Marcu 8 - ꞌRe Ihâimana Uꞌâsi Mono Zadawa Wasuꞌu

Zezusi hã, 4 miu na dahâiba hã te te isaihurizé wasu'u

¹ Tawamhã suru na ãma ronomro parip si, ma tô duré apâ itẽme tasi'rã'õtõ ni, Zezusihi u hã. Tawamhã da te ihuri da hã, mra hâimana õ wa, te Zezusi hã sima sô tihârâ za'ra, tisiré 're inomro mono norĩ zô.

² Ãne te tãma siwasu'u za'ra: — Ãhã na ĩ'rata dasi'ubumroi ré, ma tô dasa hã dawi ai'utõ, bâdâ si'ubdatõ da'ãma si'utõrĩ wa. Tahawa, da'ãma ĩpẽ'ẽzé di, wa hã.

³ Mram nherẽ, te dama rob'rui wamhã, te za dasi'marõpãrĩ za'ra bâdâdi na, danhib'uware mono wa, romhâ hawi we idasihutu norĩ hã.

⁴ Tawamhã asa te tãma nharĩ za'ra, ãne: — E niha wa za dasa hã dama 'mai'uipra za'ra ni, wa te dama sõmri za'ra mono da. Ãme wa tô a'ubuni wimhã asimro ni.

⁵ Tawamhã Zezusi te asa sadanharĩ za'ra, ãne: — E niha te i'u'ẽtẽ wapu hã aima tihâimana za'ra wa'wa. — 7 na te wama tihâimana za'ra. — Ãne ma tô asa hã ãma sada'âbâ za'ra.

⁶ Tahawa, ma tô Zezusi hã dama tinha, ti'ai wamhã, dasi'ubumroi mono da. Taha pari, ma tô duré 7 na i'u'ẽtẽ wapu hã waibu, 'Re ihâimana u'âsi mono ãma wata da, sõpru wa. Ãma wata pari, ma tô duré oto te te wẽ'ẽ, i'u'ẽtẽ wapu hã. Tawamhã tisiré 're inomro mono norĩ ma, ma tô te te sõmri, te te dama sõmri za'ra mono da hã.

⁷ Pe'a isurure hã te duré tãma ti'maihâiba, isebre siro hã. Tawamhã 'Re ihâimana u'âsi mono ãma te duré tiwata, pe'a isurure na zama, sõpru wa. Taha pari, te duré tãma 'ru za'ra, te te dama sõmri za'ra mono da hã.

⁸ Tawamhã aihĩni te oto dasa hã huri ni. Dasa hã ma da te 'mahâpãrĩ, aihĩni. Taha pari, dasa isi'azazâri hã isiré 're inomro mono norĩ hã ma tô apâ duré te te sé. Si'õno hã 7 na ihâiba wa, ma tô ãma te te 'masisi.

⁹ Idasaihuri za'ra norĩ hâiba za'ratazé hã, 4 miu u, ma watobro, ãté. Taha pari, te oto Zezusi hã dama rob'ru, apâ darob u, da te ropéi mono da.

¹⁰ Tawamhã te te dama rob'rui pari, ma uba're wa asisi, Zezusi norĩ hã, zara u te te saprĩ za'ra da, Damanuta na ti'a nhisi u si'aba'ré da.

Farizeu norĩ hã, Zezusihi wi, te te irowaptẽrẽ za'ra zé wasu'u

¹¹ Tawamhã farizeu norĩ hã ma Zezusihi u aihutu, isimirowasu'u na te te saze za'ra õ wa, imreme wa'rãmi te te nasi tãma nharĩ za'ra da. Tawamhã Zezusihi wi, te oto rowaptẽrẽ za'ra, tiwaihu'u pese na marĩ dama i'manharĩ waihu'u'õ hã te te tãma 'manharĩ za'ra da. E marĩ da. Tô sena 'Re ihâimana u'âsi mono zadawa para, dama iwaihu'u'õ hã te te 're i'ab'manharĩ mono zô, te te siwi pibu za'ra da. Taré te te siwi wẽ'õ da, te ãne tiwi rowaptẽrẽ za'ra.

¹² Tawamhã Zezusi ãma pẽ'ẽzé za'ra wa, ma sa'ẽtẽ pẽ'ẽwaze. Tawamhã te sima tinha, ãne: — E niha ma tô nimosi dapoto tém norĩ hã siwi ĩwada'u, marĩ dama i'manharĩ waihu'u'õ hã isõ'a te tãma 'manharĩ za'ra da. Mare di za. Ãne hã te tãma 'manharĩ za'ra õ di za.

¹³ Taha pari, te tiwi timorĩ za'ra. Uba're wa, ma oto ãzé, zara u te te saprĩ da apâ.

Farizeu norĩ te, duré Erodihi te, i'u'ẽtẽ wapuzé wasu'u

¹⁴ Tawamhã zara u, ma tô oto aihutu, Zezusi norĩ hã. I'u'ẽtẽ wapu hã siré te te 'ma'âri za'ra da nherẽ, ma tô ãma po're ha'âri za'ra, isiré 're inomro mono norĩ hã. Misire te nomro, uba're 'remhã.

¹⁵ Tawamhã Zezusi ma ãne tãma waihu'u za'ra: — Ma'ãpé, 're asi'madâ'â pese za'ra wa'aba mono, i'u'ẽtẽ wapuzém nhiti 're anomro aba mono da, farizeu norĩ nhimi'manharĩzém nhiti, apito Erodihi me.

¹⁶ Tawamhã te sima nharĩ za'ra, ãne: — I'u'ẽtẽ wapu hã ãté wama hâimana za'ra õ wa, ma ãne wama waihu'u za'ra.

¹⁷ Tawamhã Zezusi ma sina wapari za'ra. Tahawa, te sadanharĩ za'ra, ãne: — E niha te i'u'ẽtẽ wapu hã aima ihâimana za'ra wa'aba õ na, sô asimrami za'ra wa'wa. E asiwi ĩzadaihu'u za'ra wa'aba õ di bété, i'u'ẽtẽ wapuzém na te aima iwaihu'u za'ra wa'aba zém na hã. E niha waihu'u su'u za'ra wa'aba õ di.

^18-19 E niha atõmo na marĩ 're 'madâ'â za'ra wa'aba mono nherẽ, aima waihu'u za'ra wa'aba õ di. E niha aipo're na marĩ 're wapari za'ra wa'aba mono nherẽ, aima waihu'u za'ra wa'aba õ di. 5 na i'u'ẽtẽ wapu hâiba hã te dama iwẽ'ẽi mono zém na hã, duré 5 miu na dahâiba nherẽ, aihĩni idasaihurizém na hã, e ma ãma aipo're si'âri za'ra wa'wa. E niha si'õtõ hâiba hã danho'rada ré isi'azazâri, apâ iwa iséme aba mono hã. Tawamhã asa ma Zezusi hã ãma siwi sada'â, ãne: — Si'õno hã 12 na ihâiba hã danho'rata ré hã.

²⁰ Tawamhã Zezusi hã isadanharĩ na, ma duré tãma ãma sahu za'ra: — Duré, 7 na i'u'ẽtẽ wapu hã hâimana nherẽ, te dama iwẽ'ẽi mono zém na hã, duré 4 miu na dahâiba nherẽ, da te 'mahâpãrĩ mono wamhã, e niha si'õtõ hâiba hã danho'rata ré hã. — Si'õno hã, 7 na ihâiba danho'rata ré hã. — Ãne ma asa ãma sada'âbâ za'ra duré.

²¹ Tawamhã Zezusi te duré tãma nharĩ za'ra, ãne: — E niha bété zahadu ĩwaihu'u za'ra wa'aba õ di, ĩwaihu'u pese na hã.

Zezusi hã itob'a te te ipesezé wasu'u

²² Taha pari, te oto ai'aba'ré Zezusi norĩ hã, Besada u. Tawamhã datẽme sihutu wamhã, aibâ itob'a hã ma tô itẽme dasiwi saprõni ni, Zezusihi u. Tinhib'rata na te te upi da, te te to pese da, te duré tãma 'ru za'ra, siwi isaprõni'wa norĩ hã.

²³ Tawamhã Zezusi hã ma itob'a hã pa'â, danhiti te te sima saprõni da. Tawamhã tizadaipro na ma sada sisiptõmo di'i, te te ãma tob'u'ré da, aibâ hã. Taha pari, ma duré tinhib'rada hã ãma tihi. Taha parimhã, te sadanha, ãne: — E zahadu marĩ hã 'madâ'â õ di. E ma tô marĩ hã i'madâ.

²⁴ Tawamhã aibâ te te rob'madâ'â wamhã, Zezusihi ma, te asa tinha, ãne: — Zahadu te rob'madâ'â pese õ di. Aibâ norĩ hã te ai'aba'ré, wede sine hã.

²⁵ Tahawa, tinhib'rada hã ma tô duré ãma tino, itomhâ ãma, Zezusi hã. Tawamhã ma tô tito pese oto, aibâ hã. Te rob'madâ'â wẽ di oto.

²⁶ Tawamhã Zezusi hã te aibâ ma rob'ru, tinhorõwa u morĩ waré da oto, apâ morĩ tõ da, 'ri wa'õtõ u hã.

Zezusi hã Danho'reptui'wa na, Pedru hã asa te te tãma iwaihu'uzé wasu'u

²⁷ Taha pari, Zezusi norĩ hã te oto 're nomro, 'ri wa'õtõ mono bâ. Apito Filipihi te, Sézaréa na 'ri nho'õmo nhisi niwĩ, 'ri wa'õtõ u. Tawamhã bâdâdi na si'aba'ré sina, te sina sadanharĩ za'ra, ãne Zezusi hã: — E niha ma tô da te dasima 're ĩwasu'u za'ra. E 'wa hã, wa hã.

²⁸ Tawamhã asa ma te ãma sada'âbâ za'ra, ãne: — Aiwasu'u hã, ahâ di. A hã, u, Zuwã Batista, apâ aihâiwa'udu. A hã, u, Eliasi apâ we i'aimorĩ. A hã, u, 'Re ihâimana u'âsi mono zadawa 'mahârâ 'rata 'wa hâiba amo, duréi pese atâ'â nherẽ, apâ aihâiwa'udu.

²⁹ Tawamhã Zezusi te duré sina sadanharĩ za'ra: — A norĩ wa'wa hã bété, e niha ma tô asima 're ĩwasu'u za'ra wa'aba mo. Tawamhã Pedruhu si, ma asa ãma sada'â, ãne: — A hã Cristu, 'Re ihâimana u'âsi mono te te aipisudu, Danho'reptui'wa da.

³⁰ Tawamhã Zezusi te sina sadawa uwati za'ra, ãne Danho'reptui'wa na, te te a'â dama wasu'u za'ra tõ da.

Zezusi hã, za idâ'âzém na, duré za apâ ihâiwa'utuzém na isiwasu'uzém na rowasu'u

³¹ Tawamhã ãne te Zezusi hã tãma siwasu'u za'ra, tisiré 're inomro mono norĩ ma: — Ti'ai ãma Dasiré Ipodo hã, 'Re ihâimana u'âsi mono te te tãma ipisutuzéb zarina, te za robzépata za'ẽtẽ. Dama roti'wa norĩ hã te za siwi wẽ'õ za'ra, ihi norĩ hã. Sasedoti ipire norĩ zama, duré dama rowahutu'wa norĩ zama, te za siwi wẽ'õ za'ra. Tawapsi te za dasiwi wĩrĩ ni. Tawamhã bâdâ maparane ãma si'utõrĩ õ ré, te za hâiwa'udu apâ.

³² Ãne sõ'awi ma tô Zezusi hã tãma siwasu'u za'ra, tãma irob'rãsutuzém na hã te te ãma waihu'u siromo za'ra da. Tawamhã Pedru hã ãne tãma isiwasu'u za'ra zé te te tiwi sawi da, te sima saprõ Zezusi hã, tisiré norĩ nhiti.

³³ Tawamhã te te sina wapari wamhã, tisiré 're inomro mono norĩ u, ma aipi'ra. Tawamhã Pedruhu ma, te ãne tinha: — Satanasi, mo oto aimorĩ, ĩnhiti. 'Re ihâimana u'âsi mono nhimirosa'rata zarina rosa'rata õ di, a hã. Danhimirosa'rata zarina si, te ĩ'ãma irosa'ra, a hã.

³⁴ Taha pari, Zezusi te duré sima dazô hâ, uburé itẽme dasi'rã'õtõ mono da. Tisiré 're inomro mono norĩ zô zama, te duré tihârâ za'ra sima. Tawamhã ãne ma si'ãma dama rowaihu'u: — Ni'wam norĩ hã ĩsiré 're nomro u'âsi mono da, te te sima 're ĩwẽ za'ra mono wamhã, tihâimanazém na te te 're rosa'rata za'ra mono õ di za. Tiza'ozéb ré, ĩzarina 're inomro mono ne, da te dasiwi uprosi da nherẽ, te za ĩsiré 're nomro.

³⁵ Ni'wam norĩ hã si'uihâ na tihâimanazép si te te sima 're sawi za'ra mono wamhã, rowẽ isi'utõrĩ'õ hã te te sina 're uwaimrami za'ra mono õ di za. Ni'wam norĩ hã ĩzarina 're nomro mono da, duré ĩzadawa wasu'u'wa 're nomro mono wa, 're sihâiba zawi za'ra mono õ wapsi, te za te te sina 're uwaimrami za'ra, rowẽ hã.

^36-37 Ãté ni'wa hã te za tinhibro hã te te sima 're a'ubumroi pese, sibrob ahâ uptabi da. Tawamhã te za oto dârâ. Ti'ab ré sibrob ahâ nherẽ, e tãma 're rowẽ mono di za, rowẽ isi'utõrĩ'õ hã te te sina 're uwaimrami mono õ wamhã. Mare di. Tãma 're rowẽ mono õ di za. Ti'ai ãma simarĩ ahâ uptabi nherẽ, tãma waihu'u õ di za, marĩ na isiwa'âbâzéb da hã, rowẽ ãma 're ihâimana mono zéb da hã.

³⁸ Ãhã na da'ahâ na 'Re ihâimana u'âsi mono nhimiroti hã ma tô rẽme za'ra ni. Dawasété na si te oto 're danomro, ã nimosi dapoto té mono hã. Tawamhã ni'wam norĩ hã ĩzazei'wa na, duré ĩmreme wapari pese 'wa na, ãté dama 're siwasu'u za'ra mono õ di za, 're siséb za'ra mono õ'umnhasite. Ãté te za dawi 're si'udâ za'ra, ĩzazei'õ'wa ne. Taha wamhã, ti'ai ãma Dasiré Ipodo hã nimahã na za we apâ morĩ wamhã, Timama te ré rowa'a za'ẽtẽ ré, te za wei mo, hâiwa ãma tãma iromhuri'wa norĩ siré. Tawamhã apâ we morĩ wapsi, i'udâ'wa norĩ hã isazei'wa na te te waihu'u za'ra õ di za.