba mo.

²¹ Tahawa, romnhi hã siwa'ru 're huri aba mono õ di za, duré uwa 'rãi wa'u isé hã 're âhuri aba mono õ di za, taha zarina asiré isazei'wa norĩ hã tiwasété na apâ 're si'marõpãrĩ tõ za'ra mono da. Duré siwa'ru marĩ aimawi hã 're 'manharĩ za'ra wa'aba mono wa, ni'wam norĩ hã tiwasété na apâ 're si'marõpãrĩ tõ za'ra mono da, 're 'manharĩ za'ra wa'aba mono õ di za.

²² 'Re ihâimana u'âsi mono si te te ãma 're awaihu'u mono da, te za 'râwi asima si ãma 're irosa'rata za'ra wa'aba mo, siwa'ru romnhi 're huri aba mono wa, ãma 're i'upa za'ra wa'aba mono õ zém na hã. Ni'wam norĩ hã uburé siwa'ru, tisa te te sima 're iwẽ uptabi za'ra mono zéb zarina, te te 're ihuri mono na, 're siwẽ'õ za'ra mono õ wamhã, ipẽ'ẽ 're tãma 're rowẽ uptabi za'ra mono di za. Duré ni'wam norĩ hã siwa'ru dasa hã te te siwi 're iwẽ'õ za'ra mono zéb zarina, te te 're ihuri mono õ na, 're siwẽ'õ za'ra mono õ wamhã, ipẽ'ẽ 're tãma 're rowẽ uptabi za'ra mono di za duré, ãne hã aiwa.

²³ Tane nherẽ, ni'wam norĩ hã romnhi siwa'ru te te 're huri mono nherẽ, 'râwi ãma 're siwawã za'ra mono wamhã, 'Re ihâimana u'âsi mono hã te za te te 're wẽ'õ za'ra, tisa na 're isiwawã za'ra mono zéb zarina. Tane hã marĩ hã wa te 're 'manharĩ za'ra mono nherẽ, 'râwi ãma 're wasiwawã za'ra mono wamhã, taha na wa za wawasédé hã wa te 're 'manharĩ za'ra.