Mateu 15 - ꞌRe Ihâimana Uꞌâsi Mono Zadawa Wasuꞌu

Zudeu norĩ hi'rata hâimanazé wasu'u

¹ Tawamhã farizeu norĩ hã, duré 'Re ihâimana u'âsi mono nhimiroti na rob'ui'éré na dama rowahutu'wa norĩ hã ma tô ai'aba'ré Zeruzalẽ hawi, Zezusi hã te te siwi ãma sadanharĩ da, zudeu norĩ hi'rata nhimiroti na. Ãne te taha wamhã ãma siwi sadanha:

² — E niha asiré 're inomro mono norĩ hã te te 'madâ'â za'ra õ di, duréi wahi'rata norĩ nhimiroti hã. Ta norĩ hã 're saihuri mono õ ré, 're simisõi pese za'ra mono õ di. Ãne wa, te ta norĩ hã, 're iwahâimana za'ra mono zém na hã te te ãma wawi 're upa za'ra.

³ Tawamhã asa te Zezusi hã tãma nharĩ za'ra, ãne: — E niha bâ bété, a norĩ wa'wa hã 'Re ihâimana u'âsi mono nhimiroti si hã 're 'madâ'â za'ra wa'aba mono õ di, te bété asimiroti na si 'râwimhã 're asi'madâ'â za'ra wa'aba mo.

⁴ Duréihã 'Re ihâimana u'âsi mono hã ma tô ãne dama roti: “Aimama norĩ hã, te za ana me hã 're iwazéb za'ra wa'aba mo.” Ãne isimiroti amo hã duré: “Ni'wam norĩ hã timama nherẽ, duré tina nherẽ, te te ãma 're wasété za'ra mono wamhã, te za da te 're simro.” Ãne isimiroti hã duréihã te 're hâimana.

^5-6 Tane nherẽ, te aimawi nasi dama 're iroti za'ra wa'aba mo, ãne: “Ãté ni'wa hã te za sima rosa'rata, marĩ hã timama norĩ ma, te te sõmri da, te te ãma pawaptob zahuré da. Tane nherẽ, te za tipẽ'ẽ na sima tinha, ãne: ‘Ã hã 'Re ihâimana u'âsi mono te hã.’ Ãne wamhã, timama norĩ ma, te te sõmri õ di za, te te ãma pawaptob zahuré da hã.” Ãne te dama 're iroti wasété za'ra wa'aba mo. 'Râwi asimiroti na si 're anomro aba mono da, ma tô 'Re ihâimana u'âsi mono nhimiroti hã asiwi 're iwẽ'õ za'ra wa'aba mo.

⁷ A norĩ wa'wa hã aihâimana si'ahâ za'ra wa'aba di. Duréihã Izaia hã ma tô i'uwaibaba na ai'ãma rob'ui'éré siromo za'ra wa'wa, za 're i'aihâimana za'ra wa'aba mono zém na hã. 'Re ihâimana u'âsi mono mreme na ma tô ãne na ai'ãma rob'ui'éré siromo za'ra wa'wa:

⁸ “Õ norĩ hã tô sena newa, te timreme na si taré ĩ'ãma 're wata za'ra. Tane nherẽ, te tipẽ'ẽ 're aimawi zô si sima te te 're rosa'rata u'âsi za'ra, ĩ'upana.

⁹ Danhimiroti zarina si, te ta norĩ hã te te dama 're rowahutu za'ra, ĩnhimiroti zarina newa. Tahawa, senai õ di, ta norĩ hã ĩ'ãma 're iwata za'ra mono zé hã.”

Dasa hã da te 're huri mono wa, dasa na dawasédé, da te 're i'manharĩ za'ra mono õ zé wasu'u

¹⁰ Tawamhã Zezusi ma tô sima dazô hâ, isimirowasu'u hã da te wapari za'ra da. Ãne te taha wamhã dama tinha: — Ma'ãpé, ĩwapari pese za'ra wa'aba za, marĩ hã ãma asiwi waihu'u aba da hã.

¹¹ Uburé marĩ na 're dasaihuri mono wa, dapẽ'ẽ 're, 're isisisi mono na 'râwi dapẽ'ẽ 'remhã 're dasiwasété za'ra mono õ di za. Dapẽ'ẽ hawim na danhimirosa'rata wasété zarina, da te dasima 're nharĩ wasété za'ra mono wapsi, te za 'râwi dapẽ'ẽ 'remhã 're dasiwasété za'ra.

¹² Tawamhã isiré 're inomro mono norĩ, ma tô Zezusihi u hã itẽme ubumro, te te ãma siwi sadanharĩ da, ãne: — E ma tô asina iwaihu'u za'ra. Farizeu norĩ hã ma tô siwi aimreme wẽ'õ pese.

¹³ Tawamhã Zezusi hã, ãne ma te asa ãma sada'âbâ za'ra, farizeu norĩ ãma te te iromnhimiré'ézém na hã: — Ĩmama hã hâiwa ãma 're isãmra mono hã rob're te te i'a're'õ si hã te za uburé te te 're aza'o'o.

¹⁴ Farizeu norĩ ãma 're aihâtâ'â za'ra wa'aba mono õ di za. Tô si'uihâ na 're hâimana za'ra mono. Ni'wa hã tob'a na 're ihâimana mono hã te za tisiré itob'a hã saprõ. Te te saprõni wamhã, te za ab're 're siré tiwaptã'ã zahuré. Tane te farizeu norĩ hã itob'a ne hã te te 're danhimro.

¹⁵ Tawamhã Pedru te ãma 'mahâ ãne, Zezusi hã: — Ma'ãpé taha na ãma wama rowasu'u za'ra na, ãma iromnhimiré'ézé wa te waihu'u za'ra da.

¹⁶ Tawamhã Zezusi te asa tãma nharĩ za'ra, ãne: — E niha a norĩ wa'aba zama hã, waihu'u za'ra wa'aba õ di.

¹⁷ Dasa hã da te 're huri mono wamhã, te za taré danomo 'remhã 're sisisi. Taha pari, te za duré apâ 're wairébé, dahâiba hawimhã rob u.

¹⁸ Tazahã oto, dapẽ'ẽ hawi da te 're isani za'ra mono na si hã, te za 'râwi ãma 're dasiwasété za'ra.

¹⁹ Dapẽ'ẽ 're, danhimirosa'rata wasété hawim na si, te za dawasédé hã uburé da te ãma 're 'manharĩ za'ra, dasipãrĩ na hã, duré dasina danhimisaihuri na hã, duré marĩ na danhimisaihuri na hã, duré dazadawa nhipese na hã, duré da te da'ãma 're iwasété za'ra mono na hã.

²⁰ Ãne uburé dapẽ'ẽ 're, da te 're rosa'rata wasété za'ra mono wapsi, te za dawasédé hã da te 're 'manharĩ za'ra. Tanei õ di, danhimisõi ãna 're dasaihuri mono nherẽ, ãma 're dasiwasété waihu'u za'ra mono õ di za. Mare di.

Pi'õ zudeu'õ 'ra, Zezusi hã te te ipesezé wasu'u

²¹ Tawamhã Zezusi hã ma tô mo Zenezaré hawi, Tiru na 'ri nho'õmo nhisi niwĩ, duré Sidõ na 'ri nho'õmo nhisi niwĩ.

²² Tame sãmra ré, ma tô pi'õ zudeu'õ hã itẽme wi, cananeu norĩ siré, ta niwĩ 're isãmra mono hã. Itẽme wisi wamhã, ma tô 'mahâ, ãne: — Apito, Dawihi nhihudu, ma'ãpé ĩ'ãma aipẽ'ẽzé na. Ĩ'ra sipi'õ, wa'uburé ré 're hâimana u'âsi mono wa, ma tô te te 're robzépata za'ẽtẽ u'âsi.

²³ Tawamhã ãne na pi'õ te te 'mahârâ nherẽ, te te sada'âbâ õ di asa, Zezusi hã. Tawamhã isiré 're inomro mono norĩ hã ma tô Zezusihi u itẽme ai'ré za'ra. Taha wamhã, ma tô ãne tãma 'ru za'ra: — Ma'ãpé pi'õ satõrĩ apâ, wahawib za'ra morĩ da. Wazarina te we 're mo. Te we te te duré wa'ab'mahârâ, mreme 'rãihâ na.

²⁴ Tawamhã Zezusi te tãma nharĩ za'ra, ãne asa: — Pone'ẽrebâ 're isimani za'ra mono norĩ zô si, ma tô we Ĩmama hã ĩzatõ, Izaraéu nhihudu norĩ zô si.

²⁵ Tawamhã ãne na Zezusi te te rowasu'u wamhã, ma tô pi'õ hã itẽme mo. Duré hi'rãtitõ ma tô ipaparamhã nhamra. Taha wamhã, te ãne tãma tinha: — Apito, ma'ãpé ĩ'ãma aime na.

²⁶ Tawamhã Zezusi ma te ãma tãma wa'rã ãne: — E i'u'ẽtẽ wapu da'ra norĩ te te 're huri mono ré, te za da'ra wi hã da te 're waibu, wapsã ma, da te 're sãmra mono da hã. Mare di. Ãne hã i'uwaibaba õ di. — Ãne te Zezusi hã pi'õi ma ãma tãma romnhimiré'é za'ra, zudeu'õ norĩ ãma, sõ'awim nai õ nherẽ.

²⁷ Tawamhã pi'õ hã te duré asa tãma tinha, ãne: — Apito, tô ibâre ma te tane hã ĩma iwaihu. Tane nherẽ, te za tô wapsã titede'wa sai'a'a wedeza zahâpâ irere'e mono hã te te 're huri.

²⁸ Tawamhã pi'õi mreme te te wapari wamhã, te tãma tinha ãne, Zezusi hã: — Pi'õ, wa tô aiwaihu'u, aima ĩ'umnhasi za'ẽtẽ wa, ĩwi iwaptẽrẽzéb zarina te aima i'manharĩ da hã. Tahawa, wa za aima ãma uwaimra, tô. Tawamhã ãne te te tãma nharĩ wi, ma tô wa'uburé hã i'ra sipi'õi hawi watobro. Ãhã wamhã, i'ra hã ma tô tipese oto.

Zezusi hã da'ahâ uptabi na te te ida'apesezé wasu'u

²⁹ Tawamhã ta hawi te oto mo Zezusi hã, Galiléa na isõ'u zapoto nhisi u. Ta hawi te duré sa'a u mo, sa'a nhisi ãma sãmra da.

³⁰ Tame sãmra ré, ma tô da'ahâ uptabi na duré itẽmemhã aihutu ni. Ihâzé ré norĩ hã ma tô itẽme da te simro, imorĩ'õ norĩ hã, duré itob'a norĩ hã, duré i'rãtẽire norĩ hã, duré imreme'õ norĩ hã. Uburé siwa'ru ma tô ihâzé ré norĩ ãma dasito, ipapara da te sõré da. Tawamhã uburé ma tô da'apese, Zezusi hã.

³¹ Tawamhã imreme'õ norĩ hã ma tô mreme wairé. Duré i'rãtẽire norĩ hã ma tô timorĩ wẽ za'ra. Imorĩ'õ norĩ hã te duré oto para na 're nomro. Itob'a norĩ hã te te duré rob'madâ'â wẽ za'ra di oto. Tawamhã ãne hã da te 'madâ'â za'ra wamhã, ma tô ãma tatob'uzu za'ra ni. 'Re ihâimana u'âsi mono ãma, ma tô duré ãma tawata za'ra ni, Izaraéu nhihudu norĩ nhib'apito ãmamhã.

Zezusi hã dasa te te dama i'manharĩ hâiba amo zé wasu'u

³² Tawamhã Zezusi hã ma tô tisiré 're inomro mono norĩ zô sima sô tihârâ za'ra. Tawamhã te tãma nharĩ za'ra, ãne: — Ãhã na ĩ'rata dasi'ubumroi ré, ma tô dasa hã dawi ai'utõ, si'ubdatõ bâdâ hã da'ãma si'utõrĩ wa. Tahawa, da'ãma hã ĩpẽ'ẽzé di, wa hã. Mram na dahâimana za'ra nherẽ, te dama rob'rui waihu'u õ di, apâ da te ropéi mono da hã. E marĩ wa. Bâdâdi wa, danhib'uwa za'ra wa, da te ãma ãpusi pese za'ra õ'umnhasite.

³³ Tawamhã isiré 're inomro mono norĩ hã ma tô siwi sadanha, ãne Zezusi hã: — E niha wa za i'u'ẽtẽ wapu hã wasiwi 'masãmri ni, a'ubuni wi wasi'ubumro nherẽ, dahâiba mono bâ wa te dama i'a za'ra da hã. Da'ahâ uptabi di.

³⁴ Tawamhã te asa sadanharĩ za'ra, ãne Zezusi hã: — E niha, te i'u'ẽtẽ wapu hã aima tihâimana za'ra wa'wa. — 7 na te wama tihâimana za'ra. Duré pe'a te umrore na wama tihâimana za'rare. — Ãne ma asa hã ãma sada'âbâ za'ra.

³⁵ Tawamhã Zezusi te dama rob'ru, ti'ai wa dasi'ubumroi mono da.

³⁶ Taha pari, ma tô duré 7 na i'u'ẽtẽ wapu hã waibu. Duré pe'a zama ma tô timra, 'Re ihâimana u'âsi mono ãma wata da, sõpru wa. Tawamhã ãma wata pari, ma tô i'u'ẽtẽ wapu norĩ hã, pe'a me hã te te si'ẽ. Duré tisiré 're inomro mono norĩ ma, ma tô te te sõmri, te te dama sõmri za'ra mono da hã.

³⁷ Tawamhã uburé ma tô tasaihuri ni. Ma da te 'mahâpãrĩ. Tawamhã isiré 're inomro mono norĩ hã ma tô danho'rada hã apâ te te ubumro za'ra, 7 na si'õno hã isi'atarẽme ré hã.

³⁸ Aibâ norĩ hã tisa te te ihuri norĩ hã 4 miu na ihâiba za'ra hã. Ãhã wamhã, pi'õ norĩ hã ai'uté norĩ me hã sa'rata za'ra õ di.

³⁹ Tawamhã Zezusi hã te oto dama rob'ru, apâ dasi'aba'ré da, darob u. Taha pari, ma tô uba're 're ãzé, Madadã na danhipti'a nho'õmo nhisi u te te saprĩ da hã.