Marcu 6 - ꞌRe Ihâimana Uꞌâsi Mono Zadawa Wasuꞌu

Zezusi hã Nazaré u imorĩzé wasu'u

¹ Tawamhã Zezusi norĩ hã Nazaré u, ma tô apâ ai'aba'ré, Zezusi hã aré 're ihâimana mono zéb u.

^2-4 Tawamhã datẽme sihutu wamhã, zudeu norĩ te, romhuri zahârizém na te oto dama rowahutu, sabadu na, rowahutuzéb ãma. Da'ahâ na da te wapari za'ra wamhã, ma tô ãma tatob'uzu za'ra ni, isimirowasu'u na hã. Ãne te duré ãma tasisadanharĩ za'ra ni: — Pra. E ma hawimhã, ma uburé marĩ hã awaihu'u, waihu'u pese na, te te dama 're irowasu'u mono da hã. E niha bété õhõ ma si waihu'u pese di, marĩ dama i'manharĩ waihu'u'õ te te dama 're i'ab'manharĩ wẽ mono zéb da hã. Õ hã wede'é na romhuri'wa, Mariaha 'ra. Ino norĩ hã Tiagu, duré Zuzé, duré Zuda, duré Sima. Ihidiba norĩ hã te duré wa'rata 're hâimana za'ra. Ãne wa, Zezusihi zô datob'uzu za'ra õ di, dama waihu'u pese wa, ãne na hã. Tahawa, ma ãne dama waihu'u, Zezusi hã: — 'Re ihâimana u'âsi mono zadawa 'mahârâ'wa norĩ hã daro mono bâ datẽme 're nomro mono wamhã, isimiroti na wazép sina, te za sô 're datob'uzu za'ra. Isipti'ai ãma si sô 're datob'uzu za'ra mono õ di za, isipti'ai ãma wa. Isisãnawã norĩ zama, sô 're tob'uzu za'ra mono õ di za, isõrõwa ãma isiré 're idahâimana za'ra mono norĩ zama.

⁵ Tahawa, Nazaré ãma sô datob'uzu za'ra õ wa, marĩ dama i'manharĩ waihu'u'õ hã ahâ na te te dama 'manharĩ õ di, tiwaihu'u pese na hã. Ni'wam norĩ si, ma tô upi za'ra, tinhib'rata na te te pese za'ra da, da'umro na.

⁶ Tahawa, 'Re ihâimana u'âsi mono zadawa 'mahârâ'wa na da te dasiwi saze za'ra õ wa, te taré da'ãma rosa'rata, da te dasiwi isaze za'ra õ zém na hã. Tawamhã Nazaré 'rata 're idahâimana za'ra mono norĩ ma, te te 're rowahutu oto Zezusi hã, 'ri wa'õtõ mono bâ.

Zezusi hã tisiré 're inomro mono norĩ hã te te datẽme isatõrĩ za'ra zé wasu'u

⁷ Tawamhã tisiré 're inomro mono norĩ zô, te tihârâ za'ra, aibâ 12 na ihâiba norĩ zô. Taha pari, ma tô maparane si te te apisutu, daro mono bâ si'aba'ré da, datẽme. Si'aba'réi õ ré, ma tô duré tãma pisutu za'ra, isimiromhõsi zarina, wa'uburé hã te te dama 're sãmra za'ra mono da.

⁸ Ma duré tãma waihu'u za'ra, marĩ hã te te siré 'wasari tõ da, bâdâdi na da hã. Tisiwazusizéb ré si si'aba'ré da, ma tô tãma waihu'u za'ra. Mra hã duré romramizé hã duré rob'uiprazé hã te te 'wasari tõ da, ma tô duré tãma waihu'u za'ra.

⁹ Tipara'uza ré si si'aba'ré da, ma tô tãma waihu'u za'ra. Duré da'uza ihâpa isõ'utu'u hã te te 'wasari tõ da, tihâiba na ré si si'aba'ré da, ma tô duré tãma waihu'u za'ra.

¹⁰ Ãne ma tô duré tãma waihu'u za'ra: — Darob u, 're aihutu aba mono wamhã, te te 're i'aiwaibui wẽ wa'aba mono norĩ nhorõwa ãma si, te za a'â 're asimroi wa'aba mo, darob amoi u, duré 're aiwairébé aba mono õ ré.

¹¹ Da te 're aiwaibui wẽ za'ra wa'aba mono õ wamhã, duré da te 're aiwapari ze za'ra wa'aba mono õ wamhã, te za dahawi 're aiwairébé su'u aba mo. Tawamhã dahawi 're aiwairébé aba mono õ ré, te za asisa'u aipara zapru hã 're itata'a za'ra wa'aba mo, ti'ai u 're rere'e mono da, dapo're õ na 're danomro mono wa, 'râwi 're dasisãmri za'ra mono da.

¹² Tawamhã isiré 're inomro mono norĩ hã te oto datẽme ai'aba'ré, te te dama 're sadawa wasu'u za'ra mono da, dawasété wi 're dasipizari za'ra mono da, 'Re ihâimana u'âsi mono niwĩ.

¹³ Wa'uburé hã te te oto dama 're sãmra za'ra. Duré azeitona 'rãi wa'u wam na, te te 're da'rãi u'ré za'ra mono pari, ma tô da'ahâ na te te 're dapese za'ra, dahâzé u'âsi 're idahâimana za'ra mono hã.

Zuwã Batistaha dâ'âzé wasu'u

¹⁴ Tawamhã apito Erodi hã ma tô Zezusihi wasu'u hã wapa, iwasu'uwẽ hã daro mono bâ waptã'ã mono wa. Ãne te ni'wam norĩ hã Zezusihi wasu'u na taré te te sima 're romnomri za'ra: — Õ hã, Zuwã Batista apâ ihâiwa'udu. Tahawa, te marĩ hã dama i'manharĩ waihu'u'õ hã te te dama 're ab'manharĩ, tiwaihu'u pese na.

¹⁵ Ni'wam norĩ hã te duré te te sima ãma 're romnomri za'ra, ãne: — Õ hã Eliasi, duréihã dâ'â nherẽ, apâ ihâiwa'udu. Ni'wam norĩ hã te duré te te sima ãma 're romnomri za'ra, ãne: — Õ hã 'Re ihâimana u'âsi mono zadawa 'mahârâ'wa, duréihã 're inomro mono norĩ ne hã. — Ãne te Zezusihi wasu'u na taré da te dasima ãma 're romnomri za'ra.

¹⁶ Tawamhã apito Erodi, ma tô Zezusihi wasu'u na hã danhimirowasu'u hã wapa. Tawamhã ãne te tinha: — Tô õ hã, Zuwã Batista. Te 'rui wa, da te butu nhizâri nherẽ, apâ ihâiwa'udu te 're mo.

^17-18 Erodi hã ma tô aré dama ti'ru, Zuwã Batista da te dasiwi pawasisi da, da te dasiwi sẽrẽ da, dazazéb 're, 're sa mono da. Ãne ma tô Erodi hã Zuwãhã ma, rob'manharĩ wasété. E marĩ da. Imro ma, tãma rowẽ da, Erodizaha ma. Tinoi wi, ãma isi'ré na, ma timro, Filipihi mro na, Erodi hã. Ãma mro wa, Zuwã ma tô Erodihi ma tinha: “'Re ihâimana u'âsi mono nhimiroti hã ãne: ‘Asisãnawãi mro na hã tiwi ãma 're ai'ré za'ra wa'aba mono õ di za.’ ” — Ãne ma tô Erodihi ma waihu'u, 'Re ihâimana u'âsi mono nhimiroti hã.

^19-20 Tahawa, Erodiza hã te te sina 're mreme 'ruiwapari, Zuwã hã. Te te wĩrĩ neza. Tane nherẽ, te te wĩrĩ waihu'u õ di. E marĩ wa. Erodi hã te te tiwi 're 'madâ'â pese, Zuwã Batista hã. Zuwã hã wẽ uptabi na, te dama 're hâimana. Ãne na ma tô ihâimanazém na waihu'u, Erodi hã. Tahawa, sina 're pahi mono wa, ma tô dawi te te 're 'madâ'â pese, Zuwã hã. Zuwãhã nhimirowasu'u hã te nasi wapa, Erodi hã. Tawamhã wapari ze na nasi te te wapari wa, zahadu rosa'rada hã te te sima ãma hiri wẽ õ di Erodi hã, Zuwã Batistaha hâiba na hã.

²¹ Tawamhã ma tô bâdâ hã pisutu Erodi hã, iwa iwaptã'ãzém na dasipo're pu'u za'ra wa, isiré dasa hã da te huri da. Tahawa, ma tô dama ipire norĩ hã isiré tisa tihu, da'wapéi'wa norĩ nhib'apito norĩ hã, duré Galiléa ãma dama ipire 're ihâimana za'ra mono hã. Tawamhã aihĩni dasiré dasaihuri ré, Erodizaha ma wẽ di, Zuwã Batista idâ'âzéb da hã.

²² Tahawa, dasaihuri ré, ma Erodizaha 'ra sipi'õ hã ãzé 'ri para u, dama sipese da. Tawamhã Erodi norĩ hã ma tô ãma uze za'ra, tãma sipese za'ra wẽ te. Tahawa, te apito hã azarutu ma tinha, ãne: — Marĩ ĩwi waptẽrẽ, asima iwẽzéb uwaibaba. Tawamhã wa za aima tisõ.

²³ Tô sena marĩ ĩwi waptẽrẽ wamhã, wa za aima ãma uwaimra za. Ĩnhipti'a ĩwi waptẽrẽ wamhã, aiwa wa za ãma aipo'o za ate da hã, duré ĩte da hã.

²⁴ Tahawa, te tina u a'â mo, marĩ hã apito wi te te iwaptẽrẽ da na, te te sadawa pibu da, tina hã. Tawamhã ina hã ãne te asa tãma tinha: — Ma'ãpé, Zuwã Batistaha 'rã si tiwi waptẽrẽ, taha si te te aima sõmri da.

²⁵ Tahawa, si'aba'ré na ma apâ ãzé apito u, azarudu hã. Tawamhã ãne te apito ma tinha: — Zuwã Batistaha 'rã si, wa ĩsima wẽ, piza'a 're nho'a wa, ĩma hiri da, ãhã na awa'awi.

²⁶ Tawamhã ma tô tiwi tirobzei'õ, apito Erodihi wi. Tane nherẽ, uburé sô idahârâ norĩ nho'a, te te azarutu ma ropisutu wa, ma tô tãma ãma uwaimra, te te tiwi iwaptẽrẽzéb uwaibaba.

²⁷ Tawamhã ma tô ti'ru, awa'awi i'rã te te we âri da, da'wapéi'wa hã. Tawamhã awa'awi te sô mo, dazazéb u. Tame awa'awi ma tô butu nhizâ, Zuwã Batista hã.

²⁸ Tahawa, te awa'awi ti'â, piza'a 'renho'a wa, azarutu ma, te te sõmri da. Te te tãma sõmri parip si, ma tina ma oto tisõ, Zuwã Batistaha 'rã hã.

²⁹ Tawamhã Zuwã Batistaha zawi'wa norĩ hã iwasu'u te te wapari za'ra wamhã, ma tô sô ai'aba'ré, ihâiba zô, te te siwi sẽrẽ da, ab're 're.

Zezusi hã dasa na te te idapawaptobzém na rowasu'u

³⁰ Tawamhã Zezusihi zadawa wasu'u'wa norĩ hã darob amoi hawi apâ sihutu wamhã, Zezusihi ma, ma tô siwasu'u za'ra, iwẽ na te te idapawaptob za'ra mono zém na hã. Duré te te dama irowasu'u za'ra mono zém na zama ma tô tãma siwasu'u za'ra.

³¹ Tawamhã da'ahâ uptabi na itẽme dasisamarĩ pese wa, saihuri waihu'u õ di, Zezusi norĩ hã. Tahawa, ma tô ãne satõrĩ za'ra, Zezusi hã: — Oto wasi'aba'réi wa'aba a'ubuni u, wawa'utu za'ra da a'â, danhiti.

³² Tawamhã hâiba pisutu te oto ai'aba'ré, uba're u. Uba're wa, ma tô asisi, zara u te te saprĩ za'ra da, danhiti hâimana za'ra da a'â, zara niwĩ.

³³ Tane nherẽ, da'ahâ na ma tô waihu'u za'ra ni, zara u te te isaprĩ za'ra zém na hã. Tahawa, ma tô isõ'rãmib za'ra dasisa're, â zada'réi baba, Zezusi norĩ nho'rãmi, daza'rui mono bâ 're idahâimana za'ra mono norĩ hã. Tawamhã Zezusi norĩ wana, ma tô aihutu ni.

³⁴ Tawamhã Zezusi hã uba're hawi watobro wi, ma tô da'ahâ uptabi na da'ab'madâ. Tahawa, ma tô da'ãma tipẽ'ẽzé, pone'ẽrebâ 'madâ'â ãna 're inomro mono ne, 're danomro mono wa. Tawamhã tame ma tô tinhimirowasu'u iwẽ na ahâ uptabi na hã da'apawapto, Zezusi hã.

³⁵ Tame tiwi hâiwahâ pesere wa, Zezusihi siré 're inomro mono norĩ hã ma tô itẽme ubumro. Ãne te taha wamhã Zezusihi ma nharĩ za'ra: — A'ubuni wi wahâimana za'ra ré, ma wawi tihâiwahâ za'ra.

³⁶ E dama rob'rui õ di za, dasi'aba'ré da, marĩ hã dasazéb da, da te dasima uipra za'ra da, re na 'ri isimasa mono u, niha wamhã duré 'ri wa'õtõ u zama.

³⁷ Tawamhã Zezusi, ma tô asa ãma tãma wa'rãmi za'ra, ãne: — Mare di. A norĩ wa'wa hã te za dama i'a za'ra wa'wa, dasaihuri da hã. Tawamhã asa ma duré ãma tãma wa'rãmi za'ra, ãne Zezusihi ma: — E niha wa za dasa hã dama uipra za'ra ni, da'ahâ uptabi nherẽ. Rob'uiprazé hã ahâ uptabi na, wama hâimana za'ra 'wa'âhã, 200 na wa aré dasa hã dama uipra za'ra ni, i'u'ẽtẽ wapu hã.

³⁸ Tawamhã Zezusi te sô sadanharĩ za'ra, ãne: — E niha te bété i'u'ẽtẽ wapu hã aima tihâimana za'ra wa'wa. Ma'ãpé sô sabu za'ra wa'aba. Tawamhã isiré 're inomro mono norĩ te te sabu za'ra wamhã, te Zezusihi ma, wasu'u za'ra, ãne: — 5 na ihâiba hã i'u'ẽtẽ wapu hã, duré maparane pe'a hã.

³⁹ Tawamhã Zezusi hã ma tô dama waihu'u, dui wa, dawa'õtõ mono bâ dasi'ubumroi mono da, uburé.

⁴⁰ Tahawa, dui wa, te oto dasi'ubumro, nima norĩ hã 100 na dahâiba hã, duré nima norĩ hã 50 na dahâiba na.

⁴¹ Tawamhã ma tô oto i'u'ẽtẽ wapu hã waibu, 5 na ihâiba hã. Pe'a zama ma duré timra. Tawamhã hâiwa u te iré rob'madâ. Timama ãma te tiwata, sõpru wa. Taha pari, ma tô te te wẽ'ẽ, i'u'ẽtẽ wapu hã. Te te wẽ'ẽi mono pari, ma tô tisiré 're inomro mono norĩ ma sõmri za'ra, te te dama sõmri za'ra mono da. Pe'a zama, ma tô te te wẽ'ẽ zahuré, te te duré dama sõmri za'ra mono da hã.

⁴² Tawamhã i'u'ẽtẽ wapu hã umrore nherẽ, wẽ'ẽi ahâ di. Duré pe'a hã maparane nherẽ, wẽ'ẽi ahâ di. Tahawa, ma tô aihĩni dasa hã ãma huri ni. Ma tô duré da te 'mahâpãrĩ. Da'ahâ uptabi nherẽ, da'ãma si'utõrĩ waihu'u õ di.

⁴³ Tawamhã isiré 're inomro mono norĩ hã ma tô apâ si'õtõ 're te te sé, danho'rada hã, i'u'ẽtẽ wapu wẽ'ẽ hã, pe'a wẽ'ẽ zama. 12 na iré hã si'õno hã, danho'rata ré hã. Si'õtõ 'remhã 'masisi mono di.

⁴⁴ 5 miu na aibâ norĩ hâiba hã, i'u'ẽtẽ wapu na isaihuri hã.

Zezusi hã â nhisi baba imorĩzé wasu'u

⁴⁵ Taha pari, ma tô Zezusi hã tãma rob'ru za'ra, tisiré 're inomro mono norĩ ma, uba're wa sisisi da, iwana te te saprĩ za'ra da zara u, Besada na 'ri wa'õtõ nhisi u, si'aba'ré da, iwana. Tawamhã Zezusi hã te a'â isa'u tizab za'ra, te te dama rob'ru da, danhorõwa u, da te ropéi mono da.

⁴⁶ Te te dama rob'rui pari, te ẽtẽ 'rãihâ u mo, Timama ma, mreme da.

⁴⁷ Tawamhã oto tiwi mara za'ra wamhã, uba're hã â wa'wa u, ma tô iré tihâimana za'ra. Taha ré, Zezusi hã siwaprosi te a'â tihâiba, ẽtẽ 'rãihâ ãma.

⁴⁸ Tawamhã ẽtẽ 'rãihâ hawi, ma tô 'madâ'â za'ra tisiré 're inomro mono norĩ hã, uba're sari na si'u'ẽtẽ za'ra mono ré, rowa'u'u za'ẽne apâ te te tiwi wabzuri za'ra mono wa. E marĩ wa. Rowa'u hã isõ'õmoi baba te te rowapõrĩ za'ra wa. Taha ré, ma tô Zezusi hã itẽme timorĩ za'ra â nhisi baba, mara hâ ré. Tawamhã isõ'rãmi te aré timorĩ za'ra, Zezusi hã.

^49-50 Â nhisi baba itẽme morĩ za'ra wamhã, te ãma rosa'rata za'ra, adâ'â hâiba warõ newa. Tahawa, tãma pahi za'ra wa, te tãma 're sadari za'ra. Tahawa, te Zezusi hã awa'awi tãma si'mahârâ za'ra, ãne: — Wa hã wa we atẽme ĩmorĩ 'wa. Ĩma aipahi za'ra wa'aba õ di za.

^51-52 Tawamhã awa'awi uba're wa, ma tô itẽme tizébré za'ra. Sébré wi, ma rowa'u hã sazâ. Tahawa, rowa'u te te isazârizém na, ma ãma titob'uzu za'ra, isiré 're inomro mono norĩ hã. E marĩ wa. Zezusi hã i'u'ẽtẽ wapu te te dama wẽ'ẽi mono wamhã, ahâ uptabi di. Tane nherẽ, te te siwi ãma waihu'u su'u õ di, iwaihu'u pese uptabi na hã.

Zezusi hã, Zenezaré ãma te te ida'apesezé wasu'u

⁵³ Tawamhã Zezusi norĩ hã ma tô saprĩ za'ra, isõ'u na zara u. Te te saprĩ za'ra wamhã, ma tô aihutu, Zenezaré na danhipti'a nho'õmo nhisi u. Tame ma tô â zada'ré ãma, uba're na ãma wasisi za'ra.

⁵⁴ Tawamhã uba're hawi wairébé wamhã, awa'awi ma tô dasiwi waihu'u za'ra ni, Zezusi hã.

⁵⁵ Tawamhã daza'rui mono bâ, ma tô ihâzé ré norĩ hã itẽme 'wasari ni, Zezusihi hâimanazéb u, isimiwaptâ ré.

⁵⁶ Daro mono bâ te Zezusi hã datẽme 're mo, 'ri wa'õtõ u zama, duré 'ri nho'õmo u zama, duré re na 'ri isimasa mono u zama. Darob u datẽme 're simasisi mono wi, ma tô ihâzé ré norĩ hã da te tãma 're sa'ra za'ra, 'ri nhi'riti wa, da te dasina 're i'ubumroi mono zéb ãma. Tawamhã ma tô tiwi rowaptẽrẽ za'ra ni, i'uza nhisutu si ihâzé ré norĩ hã te te tiwi 're upi za'ra mono da. Tawamhã i'uza nhisutu si te te tiwi 're upi za'ra mono nherẽ, ma tô 're séptâ'â za'ra, uburé ihâzé ré norĩ hã.