Mateu 19 - ꞌRe Ihâimana Uꞌâsi Mono Zadawa Wasuꞌu

Zezusi hã damro, da te 're irẽme za'ra mono zém na te te irowasu'uzé wasu'u

¹ Tawamhã ãne na Zezusi te te rowasu'u parimhã, ma tô Galiléa hawi mo, Zudéa na danhipti'a nho'õmo nhisi u morĩ da, Zodã pa, pa zara u hã.

² Taha wamhã, da'ahâ uptabi na te isarina hã ai'aba'ré ni. Tawamhã Zudéa u wisi wamhã, ma tô tame ihâzé ré norĩ hã apese.

³ Tawamhã farizeu norĩ ni'wam norĩ hã ma tô itẽme aihutu Zezusihi u, te te siwi sadawa pibu da, timreme na te te upai wa, te te siwi mreme wẽ'õ da. Ãne ma tô taha wamhã siwi sadanha: — E aibâ hã te za timro marĩ ipire te te tiwi 're 'manharĩ za'ra mono õ nherẽ, te te 're rẽme za'ra. E wahi'rata norĩ nhimiroti zarina hã, ãne hã.

⁴ Tawamhã Zezusi hã te asa tãma nharĩ za'ra: — E ibaihâ na ãne hã 're sõré za'ra wa'aba mono ã bâ, 'Re ihâimana u'âsi mono nhimiroti 'rata na rob'ui'éré hã. Ãne na rob'ui'éré hã: “Ropoto na'rata hawimhã ma tô 'Re ihâimana u'âsi mono hã a'uwẽ na aibâ hã 'manha. Pi'õ zama ma tô duré 'manha.” Ãne na duréihã ibaihâ na rob'ui'éré hã.

⁵ Ãne ma tô duré roti 'Re ihâimana u'âsi mono hã, ibaihâ na hã: “Tahawa, aibâ hã 're mro za'ra mono wamhã, te za timama norĩ hã te te 're rẽme za'ra, timro me si siré 're simasisi zahuré mono da oto. Sina 're hâiba sitob zahuré mono wa, maparane na ihâiba nherẽ, misi ihâiba ne, te za siré 're simasisi u'âsi zahuré oto.” Ãne 'Re ihâimana u'âsi mono nhimiroti 'rata na rob'ui'éré hã.

⁶ Ãne wa, dasina 're damro za'ra mono wamhã, dahâiba maparane nherẽ, te za oto dahâiba misi ne dasiré 're dasi'ubumro. Tahawa, 'Re ihâimana u'âsi mono, dasi'ãma te te 're da'ahâiba to mono nherẽ, ni'wa hã da'ãma 're siwanhizari mono õ di za. Mare di.

⁷ Tawamhã farizeu norĩ hã ma tô duré siwi sadanha, ãne Zezusi hã: — Oro zapre te Mozési hã te te wama 're roti za'ra, aibâ hã timro te te 're rẽme za'ra mono da wamhã, timro te te 're irẽme za'ra mono zém na rob'ui'éré te te tãma 're sõmri za'ra mono da, te te duré iré 're satõrĩ za'ra mono da, isiti oto sina 're pahâ za'ra mono da.

⁸ Tawamhã Zezusi hã te asa tãma nharĩ za'ra, ãne: — Ta hã Mozési hã aipẽ'ẽ tete za'ra wa'aba wa, ma tô ãne na te te aima 're roti za'ra wa'wa. Tane nherẽ, ropoto na'rata hawimhã, ãne na 're iromhâimana mono zé hã hâimana õ di.

⁹ Tahawa, tô sena wa za duré aima waihu'u za'ra wa'wa. Ni'wa hã aibâ, imro aibâ na sipsaihuri õ nherẽ, timro te te mei wa, duré oto pi'õ aimawi na ta hã mro wamhã, te za tiwasédé aibâ hã 'manha.

¹⁰ Tawamhã Zezusihi siré 're inomro mono norĩ hã te tãma nharĩ za'ra, ãne: — Tane ze te bâ, damro ãna 're idanomro mono da si, iwẽ hã.

¹¹ Tawamhã Zezusi hã te duré asa tãma nharĩ za'ra, ãne: — Ã hã te ãma irowasu'uzé hã aihĩni da te 're iwaihu'u za'ra mono da hã mare di za. 'Re ihâimana u'âsi mono te te tãma 're iwaihu'u za'ra mono norĩ si, te za te te 're waihu'u pese za'ra, ãne hã.

¹² Aibâ ni'wam norĩ hã 're ipoto za'ra mono zém hawim haré, 're 'ra waihu'u za'ra mono õ wa, te za ta norĩ si mro ãna hã 're nomro, õne haré. Duré aibâ ni'wam norĩ hã da te 're sihâri za'ra mono wamhã, oto 're 'ra waihu'u za'ra mono õ wa, te za duré ta norĩ si hã mro ãna 're nomro. Duré ni'wam norĩ hã te za tihâiba hã te te 're sawi pese za'ra 'râwi, 're mro za'ra mono tõ da, 'Re ihâimana u'âsi mono nhib'a'uwẽ si 're nomro mono da. Ni'wam norĩ hã ãne hã te te 're waihu'u pese za'ra mono wamhã, te za tô ãma 're sõpré u'âsi.

Zezusi hã, ai'uté te te i'azawizé wasu'u

¹³ Tawamhã ma tô Zezusihi u, ai'uté hã da te simro, tinhib'rada i'rã nhisiwi, te te nasi ãma aza'ra sina, Timama ma, ãma mreme za'ra da. Tane nherẽ, isiré 're inomro mono norĩ hã ma tô dama nharĩ za'ra, ai'uté norĩ hã da te itẽme simro tõ mono da.

¹⁴ Tawamhã Zezusi te tãma nharĩ za'ra, tisiré 're inomro mono norĩ ma, ãne: — Tô'ã. Dawi rosawi za'ra wa'aba tõ. A'â we ĩtẽme da te simroi mono, ai'uté norĩ hã. Ã norĩ ai'uté hã õne haré simizazei pese na 're ihâimana za'ra mono ne, ni'wam norĩ tane 're hâimana za'ra mono wapsi, te za ta norĩ 'Re ihâimana u'âsi mono hã ãma 're sib'a'uwẽ za'ra.

¹⁵ Tawamhã tinhib'rada, i'rã nhisiwi te te nasi ãma aza'ra sina te hâiwa u nasi ãma timreme za'ra. Taha pari ma tô duré oto mo.

Aibâ isibro pese wasu'u

¹⁶ Tawamhã nimahã bâtâ na ma tô aibâ hã mo, Zezusihi u, te te sadanharĩ da. Ãne te taha wamhã sadanha: — Rowahutu'wa, e marĩ iwẽ hã wa za 'manha, 're idanomro u'âsi mono zé hã te ĩsina i'uwaimramizéb da hã.

¹⁷ Tawamhã Zezusi te asa tãma tinha, ãne: — E marĩ da, te ãne ĩzadanha, marĩ iwẽ hã da te 're i'manharĩ za'ra mono zém na hã. Misire 're imorĩ wẽ uptabi hã te 're hâimana. 'Re ihâimana u'âsi mono nhimiroti 'rata na Mozési te te ãma irob'ui'éré hã 're 'madâ'â pese mono wapsi, te za asina i'uwaimra, dadâ'â ãna 're idanomro u'âsi mono zé hã.

¹⁸ Tawamhã aibâ te duré sadanha, Zezusi hã: — E ma hã 'Re ihâimana u'âsi mono nhimiroti 'rata na rob'ui'éré hã wa za te 're 'madâ'â pese. Tawamhã Zezusi asa hã, te duré tãma tinha, ãne: — “'Re danhimroi wa'aba mono õ di za. Duré aimro na asiwi 're asipsaihuri za'ra wa'aba mono õ di za. Duré danhibrom na dawi 're asipsaihuri za'ra wa'aba mono õ di za. Duré dawasu'u wasété na dama 're asadawa nhipese za'ra wa'aba mono õ di za.

¹⁹ Duré aimama norĩ hã, ana me te za 're iwazé pese za'ra wa'aba mo. Te za duré uburé 're idazawi pese za'ra wa'aba mo. Marĩ iwẽ zô asima 're asõpré wa'aba mono ne, te za duré uburé dama hã sô 're asõpré wa'aba mo, iwẽ zô.”

²⁰ Tawamhã iprédupté hã ma duré ãma sada'â apâ, tô õ hã: — Tô õhõ si, wa tô 'Re ihâimana u'âsi mono nhimiroti 'rata na rob'ui'éré hã te 're 'madâ'â pese, uburé. E marĩ, wa za duré 'manha, ãhã nhipai u hã bété.

²¹ Tawamhã Zezusi te asa tãma tinha, ãne: — Rowẽ na 're aihâimana mono zéb zô, 're rosa'rata mono wamhã, mo oto aimorĩ, uburé asibro hã dama wede mono da, da te aiwi i'uipra za'ra zé rob'uiprazé hã isibrob'õ norĩ ma, sõmri mono da. Tawapsi asibro pese di za, hâiwa ãma. Taha parip si te za we apâ ĩtẽme hã aimo, ĩsiré 're aimorĩ da oto.

²² Tawamhã ãne hã aibâ iprédupté te te wapari wamhã, ma tô robzei ãna hã mo, tinhibro pese si te te sima sawi wa.

²³ Tawamhã isa'u ma tô Zezusi hã tãma waihu'u za'ra, tisiré 're inomro mono norĩ ma, ãne: — Tô sena wa aima waihu'u za'ra wa'wa. Isibro pese norĩ hã 'Re ihâimana u'âsi mono, da'ãma 're isib'a'uwẽ mono zéb u 're isisisi mono da hã, pire di. Tãma hã pire uptabi za'ra di za.

²⁴ E niha te za awaru ba'õmore hã isi'uwazi para'õtõ zapu'u 'remhã ãzé. Sébré waihu'u õ di. Tane, isibro pese norĩ hã si'uihâ na 're sisisi waihu'u mono õ di za, 'Re ihâimana u'âsi mono, da'ãma 're isib'a'uwẽ mono zéb u hã.

²⁵ Tawamhã ãne imreme hã te te wapari za'ra wamhã, ma tô ãma titob'uzu za'ra, isiré 're inomro mono norĩ hã. Tawamhã te sisadanharĩ za'ra ãma, ãne: — Isibro pese norĩ ma, waihu'u za'ra õ wamhã, e 'wam norĩ hã te za bété danho'reptuzé hã te te sina 're uwaimrami za'ra, dadâ'â ãna 're idanomro u'âsi mono zé hã.

²⁶ Tawamhã Zezusi hã te 'madâ'â pese za'ra, tisiré 're inomro mono norĩ hã. Tawamhã te te 'madâ'â pese za'ra wamhã, te duré asa tãma nharĩ za'ra, ãne: — Dasi'uihâ na danho'reptuzé hã da te dasina 're uwaimrami za'ra mono õ di za. Dama hã waihu'u õ di. 'Re ihâimana u'âsi mono si siminho'reptu waihu'u pese di. Taha ma si waihu'u pese di, uburé marĩ te te 're i'ab'manharĩ mono zéb da hã.

²⁷ Tawamhã Pedru te tãma siwasu'u, ãne: — Wa norĩ hã wa tô wanhibro hã uburé rẽme pese za'ra ni wasipara, asiré 're wanomro mono da oto. Ãne wamhã, e marĩ te za 'Re ihâimana u'âsi mono hã te te wama 're apisutu, te te wama 're i'anhomri mono da hã.

²⁸ Tawamhã Zezusi te asa tãma nharĩ za'ra, ãne: — Ãne, sena na wa za duré aima waihu'u za'ra wa'wa. Niwapsi ti'ai ãma Dasiré Ipodo hã te za ro itéb ãma danhib'apito simasisizém na 're sãmra. Isimasisizé iwẽ uptabi ãma hã te za 're sãmra, te te 're da'ab'madâ'â u'âsi mono da oto. Tame te za duré a norĩ wa'wa hã isiré 're anomro aba mono norĩ hã 12 na danhib'apito simasisizém na 're asimroi wa'aba mo, aipire na Izaraéu 'ra nhihudu mono bâ 're 'madâ'â za'ra wa'aba mono da.

²⁹ Ãté ni'wam norĩ hã te za tinhorõwa hã te te 're rẽme pese za'ra, duré ãté tisisãnawã norĩ hã, duré ãté timama norĩ hã, duré ãté ti'ra norĩ hã, duré ãté tinhipti'a hã. Ãté ĩsiré 're nomro mono da, te za uburé marĩ hã te te 're rẽme pese za'ra. Ta norĩ ma, te za uburé marĩ te te 're irẽme za'ra mono zém nhipai u pese, 'Re ihâimana u'âsi mono te te tãma hã 're sõmri za'ra. Ta norĩ ma si te za duré dadâ'â ãna 're idanomro u'âsi mono zé hã te te tãma 're apisutu.

³⁰ Ni'wam norĩ hã dama ipire na ti'ab ré 're hâimana za'ra mono nherẽ, te za 'Re ihâimana u'âsi mono hã te te tãma 're apisutu da'ahâ na, wapu na 're hâimana za'ra mono da oto, za da'ãma 're isib'a'uwẽ mono zéb ãma hã. Duré ni'wam norĩ hã ti'ab ré dama wapu na 're hâimana za'ra mono nherẽ, te za te te tãma 're apisutu, pire na oto 're hâimana za'ra mono da.