Provébiu 31 - ꞌRe Ihâimana Uꞌâsi Mono Zadawa Wasuꞌu

Apito Remuwéhé ma, rotizé wasu'u

¹ Ã hã, apito Remuwéhé na nhimiroti ipire na ti'ra ma hã ãne na:

² Ĩ'ra, ĩma i'asawi uptabi hã, te aiwaptẽrẽ wa, te te ãma ĩzada'âbâ zarina i'aipodo.

³ Pi'õ norĩ na aihâiba na asiptetezé hã 're uprosi mono tõ, apito norĩ te te 're i'uprosi za'ra mono na hã.

⁴ Apito norĩ uwa 'rãi wa'u isé te te 're i'âhuri mono da hã ibâi õ di, duré ihâiba amo âwaima zama hã.

⁵ Te te 're âhuri mono wamhã, roti na rowaihu'uzé dama 're ihâimana za'ra mono na hã ãma 're ipo're pu'u mono da hã mare di. Duré da te 're iwati za'ra mono norĩ ma, i'uwaibaba na te te tãma 're rowairébé za'ra mono na hã te te ãma uwaimrami õ di za.

⁶ Âwaima, te za tô idâ'âzéb u iro'rutu ma 're ihâimana za'ra mono norĩ ma si, da te tãma 're sõmri za'ra, duré te te 're irobzépata za'ẽtẽ za'ra mono norĩ ma si,

⁷ ta norĩ hã te te 're âhuri mono wa, simarĩ ãna 're ihâimana za'ra mono zém na, duré robzei ãna si 're ihâimana za'ra mono zém na si'ãma 're po're pu'u za'ra mono tõ da.

⁸ Ma'ãpé 're isipawapto waihu'u za'ra mono õ norĩ hã aimreme na 're a'upari wẽ mono. Duré romnhiwasi 're inomro mono norĩ 'wawimhã 're asimi'rãmi mono, i'uwaibaba na si tãma 're arowairébé mono da hã.

⁹ Aimreme na te za tô õ norĩ hã 're i'a'upari wẽ mo. Te za duré i'uwaibaba na si tãma 're i'arowairébé mo, isibrob'õ norĩ ma, duré marĩ zô tiwi 're iro'wanhi'riti za'ra mono norĩ ma zama.

Damro sipi'õ iwẽ wasu'u

¹⁰ Damro iwẽ isõpẽtẽ da hã pire uptabi di! Ta hã, ẽtẽ waipo nhipai u hã wẽ uptabi di!

¹¹ Imro ma hã te umnhasi uptabi na 're hâimana. Duré niwamhã imro wi, marĩ iwẽ zô tiwi sô iro'wanhi'riti da hã mare di.

¹² Bâtâ bâre te õne u'âsi iwẽ si timro ma, te te 're ab'manharĩ, niwamhã marĩ iwasédé te te tãma 'manharĩ ãna.

¹³ Ta hã te pone'ẽrebâ zéré mapu hâ zéré hã te te sima 're apisutu, duré buru teihi ne zama, da'uza na tãma romhuri ze na te te ãma 're ab'manharĩ mono da.

¹⁴ Õ hã te romhâ hawi dasa tinhorõwa u hã te te 're a'wapé, uba're romhâ hawi ro te te 're i'a'wapéi mono ne.

¹⁵ Bâdâ 'rãi watobro õ ré, te za udu, 'ri 're ihâimana za'ra ma, dasa te te 're ab'manharĩ mono da hã, duré tãma iromhuri'wa norĩ ma, te te tãma 're apisutu mono da, isimiromhuri za'ra hã.

¹⁶ Tawamhã te za duré daburu te te sima azabui mono pari, sima uipra. Taha pari rob'uiprazé te te sima i'a'ubumro na te za uwa 'ru hã a're.

¹⁷ Tinhiptede te duré te te 're 'manharĩ, romhuri pese 'wa, isiptede.

¹⁸ Uburé isimiromhuri wa'âbâzé hã tãma waihu'u pese di. Duré ãma imara simei pese zéb u te õne haré te te 're romhuri.

¹⁹ Tinhib'rata na te duré abazi hã te te 're anhorõ, watõmo na.

²⁰ Isibrob'õ norĩ hã, duré marĩ zô tiwi 're iro'wanhi'riti za'ra mono norĩ hã te duré te te 're apawapto.

²¹ Rowahâzé 're pusi mono wamhã, 're hâtâ'â waihu'u mono õ di, isõrõwa 're, 're ihâimana za'ra mono norĩ te, hâ wi dasi'uzazé hã tãma hâimana siromo za'ra wa.

²² Tinhimiwaptâ ubuzé hã te duré te te sima 're ab'manharĩ. Abazi isõrõ 'raprihâire 'manharĩ na si te duré 're si'uza, ihâpré warõ iwa'âbâ za'ẽtẽ na si.

²³ Imro hã te 'ri nho'õmo 're, 're idahâimana za'ra mono norĩ ma, wazé pese na 're hâimana, dama ipire norĩ siré.

²⁴ Da'uza hã da'usisizé me roptede'wa norĩ ma, te te 're i'awede mono da hã te duré te te 're ab'manharĩ.

²⁵ Siptete di. Duré dama hã wazé pese di. Hâtâ'â waihu'u õ di, niwa romhutu'õ wab da hã.

²⁶ Tinhimirowaihu'u wẽ na te 're mreme. Isimizawi pese zém na te duré te te dama 're aroti.

²⁷ Niwamhã wa'a na 're hâimana mono õ di. Õne u'â te uburé 'ri 're, tinhimi'madâ'â norĩ hã te te 're ab'madâ'â pese.

²⁸ I'ra norĩ te te duré siwi 're wasu'u wẽ, dama hã. Imro zama te duré te te 're wasu'u wẽ, ãne:

²⁹ “Damro norĩ iwẽ hã ahâ uptabi na 're hâimana za'ra mono nherẽ, a hã uburé danhipai u aiwẽ uptabi di.”

³⁰ Pi'õi mreme wazidi hã isadawa nhipe. Duré ihâiba wẽ hã si'utõrĩ pese di. Tane nherẽ, pi'õ, Uburé Danhib'apito te te 're iwazé mono hã te za tô da te dasima 're wasu'u wẽ za'ra.

³¹ Uburé marĩ te te 're i'ab'manharĩ wẽ mono zéb zarina tãma 're awa'âbâ mono. Duré uburé isimiromhuri wẽ na hã aihĩni norĩ nho'a ãma 're aiwata mono.