Provébiu 9 - ꞌRe Ihâimana Uꞌâsi Mono Zadawa Wasuꞌu

Isimiza'rese'õ norĩ wasu'u

¹ Rowaihu iwẽ hã ma tô sima 'ri hã 'manha. Ma tô duré 7 na 'ri uparizéb da hã te te sõré.

² Ma tô danhimizama hã te te simro, datoi u dasazéb da hã. Uwa 'rãi wa'u isé, da te iwazari da hã, ma tô duré siwi wa'u. Duré ma tô siwi sõré, dasaihurizéb da hã.

³ Tawamhã tite romhuri'wai ma hã ma tô duré 'ru za'ra, 'ri nho'õmo 're, isisi hawi, hârâ 'rãihâ na dazô hârâ za'ra da hã, ãne:

⁴ “Asimirosa'rata prãire norĩ, we asisisi aba!” Tawamhã a'uwẽ isimiza'rese'õ norĩ ma, te duré tãma nharĩ za'ra, ãne:

⁵ “We ai'aba'réi wa'aba, ĩte dasa hã huri aba da, duré uwa 'rãi wa'u isé te dama i'manharĩ hã âhuri aba da.

⁶ Ma'ãpé, rẽme pese za'ra wa'aba, isimiza'rese'õ norĩ hã, rowẽ na 're i'aihâimana za'ra wa'aba mono zé hã asina uwaimrami za'ra wa'aba da. Da'rãi waihu'u wẽ na 're idanomro mono zém na bâdâdi na si 're anomro aba mono.”

⁷ Ni'wa hã da'ãma 're iwa'ẽi mono ma, te te pẽtẽ wamhã, te za 'râwi sitẽme 'wani, si'ãma iwasétézé hã. Duré ni'wa hã aibâ iwasété ma, te te pẽtẽ wamhã, te za tinhisi wazéb'õ hã sitẽme 'wani.

⁸ Niwamhã da'ãma 're iwa'ẽi mono ma hã 're pẽtẽ mono tõ. Ãnei õ wamhã, te za asada hã 're sahi. Tane nherẽ, ni'wa i'rãi waihu'u wẽ ma, 're pẽtẽ mono wamhã, te za te te 're aiwazé.

⁹ Ni'wa i'rãi waihu'u wẽ ma, marĩ na ãma tãma 're roti mono wamhã, te za ti'rãi waihu'u wẽ hã te te ãma sima 're sa'ẽtẽ. Duré i'uwaibaba si 're imorĩ ma, marĩ na ãma tãma 're rowaihu'u mono wamhã, te za ti'rã nhimiza're hã te te sima 're sa'ẽtẽ.

¹⁰ Rowaihu iwẽ hã da te 're waihu'u za'ra mono da wamhã, te za Uburé Danhib'apito hã da te dasiwi 're wazéb za'ra. Duré 'Re ihâimana u'âsi mono, marĩ iwasédé, ãma 're ihâimana mono õ, da te 're waihu'u za'ra mono wamhã, te za da'rã nhimiza're iwẽ hã dama 're hâimana za'ra.

¹¹ Rowaihu iwẽ hã aima 're ihâimana mono zéb zarina, te za 're i'aihâimana hâ mono zéb da, bâdâ hã aima 're si'apraba.

¹² Ai'rãi waihu'u wẽ na 're aihâimana mono wamhã, te za iwẽ hã asima 're isa'ẽtẽ mo, ate da hã. Duré da'ãma 're aiwa'ẽi mono wamhã, te za taha zarina 're irobzépata mono na hã 're aihâimana mo.

¹³ Danhimiza'rese ãna 're idanomro mono zé hã, aiwa pi'õ isimirosa'rata prãire, tãma rowazéb ãna mreme sihâimo na te te 're inharĩ mono ne hã.

¹⁴ Ta hã tinhib'ridawa ãma, niha wamhã, duré 'ri nho'õmo ãma dasimasisizé i'rãihâ na 're simasisi mono ré,

¹⁵ te tite na te te 're iro'rahâri za'ra mono hã te te 're ab'mahârâ, ãne:

¹⁶ “Asimirosa'rata prãire norĩ, we asisi aba!” Ãne te duré isimiza'rese'õ norĩ ma, te te 're anharĩ:

¹⁷ “Â da te 're isimi'uri za'ra mono hã sei uptabi di. Duré i'u'ẽtẽ wapu pi'uriwi dasima'uri sina da te 're ihuri mono sei uptabi di.”

¹⁸ Tane nherẽ, pi'õ te te i'mahârâ za'ra norĩ hã te te waihu'u za'ra õ di, isõrõwa 're, adâ'â norĩ pẽ'ẽzani 're ihâimana za'ra mono na hã. Tawamhã ni'wam norĩ hã pi'õ te te ãma 're saze za'ra mono wamhã, te za 're idadâ'â za'ra mono zéb u hã 're sisisi.