Roma 11 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono, Izaraéu nhihudu norĩ ãma 're ipẽ'ẽzé mono zé wasu'u

¹ E tawamhã, 'Re ihâimana u'âsi mono hã tinhib'a'uwẽ norĩ hã ma tô te te siwi 're wẽ'õ za'ra, Izaraéu nhihudu norĩ hã. Mare di. Te te siwi 're awẽ'õ mono õ di. Mare uptabi di. Wa hã bété, Izaraéu nhihudu, 're ĩmorĩ hã, duré Abra'ãhã nhihudu 're ĩmorĩ hã e te te siwi 're ĩwẽ'õ. Duré Bẽzamihĩ nhihudu norĩ siré 're ĩmorĩ wamhã, e ma tô siwi ĩwẽ'õ, Izaraéu nhihudu, 're ĩmorĩ nherẽ. Mare di. Te te siwi ĩwẽ'õ õ di, 'Re ihâimana u'âsi mono hã.

^2-3 Tinhib'a'uwẽ norĩ hã, tô sena te te siwi 're awẽ'õ mono õ di 'Re ihâimana u'âsi mono hã, duréihã isãna'rata hawimhã, te te sima 're i'apisutu mono norĩ hã. Duréihã Eliasi 'Re ihâimana u'âsi mono zadawa 'mahârâ'wa hã ma tô Izaraéu nhihudu norĩ ãma iwasété na ãma sa'ra, 'Re ihâimana u'âsi mono ma. Ãne na te te ãma irob'ui'érézé hã, aima waihu'u pese za'ra wa'aba di. Ãne ma tô ãma rob'ui'éré: “Wanhib'apito, asadawa 'mahârâ'wa norĩ hã ma tô ta norĩ hã te te 're simro. Duré ẽtẽ za'ra 'manharĩ hã, isisiwi aima danhoprubzéb da, marĩ, da te iwa 're isa'ra za'ra mono zé hã ma tô uburé te te 're prub za'ra, ẽne hã. Ĩsiwaprosi uptabi, wa oto 're ĩhâimana, te 're i'asawi pese mono hã. Taha 'ru te, te duré ĩzada 're hâimana za'ra, ĩzama te te siwi ĩwĩrĩ da.”

⁴ Tawamhã 'Re ihâimana u'âsi mono hã e niha ma tô asa tãma waihu'u, Eliasihi ma. Ãne ma tô tãma waihu'u: “Wa tô ĩsima tété za'ra, aibâ norĩ 7 miu na ihâiba na, tisiré norĩ wazari si'utõrĩ tõ da dame, ihâiba'õ na dame ãma 're iwata za'ra mono õ norĩ hã, Baau na romhâiba nhisi ãma hã. Ta norĩ si, te ĩzarina 're hâimana u'âsi za'ra.”

⁵ Tane te duré ãhã na hã dama 're romhâimana za'ra. Da'ãma 're pẽ'ẽzé mono wa, da'ãma 're isiwãrĩ mono zéb zarina, ma tô 'Re ihâimana u'âsi mono hã Izaraéu nhihudu norĩ hã te te sima 're apisutu, umro na, isib'a'uwẽ uptabi si oto 're hâimana za'ra mono da.

⁶ E tawamhã, marĩ hã te te 're i'manharĩ wẽ za'ra mono zéb zarina, ma tô te te sima 're apisutu, 'Re ihâimana u'âsi mono hã, zudeu norĩ hã. Mare di. Taha zarina te te sima 're apisutu mono õ di. Taré ãma 're ipẽ'ẽzé za'ra mono zéb zarina, ãma 're siwãrĩ ze za'ra mono wa, ma tô si'uihâ na te te sima 're apisutu, õhõ ãma si 're hâimana u'âsi za'ra mono da. Marĩ hã da te 're i'manharĩ wẽ za'ra mono zéb zarina, te te sima 're da'apisutu mono 'wa'âhã, ãne zarina 'wa'âhã, aré senai õ di, 'Re ihâimana u'âsi mono, da'ãma 're ipẽ'ẽzé mono zéb zarina si, da'ãma 're isiwãrĩ mono zé hã.

⁷ Tawamhã e niha, wa za ãne na hã ãma waihu'u pese za'ra ni. Ãne, wa za oto ãma waihu'u za'ra ni. Izaraéu nhihudu norĩ hã 'Re ihâimana u'âsi mono, iwasédé hã te te oto ãma 're ab'madâ'â tõ mono da, duré taha zarina te te 're iwẽsãmri za'ra mono zéb da hã, sô 're sõpré u'âsi mono nherẽ, te te sina tãma ãma 're uwaimrami za'ra mono õ di, ta norĩ hã. 'Re ihâimana u'âsi mono, umro na te te sima 're ipisutu za'ra mono norĩ si, ma tô te te sina tãma 're uwaimrami za'ra, 'Re ihâimana u'âsi mono te te 're iwẽsãmri za'ra mono zém na hã. Tane nherẽ, ni'wam norĩ hã Izaraéu nhihudu nherẽ, 'Re ihâimana u'âsi mono nhiti 're ihâimana za'ra mono norĩ hã, ta norĩ si ma tô 'Re ihâimana u'âsi mono hã po're nhitob za'ra, imreme hã te te 're waihu'u za'ra mono ãna, a'â 're nomro mono da.

⁸ Duréihã Mozési hã ma tô ãne na ãma rob'ui'éré: “'Re ihâimana u'âsi mono hã ma tô ta norĩ hã tiwaihu'u pese na te te 're po're nhitob za'ra, simipari ãna pẽ'ẽ tete na 're hâimana za'ra mono da a'â. Ta norĩ hã ma tô duré te te 're 'rãiwamnarĩ za'ra, rosa'rata waihu'u ãna, a'â 're nomro mono da. Tahawa, te ta norĩ hã 'Re ihâimana u'âsi mono te te siwi 're waihu'u za'ra mono ãna, siwa'ru 're hâimana za'ra.”

⁹ Dawi hã ma tô duré ãne na ta norĩ ãma rob'ui'éré za'ra, zudeu norĩ ãma hã: “'Re ihâimana u'âsi mono hã ta norĩ ma, iwẽ na tãma 're sõprub za'ra mono wẽ te, ma tô 're si'madâ'â ze za'ra, taha na tãma 're rowẽ za'ra mono da newa. Tahawa, marĩ wasété pire na 're si'marõpãrĩ za'ra mono neza, 'râwi. Duré 'Re ihâimana u'âsi mono hã te te hâ za'ra neza.

¹⁰ Te te duré 're tõmo nhitob za'ra mono neza, datob'a na 're idanomro mono ne, 're nomro mono da oto. Duré ta norĩ hã marĩ pire hã da te 're 'wasari mono wa, iré 're idanhihâpâ za'ra mono ne, te te 're robzépata u'âsi za'ra mono neza.”

¹¹ E tawamhã, zudeu norĩ hã 'Re ihâimana u'âsi mono wi, 're si'marõpãrĩ za'ra mono nherẽ, apâ itẽme 're wahutu waihu'u za'ra mono õ di za. E tawamhã apâ itẽme 're sipizari waihu'u za'ra mono õ di za. Te za tô apâ itẽme 're sipizari za'ra. Ta norĩ hã 'Re ihâimana u'âsi mono wi, 're sipizari za'ra mono wa, tiwasédé hã te te 're 'manharĩ za'ra mono wa, ma tô 'Re ihâimana u'âsi mono hã zudeu'õ norĩ ma a'â pisutu za'ra, te te 're ida'anho'reptui mono zé hã. Zudeu norĩ hã te te ãma 're 'ruiwapari za'ra mono da, ma tô zudeu'õ norĩ ma a'â pisutu za'ra, te te 're ida'anho'reptui mono zé hã, zudeu norĩ hã apâ itẽme 're sipizari za'ra mono da, te te 're ida'anho'reptui mono zém niwĩ.

¹² Zudeu norĩ hã 'Re ihâimana u'âsi mono te te 're iwẽsãmri za'ra mono zéb da hã, te te sina tãma 're uwaimrami za'ra mono õ wa, ma tô 'Re ihâimana u'âsi mono hã zudeu'õ norĩ ma, hâiwa hawi marĩ iwẽ na tãma 're sõprub za'ra, daro mono bâ. Tawamhã zudeu norĩ hã 'Re ihâimana u'âsi mono niwĩ, ahâ uptabi na apâ za itẽme 're sipizari za'ra mono wamhã, tawapsi, te za oto marĩ iwẽ uptabi hã te te dama 're anhomri, 'Re ihâimana u'âsi mono hã hâiwa hawi, uburé tinhib'a'uwẽ norĩ ma hã.

Zudeu'õ norĩ, 'Re ihâimana u'âsi mono te te 're i'anho'reptui mono zé wasu'u

¹³ Zudeu'õ norĩ, wa za oto aima ĩsiwasu'u za'ra wa'wa. Wa hã Cristuhu zadawa wasu'u'wa, wa aima 're ĩhâimana za'ra wa'wa. Wa hã te aima 're iromhuri za'ra wa'aba mono zé hã, taréi hãi õ di. Tahawa, wa za tô ĩnhimi'ẽ na te aima 're romhuri u'âsi za'ra wa'wa.

¹⁴ Wa hã te aima 're romhuri za'ra wa'aba mono wa, ĩsiré zudeu norĩ hã te te ãma 're ai'ruiwapari za'ra wa'aba mono da, wa tô ta norĩ si te ĩsima 're wẽ za'ra, ni'wam norĩ hã apâ 'Re ihâimana u'âsi mono u 're sipizari za'ra mono wa, te te 're anho'reptui mono da.

¹⁵ Ta norĩ hã te te 're saze za'ra mono õ wa, ma tô 'Re ihâimana u'âsi mono hã asa te te siwi 're awẽ'õ, a'â. Ãne wa, ma tô a'â ai'ãma si 're siwadi za'ra wa'wa, zudeu'õ norĩ ãma. Tane nherẽ, ta norĩ hã niwapsi 'Re ihâimana u'âsi mono u, apâ 're isipizari za'ra mono zéb zarina, te te 're wẽsãmri za'ra mono wa, te za oto rowẽ uptabi na 're hâimana za'ra, iwasédé hã te te oto ãma 're i'ab'madâ'â mono õ zarina. 'Re dadâ'â za'ra mono wa, apâ 're dahâiwa'utu za'ra mono wa, dama 're irowẽ za'ra mono ne, te za oto ta norĩ hã rowẽ uptabi na 're hâimana za'ra.

¹⁶ Ãne na, wa za oto aima ãma romnhimiré'é za'ra wa'wa. I'u'ẽtẽ wapu hã da te 're 'manharĩ za'ra mono wamhã, sebre õ ré, te za suru na da te 're po'o za'ra, 'Re ihâimana u'âsi mono ma, da te 're sõmri za'ra mono da. Misi i'u'ẽtẽ wa'õno hã da te tãma 're sõmri za'ra mono nherẽ, wahuré da te tãma 're isõmri za'ra mono zé, te wasu'u. Duré ãté ni'wa hã te za 'Re ihâimana u'âsi mono ma tinha, ãne: “Ã hã wede 're isa mono zari hã wa aima pisutu, ate da.” Ãne hã wede hã zahadu 're sa mono ré, ni'wa hã wedezari si 'Re ihâimana u'âsi mono te da, te te tãma pisutu nherẽ, ipanhipti zama ite hã za. Ã hã wedezari hã, Izaraéu nhihudu norĩ hi'rata norĩ, te wasu'u. Duré ipanhipti hã ta norĩ nhihudu norĩ, te wasu'u. Izaraéu norĩ hi'rata norĩ hã, 'Re ihâimana u'âsi mono ma si, 're hâimana za'ra mono da, te te 're ipisutu za'ra mono ne, te za duré isihudu norĩ zama tãma 're hâimana za'ra, wedezari si 'Re ihâimana u'âsi mono te da, da te tãma 're pisutu za'ra mono nherẽ, ipanhipti zama ite ne tãma 're hâimana za'ra mono da oto.

¹⁷ Ãne na, wa za duré aima ãma romnhimiré'é za'ra wa'wa. Ãté azeitona wede hã te a'ubuni wi 're sa, oriwera na isisi hã 'madâ'â ãna iprédu hã, tede'wai õ nherẽ. Ta hã zudeu'õ norĩ, te wasu'u. Duré azeitona wede hâiba amo hã te duré 're sa, danho'a da te dasiwi 're i'madâ'â pese mono hã. Ta hã zudeu norĩ, te wasu'u. Tawamhã ãté azeitona wede hã danho'a 're isa mono panhipti hã te za nima niwĩp si panhipti nhi'ẽ za'ra ni, taré simi'wara da, dasiré 're 'rã za'ra mono õ wa. Ta hã, zudeu norĩ hã 'Re ihâimana u'âsi mono te te 're isaze za'ra mono õ norĩ, te wasu'u. Ãté a'ubuni wi azeitona wede 're isa mono panhipti hã te za misi wẽ'ẽ ni, azeitona wede hâiba amo hã dama i'madâ'â pese u iwede wãi wa, da te ãma wasisi da, dasiré oto 're 'rãi mono da. Ta hã, zudeu'õ norĩ ãma, 'Re ihâimana u'âsi mono, oto ãma 're isib'a'uwẽ za'ra mono zé, te wasu'u. Tawamhã azeitona wede, dama i'madâ'â pese wede wa'u na te za oto tipanhipti prédu, wẽ na, a'ubuni wi azeitona wede 're isa mono panhipti hã rob'rãi wede amoi u, da te ãma iwasi hã. Tane duré, zudeu norĩ ma, 'Re ihâimana u'âsi mono hã marĩ wẽ na tãma 're isõprub za'ra mono zé hã, te duré aima 're hâimana za'ra wa'wa oto, zudeu'õ norĩ na 're aihâimana za'ra wa'aba mono ma hã.

¹⁸ Tahawa, rob'rãi wede, dama i'madâ'â pese panhipti hã 're 'rã za'ra mono õ wa, da te 're isi'ẽ za'ra mono ne, 'Re ihâimana u'âsi mono a'â te te siwi 're i'awẽ'õ mono norĩ ma, aipire na tãma 're aihâimana za'ra wa'aba mono zém na, asina 're sa'ra wa'aba mono õ di za. E iwede panhipti wa'ui hawi, te iwede zari hã 're prédub za'ra. Mare di. Iwede zari hawip si, te iwede panhipti hã 're prédub za'ra. Tane, a norĩ wa'wa hã zudeu norĩ ma, aipire na 're aihâimana za'ra wa'aba mono õ di. Tahawa, aipire na tãma 're aihâimana za'ra wa'aba mono zém na, 'râwi asina 're aiwata waihu'u za'ra wa'aba mono õ di za.

¹⁹ Zudeu'õ norĩ, ãté ãhã wasu'u zarina, te za ãne asima 're inharĩ za'ra wa'aba mo: “'Re ihâimana u'âsi mono hã rob'rãi wede panhipti, da te 're isi'ẽ za'ra mono ne, e marĩ da, ma tô te te siwi 're awẽ'õ, zudeu norĩ hã. Wa norĩ hã iwa'rãmi 're wahâimana za'ra mono da, ma tô ta norĩ hã te te siwi 're awẽ'õ. Rob'rãi wede amo panhipti hã iwede amo na da te ãma 're iwasisi za'ra mono ne, wa oto wa norĩ hã 're wahâimana za'ra, i'upana za'ra.”

²⁰ Ãne na asima 're nharĩ za'ra wa'aba mono wamhã, i'uwaibaba te za tô asima ãma 're irowaihu'u za'ra wa'aba mo, ta norĩ ãma hã. Ta norĩ hã ma tô te te 're awẽ'õ tô siwi, te te 're saze za'ra mono õ wa. A norĩ wa'aba si 're sazei pese za'ra wa'aba mono wa, te tô ta norĩ wa'rãmi 're aihâimana za'ra wa'aba mo. Tane nherẽ, a norĩ wa'wa hã asina 're aiwata za'ra wa'aba mono õ di za. Tô'ã. Tahawa, te za 'Re ihâimana u'âsi mono si asiwi 're iwazéb za'ra wa'aba mo.

²¹ E 'Re ihâimana u'âsi mono hã zudeu norĩ ma, tinhimihâzé te te tãma 're ba'a za'ra mono õ nherẽ, te za bété a norĩ wa'aba ma tinhimihâzé hã te te aima 're ba'a za'ra wa'wa, tiwi 're aipizari za'ra wa'aba mono wamhã. Mare di. Te za tô te te 're aihâ za'ra wa'wa, tiwi 're aipizari za'ra wa'aba mono wamhã. Tahawa, te za 'Re ihâimana u'âsi mono si asiwi 're iwazé pese za'ra wa'aba mo.

²² Ãhã wasu'u na, wa za 'Re ihâimana u'âsi mono nhimizawi pese zé hã ãma waihu'u za'ra ni. Isimihâzé pire na zama, wa za duré ãma waihu'u pese za'ra ni. Tiwi 're isi'marõpãrĩ pese za'ra mono norĩ si, te za te te 're ahâ za'ra za'ẽtẽ. Tane nherẽ, a norĩ wa'wa hã 'Re ihâimana u'âsi mono te te 're asawi pese za'ra wa'aba mono zéb zarina, marĩ iwẽ na te te 're aipawaptob za'ra wa'aba mono zéb da hã, tãma asina 're uwaimrami u'âsi za'ra wa'aba mono wamhã, te za tô rowẽ hã te te aima 're pisutu u'âsi za'ra wa'wa, hâiwa hawi, ai'ãma 're ipẽ'ẽzé za'ra wa'aba mono zéb zarina. Ãne na tãma asina 're uwaimrami za'ra wa'aba mono õ wamhã, a norĩ wa'aba zama te za tô te te siwi 're aiwẽ'õ pese za'ra wa'wa, rob'rãi wede panhipti hã 're 'rã za'ra mono õ wa, da te 're isi'ẽ za'ra mono ne.

²³ Duré zudeu norĩ hã Zezusihi zazei'õ'wa na 're ihâimana za'ra mono norĩ hã, 'Re ihâimana u'âsi mono u oto 're sipizari za'ra mono wamhã, te za oto apâ ãma 're sib'a'uwẽ za'ra, ta norĩ ãma. Ãne hã 'Re ihâimana u'âsi mono ma, waihu'u pese di, zudeu norĩ ma, apâ te te 're i'manharĩ wẽ za'ra mono zéb da hã.

²⁴ Ãne na, wa za oto rowasu'u na aima 'rãsutu za'ra wa'wa, azeitona wede panhipti wasu'u na ãma isimiré'ézém na hã. A norĩ wa'wa hã zudeu'õ na 're aihâimana za'ra wa'aba mono norĩ hã, a'ubuni wi azeitona wede panhipti, da te 'maiwẽ'ẽi wa, azeitona wede dama i'madâ'â pese wede u, da te ãma iwede wasisi ne, te oto simisutu 're aihâimana za'ra wa'aba mo, zudeu norĩ me. Duré zudeu norĩ hã azeitona wede dama i'madâ'â pese panhipti ne, te 're hâimana za'ra. Taha wede panhipti hã da te 're si'ẽi mono wa, da te 're isãmra mono hã i'madâ'â'wai ma, tãma wapure di, tô iwede na apâ te te ãma 're i'ato mono da hã. Tane duré, 'Re ihâimana u'âsi mono ma hã wapure di, zudeu norĩ ãma apâ 're isib'a'uwẽ za'ra mono zéb da hã, ta norĩ hã tiwi 're sipizari za'ra mono nherẽ, aré.

Zudeu norĩ hã, ahâ na 'Re ihâimana u'âsi mono u, za apâ 're isipizari za'ra mono zé wasu'u

²⁵ Ĩsisãnawã norĩ, zudeu'õ na da te 're aiwaptẽrẽ za'ra wa'aba mono norĩ hã, marĩ aré dama iwaihu'u'õ na roti ipire wasu'u na hã wa za oto aima rowasu'u za'ra wa'wa, asimiza'rese ãna 're aihâimana za'ra wa'aba mono tõ da. Zudeu norĩ upana, 'Re ihâimana u'âsi mono hã ai'ãma wa'aba si 're sib'a'uwẽ mono newa, 'râwi asi'ãma 're aiwata za'ra wa'aba mono tõ da, wa za oto ãne na aima rowasu'u za'ra wa'wa. Izaraéu nhihudu norĩ hã 'Re ihâimana u'âsi mono wi, pẽ'ẽ tete uptabi na 're hâimana za'ra mono nherẽ, pẽ'ẽ tete u'âsi, tiwi 're hâimana za'ra mono õ di za. Duréihã, 'Re ihâimana u'âsi mono te te sima ipisutu siromo zéb zarina, zudeu'õ norĩ hã da'ahâ uptabi na Cristu za da te 're isaze za'ra mono norĩ za'ratazé hã, oto iwa waptã'ã wapsi, te za oto zudeu norĩ hã ahâ uptabi na itẽme 're sipizari za'ra, õhõ ãma si oto 're nomro mono da.

²⁶ Ãne 'Re ihâimana u'âsi mono te te 're isõ'reptu za'ra mono zéb da hã, Izaraéu nhihudu norĩ hã. Ãne na ma tô duréihã Izaia hã ãma rob'ui'éré siro, ta norĩ ãma hã: “Danho'reptui'wa da hã, Zeruzalẽ ãma Siã na sa'a nhisi ãma, dasiré za 're ihâimana mono hã, tame. Ta hã Zacoho nhihudu norĩ 're iwasété za'ra mono zé hã te za te te tãma 're apari.

²⁷ 'Re ihâimana u'âsi mono hã ma tô ta norĩ ãma tinhimirosa'rada hã waihu'u siro, ãne: ‘Ta norĩ ma, te iropisutuzé hã wa za tô tãma ãma uwaimrami za'ra, iwasédé te tãma 're i'apari mono zém na.’ ”

²⁸ Zudeu norĩ hã Cristuhu wasu'uwẽ hã ma tô ahâ na te te siwi 're wẽ'õ za'ra. Tahawa, te oto 'Re ihâimana u'âsi mono nhitob'ru ne 're hâimana za'ra. Taha wa'rãmi, ma tô ai'ãma 're siwadi za'ra wa'wa, asiré zudeu'õ norĩ ãma hã. Tane nherẽ, isib'a'uwẽ 're nomro mono da, te te pisutu za'ra wa, te ta norĩ hã te te 're azawi pese u'âsi sima, ta norĩ hi'rata ma, te te sina iropisutu za'ra zéb zarina.

²⁹ 'Re ihâimana u'âsi mono te te sima 're da'apisutu mono nherẽ, duré marĩ iwẽ na dama 're sõpru mono nherẽ, e te za tinhimirosa'rata na te te ãma 're saprĩ. Mare di. Misi haré, isimirosa'rada hã te tãma 're hâimana u'âsi.

³⁰ Duréihã, aihi'rata norĩ wa'wa hã 'Re ihâimana u'âsi mono nhimiroti hã te te 're wapari za'ra mono ãna, ma tô aré 're hâimana za'ra, zudeu'õ norĩ hã. Tane nherẽ, zudeu norĩ hã 'Re ihâimana u'âsi mono si te te 're sazei pese za'ra mono õ wa, ma tô oto ai'ãma 're pẽ'ẽzé za'ra wa'wa, ai'ãma 're sib'a'uwẽ za'ra wa'aba mono da, zudeu'õ 're aihâimana za'ra wa'aba mono nherẽ.

³¹ A norĩ wa'wa hã aré asimipari ãna 're anomro aba mono nherẽ, ai'ãma 're ipẽ'ẽzé za'ra wa'aba mono ne, te za oto duré zudeu norĩ ãma zama 're pẽ'ẽzé 'Re ihâimana u'âsi mono hã, po're ãna duré ta norĩ hã tiwi 're hâimana za'ra mono nherẽ.

³² 'Re ihâimana u'âsi mono wi, danhimipari ãna 're danomro mono wa, ma tô te te siwi 're da'awẽ'õ pese, dawasédé hã te te da'ãma 're i'ab'madâ'â mono hawi. Dazazéb 're, da te 're danheme mono wa, apâ dasi'uihâ na 're idawairébé waihu'u mono õ ne, dawasété hawi 'râwi 're dasisõ'reptui waihu'u za'ra mono õ di. Taha na, dasi'uihâ na da te dasina 're waihu'u za'ra mono da, ma tô te te siwi 're da'awẽ'õ. Uburé da'ãma 're pẽ'ẽzé mono da, ma tô ãne hã te te dama 're apisutu, 'Re ihâimana u'âsi mono hã.

Iwaihu'u pese na 'Re ihâimana u'âsi mono wasu'u

³³ 'Re ihâimana u'âsi mono hã uburé da'ãma 're isiwamri mono zé hã tãma sa'ẽtẽ uptabi di, te te dama 're i'ab'manharĩ wẽ mono zéb da hã. Iwaihu'u pe hã tãma sa'ẽtẽ uptabi di duré. E 'wa hã te za marĩ hã te te sima 're i'apisutu mono zé hã tiwi waihu'u. E 'wa hã te za duré tiwi waihu'u, uburé marĩ hã te te 're i'ab'manharĩ mono zé hã.

³⁴ Duréihã Izaia hã ma tô ãne na ãma rob'ui'éré: “E 'wai ma, Wanhib'apito nhimirosa'rada hã waihu'u pese di. E 'wa hã roti na tãma iwa'rãmi'wa da hã, te 're hâimana. Robaba di.”

³⁵ Wahi'rata hâiba amo hã ma tô duré ãne na ãma rob'ui'éré, Zo na isisi hã: “'Re ihâimana u'âsi mono si, roptede'wa 're hâimana mono nherẽ, e niha te za ni'wa hã marĩ hã tãma tisõ, iwa'rãmi marĩ na te te tãma iwa'âbâ da hã. Ãne hã robaba uptabi di, tãma hã.”

³⁶ 'Re ihâimana u'âsi mono si ma tô uburé te te aropoto, sima. Tahawa, te uburé marĩ hã te te 're ab'madâ'â, tiwaihu'u pese na. Ãne wa, 'Re ihâimana u'âsi mono ãma, aihĩni, ãma 're wawata u'âsi za'ra wa'aba mono, õne u'âsi. Tane tô.