Provébiu 29 - ꞌRe Ihâimana Uꞌâsi Mono Zadawa Wasuꞌu

¹ Ni'wa marĩ na te te 're i'upai mono zém na nasi da te tãma pẽtẽ nherẽ, pẽ'ẽ tete na dawi 're hâimana u'âsi mono wamhã, te za siwa'ru bâtâ na po're pu'u õ pese na ropipa hã sô wi.

² Sena na i'uwaibaba na si 're ihâimana za'ra mono norĩ, 're si'i'rãnho'õmo za'ra mono wamhã, te za da te ãma dasima 're rowẽ za'ra. Tane nherẽ, iwasété norĩ 're si'i'rãnho'õmo za'ra mono wamhã, te za iwẽ'õ te 're dasiwapsari za'ra.

³ Aibâ ti'rãiwaihu'u wẽ te te sima 're isawi mono na, te za timama ma hã te te ãma tãma 're rowẽ zani. Tane nherẽ, ni'wa pi'õi wasété ãma si 're morĩ wamhã, te za tinhimarĩ hã taré pese te te siwi ãma 're a'uprosi.

⁴ Sena na apito dama 're hâimana za'ra mono wamhã, te za ti'ai wa'õtõ nho'õmo 're, 're idahâimana za'ra mono hã siptete na 're hâimana za'ra. Tane nherẽ, dama i'rãnho'u dapawa'âbâzé sipo'ore da te tãma 're sõmri za'ra mono da, te te ãma dawi 're hâimo uptabi mono wamhã, te za tinhimi'madâ'â norĩ hã ti'ai 'remhã siwi uprosi.

⁵ Ni'wa tisiwaihu'u ma, timreme wazidi na senai'õ na, te te 're robzanhamri mono wamhã, te za 'râwi ãma 're simrami, niha timreme na hã.

⁶ Wasété na 're ihâimana za'ra mono norĩ hã, tiwasété na te za tô tinhitobzé hã te te 're waibu. Tane nherẽ, sena na i'uwaibaba na 're ihâimana za'ra mono norĩ si, te za tô sima iwẽ na tãma rowẽ sina hã 're nomro.

⁷ Sena na 're ihâimana za'ra mono, te simarĩ ãna 're ihâimana za'ra mono norĩ 'madâ'âzé, isimarĩ pese 'madâ'âzé me aiwam na 're hâimana mono da hã te te sima 're wẽ za'ra. Tane nherẽ, wasété na 're ihâimana za'ra mono hã, ãne na hã te te ãma 're rosa'rata za'ra mono õ di, tarére wa tãma za'ra hã.

⁸ Da'ãma 're iwa'ẽ za'ra mono hã te za 'ri nho'õmo mono bâ ro'wa'rudu hã te te dawi 're sani za'ra. Tane nherẽ, te za 'rãiwaihu'u wẽ na 're ihâimana za'ra mono hã dasisada dahâimana wa'ro zé hã te te dawi 're uprosi za'ra, rowẽ na si apâ 're romhâimana mono da.

⁹ Aibâ isimiza'rese wẽ, isimiza'rese'õ da hâimana da, dama rowairébézéb u morĩ wamhã, te za isimiza'rese'õ hã taré nasi ãma wasété. Te za duré nasi sahi sina robzanha. Tawamhã ro'wa'rutu uptabi di za.

¹⁰ Dapãrĩ'wa norĩ hã te sena na 're ihâimana za'ra mono norĩ zada 're siti'ru wairébé. Tane nherẽ, te iwẽ norĩ hã i'wawimhã 're simapa za'ra.

¹¹ Isimiza'rese'õ norĩ hã te sõ'awi 're isahi za'ra mono zém na hã 're sihâi'ré za'ra. Tane nherẽ, wẽ na 're ihâimana mono hã te za ari'iwi 're hâimana mono da si 're sitété.

¹² Dama i'rãnho'u dazadawa nhipese na romreme te te 're wapari za'ra mono wamhã, te za uburé ipa'upari'wa norĩ hã tiwasété za'ra.

¹³ Isimarĩ'õ norĩ, isimarĩ'õ wati'wai me te ãhã si aiwa tãma 're hâimana zahuré: Uburé Danhib'apito ma tô rob'madâ'âzéb da hã ito hã te te tãma 're 'manharĩ za'ra.

¹⁴ Dama ipire hã isimarĩ'õ ma, i'uwaibaba na si te te tãma 're rowairébé za'ra mono wamhã, te za i'rãnho'õmo na dama 're hâimana hâ za'ra.

¹⁵ Da'ra da te 're ihâ za'ra mono zéb zarina, te za i'rãiwaihu'u wẽ hã da te tãma 're sõmri za'ra. Tane nherẽ, ai'uté ahâri ãna, sihawim na marĩ sima iwẽ na, siwa'ru te te 're i'manharĩ mono zarina, te za tina wi hã te te ãma 're rowazéb zani.

¹⁶ Iwasété norĩ ipire na ihâimana za'ra zéb u oto 're sarõtõ za'ra mono wamhã, te za dawasétézé hã te te sina hâimo, isarina. Tane nherẽ, sena na 're ihâimana za'ra mono norĩ hã te za apto'oré hã iwasété norĩ rere'ezé hã te te 're 'madâ'â za'ra.

¹⁷ Ai'ra norĩ ma, te za 're iropipa za'ra mo. Ãne wamhã, te za rowẽ hã te te aima sina 're sõmri za'ra, duré aipẽ'ẽ 're aima 're irobzei mono zéb zama hã.

¹⁸ Ti'ai wa'õtõ nho'õmo 're, 'Re ihâimana u'âsi mono nhimiroti zarina 're idanomro mono õ ãma hã te za siwa'ru 're dahâimana za'ra, isiti. Tane nherẽ, 'Re ihâimana u'âsi mono nhimiroti te te sima 're itété za'ra mono si tãma 're rowẽ uptabi za'ra mono di za.

¹⁹ Marĩ dai õ di, dama romhuri'wai ma damreme na si da te tãma ipẽne hã, õ hã tinhib'ihâ'a mreme te te sadaihu'u wẽ nherẽ, te te wapari dai õ wa.

²⁰ E aima waihu'u pese di, ni'wa õne haré timreme te te ime hã, simirosa'rata ãna. Taha ma hã rowẽ õ di za. Isimiza'rese'õ ma, tãma rowẽ di za, õhõ nhipai u.

²¹ Dama romhuri'wa ai'uté na hâimana ré ihâ'â zarina marĩ zô 're isiti'ru mono, siwa'ru marĩ da te tãma 're i'manharĩ wẽ u'âsi mono hã te za nimahã na hã sima wẽ, uburé marĩ tede'wa na oto 're hâimana mono da.

²² I'rãi wa'ro su'u norĩ hã te za damreme na dasi'wapé hã te te 're poto za'ra, duré ro'wa'rutu zama.

²³ 'Râwi 're idasi'madâ'â ze za'ra mono zéb zarina, te za 'râwi 're dasiwazéb za'ra. Tane nherẽ, dama dawapu na 're idasi'madâ'â mono zéb zarina, te za dama dawazé pese zé hã da te dasina 're sani za'ra.

²⁴ Isimisaihuri siré 're ihâimana mono hã, te tô 'râwi tisi'ru na hã 're hâimana. Dama rowairébézéb ãma sena na dama siwasu'u wamhã, te za tô tãma rob'manharĩ wasété ni. Tazahã ãne na sena na dama siwasu'u õ wamhã, te za 'Re ihâimana u'âsi mono hã niha hã ropipa tãma pisutu.

²⁵ Simimnhasi uptabi di, 'râwi dasima 're idapahi za'ra mono zé hã. Tane nherẽ, ni'wa 'Re ihâimana u'âsi mono si te te sina 're umnhasi mono wamhã, te za sima iwẽ na 're hâimana, tãma romnhimimnhasi ãna.

²⁶ Dama ipire hã te te 're ida'awẽsãmri mono da hã, te uburé da te dasi'ãma 're rosa'rata ze za'ra. Tane nherẽ, te 'Re ihâimana u'âsi mono si dahâiba mono bâ te te sima 're ida'awẽ mono zéb zarina te te dama 're arowairébé, i'uwaibaba na.

²⁷ Wẽ na 're ihâimana za'ra mono hã te senai'õ na 're ihâimana za'ra mono hã te te siwi 're wẽ'õ pese za'ra. Duré wasété na 're ihâimana za'ra mono hã te wẽ na 're ihâimana za'ra mono hã asa te te siwi 're wẽ'õ pese za'ra, aiwab da.