Provébiu 6 - ꞌRe Ihâimana Uꞌâsi Mono Zadawa Wasuꞌu

Danhimiza'rese'õ na rotizé wasu'u

¹ Ĩ'ra, e dahâiba wapto'wa na te marĩ wa'âbâ'wa na dama 're aihâimana mo.

² E ma tô asisito, aimreme na dama iropisutu zarina hã.

³ Tahawa, ĩ'ra, danhib'ratamhã te oto aihâiba. Tahawa, ãne wi aiwatobro da wamhã, ma'ãpé te te aima rowairébé da, aimreme tete na tiwi waptẽrẽ da itẽme aimorĩ su'u.

⁴ Ãhã õ ré hã asõtõ tõ, duré aiwa'utu tõ a'â.

⁵ Ma'ãpé si norĩ, duré abaze norĩ, sô i'aba'wa norĩ wi 're isimani za'ra mono ne, asitobzém hawimhã aiwatobro.

⁶ Aiwa'a za'ra wa'aba norĩ, 'rãti norĩ 're ihâimana za'ra mono zém na rosa'rata za'ra wa'aba, marĩ hã ãma waihu'u za'ra wa'aba da!

⁷ Ta norĩ hã sib'ihâ'a õ di, sib'apito za'ra õ di, duré si'i'rãnho'õmo za'ra õ di.

⁸ Tane nherẽ, wahum na hã te tisazéb da, te te sima 're 'rã'õtõ za'ra, ubumro siromo sa 're hâimana za'ra mono da, tãi 'rowib da hã.

⁹ Aiwa'a za'ra wa'aba norĩ, e momo te za asimiwaptâ wamhã, anomrozé hã i'rãsutu za'ra wa'wa. Rob'upi zei õ 'wa norĩ, e niwa te za asimiwaptâ hawimhã aptâ'â wi tiwi ai'utu za'ra wa'wa.

¹⁰ Iwa'a te za ãne tinha: “Wa za a'â nhono suru na. Wa za a'â ĩsitété sina suru na ĩwa'utu da hã nomro.”

¹¹ Tawamhã nomro ré, te za simarĩ ãna ihâimanazé hã sô wi, ro'wa na isimisaihuri dazô 're isihutu mono ne, te te susi da.

¹² Aibâ norĩ taré pese wasété na 're ihâimana za'ra mono norĩ hã te tizadawa nhipese na si te te dama 're rowasu'u za'ra.

¹³ Te dama 're tomre za'ra, te te 're da'rãiwamnarĩ za'ra mono da hã. Te duré 're sirési za'ra, sadawa nhipese na te te dama 're rowasu'u za'ra mono ré.

¹⁴ Simirosa'rata wasété na 're hâimana za'ra mono wa, te õne u'âsi te te sima 're rowa'õtõ za'ra, marĩ te te 're i'manharĩ wasété za'ra mono zéb da hã. Te duré ro'wa'rutuzém na hã ropâ te te dama ãma 're ropé.

¹⁵ Tahawa, te za sa'rese ãna waptu na ropipa hã sô tiwisi za'ra, tiwi 'masimani ãna hã za.

^16-19 7 na marĩ iwasédé, Uburé Danhib'apito ma i'ru, ã norĩ hã: 'râwi 're idasi'madâ'â ze za'ra mono, dazadawa nhipe, danhib'rata na iwẽ pãrĩ, danhimirosa'rata wasété na da te dasima 're irowa'õtõ za'ra mono, marĩ 'manharĩ wasété zéb da, sa'ẽtẽ dapara hã te te 're idanhimroi mono, dazadawa nhipese na dama dawasu'u, duré dasiwaihu'u 'rem nherẽ, dasi'wapé zani'wa.

Dahâiba na dasina danhimisaihuri isimimnhasi wasu'u

²⁰ Ĩ'ra, ma'ãpé aimama te te aima 're iroti mono zé hã 're wapari pese mono. Duré ana marĩ na te te ãma aima 're irowasu'u mono zém na hã niwamhã ãma aipo're si'âri tõ.

²¹ Aima imreme zahuré zé hã, ma'ãpé aipẽ'ẽ na asima 're tété u'âsi mono.

²² Nimomo 're ane mono wamhã, te za isimiroti zahuré hã te te 're asaprõni wẽ. Duré te za bara na hã asõtõ ré ai'wawimhã 're simapa. Bâtâ na te za duré tô te te aima 're roti.

²³ E marĩ wa. Isimiroti zahuré zé hã rob'uiwẽzém ne te aima 're hâimana. Duré isimiwaihu'u zahuré zé hã 're idahâimana wẽ za'ra mono waihu'uzéb da, te aima 're hâimana.

²⁴ Ta hã te za pi'õ 're imorĩ wasété hawimhã te te 're asani, timreme na te te 're i'aipibui mono zém hawimhã.

²⁵ Tiwẽ na te te 're aipibui mono wamhã, duré te te 're ai'madâ'â pese mono wamhã, aipẽ'ẽ na sô 're asitai mono tõ.

²⁶ Pi'õ iwa'âbâ zô 're isisõmri mono wa'â hã, i'u'ẽtẽ wapu wẽ'ẽi wa'âbâ ne hã. Tazahã pi'õ mro ré nherẽ, aibâ te te âri wamhã, te za 'râwi tihâimanazé hã siwi uprosi.

²⁷ E uzâ hã asõ're niwĩmhã aipamhã âri waihu'u pese di, ai'uzazé te te aiwi hâ zata ãna hã.

²⁸ E pré'a nhisiwimhã aimorĩ waihu'u pese di, te te aipara zata ãna hã.

²⁹ Tane ni'wa hã, pi'õ mro ré nherẽ, iré 're sõtõ mono wamhã, tãma simimnhasi uptabi di. Ãne ni'wa te te 're 'manharĩ mono wamhã, te za sa'ẽtẽ na te te 're robzépata.

³⁰ Ni'wa hã mra te te isépata zarina, dasa te te simi'uri wamhã, da te iwẽ'õ pese dai õ di.

³¹ Tane nherẽ, isimisaihuri hã da te oto upsibi mei wamhã, te te dawi isimi'uri na hã 7 na ãma isahu na hã te za wa'â, itede'wai ma hã, uburé isimarĩ hã tiwi si'utõrĩ da nherẽ.

³² Tane nherẽ, aibâ, pi'õ mro ré nherẽ, ãma 're isimisaihuri mono hã ta hã te hâimana nhimiza'rese'õ na 're hâimana. 'Râwi te za õ hã tihâimanazé siwi uprosi.

³³ Ti'wa're na te za te te 're robzépata. Duré niwamhã rowazébzé tãma isi'utõrĩ da hã mare di za.

³⁴ E marĩ wa. Pi'õi mro hã da te âri wa, imro te te i'umnhasi zarina, te za 're siti'ru pusi. Duré isimi'ruiwa'âbâzé isitõ da hã mare di.

³⁵ Tahawa, tinhiti'ru wa'âbâzé te te sima iwẽ da hã mare di. Duré taré danhibzari na isiti'ruzé hã da te ãma tiwi i'uprosi da hã mare di za, sa'ẽtẽ nherẽ.