Roma 1 - ꞌRe Ihâimana Uꞌâsi Mono Zadawa Wasuꞌu

Paulu te te idazawizé wasu'u

¹ Wa hã Paulu, Cristu Zezusihi ma romhuri'wa, wa ãma aima rob'ui'éré za'ra wa'wa, Roma ãma 're aihâimana za'ra wa'aba mono norĩ ma. 'Re ihâimana u'âsi mono hã ma tô ĩpisutu, isadawa wasu'u na te tãma 're romhuri mono da, Zezusihi wasu'uwẽ hã te te wama 're i'awaihu'u mono hã te dama 're wasu'u u'âsi mono da, isadawa para.

² 'Re ihâimana u'âsi mono hã ma tô duréihã dama ropisutu siro, iwasu'uwẽ na hã. Duréihã isadawa 'mahârâ'wa norĩ hã, ma tô ãne na ãma rob'ui'éré siromo za'ra, ibaihâ na hã.

³ E 'wai wasu'uwẽ, ã hã. 'Re ihâimana u'âsi mono 'ra, Wanhib'apito Zezu Cristuhu wasu'uwẽ. Ta hã Zezusi hã ti'ai ãma dahâiba na dasine 're ihâimana mono na, wama waihu'u pese za'ra di, apito Dawihi nhihudu 're morĩ wa.

⁴ Duré 'Re ihâimana u'âsi mono 'ra na, wama waihu'u pese za'ra di, dâ'â uptabi nherẽ, Imama hã tiwaihu'u pese na te te hâiwa'utu wa. Duré Timama hawi we imorĩ na hã wama waihu'u pese za'ra di. Duré 're imorĩ wẽ na zama, wama waihu'u pese za'ra di.

⁵ 'Re ihâimana u'âsi mono hã tinhoprubzéb zarina ma tô Cristuhu ma ĩpisutu siro, ĩpire na te dama 're sadawa wasu'u mono da. Cristuhu ma, te 're romhuri wẽ mono da, ma tô ĩpisutu, ĩnhimiromhurizéb zarina dapoto mono bâ, da te 're sazei pese za'ra mono da, duré da te 're sazei pese za'ra mono wa, isimiroti si, da te 're 'madâ'â pese za'ra mono da.

⁶ A norĩ wa'aba ma zama, te 're sadawa wasu'u mono da, ma tô ĩpisutu 'Re ihâimana u'âsi mono hã, wasiré Zezu Cristuhu nhib'a'uwẽ oto 're anomro aba mono da, te te 're i'aipisutu za'ra wa'aba mono norĩ ma hã.

⁷ 'Re ihâimana u'âsi mono ma, asawi pese za'ra wa'aba di. Taha si ma tô aipisutu za'ra wa'wa, isib'a'uwẽ si oto 're anomro aba mono da, tãma. Tahawa, wa ãhã na aima ãma rob'ui'éré za'ra wa'wa, Roma ãma 're aihâimana za'ra wa'aba mono norĩ ma. Wamama ma, wa ai'ãma 're ĩmreme u'âsi za'ra wa'wa, 'Re ihâimana u'âsi mono ma, duré Wanhib'apito Zezu Cristuhu ma zama, isimizawizé hã ai'ãma 're hâimana u'âsi za'ra wa'aba mono da, rowẽ u'âsi, ãma 're anomro aba mono da.

Roma u, Paulu hã datẽme isisatõrĩzé wasu'u

⁸ Ãhã na, wa za Ĩnhib'apito ãma uimrehẽne ĩwata, ĩmreme na, 'Re ihâimana u'âsi mono ãma, Zezu Cristuhu nhimipawaptobzéb zarina 're sazei pese za'ra wa'aba mono wa, aiwasu'u za'ra wa'wa hã daro mono bâ da te 're wapari za'ra mono wa.

^9-10 Wa hã 're ĩsihâiba zawi mono ãna, wa 'Re ihâimana u'âsi mono ma, te 're romhuri u'âsi, i'ra wasu'uwẽ hã te dama 're iwasu'u mono zém na hã. Wa ai'ãma 're ĩsipo're pu'u u'âsi za'ra wa'wa. Wa duré ai'ãma 're ĩmreme u'âsi za'ra wa'wa, 'Re ihâimana u'âsi mono ma. Tô sena, wa ãne na aima rowasu'u za'ra wa'wa, 'Re ihâimana u'âsi mono ma, ãne hã tãma waihu'u pese uptabi wa. Taha wi si, wa nasi ĩsima rowaptẽrẽ u'âsi ãhã na hã, te te sima iwẽzéb uwaibaba te te ĩma ãma uwaimrami da, ãma atẽme ĩmorĩ za'ra wa'aba da hã.

¹¹ Te asabu su'u za'ra wa'aba da si, wa tô ĩsima rowẽ si'aba'ré, 'Re ihâimana u'âsi mono, Tipẽ'ẽzani na rowẽ te te dama 're i'apisutu mono zém na, te ãma aipawaptob za'ra wa'aba da, asiptete sina ãma 're anomro aba mono da.

¹² Atẽme ãma ĩwisi za'ra wa'aba wamhã, wa za aihĩni wasipawaptob za'ra ni, Zezusi wa te 're isazei pese za'ra mono zém na, wanhiptete na ãma 're wanomro mono da.

¹³ Ĩsisãnawã norĩ, ãne na aima ĩsiwasu'u za'ra wa'aba da, wa tô ĩsima wẽ, waihu'u za'ra wa'aba da. Wa tô te ĩsima 're rosa'rata u'âsi, te asabu za'ra wa'aba da. Tane nherẽ, atẽme ãma ĩmorĩ su'u aba da nherẽ, te marĩ hã ĩma 're hâimana u'âsi, õne u'âsi. Zudeu'õ norĩ hã daro mono bâ 're isi'ubumroi mono hã, iwasu'uwẽ hã te tãma 're iwasu'u za'ra mono zém na, te te 're saze za'ra mono wa, wa tô te 're awaibu, 'Re ihâimana u'âsi mono ma. Tane da, wa tô duré te ĩsima 're rowẽ, airo wa'aba ãma asiré zudeu'õ norĩ hã te duré tãma 're awaibui mono da, tame.

¹⁴ E marĩ wa, wa tô ĩsima wẽ, ãne na te aipawaptob za'ra wa'aba da. Wa hã uburé te 're da'apawapto mono da, 'Re ihâimana u'âsi mono te te ĩpisudu. Tahawa, wa za tô te 're da'apawaptob u'âsi, 'ri nho'õmo mono bâ 're idahâimana za'ra mono norĩ hã, duré marã 'rowi 're idahâimana za'ra mono norĩ hã, duré rowaihu'u pese 'wa norĩ hã, duré rowaihu'u'õ'wa norĩ hã. Ta norĩ hã wa za uburé te 're apawaptob u'âsi, dawaptẽrẽ mono bâ.

¹⁵ Tahawa, wa ĩsima wẽ zahi, Roma ãma 're i'aihâimana za'ra wa'aba mono norĩ ma, iwasu'uwẽ na tame te duré aima rowasu'u za'ra wa'aba da.

Zezusihi wasu'uwẽ nhiptede

¹⁶ 'Re ĩnhisé mono õ di, Zezusihi wasu'uwẽ hã te dama 're wasu'u tõ mono da. E marĩ wa. 'Re ihâimana u'âsi mono hã siptete uptabi wa, iwasu'uwẽ na te te ãma 're da'anho'reptui mono da, Zezusi te te sina 're i'umnhasi za'ra mono norĩ hã. Zudeu norĩ si ma tô isãna'rata hawimhã te te 're sõ'reptu za'ra aré. Tane nherẽ, te oto ãhã na hã zudeu'õ norĩ zama te te 're anho'reptu.

¹⁷ Zezusihi wasu'uwẽ na hã e marĩ, wa za wa te ãma 're waihu'u za'ra. 'Re ihâimana u'âsi mono, da te 're saze za'ra mono wapsi, dawasédé hã te te oto da'ãma 're i'ab'madâ'â mono õ zarina, te te 're ida'awẽsãmri mono zé, taha wasu'u. Duréihã 'Re ihâimana u'âsi mono zadawa 'mahârâ 'rata 'wa hã ma tô ãne na ãma rob'ui'éré, ibaihâ na: “Ni'wam norĩ hã, 'Re ihâimana u'âsi mono te te 're saze za'ra mono wamhã, ta norĩ si te za te te 're awẽsãmri, 'Re ihâimana u'âsi mono hã, iwasédé hã te te oto ãma 're i'ab'madâ'â mono õ zarina, po're'õ nherẽ, te te 're hâ za'ra mono tõ da. Ta norĩ si te za duré rowẽ u'âsi, ãma 're hâimana za'ra.”

Dapo're ãna 're idanomro mono na rowasu'u

¹⁸ 'Re ihâimana u'âsi mono hã ma tô ãne hã wama waihu'u siromo za'ra, dapo're'õ na 're idanomro mono norĩ hã za te te 're ida'ahâ za'ra mono zém na. Ta norĩ hã te tipẽ'ẽ na te te sima 're rosa'rata wasété u'âsi za'ra. Hâimana wasété uptabi na, te duré dama 're hâimana u'âsi za'ra. Ta norĩ hã tiwasété si te te 're 'manharĩ za'ra mono wa, te 'Re ihâimana u'âsi mono nhimiroti tô sena uptabi hã te te dawi 're 'wa'rutu za'ra, ãne na roti iwẽ hã da te 're waihu'u za'ra mono tõ da.

¹⁹ 'Re ihâimana u'âsi mono 're ihâimana mono zé hã, da te 're iwaihu'u za'ra mono zéb da hã, dama waihu'u pese di. E marĩ wa. 'Re ihâimana u'âsi mono hã dawi 're si'udâ mono õ wa. Uburé marĩ hã te te i'apoto mono hã sõ'awi da te 're i'madâ'â za'ra mono zéb zarina, te da te 're waihu'u za'ra, 're ihâimana mono zé hã. Tahawa, da te 're iwaihu'u za'ra mono zéb da hã dama waihu'u pese nherẽ, dapo're ãna 're danomro mono wa, te 'Re ihâimana u'âsi mono hã te te 're da'ahâ za'ra.

²⁰ Duréihã isãna'rata hawimhã, 'Re ihâimana u'âsi mono, ma tô te te ro'apoto, tiwaihu'u pese na. Tiwaihu'u pese na te te ro'apoto mono wa, ta hawim haré te isimiwaihu'u pese zém na, duré tô sena 're ihâimana mono na, da te ãma 're waihu'u pese za'ra, ihâiba hã da te 're 'madâ'â waihu'u za'ra mono õ nherẽ. E marĩ zarina tawamhã, 'Re ihâimana u'âsi mono, 're ihâimana mono na te za tô sena na da te ãma 're waihu'u pese za'ra. 'Re ihâimana u'âsi mono hã uburé marĩ hã te te i'apoto mono hã da te 're i'madâ'â za'ra mono zéb zarina, te oto da te ãma 're waihu'u za'ra, iwaihu'u pese na, duré tô sena õne u'âsi 're ihâimana mono na. Tahawa, tô sena 're hâimana mono nherẽ, da te dasiwi 're udâ waihu'u za'ra mono õ di za, 'Re ihâimana u'âsi mono hã.

²¹ Ta hã tô sena 're ihâimana mono na, da te dasiwi 're waihu'u za'ra mono nherẽ, tô sena da te dasiwi 're ihâimana wazé mono na, da te tãma ãma 're uwaimrami za'ra mono õ di, 'Re ihâimana u'âsi mono ma hã. Duré sõprub uptabi nherẽ, ãma 're dawata za'ra mono õ di. Taha upana, te marĩ na si siwa'ru da te 're rosa'rata wasété za'ra. Dapẽ'ẽ 're, robra u'âsi 're dahâimana za'ra mono wa, te danhimirosa'rata na da te 're upa za'ra.

²² Dapo're'õ na 're idanomro mono norĩ hã uburé marĩ hã te te 're waihu'u pese za'ra mono newa, te taré sina 're wata za'ra, dama. Tane nherẽ, te ta norĩ hã simiza'rese ãna 're nomro.

²³ 'Re ihâimana u'âsi mono upana, te ta norĩ hã rob'manharĩ ãma si 're wata za'ra, a'uwẽ na dahâiba 'manharĩ ãma, duré si hâiba ne 'manharĩ ãma, duré abaze hâiba ne 'manharĩ ãma, duré di'i na 're inomro mono norĩ hâiba ne 'manharĩ ãma.

²⁴ Ta norĩ hã simiza'rese'õ uptabi na 're hâimana u'âsi za'ra mono wa, ma tô 'Re ihâimana u'âsi mono hã te te sima ãma 're aroti, ãne: “Ta norĩ hã po're za'ra õ wa, wa za oto rẽme za'ra. Te tãma 're roti za'ra mono õ di za oto. Si'uihâ na te za oto 're hâimana za'ra.” Ãne ma tô 'Re ihâimana u'âsi mono hã te te sima ãma 're aroti, ta norĩ ãma hã. Tahawa, te oto marĩ iwasété si te te sima 're iwẽ u'âsi za'ra mono zéb zarina, te te 're 'manharĩ u'âsi za'ra, ta norĩ hã. Tihâiba na zama te duré 're siwasété uptabi za'ra oto, si'uihâ na.

²⁵ 'Re ihâimana u'âsi mono nhimiroti hã tô sena nherẽ, te imreme upana aimawi si te te 're wapari za'ra, tô senai'õ hã. Ropoto'wai upana, te isimipoto ãma si 're wata za'ra, ta norĩ hã. 'Re ihâimana u'âsi mono ãma si, 're dawata u'âsi za'ra mono za, õhõ si, tô sena wa.

²⁶ Tawamhã dapo're'õ na 're idanomro mono norĩ hã, Ropoto'wa nhimipoto ãma si 're dawata za'ra mono wa, ma tô oto 'Re ihâimana u'âsi mono hã te te 're da'arẽme, dawasété si da te dasima 're iwẽ za'ra mono zéb zarina si, dahâiba na 're dasiwasété za'ra mono da, dasi'uihâ na. Ãne da hã, 'Re ihâimana u'âsi mono hã te te dama 're apisutu mono õ nherẽ, te dasi'uihâ na pi'õ si'uiwa na dasina 're dawasété za'ra.

²⁷ Tane aibâ norĩ hã pi'õ na dasina 're idamro za'ra mono zéb upana, te aibâ si'uiwa na si te te sina 're rosa'rata wasété uptabi za'ra, pi'õi upana, aibâ si'uiwa 're isi'ruiwapari za'ra mono na. Dasi'uihâ na te aibâ si'uiwa na dasina 're dawasété za'ra. Tahawa, te za 'Re ihâimana u'âsi mono hã te te 're da'ahâ za'ra, dapo're'õ si, da te dasi'ãma 're i'manharĩ za'ra mono zéb uwaibaba, 're danomro mono wa.

²⁸ Dapo're'õ na 're idanomro mono norĩ hã, 'Re ihâimana u'âsi mono nhimiroti tô sena hã te te siwi 're wẽ'õ pese za'ra mono wa, te za 'Re ihâimana u'âsi mono hã te te 're arẽme, si'uihâ na te te sima 're irosa'rata wasété za'ra mono zéb uwaibaba si, tiwasédé hã te te 're 'manharĩ u'âsi za'ra mono da.

²⁹ Ta norĩ hã wasété uptabi na te 're hâimana za'ra. Marĩ zô si te te sima 're rob'ruiwapari za'ra. Te duré te te dama 're rob'manharĩ wasété za'ra. Marĩ na te te duré 're da'ruiwapari u'âsi za'ra. Te duré te te 're danhimro. Siti'ru sina, te ta norĩ hã dazô 're nomro, te te dama 're nharĩ za'ra mono da. Sadawa nhipese uptabi na, te 're hâimana za'ra. Niha te te dama 're rob'manharĩ za'ra mono da, te da'ãma te te sima 're rosa'rata wasété u'âsi za'ra. Taré te te duré sima 're dabâsi wasété u'âsi za'ra.

³⁰ Daza're'ra nherẽ, te duré ta norĩ hã te te sima 're dabâsi wasété za'ra. 'Re ihâimana u'âsi mono hã te te duré siwi 're 'ruiwapari. Te duré te te dama 're nharĩ wasété u'âsi za'ra. Danhipai u dama pire na dama 're hâimana za'ra mono newa, te 'râwi tipẽ'ẽ na sina 're wata za'ra. Tahawa, te sõ'awi timreme na dama 're siwasu'u za'ra, marĩ tãma iwaihu'u pese za'ra na. Marĩ te te 're iwaihu'u za'ra mono zéb zarina si te te 're 'manharĩ za'ra, marĩ iwasétére hã. Timama norĩ nhimiroti hã te te 're wapari za'ra mono õ di duré.

³¹ Marĩ iwasété zô si, te ta norĩ hã sima 're sõpré. Simiroti na saprĩ ahâ na te 're hâimana za'ra. Da'ãma 're pẽ'ẽzé za'ra mono õ di. Duré da'ãma 're siwamri za'ra mono õ di.

³² 'Re ihâimana u'âsi mono hã ma tô ãne na da'ãma sima roti siro, dapo're'õ na 're danomro mono wa, isiré i'rata za 're idahâimana u'âsi za'ra mono õ na hã. Dapo're'õ norĩ ma hã, ãne hã tãma waihu'u pese za'ra di. Tane nherẽ, te tihâimana wasété si te te sima 're 'ruiwapari u'âsi za'ra, te te 're rẽme za'ra mono ãna. Tane nherẽ, uburé tiwasédé hã te te 're i'manharĩ za'ra mono zém nhipai u, te duré marĩ iwasédé hã te te 're 'manharĩ za'ra. Ni'wam norĩ hã isine 're hâimana wasété za'ra mono wa, te ta norĩ si te te 're wẽsãmri za'ra.