Provébiu 19 - ꞌRe Ihâimana Uꞌâsi Mono Zadawa Wasuꞌu

¹ Danhimarĩ õ na sena na i'uwaibaba na si 're idahâimana za'ra mono zé hã wẽ uptabi di, sadawa nhipese na isimiza'rese'õ 're ihâimana mono zém nhipai u hã.

² Ni'wai ma hã marĩ tãma waihu'u õ nherẽ, te te sima 're iwẽ mono te te 're i'manharĩ mono da hã wẽ õ di. Duré ni'wa wara sina marĩ te te 'manharĩ wamhã, te za ãma upa.

³ Danhimiza'rese'õ na niha na 're idanomro mono zéb zarina, te za dahâimanazé hã da te dasiwi 're wasété pese za'ra. Duré dapẽ'ẽ 're te za Uburé Danhib'apito da hã 're danhiti'ru za'ra, ta hã te te upa newa.

⁴ Isibro pe hã te za tisiwaihu, ahâ na te te sitẽme 're a'wani. Tane nherẽ, isimarĩ'õ siwaihu'u si te za te te 're arẽme.

⁵ Da'ãma rowairébézéb ãma sena na dawasu'u'õ'wa hã, isimihâzé wi 're isimani mono da hã mare di za.

⁶ Dama ipire na 're ihâimana za'ra mono norĩ, te te 're dawẽsãmri za'ra mono da hã, te za uburé dasima 're danhopré. Duré sapa'abâ isibzari ze siwaihu'u norĩ hã ahâ uptabi di.

⁷ Isimarĩ'õ, isisãnawã uptabi te te siwi 're wẽ'õ mono nherẽ, e te aré bété isiwaihu'u norĩ hã te te sina 're tété za'ra. Mare di. Aiwa te za tô te te siwi 're wẽ'õ pese za'ra. Tahawa isiwaihu'u norĩ te te 're pawaptob za'ra mono da, duré sô 're rĩtĩ za'ra mono nherẽ, nimame te te i'manhopẽtẽ da hã mare di za.

⁸ Ni'wa ti'rãi waihu'u wẽ zô sima 're rĩtĩ mono wamhã, te tihâimanazé hã te te sima 're sawi. Duré ni'wa 'rãi waihu'u wẽ na 're hâimana mono wamhã, te za tãma 're irowẽ mono zé hã te te sina 're uwaimrami.

⁹ Da'ãma rowairébézéb ãma senai'õ na dawasu'u'wa hã, danhimihâzé wi 're isimani mono da hã mare di. Te za duré isadawa nhipese zarina ihâiba hã ai'utõ.

¹⁰ Isimiza'rese'õ norĩ, sima sipese na 're ihâimana za'ra mono da hã ibâi õ di. Pawa'âbâ ãna te te dama 're iromhuri za'ra mono norĩ hã bété. Dama i'rãnho'õmo norĩ upana te te 're ida'a'madâ'â mono da hã ibâi õ di duré.

¹¹ I'rãi waihu'u wẽ norĩ hã dame 're si'rãi wa'ro su'u za'ra mono õ di. Duré dawasédé, da te tãma 're 'manharĩ mono nherẽ, te te da'ãma 're i'a'madâ'â mono õ zarina te za dasiwi da te 're wazé pese.

¹² Apito 're isahi mono zé hã aiwa hu'u zérépa wairõ ne te 're hâimana. Tane nherẽ, isimizawizé hã aiwa atébré rowarã na du te te 're iwaihi za'ra mono ne hã.

¹³ Da'ra isimiza'rese'õ te za timama wi tihâimanazém na hã tiwi rowamna. Duré damro pi'õ timreme na isimiwati pe hã aiwa â 're itoptõrĩ nhimizahâri za'ra mono õ ne hã.

¹⁴ Da'ra norĩ te za timama uirĩ na isimarĩ hã 'ri hã duré rob'uiprazé hã te te sima 're waibu za'ra. Tane nherẽ, Uburé Danhib'apito si te za damro pi'õ isimiza'rese wẽ hã te te dama 're anhomri.

¹⁵ Dawa'a hã te za aptâ'â si te te dama 're sõmri za'ra. Duré iwa'a hã te za mra hã te te 're sépata.

¹⁶ Ni'wa 'Re ihâimana u'âsi mono nhimiroti te te 're wapari pese mono wamhã, te za 're hâimana hâ. Duré ni'wa isimiroti te te siwi 're wẽ'õ mono wamhã, 're hâimana hutu mono di za.

¹⁷ Ni'wa isimarĩ'õ ma, te te 're rob'manharĩ wẽ mono wamhã, Uburé Danhib'apito ma, marĩ te te a'â taré tãma isõmri ne hã. Tahawa te za isimi'manharĩ wẽ zé wa'rãmi iwẽ hã tãma tisõ.

¹⁸ Ai'ra norĩ hã zahadu prédub õ ré, te za tãma 're iropipa za'ra wa'aba mo. Ãnei õ wamhã, te za tihâimanazé hã te te siwi 're uprosi za'ra, 'râwi.

¹⁹ Ni'wa hã ihâimana wa'ro su nimahã na te te robzépata tõ da, pawaptom nherẽ, sisãmri dai õ di. Duré pawaptob zahu nherẽ, isisãmri da hã mare di. Tahawa, ihâimana wa'ro su'u norĩ te te tô 're robzépata za'ra mono.

²⁰ Ma'ãpé danhimiroti hã 're wapari pese mono, duré asima 're wẽ mono. Ãne wamhã, nimahã na te za ai'rãi waihu'u wẽ na oto 're aimo.

²¹ Dapẽ'ẽ 're, da te 're irowa'õtõ za'ra mono zé hã ahâ di. Tane nherẽ, Uburé Danhib'apito te te dama 're i'apisutu mono zéb zarina si te za tô dama 're wairébé.

²² Ni'wa tinhimizawi pese zém na 're hâimana mono wamhã, ãma 'ruiwapari za'ẽtẽ di. Duré danhimarĩ'õ na 're idahâimana za'ra mono da hã wẽ uptabi di, dazadawa nhipese na 're idahâimana za'ra mono zém nhipai u hã.

²³ Ni'wa, Uburé Danhib'apito te te 're wazé mono wamhã, te za rowẽ na si 're hâimana hâ pese, sima iwẽ na.

²⁴ Sima iwa'a, tizadawa u tisa hã te te sima 're zai waihu'u mono õ di, wa'a uptabi wa.

²⁵ 'Râwi 're isi'madâ'â ze za'ra mono ma, te za da te tãma 're rob'manharĩ za'ra, simirosa'rata waihu'u prã na 're ihâimana za'ra mono norĩ hã sina 're iwata za'ra mono õ zé te te ãma 're waihu'u za'ra mono da. Duré ni'wa, i'rãi waihu'u wẽ ma hã da te tãma 're ipẽtẽ mono zarina, te za rowaihu iwẽ na hã te te sima ãma 're sa'ẽtẽ u'âsi.

²⁶ Ni'wa timama ma, te te rob'manharĩ wasété wamhã, duré tina 'ri hawi te te wazere wamhã, te za timama norĩ hã ãma sisém nomri zahuré.

²⁷ Ĩ'ra, danhimiroti 'manharĩ waparizé rẽme wamhã, te za 're i'awaihu'u mono zé ma hã 're asimirẽme mo.

²⁸ Da'ãma rowairébézéb ãma, dasiwasu'u na da te 're uwaimrami za'ra mono õ wamhã, te za da'ãma 're dawa'ẽ za'ra, rob'uwaibaba na za te te da'ãma 're rowairébé mono õ wa. Iwasété norĩ ma, uburé marĩ iwasédé hã tãma ise.

²⁹ Da'ãma 're idawa'ẽ za'ra mono norĩ da hã te i'ahârizéb da hã da te sada 're sa'ra za'ra. Duré isimiza'rese'õ norĩ da zama, te za iba wi da te 're ipré'é za'ra mono da hã da te sada 're sa'ra za'ra.