Neemia 10 - ꞌRe Ihâimana Uꞌâsi Mono Zadawa Wasuꞌu

¹ Tawamhã imorĩ'rata na dama i'rãnho'u, Neemia, Hacaliasihi 'ra hã ma tô sisihâtâ. Taha parimhã ma tô duré Zedequia hã sisihâtâ. Taha nhana'remhã isiré norĩ zama ma tô oto sisihâtâ za'ra. Ãne isisi za'ra hã.

^2-8 Sasedoti hã: Seraia, Azaria, Zeremia, Pasu, Amaria, Malquia, Hatusi, Sebania, Maluque, Harĩ, Meremote, Obadia, Daniéu, Ginetõ, Baruqui, Mesulã, Abi'asi, Mi'ami, Maazia, Bilgai duré Semaia.

^9-13 levita norĩ hã: Zesua, Azaniaha 'ra, Binu'i, duré Henadadehe 'ra norĩ, Cadmi'é, Sebania, Hodia, Quelita, Pelaia, Hana, Mica, Reobe, Hasabiasi, Zacu, Serebia, Sebania, Hodia, Bani duré Beninu.

^14-27 Dama ipire norĩ hã: Paro, Paate-Moabi, Elã, Zatu, Bani, Buni, Azgade, Beba'i, Adonia, Biva'i, Adĩ, Ate, Ezequia, Azur, Hodia, Hasu, Beza'i, Harife, Anatoti, Noba'i, Magpia, Mesulã, Hezi, Mesezabe, Zadoqui, Zadua, Pelatia, Hana, Anaia, Oséia, Hanania, Hasube, Haloé, Pilea, Sobeque, Reum, Hasabna, Maaséia, Ai'asi, Hana, Anam, Maluque, Harĩ duré Ba'ana.

Izaraéu nhihudu norĩ, 'râwi sima ropisutu na isisaze za'ra zé wasu'u

²⁸ Wa norĩ hã Izaraéu nhihudu, sasedoti norĩ hã, levita norĩ hã, 'Re ihâimana u'âsi mono nhorõwa 'ri 'madâ'â'wa norĩ hã, tô taha 'ri're romhuri'wa norĩ hã, isõ're'wa norĩ tô taha 'ri 'remhã, duré uburé 'Re ihâimana u'âsi mono nhimiroti te te 're iwapari pese za'ra mono norĩ hã, wasiré a'uwẽ'õ wanhipti'ai 're, iwazarib za'ra wahâimana ãna 're iwahâimana za'ra mono norĩ hã wamro norĩ me, duré uburé wa'ra isimiza'rese prã norĩ me,

²⁹ wa ãhã na wama ipire za'ra norĩ me ropisudu hã romnhihâtâ 'remhã ãne na hã wasiwi 'manharĩ za'ra ni: Wa norĩ, tinhib'a'uwẽ Mozésihi ma, 'Re ihâimana u'âsi mono tinhimiroti te te isõmri na si wa za 're wahâimana za'ra. Duré Wanhib'apito, wate 'Re ihâimana u'âsi mono timreme uburé te te wama 're i'ru za'ra mono zém na si, wa za duré 're wahâimana za'ra. Wa za duré wapo're pese na 're iwahâimana za'ra mono zém na imreme hã wa te ãma tãma 're uwaimrami za'ra. Tawamhã wa te iropisutu za'ra zé, wa te duré ãma 're uwaimrami za'ra mono õ wamhã, te za iwẽ'õ hã te te wama 're apisutu.

³⁰ Wa'ra sipi'õ norĩ, wasiré a'uwẽ'õ norĩ wanhipti'ai 're, 're ihâimana za'ra mono norĩ ma, ãma 're mro za'ra mono da, wa te duré tãma 're isõmri za'ra mono da hã mare di za. Duré i'ra sipi'õ norĩ hã, wa'ra si'aibâ norĩ ma, wa te duré tãma 're ipisutu za'ra mono da hã mare di za, ãma 're mro za'ra mono da.

³¹ Wasiré a'uwẽ'õ norĩ, sabadu na duré siwa'ru nimahã bâdâ iwazéb zahi na, amnho trigu hã duré siwa'ru marĩ te te 're wede za'ra mono da, we te te 're i'wasari mono hã, wa te tiwi 're i'uipra za'ra mono da hã mare di za. Duré 7 wahu iwa 're tobro mono sidâpâsi, wanhib'rata na wa te 're robzuri za'ra mono õ di za. Wa za duré taré marĩ, wa te wasiwi 're iwaibui mono zé hã wa te wasima 're sisisi za'ra.

³² Tawamhã wahâiba mono bâ, wahup sidâpâsi wa za 'Re ihâimana u'âsi mono nhorõwa ma, marĩ wa'âbâzéb da, wa te 're sõmri za'ra, ẽtẽ waipo prã prata 4 grama na ipire pibuzém na hã.

³³ Isadawa wasu'uzé 'ri 're, ãma 're idawata za'ra mono zéb ãma romhurizéb da hã, wa za ã norĩ wa te 're sõmri za'ra: I'u'ẽtẽ wapu duptoi'õ 'Re ihâimana u'âsi mono ma, danhoprubzéb da hã, bâtâ sidâpâsi trigu na, cewada na danhoprubzéb da hã, danhimizama bâtâ sidâpâsi da te tãma 're izata za'ra mono na danhoprubzéb da hã, sabadu na danhoprubzé iwazéb zahi da hã, A'amo itém na dasima iromhu'u nhisi da hã, dato ihâiba amo norĩ da hã, danhoprubzé ihâiba amo norĩ da hã, Izaraéu nhihudu norĩ wasété pari zéb da, danhoprubzéb da hã, duré siwa'ru isadawa wasu'uzé 'ri 're, marĩ zô 're irowaptâ'â mono norĩ da hã.

³⁴ Tawamhã Uburé Danhib'apito, wate 'Re ihâimana u'âsi mono nhimiroti na rob'ui'éré te te wama i'ru za'ra zéb zarina, wa za wahub sidâpâsi uburé wa norĩ a'uwẽ, sasedoti norĩ, levita norĩ me datozébre hã wa te 're sãmra, nimahã te a'uwẽ wa'õno, te te wama 're ipisutu za'ra mono zéb da hã, 'Re ihâimana u'âsi mono nhorõwa 'ri 're, danhimizama na danhoprubzé zata zéb da, mi te te sada 're i'ãwisi za'ra mono da hã.

³⁵ Tawamhã wahup sidâpâsi wa te 're iroptehâri na'rata mono hã duré rob'rã norĩ wa te 're isinarĩ 'rata mono hã wa za isõrõwa 'ri u wa te 're ãwisi za'ra.

³⁶ 'Re ihâimana u'âsi mono nhimiroti zarina, wa za duré wawa'õtõ mono bâ wa'ra norĩ imorĩ'rada hã wa te 're ãwisi za'ra, isõrõwa 'ri u, tame sasedoti norĩ te te tãma 're hâiba nhomri za'ra mono da. Wanhimizama powawẽ zapu imorĩ'rata na 're ipoto za'ra mono na, pone'ẽrebâ zéré mapure imorĩ'rata na, duré pone'ẽrebâ zéré uzé imorĩ'rata na, wa za duré ãma tãma 're wanhoprub za'ra.

³⁷ Sasedoti norĩ ma, wa za duré amnho trigu wahup sidâpâsi wa te 're itehâri 'rata mono 'rã zu pese wai'o 'manharĩ hã 'Re ihâimana u'âsi mono nhorõwa 'ri u wa te 're ãwisi za'ra. Duré ihâiba amo na wanhoprubzé hã wa za duré wa te tãma 're sõmri za'ra, uwa 'rãi wa'u isé hã, azeitona wa'u to hã, duré uburé rob'rã isipu'u pese norĩ zama. Levita norĩ ma, wa za duré wanhimitehâri za'ra 10 na isa'rata ãmamhã wa te 're sani za'ra, wa te tãma 're sõmri za'ra mono da. E marĩ wa. Ta norĩ hã 'ri nho'õmo mono na wa te 're iromhuri za'ra mono zéb ãma, danhoprubzé apo'o waibui'wa wa.

³⁸ Tawamhã amnho tehâri 10 na isa'rata ãma za te te 're iwaibui mono zéb da ãma, te za nimahã sasedoti Arãhã nhihudu, levita norĩ siré hã 're 'maihâimana. Duré tô 10 na isa'rata ãma te te siwi 're ipo'o siromo mono hawimhã, te za duré 10 na isa'rata ãmamhã levita norĩ te te siwi 're 'wasari, 'Re ihâimana u'âsi mono nhorõwa 'ri 're, romnhimi'warazéb u.

³⁹ 'Re ihâimana u'âsi mono nhorõwa 'ri wa, marĩ mono siwazari 're isimi'wara mono ãma, sasedoti norĩ niha bâtâ na te te 're romhuri za'ra mono wa, 're isimi'wara mono zéb ãma, 'ri 'madâ'â'wa norĩ 're isimi'wara mono zéb ãma, tô taha 'ri wa, isõ're'wa norĩ 're isimi'wara mono zéb ãma, te za Izaraéu nhihudu norĩ hã, levita norĩ hã amnho, duré uwa 'rãi wa'u isé hã te te 're sõmri za'ra. Ãhã nherẽ, wate 'Re ihâimana u'âsi mono nhorõwa 'ri hã 'ri pese ãna wa te wasiwi 're irẽme mono da hã mare di za.