Neemia 12 - ꞌRe Ihâimana Uꞌâsi Mono Zadawa Wasuꞌu

Sasedoti norĩ na, levita norĩ me, ãma irob'ui'éré zahuré zé wasu'u

¹ Ã hã sasedoti norĩ nhisi na levita norĩ nhisi me, ãma irob'ui'éré za'ra, Zorobabé Salati'éhé 'ra siré, duré sasedoti ipire Zozuéhé siré, Babilonia ãma sito pese na 're ihâimana za'ra mono zém hawi apâ we isi'aba'ré norĩ nhisi na.

^2-7 Sasedoti norĩ nhisi hã ãne: Seraia, Zeremia, Esdra, Amaria, Maluque, Hatusi, Secaniasi, Reum, Meremote, Ido, Gineto'i, Abi'asi, Mi'ami, Maadia, Bilga, Semaia, Zoiaribe, Zedaia, Salu, Amoque, Hilquia duré Zedaia. Ã hã aibâ norĩ hã tisiré sasedoti ma, ma tô Zozué 're hâimana mono ré, i'rãnho'õmo na 're hâimana za'ra.

⁸ Levita norĩ nhisi hã duré ãne: 'Re ihâimana u'âsi mono ãma, danho're na 're idawata za'ra mono zé, te te dama 're i'wani za'ra mono norĩ hã: Zesua, Binu'i, Cadmi'é, Serebia, Zuda duré Matania.

⁹ Ã norĩ hã ma tô duré tinho're na isiré isimasam norĩ hã te te ãma 're sadâ'âbâ za'ra: Baquebuquia, Uni, duré ta norĩ siré hã.

¹⁰ Zozué hã, Zoiaquĩhĩ mama, Zoiaquĩ hã, Eriasibehe mama, Eriasibe hã, Zoiadaha mama,

¹¹ Zoiada hã, Zonataha mama, duré Zonata hã, Zaduaha mama.

¹² Tawamhã Zoiaquĩ sasedoti ipire na dama 're hâimana mono ré hã, ma tô sasedoti norĩ te a'uwẽ wa'õtõ mono ma, danhib'ihâ'a na hã tãma 're hâimana za'ra: Seraiaha te a'uwẽ wa'õtõ ma hã, Meraia te 're sa; Zeremiaha te a'uwẽ wa'õtõ ma hã, Hanania te duré 're sa;

¹³ Esdraha te a'uwẽ wa'õtõ ma hã, Mesulã te 're sa; Amariaha te a'uwẽ wa'õtõ ma hã, Zoãna te duré 're sa;

¹⁴ Maluquihi te a'uwẽ wa'õtõ ma hã, Zonata te 're sa; Sebaniaha te a'uwẽ wa'õtõ ma hã, Zuzé te duré 're sa;

¹⁵ Harĩhĩ te a'uwẽ wa'õtõ ma hã, Adna te duré 're sa; Meraiotehe te a'uwẽ wa'õtõ ma hã, Helca'i te 're sa;

¹⁶ Idoho te a'uwẽ wa'õtõ ma hã, Zacaria te duré 're sa; Ginetõhõ te a'uwẽ wa'õtõ ma hã, Mesulã te 're sa;

¹⁷ Abi'asihi te a'uwẽ wa'õtõ ma hã, Zicri te duré 're sa; Miniamihi te a'uwẽ wa'õtõ ma hã, Ma'adiaha te a'uwẽ wa'õtõ ma me, Pilta'i te tãma 're sab zahuré;

¹⁸ Bilgaha te a'uwẽ wa'õtõ ma hã, Samua te duré 're sa; Semaiaha te a'uwẽ wa'õtõ ma hã, Zonata te 're sa;

¹⁹ Zoiaribehe te a'uwẽ wa'õtõ ma hã, Matenai te duré 're sa; Zedaiaha te a'uwẽ wa'õtõ ma hã, Uzi te 're sa;

²⁰ Sala'ihi te a'uwẽ wa'õtõ ma hã, Cala'i te duré 're sa; Amoquehi te a'uwẽ wa'õtõ ma hã, Ébé te 're sa;

²¹ Hilquiaha te a'uwẽ wa'õtõ ma hã, Hasabiasi te duré 're sa; duré Zedaiaha te a'uwẽ wa'õtõ ma hã, Netaneu te 're sa.

²² Tawamhã Eriasibe, Zoiada, Zuãna, duré Zadua, sasedoti ipire na dama 're hâimana za'ra mono ré, ma tô levita norĩ wa'õtõ ma, danhib'ihâ'a nhisi na ãma rob'ui'éré za'ra ni, Persia te apito Dariu 're hâimana mono ré hã.

²³ Tawamhã levita norĩ wa'õtõ nhib'ihâ'a nhisi na, Zuãna, Eriasibehe 'ra 're ihâimana mono zéb u si, ma tô ãma dasiwi rob'ui'éré ni.

'Re ihâimana u'âsi mono nhorõwa 'ri 'rem na romhuri na dasima idasipo'o za'ra zé wasu'u

²⁴ Tawamhã levita i'rãnho'õmo norĩ hã ãne: Hasabiasi, Serebia, Zesua, Binu'i, duré Cadmi'é. Tawamhã ta norĩ siré, ma tô 'Re ihâimana u'âsi mono ãma 're iwata za'ra mono zém na isõ're na te te ãma 're sada'âbâ za'ra, isõ're simasap sina, 'Re ihâimana u'âsi mono nhib'a'uwẽ Dawi, tinhimiroti te te ihirizéb zarina.

²⁵ Tawamhã 'ridawa za'ẽtẽ 'madâ'â'wa norĩ Matania, Baquebuquia, Obadia, Mesulã, Talmo, duré Acube, ta norĩ hã ma tô 'Re ihâimana u'âsi mono nhorõwa 'ridawa za'ẽtẽ 'rata romnhimi'warazé 're isimasa mono hã te te 're 'madâ'â za'ra.

²⁶ Ã norĩ hã, Zoiaquĩ, Zozuéhé 'ra, Zozadaquihi nhihudu 're hâimana mono ré, Neemia dama i'rãnho'õmo na 're hâimana mono ré, duré Esdra sasedoti na dama 're hâimana mono ré, ma tô, tô 're hâimana za'ra.

'Ri nho'õmo 'wawi wara 'rãihâ isi'utõrĩzém na da te dasima iromhu'u za'ra zé wasu'u

²⁷ Tawamhã 'ri nho'u Zeruzalẽ 'wawi wa'ra 'rãihâ isi'utõrĩzém na da te dasima romhu'u za'ra wamhã, ma tô levita norĩ 're ihâimana za'ra mono zém hawimhã da te simro, da te dasima iromhu'u za'ra zéb u, ta norĩ hã 'Re ihâimana u'âsi mono ãma danho're na dawatazém na te te dama ãma romhu'u za'ra da, rowamremezém na, isõrõ ta'a na, duré pratu 'manharĩ baihâ zapoto ne na ropta'azém na.

^28-29 Isõ're'wa norĩ hã Zeruzalẽ waptoma, Netofa waptoma, Bete-Ziuga waptoma, Zeba waptoma, duré Azmaweti waptoma 're isi'ubumroi mono zém hawi me, ma tô oto sina ubumro.

³⁰ Tawamhã sasedoti norĩ, levita norĩ me, ma tô 'râwi si'upsõ za'ra, 'Re ihâimana u'âsi mono ma, iwẽ na hâimana za'ra da hã. Taha pari ma tô duré niha hã dama 'manharĩ za'ra, ta norĩ zama we isabâdâ iwẽ na dahâimana za'ra da. 'Ri nho'õmo 'wawi wa'ra 'rãihâ 'ridawa za'ẽtẽ mono hã duré i'wawi wa'ra 'rãihâ hã ma tô duré tô õne niha hã siwi rob'manha, tãma za'ra hã.

³¹ Tawamhã wa hã Neemia, Zuda ti'ai ãma dama ipire norĩ ma, wa tô tãma waihu'u za'ra, 'ri nho'õmo 'wawi wa'ra 'rãihâ nhisiwi si'rã'õtõ da hã. Wa tô duré maparane dawa'õno isa'ẽtẽ na sima sipo'o da hã tãma waihu'u za'ra, te te ropãrĩ za'ra mono sina sisõré pese na 'Re ihâimana u'âsi mono ãma tinho're na wata za'ra sina, 'ri nho'u hã te te nasi sa'oto za'ra mono da. Tahawa, imorĩ'rata na dawa'õno hã ma tô romnhimire niwĩmhã te te ropãrĩ za'ra mono sina, sõré pese na ai'aba'ré, Roprum na 'ridawa za'ẽtẽ nhisi nho'õmoi baba.

³² Tawamhã ma tô duré isõ're'wa norĩ za'u Hosaia hã te te ropãrĩ mono sina mo. Taha zarina te duré aiwa ãma isipo'o na Zuda ãma dama ipire norĩ hã te te sa'u za'ra.

^33-35 Tawamhã sasedoti norĩ danhimnhihârâzé te te hãsi za'ra mono sina te te ropãrĩ za'ra, sõré pese na dazarina isi'aba'ré nhisi hã ãne: Azaria, Esdra, Mesulã, Zuda, Bẽzami, Semaia, duré Zeremia. Ta norĩ zarina ma tô duré Zacaria Zonataha 'ra hã mo, Semaiaha nhihudu hã. (Taha hi'rata hâiba amo norĩ hã ãne: Matania, Micaia, duré Zacu, Asafihi hawi a'uwẽ.)

³⁶ Tawamhã Zacariaha te dawa'õtõ 'remhã nima norĩ, ma tô isãna'remhã ai'aba'ré, ã norĩ hã: Semaia, Azareu, Milala'i, Gilala'i, Maai, Netaneu, Zuda, duré Hanani. Tawamhã Dawi 'Re ihâimana u'âsi mono ãma si 're imorĩ te te sima ãma 're iropta'a mono zém ne hã te uburé 'wasa. Tahawa Esdra, 'Re ihâimana u'âsi mono nhimiroti waihu'u wẽ'wa hã ma tô dawa'õtõ nhowamhã mo.

³⁷ Tawamhã Â'a'a na 'ridawa za'ẽtẽ nhisi ãma ma tô sai'urizé Dawihi te 'ri nho'õmo tẽme inomro na hã sai'uri za'ra. Taha pari, ma tô duré Dawihi nhimiromhurizé 'ri 'rãihâ wa'waibaba ro'rahâri za'ra. Taha pari ma tô duré Â na 'ridawa za'ẽtẽ nhisi u siwa'rãmi apâ hã ai'aba'ré, bâtâ pusizém niwĩ 'ri nho'u 're ihâimana mono zababa.

³⁸ Tawamhã dawa'õtõ hâiba amo 'Re ihâimana u'âsi mono ãma tinho're na 're iwata za'ra mono norĩ hã ma tô romnhimi'e niwĩ 'ri 'wawi wa'ra 'rãihâ nhisiwi duré ai'aba'ré. Tawamhã wa tô wa hã aiwa dasima idasipo'o zarina mo, tô õ norĩ zarina. Ãhã wa, Forno na 'ri 'rãihâ nhisi zababa wa tô ai'aba'ré ni, 'Ri 'Wawi Wa'ra Isitõmo za'ẽtẽ nhisi u.

³⁹ Tawamhã Efraĩ na 'ridawa za'ẽtẽ nhisi na, Zesana na 'ridawa za'ẽtẽ nhisi na, Tepe na 'ridawa za'ẽtẽ nhisi na, Hananeu na 'ri 'rãihâ nhisi na, duré Cem na 'ri 'rãihâ nhisi na wa tô duré ãma ro'rahâri za'ra ni, Pone'ẽrebâire na 'ridawa za'ẽtẽ nhisi u iwasihutuzéb u. Tame 'Re ihâimana u'âsi mono nhorõwa 'ridawa za'ẽtẽ 'rata, ma tô wanhoré pese na iwasi'aba'rézé hã oto ti'rãsutu.

^40-41 Tawamhã maparane dawa'õno hã ma tô 'Re ihâimana u'âsi mono nhorõwa 'ri u hã aihutu. Ãhã wa, ĩte dawa'õtõ nhib'ihâ'a norĩ zu ma tô sasedoti norĩ zama tihâimana za'ra, danhimnhihârâzé te te ihãsi mono hã: Eriaquĩ, Maaséia, Miniami, Micaia, Elioenai, Zacaria, duré Hanania.

⁴² Ta norĩ zu te duré ã norĩ zama tihâimana za'ra; Maaséia, Semaia, Eriaza, Uzi, Zoãna, Malquia, Elã, duré Ézé. Duré isõ're'wa norĩ, Zezraia te te tãma 're i'wani za'ra mono norĩ hã ma tô sa'ẽtẽ sõ're 'rãihâ na hã 're sõ're za'ra.

⁴³ Tawamhã tô taha bâtâ na 'Re ihâimana u'âsi mono ma, danhimizama da te 're izata za'ra mono hã ahâ uptabi na ma tô tãma sõmri za'ra ni. Tahawa, dama rowẽ uptabi za'ra di. E marĩ wa. 'Re ihâimana u'âsi mono hã ipẽ'ẽtozé te te tãma sa'ẽtẽ za'ra wa. Taha zarina, pi'õ norĩ zama, duré ai'uté norĩ zama ma tô dazu sima romhu'u za'ra. Ãhã wa, robruru te te siwi i'manharĩ hã te romhâ na uptabi nherẽ, dasiwi wapari za'ra ni.

Sasedoti norĩ uparizéb da, marĩ da te isõmri za'ra zé wasu'u, levita norĩ uparizé me

⁴⁴ Tawamhã tô taha bâtâ na ma tô aibâ norĩ romnhimi'warazé te te 're i'madâ'â za'ra mono da hã dasiwi pisutu za'ra ni, 'Re ihâimana u'âsi mono nhorõwa 'ri ma danhoprubzé nhimi'warazé hã, 10 na amnho tehâri wasi misi da te 're isani za'ra mono nhimi'warazé hã, wahup sidâpâsi amnho duré robrã imorĩ'rata na da te 're isinarĩ za'ra mono nhimi'warazé hã. Tahawa, aibâ norĩ hã 'ri nho'õmo mono waptoma da te 're irobzuri mono na 're idanhoprub za'ra mono hã te te siwi 're waibu, 'Re ihâimana u'âsi mono nhimiroti na rob'ui'éré te te i'ruzéb zarina, sasedoti norĩ ma, duré levita norĩ ma, te te tãma 're sõmri za'ra mono da. Tawamhã uburé Zudaha nhihudu norĩ hã tãma to za'ẽtẽ za'ra di, sasedoti norĩ nhimiromhurizé ma hã, duré levita norĩ nhimiromhurizé ma hã.

⁴⁵ E marĩ wa. Ta norĩ hã uburé romhuri ipisutu pe, 'Re ihâimana u'âsi mono ma, te te tãma ãma 're uwaimrami za'ra mono wa, duré dahâiba iwẽ na 'Re ihâimana u'âsi mono ma si, 're dahâimana za'ra mono da, niha na ta norĩ hã te te duré siwi ãma 're uwaimrami mono wa, te te i'ruzéb zarina. Tawamhã duré 'Re ihâimana u'âsi mono nhorõwa 'ri 're, 're isõ're za'ra mono hã, duré 'ri 'madâ'â'wa norĩ zama, apito Dawi roti te te i'manharĩzéb zarina, duré i'ra Saloma te te i'manharĩzéb zarina, ma tô tite mono bâ te te 're 'manharĩ za'ra.

⁴⁶ Duréi Apito Dawi 're ihâimana mono hawimhã haré, duré Asafi 're ihâimana mono hawim haré, ma tô isõ're'wa norĩ, 'Re ihâimana u'âsi mono ãma 're idawata za'ra mono zém na danho're hã te te dama 're sãmra za'ra.

⁴⁷ Tawamhã Zorobabé 're hâimana mono ré, duré Neemia 're hâimana mono ré zama ma tô uburé Izaraéu nhihudu norĩ hã, tinhoprubzém na isõ're'wa norĩ hã, duré 'Re ihâimana u'âsi mono nhorõwa 'ri 'madâ'â'wa norĩ hã te te ãma 're pawaptob za'ra, bâtâ sidâpâsi. Tawamhã a'uwẽ Izaraéu nhihudu norĩ hã, ma tô levita norĩ ma danhoprubzé iwazéb zahi hã te te tãma 're sõmri za'ra. Tawamhã ta norĩ, taha parimhã ma tô duré oto sasedoti norĩ ma, ipo'o mono bâ te te tãma 're sõmri za'ra, 'Re ihâimana u'âsi mono te te tãma ipisutu za'ra zéb zarina.