Neemia 3 - ꞌRe Ihâimana Uꞌâsi Mono Zadawa Wasuꞌu

'Ri nho'õmo 'wawi wa'ra apâ da te dasiwi iwahutuzé wasu'u

¹ Tawamhã 'ri nho'õmo 'wawi wa'ra ma tô ãne apâ dasiwi 'manharĩ ni: Sasedoti tisiré norĩ nhipai u ipire uptabi Eriasibe na isisi hã, duré sasedoti isiré norĩ ma tô Pone'ẽrebâ na 'ridawa za'ẽtẽ nhisi hã siwi 'manha apâ. Tahawa, ma tô ãma sima romhu'u za'ra, te te siwi isaiwĩrĩzém na. Taha pari ma tô oto ãma siwi te te sasõmri 'ridawa za'ẽtẽ mono hã, 'ri 'wawi wa'ra 'rãihâ na. Cem na 'ri 'rãihâ nhisi u ma tô duré 'ri 'wawi wa'ra wahutu na hã ãma siwi tita, duré Hananeu na 'ri 'rãihâ nhisi u zama.

² Tawamhã taha nhana're iwa'õno hã ma tô Zerico hawi aibâ norĩ hã siwi 'manha apâ, 'ri 'wawi wa'ra hã. Duré Zacu, Ĩri 'ra hã ma tô duré taha nhana're iwa'õno ihâiba hã 'manha.

³ Hasenahã 'ra norĩ ma tô Tepe na 'ridawa za'ẽtẽ wamri hã siwi 'manha. Tawamhã wedepo'o hâza'õno hã taha na ma tô te te ãma sa'ra za'ra. 'Ridawa isurure zama ma duré taha na te te ãma siwi tété, isimasabzé mono bâ. Taha pari ma tô duré isi'uwazi na itété mono zé hã te te ãma sa'ra za'ra.

⁴ Tawamhã taha nhana'remhã si'ubdatõ iwa'õtõ mono hã ma tô aibâ norĩ hã siwi 'manha: Imorĩ'rada Meremote na isisi, Uriaha 'ra, Hacozihi nhihudu hã ma tô 'manha. Duré maparane ãma hã ma tô Mesulã, Berequiaha 'ra, Mesezabehe nhihudu hã 'manha. Duré si'ubdatõ ãma hã ma tô Zadoqui, Ba'anahã 'ra hã 'manha.

⁵ Taha nhana'remhã ma tô duré 'rinho'u Tecoa na isisi hawi aibâ 're ihâimana za'ra mono norĩ hã siwi 'manha, 'ri 'wawi wa'ra wa'õno hã. Tane nherẽ, 'ri nho'õmo ãma dama ipire norĩ romhuri na tipa te te dame isarõtõ za'ra da hã te te sima wẽ za'ra õ di, romhuri na dawada'uri'wa te te tãma i'ru za'ra hã.

⁶ Tawamhã Zoiada, Paséiaha 'ra, Mesulã, Bezodiaha 'ra me ma tô 'Ridawa 'rata na 'ridawa za'ẽtẽ nhisi hã apâ 'manharĩ zahuré. Tawamhã wedepo'o hâza'õno taha na ma tô ãma te te aza'ra zahuré. 'Ridawa isurure zama ma duré taha na te te ãma atété zahuré, isimasabzé mono bâ. Taha pari ma tô duré isi'uwazi na itété mono zé hã te te ãma aza'ra zahuré.

⁷ Tawamhã Melatiza, Gibiã hawi aibâ hã duré Zadõ, Meronote na 'ri wa'õtõ nhisi hawi aibâ hã, Gibiã hawi aibâ norĩ me, duré Mispa hawi aibâ norĩ me hã ma tô Zoiada norĩ nhana'remhã iwa'õtõ na ãma romhuri za'ra, 'ri 'wawi wa'ra na Eufrati-Oeste na romnhisi te danhib'ihâ'a nhorõwa u.

⁸ Tawamhã taha nhana'remhã 'ri 'wawi wa'ra na iwa'õtõ na hã Haraiaha 'ra, Uzi'é na isisi 're ihâimana mono hã ma tô ãma romhu, oru na isi'uwazi 'manharĩ'wa hã. Hanania wedewa'u zadaze 'manharĩ'wa ma tô taha nhana'remhã duré 'manha, iwa'õno hã, 'Ri 'Wawi Wa'ra Isitõmo za'ẽtẽ na isisi u.

⁹ Refaia, Hur na isisi 'ra, Zeruzalẽ ãma 'ri wa'õno aiwa ãma isipo'o wa dama i'rãnho'u 're ihâimana mono hã ma tô duré taha nhana'remhã 'ri 'wawi wa'ra isipru hã apâ 'manharĩ pese.

¹⁰ Taha nhana'remhã ma tô Zedaia, Haramufehe 'ra tinhorõwa 'ratamhã iwa'õno hã 'manha. Taha nhana'remhã ma tô duré Hatusi, Hasabnéiaha 'ra, isababamhã 'ri 'wawi wa'ra hã 'manharĩ pese.

¹¹ Taha nhana'remhã ma tô Malquia, Harĩhĩ 'ra, Hasube, Paate-Moabihi 'ra me 'manharĩ zahuré 'ri na'rata 'wawi wa'ra wa'õno hã. Forno na 'ri 'rãihâ nhisi zama ma tô duré 'manharĩ zahuré.

¹² Taha nhana'remhã ma tô Salu, Haloéhé 'ra, Zeruzalẽ ãma 'ri wa'õno aiwa isipo'o hâiba amoi ãma dama i'rãnho'u hã 'manha, iwa'õno hã. Tahawa i'ra sipi'õ norĩ hã ma tô romhuri na pawaptob za'ra.

¹³ Tawamhã Hanu, Zanoa na 'ri wa'õtõ ãma 're ihâimana za'ra mono norĩ me ma tô Romharé na 'ridawa za'ẽtẽ nhisi hã apâ siwi 'manha. Tahawa, ma tô 'ridawa mono hã te te ãma sasõmri za'ra. Ma tô duré isi'uwazi na itétézé hã te te ãma sa'ra za'ra. Tawamhã 'ri 'wawi wa'ra zama 500 metru na ipibuzém na ma tô duré siwi 'manharĩ pese, Roprum na 'ridawa za'ẽtẽ nhisi u.

¹⁴ Malquia, Recabihi 'ra, 'ri wa'õno Bete-Haquere na isisi ãma dama i'rãnho'u hã ma tô Roprum na 'ridawa za'ẽtẽ nhisi hã apâ 'manha. Tahawa, 'ridawa mono hã ma tô te te ãma azasõmri. Ma tô duré isi'uwazi na itétézé hã te te ãma aza'ra apâ.

¹⁵ Salu, Col-Hozéhé 'ra, 'ri wa'õno Mispa na 'ri wa'õtõ nhisi ãma dama i'rãnho'u ma tô Â'a'a na 'ridawa za'ẽtẽ nhisi hã apâ 'manha. Tawamhã taha nhisiwimhã 'ridawa upsibizé hã ma tô duré 'manha. Tahawa, ma duré 'ridawa mono hã te te ãma azasõmri. Ma tô duré isi'uwazi na itétézé hã te te ãma aza'ra. Tawamhã duré apito te rob're 're ihâimana mono zababa Siroé na â nhowada nhisi ãma ma tô 'ri 'wawi wa'ra 'rãihâ hã 'manharĩ pese Salu hã, sai'urizé Dawihi te 'ri nho'õmo hawi te te isi'ra tẽme.

¹⁶ Tawamhã Neemia, Azbuquehe 'ra, Bete-zu na 'ri wa'õno aiwa ãma isipo'o na dama i'rãnho'u hã ma tô isãna're iwa'õno hã 'manha, Dawihi ãma da te iti'azéb u, duré â nhowada u, duré dasi'wapéi 'manharĩ'wa norĩ te, romhâ 'manharĩ na 'ri, isisõré mono u.

Levita norĩ, 'ri 'wawi wa'ra 'rãihâ na te te irob'ma'wamarĩ za'ra zé wasu'u

¹⁷ Tawamhã levita norĩ zama ma tô 'ri 'wawi wa'ra 'rãihâ 'manharĩ pese na hã dapawaptob za'ra. Ãne isisi na ãma irob'ui'éré za'ra hã: Reum, Banihi 'ra, ma tô isãna're iwa'õno hã 'manharĩ pese. Duré isãna're iwa'õno hã ma tô Hasabiasi, Queira na 'ri wa'õno aiwa ãma isipo'o ãma dama i'rãnho'u hã 'manharĩ pese.

¹⁸ Bavai, Henadadehe 'ra, Queira na 'ri wa'õno aiwa isipo'o hâiba amoi ãma dama i'rãnho'u hã ma tô isãna'remhã 'ri 'wawi wa'ra 'rãihâ wa'õno hã 'manharĩ pese.

¹⁹ Tawamhã ihâiba amo iwa'õno hã ma tô duré Ézé, Zesuaha 'ra, Mispa na 'ri wa'õtõ ãma dama i'rãnho'u hã 'manharĩ pese, dasi'wapéi 'manharĩzé nhimi'warazém nho'remhã, 'ri 'wawi wa'ra wẽ'ẽzéb u.

²⁰ Isãna're iwa'õno hã ma tô duré Baruqui, Zaba'ihi 'ra hã 'manharĩ pese, 'ri 'wawi wa'ra wẽ'ẽzém hawi, Eriasibe sasedoti tisiré norĩ nhipai u ipire uptabi nhib'ridawa ihâimana u.

²¹ Tawamhã taha nhana'remhã iwa'õno hã ma tô duré Meremote, Uriaha 'ra, Hacozi na isisi nhihudu hã 'manharĩ pese, Eriasibehe nhorõwa hawi, 'ri 'rãsudu ihâimana u hã.

Sasedoti norĩ, 'ri 'wawi wa'ra na te te irob'ma'wamarĩ za'ra zé wasu'u

²² Tawamhã sasedoti norĩ zama ma tô 'ri 'wawi wa'ra 'manharĩ pese na dapawaptob za'ra. Ãne ãma irob'ui'éré za'ra norĩ hã isisi na: Sasedoti norĩ, Zeruzalẽ waptoma 're ihâimana za'ra mono norĩ hã ma tô isãna're iwa'õno hã duré siwi 'manharĩ pese, 'ri 'wawi wa'razé hã.

²³ Taha nhana'remhã iwa'õno hã ma tô Bẽzami norĩ, Hasubehe me hã tinhorõwa zahuré 'ri nho're wa'waibaba hã 'manharĩ pese zahuré. Azaria, Maaséiaha 'ra, Ananiaha nhihudu hã tinhorõwa nho're wa'waibaba hã ma tô 'manharĩ pese.

²⁴ Taha nhana'remhã iwa'õno hã ma tô Binu'i, Henadadehe 'ra hã Azariaha nhorõwa hawimhã 'manharĩ pese, 'ri 'wawi wa'ra 'rãihâ wẽ'ẽzéb u.

^25-26 Tawamhã taha nhana'remhã iwa'õno hã ma tô Pala'u, Uza'ihi 'ra hã 'manharĩ pese. Ta hã ma tô 'ri 'wawi wa'ra 'rãihâ wẽ'ẽzém hawi i'manharĩ na romhuri hã ãma sãna'rata, apito nhimiromhurizé 'ri hawi, apito 'madâ'â'wa norĩ 'ri zahâpâ wa, 're isi'ubumroi mono zéb 'rata. Taha nhana'remhã iwa'õno hã ma tô Pedaia, Paroho 'ra hã 'manharĩ pese, bâtâ pusizém niwĩ ro 're ihâimana mono u hã, Â na 'ridawa za'ẽtẽ nhisi 'rata, duré 'ri 'rãihâ 'rata, 'Re ihâimana u'âsi mono nhorõwa 'madâ'âzéb ãmamhã. Ãhã 'ri hã te Ofe'u na 'ri nho'õmo wa'õtõre 'rata 're sa, aibâ norĩ 'Re ihâimana u'âsi mono nhorõwa 're, romhuri'wa norĩ 're ihâimana za'ra mono zéb ãma.

Ihâiba amo 'ri 'wawi wa'ra na romhuri'wa norĩ wasu'u

²⁷ Taha nhana'remhã ma tô 'rinho'u Tecoa na isisi ãma aibâ 're ihâimana za'ra mono norĩ hã duré iwa'õtõ hâiba amo hã siwi 'manharĩ pese, 'ri 'rãihâ 'Re ihâimana u'âsi mono nhorõwa 'madâ'âzém nho're hawi, Ofe'u na 'ri wa'õtõre 'rata 'ri 'wawi wa'ra u hã.

²⁸ Tawamhã taha nhana'remhã ma tô sasedoti norĩ hã iwa'õno hã siwi 'manharĩ pese, Awaru na 'ridawa za'ẽtẽ nhisi hawi, hâiwa nhimi'e niwĩb u hã. Ta norĩ hã ma tô hâiba mono bâ tinhorõwa nho're mono na hã te te ãma rob'ma'wamarĩ.

²⁹ Taha nhana'remhã ma tô Zadoqui, Imehe 'ra hã tinhorõwa nho're wa'waibaba hã 'manharĩ pese. Isababamhã iwa'õno hã ma tô duré Semaia, Secaniasihi 'ra Bâtâ Pusizém Niwĩm na 'ridawa za'ẽtẽ nhisi 'madâ'â'wa hã 'manharĩ pese.

³⁰ Taha nhana'remhã ma tô Hanania Selemiaha 'ra, Hanu Zalafehe 'ra 6 ãma ipoto me iwa'õtõ hâiba amo hã 'manharĩ pese zahuré. Tawamhã duré isababab zahuré hã Mesulã, Berequiaha 'ra, ma tô tinhorõwa nho'remhã 'manharĩ pese, 'ri 'wawi wa'ra 'rãihâ wa'õno hã.

³¹ Taha nhana'remhã iwa'õno hã ma tô Malquia oru na isi'uwazi 'manharĩ'wa hã 'manharĩ pese, 'Re ihâimana u'âsi mono nhorõwa 'ri 're, romhuri'wa norĩ duré rowede'wa norĩ iwa 're ihâimana za'ra mono zéb u. Ã hã 'ri te Rob'madâ'âzém na 'ridawa za'ẽtẽ nhisib zababa 're sa, hâiwa nhimi'e niwĩ 'ri 'wawi wa'ra 'rãihâ ãma, rob'madâ'âzé 'ri 'wawi wa'ra zasé're 'rata.

³² Taha nhana'remhã iwa'õno hã ma tô Oru na isi'uwazi 'manharĩ'wa norĩ hã rowede'wa norĩ me 'ri 'wawi wa'ra 'rãihâ wa'õtõ 'rãsudu hã siwi 'manharĩ pese, 'ri na'rata zasé're ãma 'ri're wa'wa hawi, Pone'ẽrebâ na 'ridawa za'ẽtẽ nhisi u hã.