Provébiu 26 - ꞌRe Ihâimana Uꞌâsi Mono Zadawa Wasuꞌu

Ihâimana nhimiza'rese'õ wasu'u

¹ Rob'ré siwaprã rowahâzé pĩni u'ẽne 're ita'a mono ne, duré niha wamhã, roptehâri siwaprã tã 're ita'a mono ne, ni'wa hã ihâimana nhimiza'rese'õ ãma 're iwata mono zé hã te te rowazari õ di, sadai õ wa.

² Buru'õtõre wara wairébé ãna 're isisa'rei mono ne, iwẽ ma, ropipa da te ãma 're ipisutu za'ra mono zém na hã da te ãma 're waibui waihu'u mono õ di.

³ Awaru ahârizéb da, te ihâ nhorõ hã sada 're hâimana za'ra. Duré awaru po're pore da, te isi'uwazi nhi'odo iwata wazizé hã sada 're hâimana za'ra. Tane te wedehu waré hã, hâimana nhimiza'rese ãna 're ihâimana za'ra mono norĩ ba ãma i'ahârizéb da hã, sada 're hâimana za'ra.

⁴ Ihâimana nhimiza'rese'õ nhinharĩzém na, aiwam na a hã ãma sada'âbâ wamhã, te za õhõ sine tawamhã oto 're aihâimana mo.

⁵ Ihâimana nhimiza'rese'õ nhimirobzanhamri wa'rãmip si ãma sada'âbâ, ti'rãi waihu'u pese na te te sina rosa'rata upa tõ da.

⁶ Ni'wa tipara te te isizâri ne, niha wamhã, duré marĩ isé te te izâ'rẽne ne, te 're hâimana, ihâimana nhimiza'rese'õ romreme ré, da te 're satõrĩ za'ra mono wamhã.

⁷ Imorĩ'õ hi hã taré 're isiwaiwẽrẽ za'ra mono ne, te rowaihu'u wẽ na ihâimana nhimiza'rese'õ nhimirobzanhamrizé hã taré pese 're hâimana.

⁸ Isimiza'rese'õ ãma 're idawata za'ra mono zé hã aiwa powawẽ hâ 'manharĩ, ẽtẽ ré da te 're iwasisi za'ra mono ne hã.

⁹ 'Wabzéré pa nhipti i'rã siwamnarĩ norĩ nhib'rata 're ihâimana mono ne, te rowaihu'u wẽ na ihâimana nhimiza'rese'õ norĩ nhimirobzanhamrizé hã taré pese 're hâimana za'ra.

¹⁰ Roptede'wa siwa'ru simiza'rese ãna 're ihâimana za'ra mono, te te tãma 're romhuri za'ra mono da, te te 're waibui mono wamhã, te za uburé tãma iromhuri'wa norĩ wi hã te te tiwi 're rowamnarĩ za'ra, romhâ pese 'wa ti'i na siwa'ru te te 're ida'a'u'a mono ne.

¹¹ Wapsã tinho'o te te 're huri mono da, apâ sô 're isi'ãsi za'ra mono ne, te za isimiza'rese'õ, tinhimiza'rese õ zarina marĩ hã te te 're ab'manharĩ zahu.

¹² E aima waihu'u pese di, ni'wa hã ti'rãiwaihu'u wẽ na 'râwi 're isi'madâ'â zei mono hã. Taha ma hã rowẽ õ di za. Isimiza'rese'õ ma si, tãma rowẽ di za, õhõ nhipai u iwa'rãmi.

Iwa'a wasu'u

¹³ Iwa'a hã te za tinha ãne: “Hu'u zérépa te bâdâdi wamhã nhamra. Te te ĩ'âri wamhã, bété.”

¹⁴ 'Ridawa tétézé taré 'ridawa ré nasi isipizari ne, te za iwa'a hã taré nasi aipiza, tinhimiwaptâ wamhã.

¹⁵ Sima iwa'a, tizadawa u tisa hã te te sima 're zai waihu'u mono õ di, wa'a uptabi wa.

¹⁶ Iwa'a hã te duré si'ãma 'râwi te te 're rosa'rata, 7 na aibâ norĩ i'uwaibaba na si 're isimizada'âbâ za'ra mono nhipai u marĩ tãma iwaihu'u pese na hã.

Rowaihu'u wẽ hâiba amoi wasu'u

¹⁷ Ni'wa damreme na dasi'wapé tẽme itei õ nherẽ, õne haré isébré hã, aiwa wapsã rowẽ na te te ro'razâri ré ipo're na da te 're iwaibui mono ne hã.

^18-19 Ni'wa tisiré ma isadawa nhipe, te za taré mreme to na te te inharĩ na hã tãma siwasu'u. Ta hã te i'rã siwamnarĩ ti i'rã'wa ro'o ré siwa'ru te te 're i'anhamra mono ne hã 're hâimana.

²⁰ Mimi õ wamhã, uzâ hã te za dârâ. Tane robâsi zei 'wa hâimana õ wamhã, te za duré damreme na dasi'ahâri hã ai'utõ.

²¹ Wedepro hawimhã te pré'a hã 're hâimana. Duré mimi hawimhã te uzâ hã 're hâimana. Tane te duré isi'wapé zei hawimhã dasi'wapé hã 're sãna'rata.

²² Dabâsi zei'wa norĩ mreme hã aiwa dasai wa'õtõre ise, dapẽ'ẽ u 're isisisi mono ne hã te 're hâimana.

²³ Damreme hã iwẽ newa te romana wawimhã 're hâimana, dapẽ'ẽ 'remhã wasété uptabi nherẽ, zé'a na ub'rẽ hã waipo da, da te 're i'ma'wamarĩ mono ne.

²⁴ Ihâimana si'ahâ hã te te 're da'ruiwapari ahâ za'ra mono nherẽ, te timreme wẽ na hã te te 're suwa za'ra, sadawa nhipese na.

²⁵ Ta hã dama 're mreme wẽ mono nherẽ, te te inharĩzém na hã ãma 're sazei mono õ di za. E marĩ wa. Ipẽ'ẽ 'remhã isimirosa'rada hã wasété uptabi wa.

²⁶ Da'ruiwapari na sima'uri sina dawi 're hâimana mono da nherẽ, te za uburé dasiwi da te 're upsibi nhamra, tiwasédé te te 're i'manharĩ mono zém na hã.

²⁷ Ni'wa hã ab're 'rehâ iwa 're darere'e mono da, te te dama ab're nherẽ, te za sisa'rese ãna iwa waptãrã. Duré ni'wa ẽtẽ tõmo wawẽ, te te dazô pizari mono nherẽ, te za ẽne hã apâ sô tõmo siwairĩ, te te wĩrĩ da hã.

²⁸ Ni'wa isadawa nhipe, te te 're ida'a'ruiwapari mono zarina, te za te te ãma 're da'a'u'a, niha na hã. Imreme nhipe hã te za duré tinhimirob'rãmi na ropipa hã te te dazô 're azani.