Neemia 2 - ꞌRe Ihâimana Uꞌâsi Mono Zadawa Wasuꞌu

Neemia imorĩzé wasu'u, Zeruzalẽ u

¹ Tawamhã maparane si'uiwa na a'amo si'utõrĩ pari, apito Artazesi nhimi'madâ'âzém na 20 na ãma iwahub 'remhã nimahã bâtâ na apito hã sai ré, wa tô uwa 'rãi wa'u isé hã tãma ti'â. Ãhã wamhã, ĩwi irobzei'õzém na hã te te ĩ'madâ'â õ di aré.

² Tahawa te ĩzadanha ãne: — E marĩ wa, ma tô bété ai'ubu zei'õ, aihâzé õ nherẽ. Ãté tô aipẽ'ẽzé wa. Ãhã wa, wa tô imreme ma ĩpahi.

³ Tahawa, wa tô ãma tãma wa'rã ãne: — Apito, õne u'â 're i'aihâimana mono da si, iwẽ hã! E niha wa za bété ĩ'ubu zei'õ ãna hã ĩhâiba, 'ri nho'õmo ãma wahi'rata norĩ na da te ãma 're iti'a za'ra mono zé sipru pese na 're sa'wari mono nherẽ, duré taha te 'ridawa za'ẽtẽ na da te ãma sazu za'ra haré 're sa'wari mono nherẽ!

⁴ Tawamhã te apito ĩzadanha ãne: — E marĩ te asima iwẽ. Tawamhã wa tô mre 'Re ihâimana u'âsi mono, hâiwa ãma 're isãmra mono ma hã.

⁵ Taha pari wa tô oto apito ma tinha ãne: — Aima irowẽ zarina ĩma aipẽ'ẽ toi wamhã, ma'ãpé ĩma waprosi, Zuda u ĩmorĩ da, 'ri nho'u ĩhi'rata norĩ da te iwa 're iséme mono zé hã apâ te 'ri da.

⁶ Tawamhã apito zababa imro sãmra ré, ma tô te tiwi irowaptẽrẽzém na hã ãma ĩzaze. Tahawa, ma tô ĩzadanha, niha bâtâ na za ĩhâimana zô õmemhã, duré niwa za we te ĩsina isiri zô apâ hã. Tawamhã za niha a'amo te ĩsina i'uprosizém na hã wa tô ãma wasisaze ni.

⁷ Tahawa wa tô apito wi waptẽ, te te ĩma sõmri da tinhimirob'ui'éré hã, daza'rui wa'õno Eufrati-Oeste na isisi ãma i'rãnho'õmo norĩ ma, te tãma sõmri za'ra wa, isa'ru wa'waibaba za'ra te ro'razâri wẽ wa, ta hawimhã Zuda u ĩwisi wẽ da hã.

⁸ Tawamhã wa tô duré waptẽ rob'ui'éré hã, Asafi apito marã 'madâ'â'wai ma da hã, wede norĩ te te ĩma 'mai'ru da, 'Re ihâimana u'âsi mono nhorõwa 'ri 'wawi 'ri isiptede 're isimapa mono 'ridawa za'ẽtẽ norĩ hã da te dasiwi ãma 'manharĩ da, duré 'ri nho'õmo 'wawi wa'ra 'rãihâ 'manharĩzéb da hã, duré ĩnhorõwa 'manharĩzéb da hã. Tawamhã apito ma tô uburé ĩma sõmri za'ra, te tiwi iwaptẽrẽ hã. E marĩ wa, 'Re ihâimana u'âsi mono hã ĩsiré hâimana wa.

⁹ Tawamhã apito ma tô duré ĩsiré si'aba'ré da hã, tãma rob'ru za'ra, nima norĩ ma, dasi'wapéi 'manharĩ'wa nhib'ihâ'a norĩ hã duré awaru na dasi'wapéi 'manharĩ'wa norĩ hã. Tawamhã Eufrati-Oeste u wa tô oto mo. Tamomo ĩwisi wamhã, wa tô oto apito nhimi'ui'éré hã te tãma sõmri za'ra, hâiba mono bâ i'rãnho'õmo norĩ ma hã.

¹⁰ Tane nherẽ, Sãbalati hã 'ri nho'u Bete-Horõ ãmamhã, duré Tobia da'madâ'â'wa ti'ai wa'õtõ nho'u Amo na isisi ãma me, ma tô tawamhã tizahi zahuré, we ni'wa imorĩzé te te waihu'u zahuré wa, Izaraéu nhihudu norĩ te te ipawaptob za'ra da hã.

¹¹ Tawamhã wa tô oto duré wi, Zeruzalẽ u hã. Si'ubdatõ bâdâ ineb 'remhã

¹² ni'wai ma hã te wasu'u õ di, te irosa'ratazé za 'ri nho'u apâ te iwahutuzém na hã, 'Re ihâimana u'âsi mono ĩpẽ'ẽ 're te te ĩma iwaihu'uzéb zarina. Tawamhã mara wa'wamhã wa tô udu, rob u ĩwatobro da, nima norĩ we ĩsiré isi'aba'ré norĩ siré. Tahawa, wa tô misi awaru po're pore hã saprõ, tô we ãma ĩmorĩzé hã.

¹³ Tawamhã zahadu mara hâ ré, wa tô 'ri nho'õmo hawimhã watobro, Romharé na 'ridawa za'ẽtẽ nhisi na bâtâ zasizém niwĩ. Tahawa, hâiwa nhimire niwĩ wa tô a're ha'oto. Ãhã wamhã, wa tô Dragã na â'a'a nhisi na hã saprĩ, Roprum na 'ridawa za'ẽtẽ nhisi u ĩwisi da. Tawamhã ĩne mono sidâpâsi, wa tô 'ri 'wawi wa'ra 'rãihâ hã te nasi a'madâ'â, nima niwĩmhã da te dasiwi iprubzé hã, duré 'ridawa za'ẽtẽ norĩ, unhama na da te ãma isazu za'ra zé hã.

¹⁴ Tawamhã hâiwa nhimi'e niwĩ oto ĩsipi'rai wamhã, Â'a'a na 'ridawa za'ẽtẽ nhisi u, duré apito te â nhowada u zama wa tô mo. Tane nherẽ, ĩte awaru po're pore hã niha te te ãma saprĩ waihu'u õ di, 'ri sipru wa'waibabamhã.

¹⁵ Tahawa wa tô duré mo, Cedrõ na romharé nhisi u. Tawamhã ĩne mono sidâpâsi wa tô ta hawimhã 'ri 'wawi wa'ra 'rãihâ hã te a'madâ'â u'âsi. Taha parimhã tô õ hã bâdâdi ãma ĩmorĩzéb 'rata na wa tô apâ mo. Oto apâ ĩmorĩ wamhã, Romharé na 'ridawa za'ẽtẽ nhisi na wa tô apâ ãzé, 'ri nho'õmo u hã.

¹⁶ Tawamhã 'ri nho'õmo 'remhã dama ipire norĩ hã te te waihu'u za'ra õ di bara na 're ĩmorĩzé hã, duré te irowaimrami mono zé te i'manharĩ hã. Ãhã wamhã, zahadu tameb 're ma hã te tãma wasu'u za'ra õ di zudeu norĩ ma hã — sasedoti norĩ ma, dama ipire norĩ ma, da'madâ'â'wa norĩ ma, duré a'uwẽ aimawi za te te dame iromhuri za'ra norĩ ma hã.

¹⁷ Tawamhã ta norĩ ma, wa tô oto tãma nharĩ za'ra ãne: — Ma'ãpé ãma rosa'rata pese za'ra wa'aba, ipire wama ihâimana za'ra zém na hã! 'Ri nho'u Zeruzalẽ hã te siprum haré 're sa'wari. Duré ite 'ridawa za'ẽtẽ mono hã ma tô unhama na ãma dasiwi sazu za'ra ni. Tahawa oto apâ wa te wasiwi wahutu aba, 'ri nho'õmo 'wawi wa'ra 'rãihâ hã, wama irowazéb za'ra zé wa te ãma wasiwi pari da.

¹⁸ Tawamhã wa tô duré oto tãma wasu'u za'ra, 'Re ihâimana u'âsi mono iwẽ te te ĩma ipisutuzé hã, duré te te ĩpawaptobzé hã. Wa tô duré tãma wasu'u za'ra, apito te te ĩma ĩnharĩzé hã, marĩ mono na. Tahawa, ma te ãne ãma ĩzada'âbâ za'ra: — Tane wamhã, 'ri 'wawi wa'ra wahutuzém na wa te oto ãma sãna'rata za'ra wa'aba! Tawamhã ma tô oto sada rob'ubumro za'ra, romhuri na te te ãma isãna'rata za'ra zéb da hã.

¹⁹ Tane nherẽ, Sãbalati norĩ, Tobiaha me duré Gesẽ, Arabia norĩ siré me, ãne na wa te i'manharĩ za'ra zé te te waihu'u za'ra wamhã, ma tô wa'ãma to za'ra sina wa'ãma aihâ za'ra. Tahawa te ãne wazadanharĩ za'ra: — E marĩ te bété asiwi i'manharĩ 'wa. E taha zarina apito da, aihâimana za'ra wa'aba da.

²⁰ Tawamhã wa ãma tãma wa'rãmi za'ra ãne: — 'Re ihâimana u'âsi mono, hâiwa ãma 're isãmra mono hã te za iwẽ si wama pisutu za'ra, wa te irowa'õtõ za'ra zéb zarina, wama iwatobro za'ra zéb da hã. Wa norĩ hã tãma iromhuri'wai wa, wa za oto ãma sãna'rata za'ra ni, 'ri 'wawi wa'ra wahutu na hã. Tane nherẽ, a norĩ wa'wa hã Zeruzalẽ 'remhã marĩ tede'wa na hã aihâimana za'ra wa'aba õ di. Duré i're 're aihâimana za'ra wa'aba mono nherẽ, marĩ dai õ di, a norĩ wa'wa hã. Duré Izaraéu nhihudu norĩ 're ihâimana za'ra mono zém na 're i'aihâimana za'ra wa'aba mono da hã mare di.