Provébiu 17 - ꞌRe Ihâimana Uꞌâsi Mono Zadawa Wasuꞌu

¹ I'u'ẽtẽ wapu wẽ'ẽi 'ré si, da te 're huri mono nherẽ, dapẽ'ẽ 're dama 're irowẽ za'ra mono si, wẽ uptabi di. 'Ri 're dasa isa'ẽtẽ na 're dasaihuri u'âsi mono nherẽ, ãma 're idasihâ za'ra mono hã, taha si wẽ'õ di.

² Pawa'âbâ ãna dama romhuri'wa i'rãiwaihu'u pe hã te za ti'madâ'â'wai 'ra hã sipa, tinhimiwada'uri na, timama ma, te te sina irowazém hiri hã. Taha zarina te za duré imama nhimarĩ zama isisãnawã norĩ siré sima 'mai'â, i'uirĩ na hã.

³ Ẽtẽ waipo pré oru hã, ẽtẽ waipo prã prata me, te za unhama na da te 're pibu za'ra, i'uptabi zô. Tane te Uburé Danhib'apito hã sena na niha na dapẽ'ẽ 're danhimirosa'rata na 're idahâimana za'ra mono zé hã te te 're apibu.

⁴ Iwasété norĩ hã te za tihâiba amoi mreme wasédé hã te te 're wapari pese za'ra. Duré isadawa nhipese norĩ hã te za senai'õ na rowasu'u hã te te 're wapari ze za'ra.

⁵ Ni'wa hã isimarĩ'õ ãma 're wa'ẽi mono wamhã, taha u'âbâ te duré 'Re ihâimana u'âsi mono ipoto'wai ãma hã te te 're wasété. Duré ropipa hã dazô watobro wa, te te da'ãma sima irowẽ hã, tãma rob'manharĩ wasété ãna ihâimana da hã, mare di za.

⁶ Danhihudu hã te za da te 're 'madâ'â ze za'ra, da te 're iwẽsãmri za'ra mono zéb zarina. Tane te za duré da'ra norĩ hã timama hâimanazé hã te te 're 'madâ'â ze za'ra, te te 're iwẽsãmri za'ra mono zéb zarina.

⁷ Isimiza'rese'õ, damreme iwẽ na te te inharĩzéb da hã te te wazari õ di, niwa ãma hâimana õ wa. Duré dama iwazém norĩ hã dazadawa nhipese na rowasu'u hã te te wazari õ di.

⁸ Ni'wam norĩ hã rob'uiprazém na pi'uriwi ãma da'uiprazém na te te 're rosa'rata za'ra, niha na iwa'rãmi da te tãma 're rowairébé za'ra mono da hã, wapu pese na ãma 're isibro pese za'ra mono zéb da hã.

⁹ Ni'wa hã dawasédé da te tãma 're i'manharĩ mono zé te te da'ãma 're 'madâ'â mono õ wamhã, isimizawizé tãma 're ihâimana mono zém na hã te za dama sihâi'ré. Tane nherẽ, duré ni'wa dawasété na te te 're rosa'rata u'âsi mono wamhã, te za sina 're siwãnhizari zahuré.

¹⁰ Ni'wa i'rãi waihu'u wẽ ma, da te pẽtẽ wamhã, te za tihâimana pese zé hã sina uze, te te waihu'u wẽ wa. Tane nherẽ, isimiza'rese'õ hã 100 na da te 're pré'é mono nherẽ, siwaihu'u su'u õ di, tiwasété na hã.

¹¹ Aibâ iwasédé hã te za romhâimanazé iwasété si õne u'â te te 're apoto. Tahawa, da'wapéi'wa da'ãma isiwamri'õ te za itẽme hã satõrĩ ni, te te ãma ro'wa'rutu da hã.

¹² Robzahi ursu wi, i'ra da te tiwi 're iwaibui mono, da te 're sõpẽtẽ za'ra mono wamhã, pipa di. Tane nherẽ, isimiza'rese'õ tihâimana nhimiza'rese'õ zarina marĩ te te 're 'manharĩ mono ré, da te ãma 're sõpẽtẽ mono wamhã, taha si ipipa uptabi hã.

¹³ Ni'wa, marĩ iwẽ da te tãma 're 'manharĩ mono nherẽ, aiwétési iwasédé te te dama 're ab'manharĩ mono wamhã, rowasédé hã isõrõwa hawimhã tãma isi'ré da hã mare di za.

¹⁴ Damreme na dasi'ahâri, 're isãna'rata mono zé hã, aiwa â nhowadazé 're isipo'o na'rata mono ne hã te 're hâimana. Tahawa iwẽ hã ropsiwamnarĩ prãi ré, da te ãma 're irosahâri za'ra mono da si.

¹⁵ Uburé Danhib'apito ma hã maparane tãma iwẽ'õ pe hã te 're hâimana zahuré: Iwẽ norĩ ãma iwasédé hã, da te ãma 're isa'ra mono hã wẽ nherẽ, duré iwasété norĩ marĩ na te te 're upa za'ra mono nherẽ, wẽ na da te 're iwasu'u za'ra mono, marĩ 'manharĩ'õ'wa na.

¹⁶ Isimiza'rese'õ norĩ rowaihu'u wẽ tãma 're hâimana za'ra mono da, rob'uiprazé te te ãma 're i'uprosi za'ra mono hã marĩ dai õ di. E marĩ wa. Ta norĩ hã tô te te waihu'u za'ra dai õ wa.

¹⁷ Ni'wa hã te za tisiwaihu te te 're sawi u'âsi. Ropipa hã sô watobro wamhã, te za isisãnawã ne hã tãma 're hâimana.

¹⁸ Isimiza'rese'õ norĩ si te iwaptoma 're ihâimana za'ra mono norĩ hâiba wapto'wa na 're hâimana za'ra mono da hã te te sima 're wẽ za'ra.

¹⁹ Ni'wa damreme na dasi'wapé te te sima 're isawi mono hã, te tiwasété si te te sima 're sawi. Duré 're isi'madâ'â ze za'ra mono norĩ hã te 'râwi timorĩ nhiptõzé hã te te sina 're uwaimrami za'ra.

²⁰ Ni'wa ipẽ'ẽ 're wasété na 're ihâimana mono hã marĩ iwẽ zô 're isimipari mono da hã mare di. Duré isadawa nhipe hã te za ropipa si te te sina 're a'uwaimrami.

²¹ Da'ra isimiza'rese'õ te za timama ma, robzei'õzép si, duré robzépatazép si te te 're sõmri.

²² Dapẽ'ẽ 're rowẽzé hã te wedenhi iwẽ uptabi ne hã dama 're hâimana. Tane nherẽ, õne u'â dapẽ'ẽ 're robzei ãna 're idahâimana za'ra mono zé hã te za atãma na te te 're danhib'uwa zani za'ra.

²³ Da'ãma 're irowairébé za'ra mono 'wa, sena na 're ihâimana za'ra mono õ norĩ hã te za rob'uiprazém na dama 're siwede za'ra. Tahawa rob'uwaibaba na hã te te dama 're rowairébé mono õ di za.

²⁴ Isimiza'rese wẽ, te za ti'rãi waihu'u wẽ zô si sima 're sõpré. Tane nherẽ, isimiza'rese'õ te za titõmo na marĩ te te sima 're wẽ ahâ za'ra, misi haré te te sima 're pisutu za'ra mono ãna.

²⁵ Da'ra isimiza'rese'õ te za timama ma robzei'õ hã te te sina tãma 're sõmri. Duré tina ma, te za rosa'ratazé hã te te sina tãma 're sani.

²⁶ Wẽ'õ di, iwẽ hã te te dama irowa'âbâ da hã da'upana, õ hãi õ nherẽ. Duré i'uwaibaba õ di, dama i'rãnho'u sena na 're ihâimana za'ra mono, da te 're ipré'é mono da hã.

²⁷ Isimirowaihu'u wẽ hã mreme wadi õ di. Duré atãma na te 're hâimana.

²⁸ Isimiza'rese'õ na zama te za 'rãi waihu'u wẽ newa da te ãma 're rosa'rata za'ra, ari'iwi 're si'ubumroi mono wa, mreme ãna.