Provébiu 2 - ꞌRe Ihâimana Uꞌâsi Mono Zadawa Wasuꞌu

Rowaihu iwẽ zarina rowẽ hã dama 're ihâimana za'ra mono zé wasu'u

¹ Ĩ'ra, wa hã te aima 're iroti mono zé hã awaihu'u mono. Duré aipẽ'ẽ 'remhã asima tété.

² Ma'ãpé rowaihu'u wẽ 'wa norĩ hã 're wapari pese za'ra mono. Te te ãma 're irowasu'u za'ra mono zé 're waihu'u mono da asima sô 're airĩtĩ mono.

³ Ĩhe, rowaihu iwẽ si asima 're waptẽrẽ mono. Duré sa'ẽtẽ aimreme 'rãihâ na ai'rã nhimiza'resezé hã 're waptẽrẽ mono.

⁴ Ma'ãpé ẽtẽ waipo prã prata zô, niha wamhã, marĩ wa'âbâ za'ẽne sima'uri pese na 're isimi'wara mono zô 're idarĩtĩ za'ra mono ne, te za ãhã zô si asima 're airĩtĩ mo.

⁵ Ãne hã 're 'manharĩ mono wamhã, te za Danhib'apito 'Re ihâimana u'âsi mono wazébzé hã iwaihu. Te za duré i'aza'rese mo, rowaihu'u wẽ zé hã.

⁶ Uburé Danhib'apito si rowaihu'u wẽ nhomri'wa hã. Ta hawip si te duré da'rã nhimiza're hã we 're ne.

⁷ Te duré sena na 're ihâimana za'ra mono hã te te 're apawapto. Te isi'uwazi 'manharĩ dasi'wawi 're idasimapa za'ra mono zém ne hã te te 're 'madâ'â za'ra.

⁸ Ni'wam norĩ hã i'uwaibaba si te te 're ida'apawapto mono norĩ 'wawimhã te 're simapa. Imreme te te 're iwapari pese za'ra mono norĩ hã te duré te te 're a'madâ'â pese.

⁹ A hã ĩwapari wamhã, marĩ i'uwaibaba na si, duré sena na 're dahâimana za'ra mono wa, da te 're i'manharĩ za'ra mono zé hã te za i'awaihu'u mo.

¹⁰ Ãne wamhã, ai'rãi waihu'u wẽ na te za sena na 're aihâimana mo. Tawamhã te za asimiza'rese wẽ zém na hã aipẽ'ẽ 'remhã asima irowẽ waze.

¹¹ Asimirowaihu iwẽ hã te za ai'wawimhã 're simapa.

¹² Te za marĩ te te 're i'manharĩ wasété za'ra mono norĩ hâimanazé wi hã te te 're asõ'reptu, sadawanhipese na te te dama 're irowasu'u wasété za'ra mono norĩ wi hã,

¹³ a'uwẽ tihâimanazé iwẽ te te 're rẽme za'ra mono wa, robra na oto 're ihâimana za'ra mono norĩ wi hã,

¹⁴ marĩ iwasédé te te 're i'manharĩ ze za'ra mono wi hã,

¹⁵ sena na 're ihâimana za'ra mono õ norĩ, da te 're i'umnhasi waihu'u za'ra mono õ norĩ wi hã.

¹⁶ Ãne wamhã, pi'õ iwasédé timreme nhipese na te te 're aipibui mono wamhã, te za asimirowaihu iwẽ hã te te 're aipawapto, imreme na ãma 're ai'uté mono da,

¹⁷ préduptéb ré 'Re ihâimana u'âsi mono nho'a timro ma te te iropisutu wẽ zém na po're si'âri wa, timro te te irẽme hã.

¹⁸ Isõrõwa u aimorĩ wamhã, te za bâdâdi 're idadâ'â za'ra mono zép te u hã aimo. Õwa ni'wa morĩ wamhã, te za 're idadâ'â za'ra mono zép 'rata 'râwi tihâiba.

¹⁹ Ã hã pi'õ tẽme aibâ morĩ wamhã, apâ bâdâdi iwẽ na 're ihâimana mono zéb u te te sina siri waihu'u õ di za.

²⁰ Tahawa sena na, duré i'uwaibaba na si 're ihâimana za'ra mono norĩ nhirã na si 're aihâimana mono.

²¹ E marĩ wa. Wẽ na i'uwaibaba na si 're ihâimana za'ra mono norĩ si te za wanhipti'ai 'remhã 're hâimana za'ra.

²² Tane nherẽ, 'Re ihâimana u'âsi mono hã te za iwasété norĩ na te te 're awamro. Tiwasédé te te 're i'manharĩ za'ra mono norĩ hã te za te te 're azani, rob're hã ti'ai hawi, da te 're isa'o'o za'ra mono ne.