Mateu 21 - ꞌRe Ihâimana Uꞌâsi Mono Zadawa Wasuꞌu

Zezusi hã, Zeruzalẽ u datẽme iwisizé wasu'u

¹ Tawamhã Zezusihi siré 're inomro mono norĩ hã ma tô oto isiré ai'aba'ré, Zeruzalẽ u. Si'aba'réi wamhã, ma tô oto rob'umhutu za'ra, Befazé na 'ri wa'õtõ nhisi u hã. Oriwera na ẽtẽ 'rãihâ nhisi ãma te 'ri wa'õno hã 're hâimana. Te te oto rob'umhutu za'ra wamhã, ma tô Zezusi hã tisiré 're inomro mono norĩ hã maparane ihâiba na sisõwamhã satõrĩ zahuré, 'ri wa'õtõ u.

² Ãne ma tô tawamhã tãma nharĩ zahuré, te te isatõrĩ zahuré ma hã: — Õwa te za ane wa'wa, asõ're uwaibaba wa'aba, 'ri wa'õno hã ihâimana u. Tawamhã aimasisi aba wi, te za awaru po'repore hã isãmri 'wa, da te ãma wasisi haré, 'rãi wazi na isa hã. Tame te duré i'ra hã isiré isababa za. Tawamhã ta norĩ hã te za iwasihu zahuré wa'wa za, sahuré we ĩma saprõni aba da ãwamhã.

³ Tawamhã ni'wa hã awaru po'repore, sahuré we ĩma isaprõni aba na te te asadanharĩ aba wamhã, ãne te za tãma ĩzadawa wasu'u wa'wa za, asa: “Wanhib'apito hã marĩ õ wa, ãma morĩ da, wa we sô wanem ni, wa te tãma saprõni zahuré da.” Ãne na hã tãma waihu'u aba wi, te za awa'awi ãma asazei wa'wa za, awaru po'repore norĩ hã sahuré we ĩma isaprõni aba da na hã.

⁴ Duréihã 'Re ihâimana u'âsi mono zadawa 'mahârâ 'rata 'wa te te ãma irob'ui'éré siromo zéb zarina te te sina uwaimrami da, ma tô Zezusi hã ãne tãma pisutu zahuré, awaru po'repore te te itẽme saprõni zahuré da. Ãne duréihã ãma irob'ui'éré siro hã:

⁵ “Ma'ãpé, tãma rowasu'u za'ra wa'aba, Siã na ẽtẽ 'rãihâ nhisi ãma 're idasi'ubumroi mono norĩ ma, ãne: ‘Õhõta te we oto atẽme timorĩ 'wa, asib'apito za'ra wa'wa hã. Ta hã dazada 're ihâimana mono õ isimizawi pe te we ãma mo, awaru po'repore na, ipréduptém na hã.’ ”

⁶ Tawamhã Zezusi te te tãma ipisutu zahuré zéb zarina, ma tô awaru po'repore norĩ zô hã ne.

⁷ Tawamhã te te sãmri zahuré wamhã, ma tô apâ saprõni zahuré Zezusihi u, awaru po'repore hã i'ra ré. Tawamhã tisi'ubuzém na ma tô tãma ba'ubu zahuré. Taha pari, ma tô ãma darõno Zezusi hã, ãma morĩ da.

⁸ Tawamhã da'ahâ uptabi na ma tô dasi'ubuzém na tãma waptâ za'ra ni bâdâdi na, isisiwi za ãma imorĩ da na, dama pire wa, sô 're datob'uzu za'ra mono wa. Wedepa nhipti su na zama ma duré tãma waptâ za'ra ni.

⁹ Tawamhã Zezusihi nhowa idasi'aba'ré norĩ hã duré isarina idasi'aba'ré norĩ zama te nasi dasima 'mahârâ za'ra ni, ãne: — Apito Dawihi nhihudu ãma, 're wawata za'ra wa'aba mono. Wanhib'apito zadawa para, te we oto mo. 'Re ihâimana u'âsi mono hã iwẽ si te te tãma 're pisutu u'âsi mono neza. 'Re ihâimana u'âsi mono ãma zama duré 're wawata za'ra wa'aba mono, hâiwa ãma 're isãmra mono ãma, wei watẽme te te satõrĩ wẽ te.

¹⁰ Tawamhã Zeruzalẽ u ma oto wi, Zezusi hã. Wisi wamhã, iwa 're idasi'ubumroi mono norĩ hã ma tô da'ahâ uptabi na 're dasiwairõtõ, da te dasima 'mahârâ za'ra sina. Tahawa, te nasi tasisadanharĩ za'ra ni, ãne: — E 'wa hã, õ hã bété.

¹¹ Tawamhã Zezusihi zarina idasi'aba'ré norĩ hã ma tô dama nharĩ za'ra, Zeruzalẽ ãma 're idasi'ubumroi mono norĩ ma, ãne: — Ã hã Zezusi, 'Re ihâimana u'âsi mono zadawa 'mahârâ'wa, Nazaré na 'ri wa'õtõ nhisi hawi we imorĩ, Galiléa hawi.

'Re ihâimana u'âsi mono nhorõwa 'ri hawi, Zezusi te te idazate mono zé wasu'u

¹² Tawamhã Zezusi hã ma tô oto ãzé, 'ri 'rãihâ u, 'Re ihâimana u'âsi mono nhorõwa 'ri u. Tame te dama rowede'wa norĩ hã 're si'ubumro, duré dawi marĩ uipra'wa norĩ zama hã, 'ri 'wawi wa'ra 're. Tawamhã Zezusi hã ta norĩ te te 'madâ'â za'ra wamhã, ma tô te te sate, rob u. Wedeza hã rob'uiprazém na te te dawi ãma 're isaprĩ za'ra mono norĩ te hã, duré utu'u te te dama 're iwede za'ra mono norĩ simasisizéb zama hã, ma tô te te tiwi anhamra.

¹³ Tawamhã Zezusi hã ãne te tãma nharĩ za'ra, rowede'wa norĩ ma hã: — Duréihã wahi'rada hã ma tô ãne na rob'ui'éré, 'Re ihâimana u'âsi mono mreme na: “Ĩnhorõwa hã iwa ĩma 're idamreme zusi mono zém na, te za da te 're sisi za'ra, 'ri hã.” Ãne te tinha. Tane nherẽ, a norĩ wa'wa hã ma tô iwa asima ãma 're irob'manharĩ wasété za'ra wa'aba mo. Tahawa, danhibrom na dawi 're isipsaihuri za'ra mono norĩ, 're isi'ubumroi mono zém ne, te oto 'ri hã 're sa, wasété uptabi na. Ãne duréihã ai'ãma rob'ui'éré za'ra wa'wa hã, ibaihâ na hã.

¹⁴ Tawamhã Zezusi hã 'Re ihâimana u'âsi mono nhorõwa ãma 'ri 'wawi wa'ra 're, zahadu sãmra ré, ma tô da'ahâ na itẽme dasito, itob'a norĩ hã, duré imorĩ waihu'u'õ norĩ zama. Itẽme dasito mono wamhã, ma tô da'apese, uburé ihâzé ré norĩ hã.

¹⁵ Tawamhã ai'uté norĩ hã ma tô nasi sima 'mahârâ za'ra, ãne: “Apito Dawihi nhihudu ãma, 're wawata za'ra wa'aba mono.” Ãne te nasi sima 'mahârâ za'ra, 'ri 'wawi wa'ra 're, sãmra ré. Tawamhã 'Re ihâimana u'âsi mono ma, da'ãma romhuri'wa norĩ ma, ipire norĩ hã tisiré ma, duré isimiroti na rob'ui'éré 'rata na dama rowahutu'wa norĩ hã, ai'uté norĩ te te nasi sima i'mahârâ za'ra zé hã te te wapari za'ra wamhã, duré tinhimiromhõsi na Zezusi te te 're ida'apawapto mono zé te te 'madâ'â za'ra wamhã, ma tô sada tizahi za'ra, Zezusihi zada.

¹⁶ Tawamhã ta norĩ hã te Zezusi hã siwi sadanha, ãne: — E wapari õ di, ai'uté norĩ mreme hã. E asina sadawa uwati za'ra ãna. Tawamhã Zezusi hã asa te duré tãma nharĩ za'ra, ãne: — Wa tô wapari za'ra. A norĩ wa'wa hã bété. E sõré za'ra wa'aba õ di, wahi'rata nhimi'ui'éré hã: “Ai'uté norĩ ma, wa tô waihu'u siromo za'ra, duré ai'utépré norĩ ma zama, iwẽ na si ai'ãma 're wata za'ra mono da.” Ãne ma tô wahi'rada hã ĩ'ãma rob'ui'éré siro, ibaihâ na hã.

¹⁷ Tawamhã Zezusi hã te oto ihawi timorĩ za'ra, Betãnha na 'ri wa'õtõ nhisi u, tame a'â sõtõ da.

Figuera wede ma, Zezusi te te inharĩzé wasu'u

¹⁸ Tawamhã mararé ma tô Zezusi hã apâ mo Zeruzalẽ u. Morĩ ré, ma tô mra hã azâ.

¹⁹ Tawamhã figuera wede hã ma tisã, bâdâdi zada'ré isa hã. Figuera na wede nhisi hã. Te te sãmri wamhã, ma tô itẽme apa, te te sabu da, i'rã zô. Tane nherẽ, 'rãi ãna te za, isui ré si. Tahawa, te figuera wede ma, tinha ãne: — Niwa i'ai'rã da hã, mare di za oto. Ai'rã'õ u'âsi, te za oto 're asa mo. Tawamhã awa'awi ma tô oto wede hã tiwede'ré.

²⁰ Tawamhã Zezusihi siré 're inomro mono norĩ hã ãne hã te te 'madâ'â za'ra wamhã, ma tô ãma titob'uzu za'ra. Tahawa, ma tô Zezusi hã siwi sadanha, ãne: — E niha ma awa'awi tiwede'ré, figuera wede hã.

²¹ Tawamhã Zezusi te asa tãma nharĩ za'ra, ãne: — Tô sena wa aima waihu'u za'ra wa'wa. 'Re ihâimana u'âsi mono hã 're wawã za'ra wa'aba mono ãna, õhõ si 're umnhasi za'ra wa'aba mono wamhã, te za marĩ hã aima waihu'u pese za'ra wa'aba õ nherẽ, 're i'manharĩ za'ra wa'aba mo isadawa para, wa hã figuera wede ma, te inharĩ ne, ãne hã za tô aiwa niwa ĩnhimi'manharĩ sine 're i'manharĩ za'ra wa'aba mono zé hã. Õhõta ẽtẽ 'rãihâ te za. 'Re ihâimana u'âsi mono si 're umnhasi za'ra wa'aba mono wamhã, te za ẽtẽ 'rãihâ ma inharĩ za'ra wa'wa, 'râwi sisa'o'o wa, âi ba hã waptã'ã da. Tawamhã asadawa para wa'aba, te za tô âi ba waptãrã, ẽtẽ 'rãihâ hã. Ãne 'Re ihâimana u'âsi mono si 're umnhasi za'ra wa'aba mono wamhã, te za tô isadawa para, marĩ iwẽ hã 're i'manharĩ za'ra wa'aba mo, aima waihu'u pese za'ra wa'aba õ nherẽ, ãne hã.

²² 'Re ihâimana u'âsi mono hã 're umnhasi za'ra wa'aba mono sina, marĩ na tiwi 're rowaptẽrẽ za'ra wa'aba mono wamhã, tô sena te za te te aima ãma 're a'uwaimrami 'wa.

Zezusi hã, ni'wa sadawa para uburé marĩ hã te te dama 're i'ab'manharĩ mono zéb zô, da te dasiwi isadanharĩzé wasu'u

²³ Tawamhã Zezusi hã ma tô apâ mo, 'Re ihâimana u'âsi mono nhorõwa 'ri u. Tame te oto dama rowahutu, 'ri 'wawi wa'ra 're. Tawamhã sasedoti ipire norĩ hã ma tô itẽme aimasa, zudeu norĩ ma roti'wa norĩ zama. Tawamhã Zezusi hã te siwi sadanha, ãne: — E 'wa sadawa para, te bété ãne hã marĩ hã dama 're i'ab'manharĩ mo. E 'wa hã, aipisutu'wa.

²⁴ Tawamhã Zezusi te asa tãma nharĩ za'ra, ãne: — Wa hã wa za a'â asadanharĩ na aima ãma wa'rãmi za'ra wa'wa. Tawamhã i'uwaibaba, ĩma waihu'u za'ra wa'aba wapsi, wa za asa aima wasu'u za'ra wa'wa, ni'wa sadawa para te dama 're i'ab'manharĩ mono na hã.

²⁵ Ãne wa za asadanharĩ za'ra wa'wa: E 'wa sadawa para, ma tô Zuwã hã â dawabzuri hã te te dama 're ab'manharĩ bété. E 'Re ihâimana u'âsi mono zadawa para. E dazadawa para. Tawamhã 'râwi te sima nharĩ za'ra, ãne dama rowahutu'wa norĩ hã: — E niha, wa za tãma waihu'u za'ra ni, õne wamhã. 'Re ihâimana u'âsi mono zadawa para, â dawabzuri te te dama 're i'ab'manharĩ mono na wa te tãma waihu'u za'ra wamhã, te za wazadanharĩ na sahu za'ra, ãne: “E niha bété, Zuwã Batistaha nhimirowasu'u hã saze za'ra wa'aba õ di, dame.”

²⁶ Tane nherẽ, taré dazadawa parap si â dawabzuri te te dama 're i'ab'manharĩ mono na wa te tãma waihu'u za'ra wamhã, wa za wasina hã wapahi za'ra ni dama, niha da te wama rob'manharĩ za'ra õ'umnhasite. E marĩ wa. Zuwã Batista hã 'Re ihâimana u'âsi mono zadawa 'mahârâ'wa 're imorĩ na, da te 're saze za'ra mono wa.

²⁷ Tawamhã Zezusihi ma, te oto asa nharĩ za'ra, ãne: — Wa norĩ hã wa te waihu'u za'ra õ di, ni'wa sadawa para, Zuwã Batista hã â dawabzuri te te dama 're i'ab'manharĩ mono zé hã. Tawamhã Zezusi hã asa ma tizadawa na tãma ãma wa'rãmi za'ra, ãne: — Tane tô. A norĩ wa'wa hã ĩma waihu'u za'ra wa'aba õ nherẽ, wa hã te duré aima waihu'u za'ra wa'aba õ di za, ni'wa sadawa para marĩ hã te dama 're i'ab'manharĩ mono na hã.

Aibâ hã, i'ra poto'rada hã te te sina isadawa zamarĩzé wasu'u

²⁸ Tawamhã Zezusi hã te duré tãma rowasu'u za'ra, 'Re ihâimana u'âsi mono ma, da'ãma romhuri'wa norĩ ma, ãne: — Wa za oto aima ãma romnhimiré'é za'ra wa'wa. Ma'ãpé ãma rosa'rata pese za'ra wa'aba za. Aibâ hã te 're sãmra. Maparane i'ra hã. Tawamhã ti'ra poto 'rata ma, ma tô rob'ru, ãne: “Ĩ'ra, mo oto aimorĩ buru u, romhuri da, ã bâtâ na.”

²⁹ — Tawamhã asa te tãma tinha, i'ra poto'rada hã, ãne: “Te ĩsima rowẽ õ di, ĩmorĩ da hã. Wa za nhamra u'â.” Ãne ma tô timama ma waihu'u asa. Tane nherẽ, te te inharĩzém na ãma ronomro wapsi, ma tô tinhimirosa'rata na ãma saprĩ. Tahawa, ma tô oto mo buru u, te te romhuri da.

³⁰ — Tawamhã ti'ra hâiba amoi ma, te duré rob'ru, idub'rata ma, te te irob'ruzém ne, buru u morĩ da, te te romhuri da. Tawamhã i'ra hã te asa tãma tinha, timama ma, ãne: “Wẽ di tô, ĩmama. Wa za tô mo, te romhuri da.” Tane nherẽ, ta hã timama mreme hã awa'awi te te saze nherẽ, morĩ õ di, buru u hã.

³¹ — E 'wa hã tawamhã, timama te te sina isaze hã te te tãma irob'ruzéb uwaibaba, imorĩ da hã. E idub'rada. E ino. — Ãne ma tô Zezusi hã ãma sadanharĩ za'ra, 'Re ihâimana u'âsi mono ma, da'ãma romhuri'wa norĩ nhib'apito norĩ hã, duré zudeu norĩ ma rowahutu'wa norĩ hã. Tawamhã asa te tãma nharĩ za'ra, ãne: — Dama ipoto'rada ma tô timama mreme hã sina saze. Tawamhã Zezusi te duré ãne tãma rowasu'u za'ra: — Tane tô. Tane duré, danhib'apito ma rob'uiprazé arĩ ubumroi'wa norĩ hã duré pi'õ hã aibâ zô si siwa'ru 're ihâimana za'ra mono norĩ hã, ta norĩ hã aré 're hâimana wasété za'ra mono nherẽ, ãté te za 're sisisi, 'Re ihâimana u'âsi mono, da'ãma 're isib'a'uwẽ mono zéb u hã, ta norĩ si tô sena na te te 're sazei pese za'ra mono wamhã. Tane nherẽ, a norĩ wa'wa hã ãté dame 're asisisi aba mono õ di za. Tô sena, wa ãne na hã aima waihu'u siromo za'ra wa'wa.

³² Zuwã Batista hã ma tô aré atẽme timorĩ za'ra wa'wa, 'Re ihâimana u'âsi mono te te sima 're i'aiwẽ za'ra wa'aba mono zéb zarina 're anomro wẽ wa'aba mono zéb da hã, te te aima 're wasu'u za'ra wa'aba mono da. Tane nherẽ, isimirowasu'u na hã ãma 're saze za'ra wa'aba mono õ di. Rob'uiprazé arĩ ubumroi'wa norĩ si ma tô ãma saze za'ra isimirowasu'u na hã, pi'õ hã aibâ zô si siwa'ru 're ihâimana za'ra mono norĩ zama. Tawamhã ta norĩ hã atõmo na 're 'madâ'â za'ra wa'aba mono nherẽ, a norĩ wa'aba zama asimirosa'rata na 're saprĩ za'ra wa'aba mono õ di, isimirowasu'u na ãma 're isaze za'ra wa'aba mono zéb da hã.

Buru na romhuri wasété'wa norĩ wasu'u

³³ Tawamhã Zezusi hã te duré ãne tãma rowasu'u za'ra: — Ãne wa za duré aima ãma romnhimiré'é za'ra wa'wa. Ma'ãpé, ĩwapari pese za'ra wa'aba za. Aibâ hã te 're sãmra, buru tede'wa hã. Tawamhã tiburu ãma ma tô a're, uwa 'ru hã. Te te a're pari, ma tô duré buru 'wawi wa'ra hã 'manha. Ma tô duré ẽtẽ nhisiwi sada ab're, iwa uwa'ru 'rãi watizéb da hã, iwa'u zô. Taha pari, 'ri 'rãihâ hã ma duré buru wa'wa 'manha, isipsaihuri norĩ zô, dasipapara rob'madâ'âzéb da hã. Tawamhã ma tô ni'wam norĩ hã sisõ'a ré pisutu za'ra, iburu hã te te sô 're 'madâ'â za'ra mono da. Uwa 'ru 'rã hã 're 'rã prédub za'ra mono wapsi, te za te te tãma ãma 're amo za'ra, buru tede'wai ma hã. Taha pari, te oto mo, buru tede'wa hã darob amoi u, tamomo a'â sãmra da.

³⁴ Tawamhã oto 'rãi prédu mono wa, ma tô buru tede'wa hã tãma iromhuri'wa norĩ hã satõrĩ za'ra tiburu u, uwa 'ru 'rã hã buru 'madâ'â'wa norĩ te te tãma ãma i'amo za'ra zô.

³⁵ Tawamhã buru u sihutu wamhã, ma tô buru tede'wa te te isatõrĩ za'ra hã siwi waibu, buru 'madâ'â'wa norĩ hã. Tawamhã buru tede'wai ma, romhuri'wa norĩ ma, ma tô rob'manharĩ wasété za'ra. Tahawa, ma tô misi siwi azâ. Ihâiba amo ma duré siwi tiwĩ. Ihâiba amo ma duré ẽtẽ na siwi u'a za'ẽtẽ, dâ'â da.

³⁶ Tawamhã buru tede'wa hã te duré sô satõrĩ za'ra, tãma iromhuri'wa norĩ hã, ahâ na. Tawamhã ta norĩ hã buru u sihutu wamhã, ma duré tãma rob'manharĩ wasété za'ra, buru 'madâ'â'wa norĩ hã.

³⁷ Tawamhã 'râwi te oto sima rosa'rata, buru tede'wa hã: “Ĩ'ra si'aibâ hã te itẽme satõrĩ za'ra wamhã, ãté te za siwi hâiba wazé.” Ãne te sima rosa'rata, buru tede'wa hã. Tawamhã uburé da te tiwi uprosi za'ra wa, te oto ti'ra uptabi hã satõ, tãma iburu 'madâ'â'wa norĩ u.

³⁸ Tawamhã wisi wamhã, buru 'madâ'â'wa norĩ hã te te duré sima sãmri za'ra wamhã, te ãne sima 'mahârâ za'ra: “Õhõta buru tede'wai 'ra hã te wei mo, timama uirĩ na buru tede'wa da hã. Wa te wasiwi wĩrĩ aba, buru hã wate za'ra da.” Ãne ma tô sima 'mahârâ za'ra, buru 'madâ'â'wa norĩ hã.

³⁹ — Tawamhã wisi wi, ma tô siwi ti'â, buru tede'wai 'ra hã. Buru nhiti ma tô siwi waze. Tame ma tô oto siwi tiwĩ, buru 'madâ'â'wa norĩ hã.

⁴⁰ Tawamhã Zezusi hã te oto sadanharĩ za'ra, 'Re ihâimana u'âsi mono ma da'ãma romhuri'wa norĩ nhib'apito norĩ hã, ãne: — Buru tede'wa hã tiburu u apâ wisi wamhã, e marĩ te za tãma 'manharĩ za'ra, tãma iburu 'madâ'â'wa norĩ ma hã.

⁴¹ Tawamhã asa te tãma nharĩ za'ra: — Buru tede'wa hã ãma pẽ'ẽzé za'ra ãna, te za dama 'ru za'ra, da te dasiwi uprosi da, aibâ iwasété uptabi norĩ hã. Tawamhã te za duré da'apisutu, dama i'umnha hã tãma iburu 'madâ'â'wa da hã. Ta norĩ hã te za i'uwaibaba si te te tãma ãma 're amo za'ra, uwa 'ru 'rã hã, 're 'rã prédub za'ra mono wamhã.

⁴² Tawamhã Zezusi hã te oto sina ãma simiré'é ẽtẽ na, ãne: — Oro 'Re ihâimana u'âsi mono zadawa wasu'u na rob'ui'éré hã 're sõré za'ra wa'aba mono za, aima waihu'u za'ra wa'aba õ di bété. Ãne ibaihâ na rob'ui'éré hã: “Ẽtẽ tomhâpâ wẽ 'ri na'ratazéb da, wẽ uptabi nherẽ, wasété newa, 'ri'wa norĩ te te siwi iwẽ'õ hã te oto tô taré nherẽ pire na hã, 're sa'wari u'âsi. Uburé Danhib'apito hã ma tô ãne hã pisutu, 'ri na'rata uparizéb da, pire na 're isa'wari mono da hã. Tahawa, ãne na wa te ãma 're rosa'rata za'ra mono wamhã, wa ãma 're watob'uzu u'âsi za'ra, wa norĩ hã.”

⁴³ — Ẽtẽ tomhâpâ wẽ hã da te dasiwi iwẽ'õ ne, a norĩ wa'wa hã asiwi 're ĩwẽ'õ za'ra wa'aba mono wa, 'Re ihâimana u'âsi mono nhib'a'uwẽ, 're aihâimana u'âsi za'ra wa'aba mono õ di za. Ai'upana wa'aba si te za oto 'Re ihâimana u'âsi mono hã da'ãma 're sib'a'uwẽ, isimiroti te te 're i'madâ'â pese za'ra mono norĩ ãma. Tô sena, wa ãne na aima waihu'u za'ra wa'wa.

⁴⁴ Duré, ẽtẽ tomhâpâ nhisiwi, zé'a 'manharĩ hã 're rere'e mono wa, 're isipru pese za'ra mono ne, te za ĩwẽ'õ'wa norĩ hã hâ za'ra, 'Re ihâimana u'âsi mono hã. Duré ẽtẽ tomhâbâ hã zé'a 'manharĩ nhisiwi 're rere'e mono wa, te te 're ipru pese za'ra mono ne, te za 'Re ihâimana u'âsi mono wẽ'õ'wa norĩ si hâ za'ra. Ta norĩ ãma hã 're sib'a'uwẽ za'ra mono õ di za. — Ãne ma tô Zezusi hã sina ãma simiré'é, ẽtẽ wasu'u na hã.

⁴⁵ Tawamhã sasedoti ipire norĩ hã, duré farizeu norĩ hã, Zezusi te te ãma iromnhimiré'ézé hã te te wapari za'ra wamhã, ma tô sina waihu'u za'ra, tô õ norĩ udâna te te ãma iromnhimiré'é mono na hã.

⁴⁶ Tahawa, ma tô aré sima hâiba 'ru za'ra, te te dama 'ru za'ra da, dazazéb 're da te dasiwi sẽrẽ da, Zezusi hã. Tane nherẽ, ma tô dama tipahi za'ra aibâ norĩ hã, Zezusi hã 'Re ihâimana u'âsi mono zadawa 'mahârâ'wa, oto 're imorĩ na da te 're saze za'ra mono wa, da'ahâ na.