Provébiu 5 - ꞌRe Ihâimana Uꞌâsi Mono Zadawa Wasuꞌu

Dasina 're idanhipsaihuri za'ra mono na rotizé wasu'u

¹ Ĩ'ra, ma'ãpé ĩnhimirowaihu'u wẽ na te aima irotizé mono na 're ĩwapari pese mono, ãma 're rob'madâ'â waihu'u mono da.

² Ãne wamhã, te za niha na hã 're i'aihâimana mono zéb da hã iwaihu. Te za duré marĩ na 're irobzanhamri wẽ mono zarina asimiza'rese wẽ hã te te 're aihâi'ré.

³ Pi'õ siwa'ru 're ihâimana mono zaihâ hã aiwa te ropĩni ise ne 're hâimana. Duré aiwa azeitona wa'u tom ne hã mreme hâ su'u na te 're hâimana.

⁴ Tane nherẽ, ihâimana 'rãsutu ãma hã, te za pi'õ marĩ isé pire ne aibâ ma hã 're hâimana, isé na si, duré sib'ézé 'wa pa 'wa si'uiwa, i'wa pese ne.

⁵ Ta hã 're idadâ'â za'ra mono zém na si 're imorĩzé hã. Tamomop si te ta hã te te 're da'anhimro.

⁶ Ã hã pi'õ, bâdâdi 're idahâimana wẽ za'ra mono zép te na hã 're morĩ õ di. Siwa'ru te niha na hã 're mo. Tane nherẽ, te te sina waihu'u õ di, niha na 're imorĩzém na hã.

⁷ Tahawa, ĩ'ra ãhã na hã te za ĩwapa. Te aima inharĩzé mono na hã ãma aipo're si'âri tõ!

⁸ Ãne na hã pi'õ 're ihâimana mono nhiti 're aihâimana mono. Isõrõwa 'ridawa u hã 'râwimhã 're aimasisi mono tõ!

⁹ Ãnei õ wamhã, aiwasu'u wẽ zé hã te za isimini. Te za duré zahadu aihâiba téb ré atâ, aibâ, da'ãma isiwamri'õ nhib'ratamhã.

¹⁰ Tawamhã a'uwẽ, aima isa'rese'õ norĩ hã te za asimarĩ hã aiwi waibu za'ra. Duré sô 're iromhuri mono zarina, marĩ asima 're i'azani mono hã te za õ norĩ nhib'ratamhã duré aiwi ai'utõ.

¹¹ Aihâimanazé 'rãsutu ãmamhã te za 're aiwazidi mo, aihâiba hã we sidâpâsi aiwi isi'utõrĩ mono zarina.

¹² Tawamhã te za asima inha, ãne: — Iwẽ na da te ĩma 're iroti mono zé hã ĩma 're wapari 'rui mono di! Duré niwamhã danhimiroti wẽ, te ĩsina hã 're sazei waihu'u mono õ di.

¹³ Ĩma roti'wa norĩ hã te 're wapari za'ra mono õ di tô. Ĩnhimipari pese na duré tãma 're ĩhâimana za'ra mono õ di.

¹⁴ Ĩhâimanazé hã ma tô aré ĩwi aipru pese oto, aihĩni norĩ nho'remhã.

¹⁵ Ate â zô ab're ãma si â hã 're hâsi mono, ate ab're hawi 're ipu'u mono si.

¹⁶ E marĩ da, te za asib'â na'rada hã taré 'ri nhi'riti mono na 're ipu'u mo, 're praba mono da.

¹⁷ Aimro ma si hã te za 're asisawi u'âsi mo. Aimawi norĩ ma hã niwamhã 're asisõmri mono õ di za.

¹⁸ Tahawa, ma'ãpé pi'õ na aipréduptéb ré ãma i'aimro na hã ãma asima 're rowẽ u'âsi mono.

¹⁹ Damro pi'õ hã 'madâ'â ze ti, imro ma hã, aiwa aihâ iwẽ uptabi ihâ su 're ihâimana za'ra mono ne hã. Tahawa, aimro nhimizawizé ai'ãma 're ihâimana mono 'wa'rãmimhã te za 're isawi wapti mo. Taha nhimizawizém na si te za asima 're irowẽ mono zé hã te te aima 're sõmri, aipẽ'ẽ to hã.

²⁰ Ĩ'ra, e marĩ da, te za pi'õ siwa'ru 're ihâimana mono hã 're i'a'ruiwapari mono zarina 're i'mazawi hutu mo. E marĩ da, te za pi'õ, aibâ aimawi mro hã 're mrami mono sina iré 're aipasito mo.

²¹ 'Re ihâimana u'âsi mono ma hã tãma 'madâ'â waihu'u pese di, nimomo 're i'ane mono zé hã, duré uburé marĩ 're i'ab'manharĩ mono zé hã.

²² Marĩ 'manharĩ wasété 'wa norĩ wasétézé hã abaze mramizém ne hã te tãma 're hâimana za'ra. Tiwasété na hã te tô 're sisitob za'ra, abazipara na abaze hã imramizém na da te 're iwaibui mono ne.

²³ Te za tô 're dâ'â za'ra, marĩ 'manharĩ wi hã si'wawi 're simi'rãmi waihu'u za'ra mono õ wa. Tahawa, te za siwa'ru hã 're nomro, tinhimiza'rese'õ zarina.