Mateu 13 - ꞌRe Ihâimana Uꞌâsi Mono Zadawa Wasuꞌu

Amnho potozé wasu'u

¹ Tawamhã tô taha bâtâ na ma tô Zezusi hã watobro 'ri hawi, isõ'ui u morĩ da. Taha wamhã, tame ma tô nhamra, isõ'u zaihâ na, te te dama rowahutu da.

² Tawamhã da'ahâ uptabi na ma tô itẽme dasito, da te wapari za'ra da. Duré da'ahâ uptabi na da te dasiwi uirĩ wa, ma tô uba're wa dawi ãzé, Zezusi hã. Uba're wa, te oto nhamra. Tawamhã isõ'u zaihâ na te hâiwi dapara na i'ratamhã aimasam ni.

³ Tahawa, te Zezusi hã tinhimiromnhimiré'é na dama rowahutu, ãne: — Aibâ hã ma tô buru u mo, ti'ai hâibâdâ wa, amnho hã te te anhamra mono da, poto mono da.

⁴ Tawamhã amnho hã te te anhamra mono wamhã, nima norĩ hã bâdâdi zababa ma tô rere'e. Tawamhã ta norĩ, sire hã ma tô uburé te te uprosi, poto mono õ ré.

⁵ Ẽtẽ nhisiwi ma tô duré nima norĩ hã rere'e. Ti'ai baihâire nherẽ, ẽtẽ nhisiwimhã. Ti'ai baihâire wa, ma tô tawamhã ti'wanhipré su'u za'ra, amnho hã.

⁶ Tawamhã bâdâ hã oto 'rãiwatobro wamhã, rowa'ro wa, ma tô ro'wanhipré hã ti'wanhipré 'ré za'ra, isari hã te te sina rowa'ré za'ra mono õ wa.

⁷ Nima norĩ hã ma duré rere'e, wab'ru wazari. Tawamhã ta norĩ hã ma tô siré 'wanhipré. Duré siré 'wanhipré mono wa, ma tô wab'ru hã te te ubu. Tahawa, 'rãi mono õ di, duré ta norĩ hã.

⁸ Ti'ai wẽ wa, ma duré nima norĩ hã rere'e. Tawamhã oto 'wanhipré 'rãihâ mono wamhã, ma tô ti'rã za'ra. Duré 'rãi mono wamhã, nima niwĩmhã 'rãi ahâ prãi mono di, amnho hã. Duré nima niwĩp si hã 'rãi ahâ mono di. Duré nima niwĩmhã 'rãi pese uptabi mono di.

⁹ Tawamhã ãne na ma tô duré dama ãma 'rãsutu, tinhimiroti na hã: — Asimipari pese za'ra wa'aba wamhã, ma'ãpé ĩwapari pese za'ra wa'aba, ĩnhimirowasu'u na waihu'u za'ra wa'aba da.

Romnhimiré'é na si, Zezusi te te dama 're irowahutu mono zé wasu'u

¹⁰ Tawamhã isiré 're inomro mono, ma tô Zezusihi u hã ubumro. Taha wamhã, ma oto ãne siwi sadanha: — E marĩ wa, te romnhimiré'é na si dama 're irowahutu mo.

¹¹ Tawamhã Zezusi hã te asa tãma nharĩ za'ra, ãne: — 'Re ihâimana u'âsi mono hã a norĩ wa'aba ma si, ma tô dama iwaihu'u'õ hã aima waihu'u za'ra wa'wa, da'ãma 're isib'a'uwẽ mono zém na hã, sõ'awimhã te te dama hâi'ré õ nherẽ.

¹² Ni'wam norĩ hã 'Re ihâimana u'âsi mono nhimirowaihu te te sima 're 'ruiwapari u'âsi za'ra mono wamhã, te za 'Re ihâimana u'âsi mono hã sa'ẽtẽ na ãma tãma 're sõprub za'ra oto, te te aré ãma 're irowaihu'u za'ra mono zém nhipai u, te te ãma 're waihu'u pese za'ra mono da hã oto. Tane nherẽ, ni'wam norĩ hã isimirowaihu'u na te te 're 'ruiwapari za'ra mono õ wamhã, ta norĩ wi te za duré tinhimirowaihu hã tãma waihu'u pese za'ra õ nherẽ, te te tiwi 're awaibu 'Re ihâimana u'âsi mono hã, te te aré ãma 're iwaihu'u za'ra mono zé hã.

¹³ Ĩnhimiromhuri hã datõmo na da te 're 'madâ'â za'ra mono nherẽ, te taré da te 're 'madâ'â za'ra, da te ãma 're waihu'u za'ra mono ãna. Duré ĩnhimiroti hã dapo're na da te 're wapari za'ra mono nherẽ, te taré da te 're wapari za'ra, da te ãma 're waihu'u za'ra mono ãna. Tahawa, wa romnhimiré'é na si te dama 're rowasu'u.

¹⁴ Duréihã Izaia hã, 'Re ihâimana u'âsi mono zadawa 'mahârâ'wa hã ma tô da'ãma rob'ui'éré, za dama 're iromhâimana mono zém na hã. Tahawa, ãhã na hã ma tô da'ãma uwaimra oto. Ãne duréihã isimi'ui'éré hã, 'Re ihâimana u'âsi mono mreme na hã: “Ĩnhimiroti hã dapo're na da te 're wapari u'âsi za'ra mono nherẽ, taré te za da te 're wapari za'ra, da te ãma 're waihu'u za'ra mono ãna. Duré ĩnhimiromhuri hã datõmo na da te 're 'madâ'â u'âsi za'ra mono nherẽ, taré te za duré da te 're 'madâ'â za'ra, da te ãma 're waihu'u za'ra mono ãna.

¹⁵ E marĩ wa. Dapẽ'ẽ 're, da te 're irosa'rata za'ra mono zé hã sitom haré te za iré 're dahâimana u'âsi za'ra, da te ĩ'ãma 're rosa'rata wẽ za'ra mono õ wa. Dapo're nhitom haré, te za duré 're dahâimana za'ra, ĩnhimiroti hã da te 're wapari ze za'ra mono õ wa. Duré datõmo nhitom haré te za 're dahâimana za'ra, ĩnhimiromhuri hã dama 'madâ'â zei õ wa. Ãnei õ 'wa'âhã, te aré ĩnhimiromhuri hã da te 're 'madâ'â ze za'ra, datõmo na. Te aré duré dapo're na da te 're wapari ze za'ra, ĩnhimiroti hã. Te aré duré da te 're ĩwaihu'u pese za'ra, dapẽ'ẽ 're, da te ĩ'ãma 're rosa'rata wẽ za'ra mono wa. Taha zarina si, te aré duré ĩtẽme 're dasipizari za'ra, dawasété wi hã. Tawamhã dahâzé wa, da te 're idapese za'ra mono ne, wa aré dawasédé hã te dama 're apari, te da'ãma 're ab'madâ'â tõ mono da hã oto.”

^16-17 Tawamhã tisiré 're inomro mono norĩ ma, te oto tinha ãne, Zezusi hã: — A norĩ wa'wa hã ĩnhimiromhuri, atõmo na 're 'madâ'â za'ra wa'aba mono wa, ma tô ĩ'ãma iwaihu'u pese za'ra wa'wa. Duré ĩnhimiroti hã aipo're na 're wapari za'ra wa'aba mono wa, ma tô duré ĩ'ãma iwaihu'u pese za'ra wa'wa. Tahawa, aima 're rowẽ uptabi za'ra wa'aba mono di, a norĩ wa'aba ma si. Tô sena wa ãne hã aima waihu'u za'ra wa'wa. Duréihã 'Re ihâimana u'âsi mono zadawa 'mahârâ 'rata 'wa norĩ hã duré isimiroti 'madâ'â pese 'wa norĩ hã te aré te te sima 're wẽ uptabi za'ra, ĩnhimiromhuri na 're ĩ'madâ'â za'ra wa'aba mono zé hã te te 're 'madâ'â za'ra mono da. Ma tô duré aré te te sima 're wẽ za'ra, ĩnhimiroti na 're ĩwapari za'ra wa'aba mono zé hã te te 're wapari za'ra mono da. Tahawa, a norĩ wa'aba ma si, aima 're rowẽ uptabi za'ra wa'aba mono di za.

Amnho potozém na isimiré'ézé, Zezusi hã sõ'awi te te dama iwaihu'uzé wasu'u

¹⁸ — Ma'ãpé, ĩwapari pese za'ra wa'aba. Ãhã na wa za oto aima waihu'u za'ra wa'wa, amnho potozém na te ãma isimiré'ézé hã waihu'u za'ra wa'aba da.

¹⁹ Amnho hã aibâ te te i'anhamra mono hã, 'Re ihâimana u'âsi mono zadawa wasu'u, te wasu'u. Ni'wam norĩ hã 'Re ihâimana u'âsi mono, da'ãma 're isib'a'uwẽ mono zé wasu'u, tipo're na te te 're wapari za'ra mono nherẽ, te te ãma sima 're rosa'rata ze za'ra mono õ wamhã, te te ãma iwaihu'u pese za'ra da hã mare di za. Ta norĩ hã amnho bâdâdi zababa irere'e mono ne, te 're hâimana za'ra. Amnho hã sire te te i'uprosi mono ne, te za iwasété uptabi hã itẽme 're simasisi za'ra, 'Re ihâimana u'âsi mono zadawa wasu'u hã tipo're na taré te te 're iwapari za'ra mono hã te te tiwi 're awaibui mono da, Wa'uburé hã.

²⁰ Duré ni'wam norĩ hã aiwa amnho ẽtẽ nhisiwi, ti'ai baihâire wa irere'e mono ne, te 're hâimana za'ra. 'Re ihâimana u'âsi mono zadawa wasu'u hã te te 're wapari za'ra mono wamhã, amnho ti'ai baihâire wa irere'e mono ipoto su'u mono ne, te ta norĩ hã waptu na taré pese sima to sina hã imreme na te te ãma 're saze za'ra.

²¹ Tane nherẽ, isadawa wasu'u te te 're saze za'ra mono wa, da te tãma 're irob'manharĩ wasété za'ra mono para, te te 're robzépata za'ra mono wamhã, te za sazei utõrĩ za'ra. Amnho hã ti'ai baihâire wa, irere'e mono hã sari õ wa, i'wanhipré 'ré mono ne, te za te te 're isaze za'ra mono zém na ãma hâimana hutu za'ra ré, awa'awi ta norĩ hã te te 're sazei utõrĩ za'ra.

²² Duré ni'wam norĩ hã amnho wab'ru wazari irere'e mono ne, te aiwa 're hâimana za'ra. Wab'ru hã ro'wanhipré siré i'wanhipré mono, te te oto ubu mono wa, i'rã za'ra õ ne, 'Re ihâimana u'âsi mono zadawa wasu'u hã tipo're na te te 're wapari za'ra mono nherẽ, iwẽ hã te te 're i'manharĩ za'ra mono da, mare di za, ta norĩ hã. Tihâimanazém na si te za sina 're hâtâ'â u'âsi za'ra. Duré danhibro pe hã wẽ uptabi newa te za taha zô si sima te te 're rob'ruiwapari u'âsi za'ra. Tahawa, amnho 'wanhipré hã i'rã za'ra õ ne, 're nomro wẽ mono õ di za, ta norĩ hã.

²³ Duré ni'wam norĩ hã aiwa amnho ti'ai wẽ wa irere'e mono ne, te za 're hâimana za'ra. Ta norĩ hã 'Re ihâimana u'âsi mono zadawa wasu'u te te 're wapari za'ra mono wamhã, te za te te sima 're wẽ uptabi za'ra, te te 're waihu'u pese za'ra mono da. Tawamhã rowede i'rãi pese uptabi ne, te za ta norĩ hã wẽ u'âsi 're hâimana za'ra.

Wab'ru hã rob're iwẽ wazari, ipoto mono zé wasu'u

²⁴ Tawamhã Zezusi hã ma tô duré tãma ãma romnhimiré'é za'ra, ãne: — 'Re ihâimana u'âsi mono, da'ãma 're isib'a'uwẽ mono zém na hã, wa za oto aima ãma romnhimiré'é za'ra wa'wa, ãne. Aibâ hã ma tô tiburu na amnho iwẽ hã te te a're, tãma 'rã da.

²⁵ Tawamhã nimahã na bara na danhotõ mono ré, ma tô isitob'ru hã iburu u mo. Taha wamhã, ta hã ma tô amnho trigu iwẽ wazari wab'ru hã te te a're. Duré te te a're mono parimhã, ma tô apâ mo.

²⁶ Tawamhã rob're ma tô prédu. Duré prédu mono wamhã, ma tô ro'wa wede hã, duré wab'ru norĩ zama iwazarimhã tipoto za'ra. Ãhã wa 'rãi mono wamhã, dama mono hã 'madâ'â waihu'u pese di, wab'ru norĩ iwazari ipoto zahuré na hã, 'ro 'wa wede me.

²⁷ Tawamhã buru tede'wai ma, romhuri'wa norĩ hã ma tô itẽme aihutu. Itẽme sihutu wamhã, ãne te tãma rowasu'u za'ra: “Apito, oro amnho hã iwẽ si aiburu na a're mono za, ma tô wab'ru hã nima hawimhã isiré 'wanhipré.” Ãne te ãma siwi sadanha, buru tede'wa hã.

²⁸ — Tawamhã buru tede'wa hã te asa tãma nharĩ za'ra, ãne: “Ni'wa ĩ'ruiwapari'wa, ma tô ãne hã ĩma 'manha.” Tahawa tãma iromhuri'wa norĩ te ãne ãma siwi sadanha: “E ãne hã aima wẽ di za, wab'ru norĩ hã uburé wa te tãma sano za'ra mono da hã, tãma ropese da.”

²⁹ — Tawamhã asa te ãma tãma nharĩ za'ra, ãne: “Tô'ã, ãté mare di za. E marĩ wa. Sano za'ra wa'aba mono wamhã, rob're trigu i'rãi mono da hã isu sano za'ra wa'aba mono tõ da. Tahawa, a'â isano za'ra wa'aba mono da hã mare di za, wab'ru hã.

³⁰ A'â simisutu siré prédu mono, roptehâri na da te 're isãna'rata mono zéb u. Tawapsi wa za oto roptehâri na romhuri'wa norĩ ma 'ru za'ra, wab'ru uimrehẽne te te siwi sanoi mono da, te te duré wasisi mono da, unhama u te te siwi sãmra da, si'unhama da. Taha parip si, te za oto trigu hã tehâri za'ra, amnho za'razéb u te te siwi sa'ra da, ĩma.”

Mostada nhamare wasu'u

³¹ Tawamhã romnhimiré'é na ma tô duré tãma rowasu'u za'ra, Zezusi hã, tisiré 're inomro mono norĩ ma, ãne: — 'Re ihâimana u'âsi mono, da'ãma 're isib'a'uwẽ mono zém na, wa za duré aima ãma simiré'é za'ra wa'wa, mostada nhamare, aibâ tiburu na te te i'a're na hã.

³² Mostada nhamare hã uburé romnhamare norĩ ma surure nherẽ, oto prédu wamhã, uburé romnhamare, da te 're izuri mono hã te za te te 're sipai pese za'ra. Papo za'ẽtẽ wa, isu 'rowi te za si norĩ hã te te sima 're sasi za'ra.

I'u'ẽtẽ wapu duptobzé wasu'u

³³ Tawamhã Zezusi hã ma tô duré ãne na tãma ãma romnhimiré'é za'ra, isiré 're inomro mono norĩ ma: — 'Re ihâimana u'âsi mono, da'ãma 're isib'a'uwẽ mono zém na, wa za duré aima ãma romnhimiré'é za'ra wa'wa, ãne. Pi'õ hã te za i'u'ẽtẽ wapu duptobzé hã suru na sa'wa, trigu 'rã zu pese wazari, trigu zub'a si, sa'ẽtẽ uptabi wa. Tawamhã te te wazari pese wamhã, te za tidupto, i'u'ẽne hã. Duré te te mapu wamhã, te za oto tiza'ẽtẽ. Ãhã sine duré, 'Re ihâimana u'âsi mono, da'ãma 're isib'a'uwẽ mono zé hã.

³⁴ Marĩ na te te dama ãma 're romnhimiré'é mono nherẽ, te te dama ãma 're arowasu'u mono õ di, Zezusi hã. Romnhimiré'é na si ma tô te te dama ãma 're rowasu'u.

³⁵ Duréihã 'Re ihâimana u'âsi mono zadawa 'mahârâ 'rata 'wa te te ãma irob'ui'érézéb zarina te te sina uwaimrami da, ma tô romnhimiré'é na si te te dama 're rowasu'u, Zezusi hã. Ãne duréihã ãma irob'ui'éré siro hã: “Te dama 're rowasu'u mono wamhã, wa za te dama ãma 're aromnhimiré'é. Wa za duré te dama 're awaihu'u, ropoto na'rata hawimhã dama iwaihu'u'õ hã.”

Wab'ru na isimiré'ézé, Zezusi hã sõ'awi te te dama iwaihu'uzé wasu'u

³⁶ Tawamhã Zezusi hã ma tô dawi mo. Dawi morĩ wamhã, ma tô 'ri para u ãzé. Tawamhã isiré 're inomro mono norĩ hã ma tô 'râwi itẽme ubumro, te te siwi sadanharĩ da, ãne: — Ma'ãpé wama waihu'u za'ra na. E marĩ na ma tô wab'ru na hã ãma iromnhimiré. E marĩ te wasu'u.

³⁷ Tawamhã Zezusi hã te asa tãma nharĩ za'ra, ãne: — Aibâ hã tiburu na amnho iwẽ te te i'a're mono hã, ti'ai ãma Dasiré Ipodo hã, te wasu'u.

³⁸ Duré aibâ buru hã, daro mono bâ ti'ai wa, 're idahâimana za'ra mono te dawasu'u. Duré amnho iwẽ hã uburé 'Re ihâimana u'âsi mono, ãma 're isib'a'uwẽ za'ra mono norĩ, te wasu'u. Duré wab'ru hã Iwasété uptabi nhib'a'uwẽ norĩ, te wasu'u, Wa'uburé nhib'a'uwẽ na 're ihâimana za'ra mono norĩ hã.

³⁹ Duré buru tede'wa nhitob'ru hã wab'ru iburu na te te tiwi i'azuri mono wa'uburé norĩ nhib'apito te wasu'u, tô õ hã. Duré da te 're iroptehâri za'ra mono zé hã rob'rãsutuzéb ãma za da'ãma isipo'ozé, te wasu'u. Duré buru nho ubumroi'wa norĩ hã hâiwa ãma 'Re ihâimana u'âsi mono ma, romhuri'wa norĩ, te wasu'u.

⁴⁰ Wab'ru hã da te 're sano za'ra mono wa, unhama u da te 're isãmra mono ne, te za dama tiromhâiba, rob'rãsutuzéb ãma hã.

⁴¹ Dasiré Ipodo hã hâiwa ãma tãma romhuri'wa norĩ hã te za we satõrĩ za'ra ti'ai u, marĩ iwasédé hã da te 're i'manharĩ u'âsi za'ra mono norĩ hã simisutu aimawi te te ubumro za'ra da, 'Re ihâimana u'âsi mono nhib'a'uwẽ norĩ nhiti. Dawasédé hã da te 're 'manharĩ za'ra mono da, te te dama 're iroti za'ra mono norĩ zama te za ubumro za'ra, hâiwa ãma ĩma romhuri'wa norĩ hã. Wab'ru hã da te 're isano za'ra mono ne, te za da'ubumro za'ra za, õne haré.

⁴² Taha parimhã te za unhama ro'o za'ẽtẽ u danhamra, ropipa u. Tame te za 're da'ru'ru u'âsi. Te za duré 're da'wasitete u'âsi za'ra za, da te oto 're robzépata za'ẽtẽ za'ra mono wa.

⁴³ Tawamhã 'Re ihâimana u'âsi mono nhimiroti te te 're i'madâ'â pese za'ra mono norĩ si, te za pire na dama 're hâimana za'ra. Bâdâ hã daro mono bâ te te dama 're rob'uiwẽ za'ra mono wa, uburé da te 're irob'madâ'â za'ra mono ne, te za uburé da te 're waihu'u za'ra, pire na za oto dama 're ihâimana za'ra mono na, Wamama hã za da'ãma 're isib'a'uwẽ mono zéb ãma hã. Asimipari pese za'ra wa'aba wamhã, ma'ãpé ĩwapari pese za'ra wa'aba, ĩnhimiroti na hã.

Ẽtẽ'ubuzi wasu'u

⁴⁴ Tawamhã ãne te duré tãma rowasu'u za'ra: — 'Re ihâimana u'âsi mono, da'ãma 're isib'a'uwẽ mono zém na, wa za duré aima ãma romnhimiré'é za'ra wa'wa, ãne. Aibâ hã daburu na te te romhuri ré, ma tô ẽtẽ'ubuzi iwa'âbâ za'ẽtẽ uptabi hã 'masã, ti'ai 'rowi ni'wa te te aré dawi isuwa hã. Te te sãmri wamhã, ma tô duré apâ dawi suwa inomrozéb ãma, da te sãmri tõ da. Tawamhã toi uptabi wa, ma tô uburé tinhibro hã dama wede, buru tô õ hã te te dawi uipra da, ẽtẽ'ubuzi, iwa inomro hã te te sima âri da.

Ẽtẽwaipo wasu'u

⁴⁵ — Ãne duré, 'Re ihâimana u'âsi mono, da'ãma 're isib'a'uwẽ mono zé hã. Aibâ hã ma tô sima wẽ, dasima danhipesezé ẽtẽwaipo iwa'âbâ za'ẽne hã te te dawi 'manhopẽtẽ wa, te te sima uipra da, dama i'madâ'â ze hã.

⁴⁶ Tawamhã ẽtẽwaipo iwa'âbâ za'ẽtẽ uptabi hã te te 'masãmri wamhã, uburé tinhibro hã ma tô dama wede, ẽtẽwaipo hã te te sima uipra da. Ãne 'Re ihâimana u'âsi mono, duré da'ãma 're isib'a'uwẽ mono zé wasu'u hã.

Tepe mramizé wasu'u

^47-48 — Ãne hã duré, 'Re ihâimana u'âsi mono, da'ãma 're isib'a'uwẽ mono zé hã. Tepe mrami'wa norĩ hã ma tô abazipara hã sô siwi time, isõ'ui wa. Te te siwi mei wamhã, ahâ na ma tô siwi ãma 'mai'âri za'ra, ipoto mono bâ, tebe hã. Tawamhã tebe hã ahâ uptabi wamhã, ma tô abazipara hã siwi tisa, â zada'ré u. Tame ma tô oto tebe hã iwẽ si siwi waibu, si'õtõ 're, te te siwi séme da. Tebe siwamnarĩ norĩ da te 're ihuri mono õ hã ma tô duré taré siwi sãmra.

⁴⁹ Tane te za dama tiromhâiba, rob'rãsutuzéb ãma hã. Hâiwa ãma romhuri'wa norĩ hã te za we dazô ai'aba'ré ti'ai u, dawasété na 're idahâimana u'âsi mono norĩ si te te da'ubumro za'ra da, 'Re ihâimana u'âsi mono nhimiroti te te 're i'madâ'â pese za'ra mono norĩ hawi te te dazani za'ra da hã oto, isiti za'ra 're dahâimana za'ra mono da.

⁵⁰ Tawamhã unhama ro'o za'ẽtẽ u te za oto danhamra, ropipa u. Tame te za 're da'ru'ru u'âsi. Te za duré 're da'wasitete u'âsi za'ra, da te 're robzépata za'ẽtẽ za'ra mono wa.

Marĩ ité hã da te dasima 're isõmri za'ra mono zé wasu'u

⁵¹ Tawamhã Zezusi hã ma tô sadanharĩ za'ra, tisiré 're inomro mono norĩ hã, ãne: — E ma tô asiwi iwaihu'u 'wa, uburé te aima ãma iromnhimiré'é za'ra wa'aba zé hã. Tawamhã asa ma te ãma sada'âbâ za'ra, ãne: — Ĩhe. Wa tô waihu'u za'ra ni.

⁵² Tawamhã ãne te duré tãma rowasu'u za'ra, Zezusi hã: — Wa za duré aima ãma romnhimiré'é za'ra wa'wa, ãne. Ãté 'ri tede'wa te za marĩ iwẽ hã te te 're azani, 'ri 're wa'wa ãma 're iromnhimi'wara mono zém hawi, te te dama 're anhomri mono da. E tawamhã marĩ i'ratare si te za te te dama 're azani. Mare di. Marĩ itéb zama te za duré te te dama 're azani, te te dama 're anhomri mono da. Tane duré, ni'wam norĩ hã 'Re ihâimana u'âsi mono nhimiroti waihu'u pese 'wa norĩ hã da'ãma 're isib'a'uwẽ mono zé wasu'u te te waihu'u pese za'ra wamhã, ta norĩ hã te za isimiroti itéb zama te te dama 're waihu'u za'ra, isimiroti 'rata me.

Zezusi hã, iprédubzéb ãma da te dasiwi iwẽ'õzé wasu'u

^53-56 Tawamhã Zezusi hã marĩ nhimiré'é na te te dama arowasu'u pari, ma tô mo, aré 're ihâimana mono zéb u. Tamomo wisi wamhã, te oto dama rowahutu, zudeu norĩ te, rowahutuzéb ãma. Tawamhã isimiroti hã da te wapari za'ra wamhã, ma tô ãma tatob'uzu za'ra ni. Te duré dasima ãma nharĩ za'ra ni, ãne: — Õ hã wede'é'wa na romhuri'wai 'ra. Ina nhisi hã, Maria na. Duré ino norĩ nhisi hã Tiagu na, duré Zuzé na, duré Sima na, duré Zuda na. Ihidiba norĩ hã te duré wa'rata 're hâimana za'ra. E niha ma te bété õhõ si uburé marĩ hã awaihu'u, tiwaihu'u pese na te te dama 're irowasu'u mono zéb da hã, duré marĩ dama i'manharĩ waihu'u'õ te te dama 're i'ab'manharĩ wẽ mono zéb da hã.

⁵⁷ Ãne para, ma tô Zezusi hã dasiwi wẽ'õ ni. Tahawa, te Zezusi hã ãne dama tinha: — 'Re ihâimana u'âsi mono zadawa 'mahârâ'wa norĩ daro mono bâ datẽme 're nomro mono wamhã, isimiroti na wazép sina, te za sô 're datob'uzu za'ra. Isipti'ai 're, 're idahâimana za'ra mono norĩ si hã sô 're datob'uzu za'ra mono õ di za, isipti'ai 're wa, ta norĩ hã. Duré isisãnawã norĩ zama, isõrõwa ãma 're isi'ubumroi mono norĩ hã te te duré siwi 're hâiba wazé mono õ di za.

⁵⁸ Tawamhã isimipawaptobzém na da te dasina 're umnhasi za'ra mono õ wa, marĩ dama i'manharĩ waihu'u'õ hã ahâ na te te dama 'manharĩ õ di, tamemhã.