Marcu 7 - ꞌRe Ihâimana Uꞌâsi Mono Zadawa Wasuꞌu

Zudeu norĩ hi'rata hâimanazém na, farizeu norĩ ma, Zezusi te te iwaihu'uzé wasu'u

¹ Tawamhã aibâ norĩ hã Zeruzalẽ hawi isihudu hã ma tô Zezusihi u si'rã'õtõ, zudeu norĩ hã. Ta norĩ hã farizeu, duré 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ.

² Ta norĩ hã ma tô 'madâ'â za'ra, Zezusihi siré 're inomro mono norĩ hã, farizeu norĩ nhimiroti hã te te 'madâ'â za'ra ãna, saihuri wa, simisõi pese ãna.

^3-4 Zudeu norĩ hã tihi'rata norĩ nhimiroti zarina si, te 're hâimana za'ra. Tisiré zudeu norĩ nhipai u, te taha si te te 're 'madâ'â pese za'ra, farizeu norĩ hã. Tahawa, 're simisõi pese za'ra mono parip si, te za 're saihuri. Duré marĩ hã dasai wedezém hawi 'ri tẽme te te 're i'ãwisi za'ra mono hã, te za te te 're upsõi pese za'ra, ãma 're saihuri mono õ ré. Duré te za hâsizé hã te te 're upsõi pese za'ra, duré piza'a hã duré piza'a isi'uwazi 'manharĩ hã, tihi'rata norĩ nhimiroti zarina.

⁵ Tahawa, farizeu norĩ hã Zezusihi u si'rã'õtõ wamhã, ma tô Zezusi hã siwi 'mahâ, rowahutu'wa norĩ me: — E marĩ wa, te bété asiré 're inomro mono norĩ hã simisõi ãna 're saihuri, wahi'rata norĩ nhimiroti na te te 're rosa'rata za'ra mono ãna.

^6-7 Tahawa, ma tô Zezusi hã asa ãma sada'âbâ za'ra, ãne: — Tô senai õ di, 're i'aihâimana za'ra wa'aba mono zé hã. Duréihã Izaia hã ma tô i'uwaibaba ai'ãma rob'ui'éré siromo za'ra wa'wa, aihâimanazéb za'ra wa'aba na hã. 'Re ihâimana u'âsi mono mreme na ma tô ãne na ai'ãma rob'ui'éré siromo za'ra wa'wa: “Õ norĩ hã tô sena newa, te timreme na si taré ĩ'ãma 're wata za'ra. Tane nherẽ, te tipẽ'ẽ 're aimawi zô si te te 're rosa'rata u'âsi za'ra, ĩ'upana. Danhimiroti zarina si, te ta norĩ hã te te dama 're rowahutu za'ra, ĩnhimiroti zarina newa. Tahawa, senai õ di, ta norĩ hã ĩ'ãma 're iwata za'ra mono zé hã.”

⁸ A norĩ wa'wa hã, 'Re ihâimana u'âsi mono nhimiroti na 're asapa'a za'ra wa'aba mono õ di. Ti'ai ãma danhimiroti na si, te 're aihâimana za'ra wa'aba mo.

⁹ Ãne ma tô duré tãma waihu'u za'ra: — A norĩ wa'wa hã aihâimana nhipese sina te 're irẽme za'ra wa'aba mo 'Re ihâimana u'âsi mono nhimiroti hã, 'râwi asimirosa'rata na si 're aihâimana za'ra wa'aba mono da.

¹⁰ Duréihã Mozési hã ma tô dama roti, ãne: “Aimama hã te za 're iwazéb za'ra wa'aba mo, ana zama.” Ãne isimiroti amo hã duré: “Ni'wam norĩ hã timama ãma nherẽ, duré tina ãma nherẽ, te te ãma 're wasété za'ra mono wamhã, te za da te 're simro.” Ãne isimiroti hã duréihã.

^11-12 Tane nherẽ, te ãhã na hã asimiroti za'ra wa'aba zéb zarina si 're dahâimana za'ra, damama norĩ hã, duré dana norĩ zama hã da te 're pawaptob za'ra mono ãna. Ãté ni'wai ma, te za isibro hã 're hâimana, timama norĩ, tina me, te te ãma ipawaptob zahuré zéb da hã. Taha wamhã, wẽ nherẽ, ãté te za ãne timama ma hã, duré tina ma zama hã waihu'u za: “Marĩ na te aipawapto wa'aba da hã, te ĩsima wẽ nherẽ, tane nherẽ, wa tô 'Re ihâimana u'âsi mono ma, ãma ropisutu, te tãma sõmri da, ãma ĩwata zéb da hã.” Ãté ãne te za timama ma waihu'u, duré tina ma zama hã. Ãne wamhã, te za tãma 're iwaihu'u wasété za'ra wa'aba mo, ãne: “'Re ihâimana u'âsi mono ma, ma tô iropisutu pa. Tahawa, te za tãma ãma i'uwaimra, aimama norĩ, ãma pawaptob zahuré õ nherẽ, ana me.” Ãne ma tô dama 're iroti wasété za'ra wa'aba mo.

¹³ Ãne wa, 'Re ihâimana u'âsi mono zadawa wasu'u hã aima wapu za'ra wa'aba di, isimiroti upana aihi'rata norĩ nhimiroti na si, dama 're roti u'âsi za'ra wa'aba mono wa. Tane duré aimawi na dama 're iroti za'ra wa'aba mono zé hã, tô sena ahâ uptabi di.

'Râwi 're idasiwasété za'ra mono zém na rowasu'u

¹⁴ Tawamhã Zezusi te duré sima dazô hâ, te te dama roti da, ãne: — Ma'ãpé, ĩnhimirowasu'u hã wapari pese za'ra wa'aba za, marĩ hã waihu'u za'ra wa'aba da ãma.

^15-16 Uburé marĩ na 're dasaihuri mono wamhã, taha na 're dasiwasété za'ra mono õ di za. Dapẽ'ẽ hawim na danhimirosa'rata wasété zarina, da te dasima 're nharĩ wasété za'ra mono wapsi, te za 're dasiwasété za'ra, 'râwi.

¹⁷ Tawamhã te te dama rowasu'u pari, te oto ai'aba'ré, 'ri tẽme, tisiré 're inomro mono norĩ me. Tawamhã 'ri tẽme sihutu wapsi, te oto siwi sadanha, isiré 're inomro mono norĩ hã, marĩ na te te dama irowasu'uzém na hã te te tãma waihu'u za'ra da, 'râwi 're idasiwasété za'ra mono zém na hã.

¹⁸ Tawamhã ma tô tãma nharĩ za'ra, ãne: — E niha a norĩ wa'aba ma zama, aima waihu'u za'ra wa'aba õ di bété. Dasa hã da te 're huri mono wamhã, taha na 're dasiwasété za'ra mono õ di za 'râwi.

¹⁹ E marĩ wa. Dapẽ'ẽ na, da te 're irosa'rata za'ra mono zéb u, 're sisisi mono õ wa za, dasa hã. Danomo u si, te za 're sisisi, dasa hã. Taha pari, te za 're wairébé apâ, rob u. — Ãne ma tô tãma waihu'u za'ra, te te ãma waihu'u za'ra da, dasai mono bâ iwẽ na 're idasaihuri mono zéb da na hã.

^20-22 Ãne ma duré tãma waihu'u za'ra: — Dapẽ'ẽ hawi, da te 're isani za'ra mono na si, te za 'râwi 're dasiwasété za'ra. Dapẽ'ẽ 're, danhimirosa'rata wasété hawim na si, te dawasédé hã uburé da te 're 'manharĩ za'ra, marĩ na danhipsaihuri hã, duré dasipãrĩ hã, duré dasina danhipsaihuri hã, duré danhibrom na da'ruiwapari hã, duré dawasété 'manharĩ hã, duré dazadawa nhipe hã, duré marĩ na danhiminho'ru hã, duré danhisi wasédé hã, duré marĩ na 'râwi dasina dawada hã, duré 'râwi dawasété na 're idasisãmri za'ra mono õ zém na hã.

²³ Dasi'uihâ na te za 'râwi da te dasima 're rosa'rata wasété za'ra. Taha pari, te za uburé marĩ hã iwasétére hã da te 're 'manharĩ za'ra. Ãne wapsi, te za 'râwi 're dasiwasété za'ra.

Pi'õ zudeu'õ 'ra hã, Zezusi te te wa'uburé hã ihawi isatõrĩzé wasu'u

²⁴ Tawamhã Zezusi norĩ hã te oto ai'aba'ré, darob amoi u, Tiru na 'ri nho'õmo nhisi 'rata, daro ihâimana tẽme. Tawamhã 'ri para u ma tô asisi. Tame isãmrazém na da te dasiwi iwaihu'uzéb da hã, te te sima wẽ õ di, Zezusi hã. Tane nherẽ, a'â da te sa'rese ãna, sãmra waihu'u õ di.

^25-26 Tawamhã pi'õ ma tô duré isãmrazém na danhimirowasu'u hã wapa. Zezusihi wasu'u te te wapari wi, te awa'awi itẽme mo. I'ra hã ba'õtõre hã, wa'uburé hã te te 're wamnarĩ mono wa, te itẽme mo, te te tãma wasu'u da. Tawamhã itẽme wisi wi, ma tô Zezusihi papara aime, hi'rãtitõ. Pi'õ hã gregu na ipodo, zudeu'õ, Siru Penisiza nhihudu. Tane nherẽ, ma tô Zezusihi wi rowaptẽ, wa'uburé ma, te te rob'ru da, i'ra ma watobro da, i'ra hã rowẽ na si, tãma 're hâimana mono da oto.

²⁷ Tawamhã Zezusi te asa tãma tinha pi'õi ma, ãne: — Imorĩ'rata na te za da'ra ma, isa hã da te tãma 're sõmri za'ra, tisa hã te te 're 'mahâpãrĩ za'ra mono da, a'â. Da'ra sa hã imorĩ'rata na wapsã ma, da te 're sãmra mono wamhã, i'uwaibaba õ di.

²⁸ Tawamhã pi'õ hã ma asa ãma sada'â: — Tô i'uwaibaba, ma tane hã ĩma iwaihu. Tane nherẽ, te za da'ra saipru hã, da'ra norĩ wi 're rere'e mono wamhã, wapsã hã te te 're huri, wedezai 'rowi.

²⁹ Tawamhã Zezusi ma duré asa tãma waihu'u: — Tane tô. Asa ãma ĩma uwaimrami wẽ wa, te za oto apâ aimo, 'ri tẽme. Ai'ra ma, ma tô wa'uburé hã watobro.

³⁰ Tawamhã pi'õ hã te apâ mo, tinhorõwa u. Wisi wamhã, rowẽ na ma tô ti'ra hã sabu, waptâ nomro ré. Iwana ma tô tãma watobro, wa'uburé hã. Tahawa, tãma hã rowẽ di oto.

Zezusi hã aibâ ipo'reptõ duré imreme waihu'u'õ, te te ipesezé wasu'u

³¹ Tawamhã Zezusi norĩ hã Tiru 'rata, hâimana za'ra pari, ma tô ai'aba'ré. Sidõ na daza'ru nhisi wa'wai baba, ma tô ro'rahâri za'ra. Duré Decapori na danhipti'a nho'õmo nhisi wa'wai baba, ma tô ro'rahâri za'ra, 10 na daza'ru wa'wai baba. Tawamhã Galiléa ãma â zaihâ u, ma tô aihutu, isõ'ui u.

³² Tawamhã isõ'u zaihâ u sihutu wamhã, aibâ ipo'reptõ hã ma tô itẽme dasiwi saprõni ni, imreme waihu'u'õ hã. Tawamhã Zezusihi ma, te oto 'ru za'ra, siwi isaprõni'wa norĩ hã tinhib'rada hã te te ãma hiri da, te te pese da.

³³ Tawamhã Zezusi hã ma tô aibâ hã danhiti sima saprõ. Tawamhã tinhipto hã ma tô ipo're 're tiza. Taha pari, ma duré tizadaipro na tinhipto hã sada di'i, te te ãma soto u'ré da.

³⁴ Taha pari, te hâiwa u rob'madâ. Hâiwa u te te rob'madâ'â sina, aibâ ãma pẽ'ẽzé wa, tipẽ'ẽ 're te ãi'ã. Tawamhã tisimremezém na te tãma tinha, ãne: — Epata. — Ãne ãma isaprĩzé hã, wamreme na: “Aipo're 'repu'u.”

³⁵ Tawamhã awa'awi ma tô po're 'repuru oto. Duré ma tô tinhoto wairo. Tawamhã mreme wẽ di oto, aibâ imreme waihu'u'õ hã.

³⁶ Tawamhã Zezusi hã te sina dazadawa uwati pese, iwasu'u na da te dasima ãma ropé tõ da. Tane nherẽ, i'madâ'â'wa norĩ hã te nasi dama rowasu'u za'ra, aibâ te te ipesezém na.

³⁷ Tawamhã isimirowasu'u, da te wapari za'ra wamhã, ma tô ãma tatob'uzu za'ra ni. Ãne te Zezusi hã dasima wasu'u za'ra ni: — Tô sena, te uburé marĩ iwẽ hã te te dama 're ab'manharĩ. Ipo'reptõ mreme waihu'u'õ na 're ihâimana mono hã ma tô pese.