Neemia 4 - ꞌRe Ihâimana Uꞌâsi Mono Zadawa Wasuꞌu

Neemiaha zada ihâimana za'ra norĩ wasu'u

¹ Tawamhã Sãbalati, wa norĩ zudeu 'ri nho'õmo 'wawi wa'ra 'rãihâ apâ wa te wasiwi i'manharĩzé te te waihu'u wamhã, ma tô ab'rui pese. Ma tô duré wa'ãma iwa'ẽ za'ra zém na ãma sãna'rata.

² Tawamhã tisiré norĩ nho'a, duré samaritanu dasi'wapéi 'manharĩ'wa norĩ nho're, ma tô tinha ãne: — E marĩ te bété zudeu norĩ tarére 're ihâimana za'ra mono norĩ hã siwi 'manha. E te za apâ 'ri nho'õmo 'wawi wa'ra hã siwi 'manharĩ pese. E te za duré tinhimizama zata na 'Re ihâimana u'âsi mono ma, apâ tãma ãma 're sõprub za'ra. E te za misi bâtâ na siwi uprosi, romhuri hã. E te za duré ẽtẽ na 'rizé hã apâ hâiwa'utu za'ra, 'ri 'wawi wa'razé isiprum hawi, te te ãma siwi 'manharĩ téb da, da te ãma dasiwi sazu za'ra nherẽ.

³ Tawamhã Amo na ti'ai wa'õtõ nho'õmo nhisi hawimhã, Tobia isababa isa hã te ãne duré tinha: — E niha te za merẽ 'ri 'wawi wa'ra hã bété siwi 'manha, wapsã wawẽre ãma sarõtõ wa, te te prub da nherẽ, apâ hã!

⁴ “Wate 'Re ihâimana u'âsi mono, ma'ãpé wa'ãma iwa'ẽ za'ra zé hã wapari! Tãma 'manharĩ za'ra na, wa'ãma iwa'ẽ za'ra zé hã õ norĩ nhisiwip si waptã'ã da, wa'upana za'ra. Duré ma'ãpé isipti'a za'ra hawi da te simroi mono da hã tãma 'manharĩ za'ra na, sito pese na 're hâimana za'ra mono da, wa'upana za'ra.

⁵ Tiwasédé te te 're i'manharĩ za'ra mono zé hã tãma pari za'ra tõ, duré iwasété za'ra zém na hã ãma aipo're si'âri za'ra tõ. E marĩ wa. Ta norĩ hã 'ri 'wawi wa'ra 'manharĩ'wai ãma te te wa'ãma wasété za'ra wa.”

⁶ Tawamhã 'ri 'wawi wa'ra 'rãihâ 'manharĩ pese na hã wa tô ãma uzusi za'ra ni. Tahawa, waptu na wa tô ãma wasiwi aipo'o ni, i'manharĩ 'rãihâ na hã, dato sina da te ãma rob'ma'wamarĩ wa.

⁷ Tane nherẽ, ma tô Sãbalati, Tobia, Arabia hawi a'uwẽ norĩ, Amo na romnhisi ãma 're idahâimana za'ra mono norĩ, duré Asidodi na 'ri nho'õmo nhisi ãma 're idahâimana za'ra mono norĩ, ma tô tizahi pese za'ra, Zeruzalẽ ãma 'ri 'wawi wa'ra 'manharĩ pese na romhuri hã wa te ãma i'uzusi za'ra zé te te waihu'u za'ra wa, duré 'ri 'wawi wa'ra isiprum na dazasizé mono hã wa te wasiwi isito mono zé, te te waihu'u za'ra wa.

⁸ Tawamhã ta norĩ hã ma tô si'rã'õtõ simisutu, wazada wa'ãma sisaze za'ra da, Zeruzalẽ te te siwi rési da, duré te te ãma siwi ro'wa'rutu da.

⁹ Tane nherẽ, wate 'Re ihâimana u'âsi mono ma, wa tô nasi tãma wamreme zusi ni. Aibâ te te irob'madâ'â za'ra da hã wa tô duré nasi wasiwi sõré ni, bâtâ na, duré bara na da'wawi nasi isõpré da hã.

¹⁰ Tawamhã Zudaha nhihudu norĩ ma tô ãne tinho're za'ra: “Ro'wapéi'wa norĩ ma tô te ãma ãpusire. Tane nherẽ, zahadu 'ri sipru za'wari hã sa'ẽtẽ di, te te nasi i'wasari da hã. Ã hã 'ri 'wawi wa'ra 'rãihâ 'manharĩ pesezé hã e wa te wasiwi i'uprosi da bâ bété.”

¹¹ Wanhitob'ru norĩ, ma tô ãne sima nharĩ za'ra: “Te te wa'upsibi me za'ra wana ré, duré titõmo na te te wa'madâ'â za'ra wana ré, 'râwibre wa za iwa'wab za'ra hã wahâimana za'ra ni. Tahawa, wa za wasiwi simro ni za. Wa za duré isimiromhuri hã tiwi uprosi za'ra ni za.”

¹² Tawamhã zudeu norĩ hã, wanhitob'ru norĩ wa'wa 're ihâimana za'ra mono hã ma tô nasi we ai'aba'réi haré, za wazada ihâimana za'ra zém na rosa'rada te te sima i'manharĩ za'ra na te te wapo're pu'u za'ra da hã.

¹³ Tahawa wa hã wa tô isi'uwazi 'rã'wa norĩ hã, sib'ézé 'wa pa norĩ hã, umnhi'ãsi norĩ hã, duré ti'i norĩ hã te dama anhomri. Taha pari wa tô duré 'ri 'wawi wa'ra 'rãihâ zahâpâmhã dasisãnawã a'uwẽ upsãtã mono bâ te anhoré, zahadu 'manharĩ pese ãna 'ri 'wawi wa'ra 'ridawa haré ihâimana za'ra mono bâ.

¹⁴ Tawamhã idahâtâ'â za'ra na hã wa tô da'a'madâ. Tahawa wa tô dama ipire norĩ ma, duré dama roti'wa norĩ ma nharĩ za'ra ãne: — Ma'ãpé wanhitob'ru norĩ ma hã aipahi za'ra wa'aba tõ. Ãma aipo're pu'u za'ra wa'aba, Uburé Danhib'apito iwaihu'u pese ãma, dapahi te te dama 're i'azani u'âsi mono ãma. Ãhã wa, te za asisãnawã norĩ na, ai'ra norĩ na, aimro norĩ na duré asõrõwa aba norĩ na i'wapé za'ra wa'wa, wanhitob'ru norĩ hã.

¹⁵ Tawamhã wanhitob'ru norĩ ma tô waihu'u za'ra, isimirosa'rada wa te tiwi i'upsibi me za'ra zé hã. Ma tô duré waihu'u za'ra, 'Re ihâimana u'âsi mono niha na te te sima irowa'õtõ za'ra zé te te tiwi i'wa'rutu za'ra na hã. Tahawa, wa tô wa norĩ hã apâ 'ri 'wawi wa'ra 'rãihâ 'manharĩ pese na romhuri hã wasiwi âri ni.

¹⁶ Tawamhã ta hawim haré aibâ norĩ aiwa sima isipo hã ma tô 'ri 'wawi wa'ra na nasi romhuri pese za'ra. Taha ré, ma tô duré aiwa sima isipo'o hâiba amo norĩ hã isi'uwazi 'rã'wa ré, duré ibaihâ 'manharĩ na dasi'wawi dasimapazéb ré, umnhi'ãsi ré, duré dahâiba ubuzé itete ré hã nasi rob'madâ'â za'ra. Tawamhã dama ipire norĩ hã ma tô tinhiptede hã tãma 'manharĩ za'ra,

¹⁷ 'ri 'wawi wa'ra apâ te te siwi i'manharĩ za'ra norĩ ma. Duré 'rizé 'manharĩ 'wapéi'wa norĩ hã te nasi tinhib'rata amo niwĩ romhuri hã ãma 'manharĩ za'ra. Taha ré, te duré nasi tinhib'rata amo niwĩmhã tinhimnhi'ã te te tété za'ra.

¹⁸ Tawamhã romhuri'wai mono bâ ma tô ti'usisi na sib'ézé 'wa pa ré hã nasi romhuri za'ra. Te duré aibâ hã nasi ĩ'rata misi 'maihaimasisi 'wamnhasite, marĩ watobro wa, danhimnhihârâzé te te ihârâ da hã.

¹⁹ Tawamhã wa hã, a'uwẽ norĩ ma, dama roti'wa norĩ ma, duré dama ipire norĩ ma, wa tô tãma nharĩ za'ra ãne: — Romhuri hã te romhâ na wama hâimana za'ra. Tahawa wa wasisiti 'ri 'wawi wa'ra nhoré na hã wasimasa mono.

²⁰ Tawamhã danhimnhihârâzém hârâ hã wapari za'ra wa'aba wamhã, te za we watẽme ato aba mo, ãwa. Tawamhã wate 'Re ihâimana u'âsi mono te za wa'ãma ai'wapé za'ra.

²¹ Tawamhã ãne wa tô bâdâ pusi nhidâpâsi mararé hawim haré, mara na wasi norĩ 're isihâi'ré za'ra mono zéb u, aiwa wasima iwasipo'o norĩ hã 'ri 'wawi wa'ra 'rãihâ 'manharĩ pese na hã wa te romhuri za'ra, isi'uwazi 'rã'wa ré, rob'madâ'â'wa ihâimana za'ra norĩ me.

²² Tahawa, wa tô dama tinha ãne: “Aihâiba mono bâ wa'aba aipawapto wa'aba 'wa norĩ me te za bara na Zeruzalẽ ãma nasi asimroi wa'wa za, bara na rob'madâ'â'wa na nasi aihâimana za'ra wa'aba da, duré bâtâ na romhuri na nasi rob'ma'wamarĩ aba da.”

²³ Tawamhã wa hã, ĩsisãnawã norĩ, aibâ ĩma i'umnhasi norĩ, duré ĩsiré rob'madâ'â'wa norĩ me wa'uza za'ra wa te nasi sani za'ra õ di, wanhotõ za'ra da hã. Wahâiba mono bâ wa tô duré wanhib'ratam haré wanhimnhi'ãsi ré, wahâimana u'âsi za'ra.