Provébiu 7 - ꞌRe Ihâimana Uꞌâsi Mono Zadawa Wasuꞌu

¹ Ĩ'ra, marĩ na te aima inharĩ mono zém na hã, aima ĩnhimirotizé mono na hã niwamhã ãma aipo're si'âri tõ.

² Ĩmreme hã 're wapari pese mono. Tawamhã te za 're aihâimana u'âsi mo. Duré ma'ãpé aima ĩnhimirotizé hã 're 'madâ'â pese mono, ato hã marĩ wi 're i'madâ'â pese mono ne.

³ Ma'ãpé aima ĩnhimirotizé hã aipẽ'ẽ na asima 're tété u'âsi mono, marĩ hã danhib'ratap si da te 're i'wasari mono ne, tãma danhimirẽme ãna.

⁴ Ma'ãpé aihidiba ne rowaihu iwẽ hã 're 'madâ'â pese mono. Asimiza'rese wẽ hã duré 're 'madâ'â pese mono, asiwaihu iwẽ uptabi ne.

⁵ Ta norĩ hã te za pi'õ iwasété wi hã, duré imreme wazidi wi hã isiti ai'ãma 're pahâ, romhâ na.

Wasété na pi'õ 're ihâimana mono wasu'u

⁶ Nimahã na ĩnhorõwa zanela 'ri zadazâri hawi te rob'madâ'â wamhã,

⁷ wa tô siwazari ipréduptém norĩ simirosa'rata waihu'u prã na 're ihâimana za'ra mono norĩ hã 'madâ'â za'ra. Ta norĩ 'remhã te isimiza'rese'õ hã ti'maihâiba dawazari.

⁸ Ã hã aibâ iprédupté te 'ri nhi'riti na hã mo, 'ri nhi'riti wẽ'ẽzéb 'rata, pi'õ hã 're ihâimana mono zéb uwaibaba. Pi'õ nhorõwa 'rata ma tô 'râwi ro'razâ,

⁹ robza'rã wi, irobra pese zéb u hã.

¹⁰ Tawamhã pi'õ hã simirosa'rata nhipese na ma tô sô watobro, te te sõpẽtẽ da hã, pi'õ iwa'âbâ zô 're isisõmri mono, 're isi'uza za'ra mono zéb ré.

¹¹ Ta hã marĩ na tãma rowazéb ãna mreme 'rãihâ na si 're ihâimana mono, duré õne u'â te te sina 're ida'a'rãiwa'ro zani mono, duré hâiwi si 'ri nhi'riti na 're ine mono.

¹² Ta hã te nimahã 'ri nhi'riti wẽ'ẽzéb ãma aibâ zô simipari sina 're simasisi, 'ri nhi'riti ãma, niha wamhã, duré 're idasisõpẽtẽ pese za'ra mono zéb ãma, te te sima 'maipa'âri da hã.

¹³ Tawamhã pi'õ, aibâ tinho'utu te te oto âri wamhã, ma tô õne haré tob'rata hârâ. Tãma rowazéb ãna itõmo u te te 'madâ'â sina, te ãne tãma tinha:

¹⁴ — Ĩnhorõwa ãma te romnhi hã tihâiba, ã bâtâ na hã 'Re ihâimana u'âsi mono ma, te iropisutuzé te tãma ãma i'uwaimramizéb da hã, danhoprubzé ãma dama 're irowẽ za'ẽtẽ za'ra mono zé hã.

¹⁵ Tahawa, asô ĩrĩtĩ mono da hã wa tô wei watobro, te ĩsima wẽ wa, te i'asõpẽtẽ da hã. Tane nherẽ, te ãme aihâiba!

¹⁶ Ĩnhimiwaptâ, i'ubuzé ihâpré warõ na hã wa tô ubu, Ezitu hawim na.

¹⁷ Wa tô waptâ hã 'ma'wama sadaze da, wedewati isadaze na, duré wedehâ 'wa'ri isadaze na hã.

¹⁸ We oto ĩsiré aimorĩ, mara wahuré na wasiré waza'wari hâ. Ãne wa, duré wasihâiba na wa te wasima rowẽ hâ.

¹⁹ Ĩmro 'ri na hã hâimana õ di. Romhâ na ma tô mo.

²⁰ Rob'uiprazé hã sa'ẽtẽ na ma tô siré ti'â. A'amo ãma sapoto õ ré, we apâ hã wisi õ di za.

²¹ Ãne, pi'õ timreme wazidi hâire na te te pibui wamhã, ma tô oto si'ra.

²² Tawamhã si'aba'ré na ma tô oto isarina mo, powawẽ ipãrĩzéb u da te 're isimroi mono ne, duré pozé wedenhorõ nhihâ're uwaibaba 're sisa'rei mono wa, ãma 're isiwaibui mono ne.

²³ Tãma isimimnha hã te te sina waihu'u ãna, te isarina mo, ti hã sa'rese ãna inomo wi te te isiptâ'â ne, duré si hã imramizéb u 're isisa'rei mono ne hã.

²⁴ Tahawa, ĩ'ra, te za ĩwapari pe! Aipo're pese na ĩwapari, za te aima inharĩzém na hã.

²⁵ Ãne pi'õi ma, aihâiba hã 're sa'réi mono tõ. Duré isarina hã 're aimorĩ tõ.

²⁶ E marĩ wa. Ta hã ma tô aibâ ahâ na te te 're awamnarĩ. Ahâ uptabi na ma tô duré te te 're a'uprosi.

²⁷ Isõrõwa u 're ane mono wamhã, te za bâdâdi 're idadâ'â za'ra mono zép te u hã 're aimo, bâdâdi ãma idahâimana huture u hã.