Marcu 5 - ꞌRe Ihâimana Uꞌâsi Mono Zadawa Wasuꞌu

Aibâ hã wa'uburé ré 're imorĩ hã, Zezusi te te ipawaptobzé wasu'u

¹ Tawamhã Zezusi norĩ hã ma tô zara u aihutu, Zeraza na danhipti'a nho'õmo nhisi u. Galiléa ãma isõ'u zapoto zara niwĩ, Zeraza hã.

² Tawamhã uba're hawi watobro wamhã, ma tô aibâ hã wa'uburé ré 're imorĩ hã sina uzusi.

^3-4 Aibâ hã adâ'â 'ru hawi, ma tô itẽme watobro. Adâ'â 'ru ãma, te ta hã 're sãmra. Te aré da te 're pawasisi, isi'uwazi nhorõ rutu na. Te aré duré da te 're hiwasisi. Tazahã ma tô te te sina 're anhinarĩ. Ni'wa hã sada 're siptete waihu'u mono õ di.

⁵ Bâtâ sidâpâsi, duré mara sidâpâsi te adâ'â 'ru ãma, duré ẽtẽ 'rãihâ ãma zama hã 're hâimana, sadari sina. Ẽtẽ na te duré 're sisihâri u'âsi.

⁶ Romhâ na, ma tô aibâ hã tisã, Zezusi hã. Te te sãmri wa, te itẽme wara, Zezusihi u. Tawamhã hi'rãtitõ ma tô ipapara aime.

⁷ Sa'ẽtẽ te 'mahâ, ãne: — Zezusi, 'Re ihâimana u'âsi mono, danhipai u 're isãmra mono 'ra, e marĩ ĩ'ãma 'manharĩ da, te we aimo. Ĩ'azâri õ di za. 'Re ihâimana u'âsi mono nho'a, wa ĩsina aipa'uwati.

⁸ Ãne te Zezusihi ma tinha wa'uburé hã, te te tãma rob'rui wa, aibâ hâiba hawi watobro da.

⁹ Tawamhã Zezusi te isisi zô sadanha: — E niha asisi hã. — Ahâ di, ĩnhisi hã. E marĩ wa. Wa norĩ hã wa'ahâ wa. — Ãne te Zezusihi ma sisisi.

¹⁰ Tawamhã Zezusihi wi, te nasi tiwi rowaptẽ, wa'uburé norĩ ma, te te rob'ru tõ da, darob amoi u, si'aba'ré tõ da.

¹¹ Tawamhã romhutu na te uhâbâ hã tisa te te 're huri, ahâ na, sa'a ãma.

¹² Tawamhã wa'uburé norĩ te Zezusihi wi sina rowaptẽrẽ za'ra, ãne uhâbâi u si te te tãma rob'ru za'ra da: — Ma'ãpé uhâbâi u wazatõrĩ za'ra na, ihâiba 're, 're wasi'ubumroi mono da oto.

¹³ Tawamhã ma tô tãma rob'ru za'ra, aibâ hâiba hawi wairébé da, uhâbâ hâiba 'rep si, sisisi da. Tawamhã uhâbâ hâiba 're sisisi wi, ma tô uhâbâ hã sisa're, wara sina, i'rã sipra u. Âi ba ma te ãhã wamhã rere. Âi ba rere'e wa, ma uburé ai'utõ, uhâbâ hã. 2 miu na ma tidâ'â za'ra taha wamhã.

¹⁴ Si'utõrĩ wi, te uhâbâ 'madâ'â'wa norĩ hã isiti sisa're wara sina, 'ri ahâ u, te te dama rowasu'u za'ra da, duré rom na 'ri wa'õtõ ãma zama. Tawamhã da'ahâ na ma tô itẽme ai'aba'ré ni, da te 'madâ'â za'ra da hã.

¹⁵ Tawamhã Zezusihi u dasihutu wamhã, ma tô aibâ hã 'madâ'â za'ra ni, wa'uburé norĩ ré aré 're imorĩ hã. Uza ré, te oto nhamra, rowẽ na. Tawamhã ma tô tãma tapahi za'ra ni, õne hã dama sa'rese za'ra õ wa.

¹⁶ Tawamhã ãma i'madâ'â za'ra 'wa norĩ hã, te aibâ wasu'u hã dama wasu'u za'ra, isihutu norĩ ma. Aibâ hã Zezusi te te ipawaptobzém na, duré uhâbâi ma, te te irob'manharĩzém na zama, te dama rowasu'u za'ra.

¹⁷ Tawamhã te siwi satõ, danhipti'ai hawi watobro da, Zezusi hã.

¹⁸ Tahawa, Zezusi ma oto ãzé uba're wa, danhiti morĩ da. Uba're wa, sébré wi, te aibâ hã ãne sina 'mahâ, wa'uburé ré aré 're imorĩ hã: — Ma'ãpé ĩma pisutu, asiré 're ĩmorĩ da.

¹⁹ Tane nherẽ, Zezusi te te ãma sazei õ di. Tahawa, ma te aibâ ma waihu'u, ãne: — Apâ te za aimo, asõrõwa u, 'Re ihâimana u'âsi mono, iwẽ na te te aipawaptobzém na asisãnawã norĩ ma, asiwasu'u da.

²⁰ Tawamhã te oto mo, aibâ hã. Zezusi, iwẽ na te te ipawaptobzém na, ma tô te te dama 're rowasu'u, Decapori na danhipti'a nho'õmo nhisi 're. Tawamhã isimirowasu'u na da te 're wapari za'ra mono wamhã, ma tô ãma 're datob'uzu za'ra.

Zairuhu 'ra wasu'u, pi'õi wasu'u me

²¹ Tawamhã Zezusi hã ma tô apâ saprĩ, zara u. Da'ahâ na, ma itẽme tasi'rã'õtõ ni, â zaihâ u hã.

²² Tawamhã aibâ hã ma itẽme wi, Zairu na isisi hã zudeu norĩ te, rowahutuzé 'madâ'â'wa hã. Itẽme wisi wi, ma tô hi'rãtitõ aime, Zezusihi papara.

²³ Ãne te tãma tinha: — Ĩ'ra hã hâzé ahâ di, azaruture hã. Te za ĩwi dârâ. Tahawa, te za ãma ĩsiré aimo, asib'rada hã ãma nomri da, ĩma pese da, dâ'â tõ da.

²⁴ Tawamhã Zezusi te ime mo. Da'ahâ na isiré dasi'aba'réi wamhã, ma dasiwi hâiba wati ni.

²⁵ Tawamhã morĩ ré, ma pi'õ hã itẽme wi, ihâzé te te 're i'manharĩ mono hã. Wahub ahâ na te hâzé ré 're hâimana, 12 na ãma iwahum na.

²⁶ Dawede'wa norĩ hã ma tô ahâ na te te 're wede za'ra. Dawede'wa nhib'rata 're hâimana mono ré, ma tô te te 're robzépata za'ẽtẽ, pi'õ hã. Uburé tinhibro hã ma tiwede'wa norĩ ma uprosi, tiwede wa'âbâzém na. Tahawa, 're séptâ'â mono õ wa, ma tô ihâzé hã te te tiwi 're wasété u'âsi, ihâiba hã.

^27-29 Tawamhã Zezusihi wasu'u te te wapari wamhã, dawa'wa u ma tô ãzé, ibabarãi hawi. Ãne isimirosa'rada hã: “Zezusihi uza si te tiwi upi nherẽ, wa za ĩpese.” Ãne te sima rosa'rata, pi'õ hã. Tahawa, te itẽme mo. I'uza si ma duré ãhã wamhã tiwi upi. Tawamhã i'uza te te tiwi upi wi, awa'awi ma tô séptârâ. Marĩ hã tãma isipari na, ma tô 'râwi sihâiba waihu'u.

³⁰ Awa'awi ma tô duré sina waihu'u, Zezusi hã tiwaihu'u pese na te te ida'maipesezém na. Tahawa, ma aipi'ra, da'ahâ wa'wa. Ãne te tawamhã da'a'mahâ: — E 'wa hã ma ĩ'uza hã ĩwi upi.

³¹ Tawamhã isiré 're inomro mono norĩ hã te asa ãne tãma nharĩ za'ra: — Oro aihĩni ai'ãma wasi'uirĩ mono za, te iwa'azadanha.

³² Tane nherẽ, Zezusi hã te i'upi'wa zô hã te te 're rob'madâ'â.

³³ Tahawa, te itẽme mo, pi'õ hã. Ma tô sihâiba waihu'u, ihâzé te te tãma ipari na. Tahawa, pahi nherẽ, te itẽme mo, rẽrẽ'ẽ sina. Hi'rãtitõ ma aime Zezusihi papara, tãma siwasu'u da. Ma tô tãma siwasu'u pese, pi'õ hã.

³⁴ Tawamhã Zezusi ma tô tãma waihu'u, ãne: — Ĩhidiba, za te aipesezém na, asina ĩ'umnhasi wa, ma tô aihâzé hã aima apa. Rowẽ na si aimorĩ. Ma tô aipe.

³⁵ Tawamhã pi'õi ma, te te rowasu'u ré, ma tô aihutu, Zairuhu nhorõwa hawimhã tãma iromhuri'wa norĩ hã. Ãne te tãma rowasu'u za'ra: — Ai'ra azaruture hã ma tô aiwi dârâ. Simiromhuri ré nherẽ, rowahutu'wai wi, ro'wa'ré õ'umnhasite, te za ãma irosazâ.

^36-37 Tazahã isimirowasu'u za'ra hã te te 'madâ'â õ di, Zezusi hã. Tahawa, te Zairuhu ma tinha, ãne: — Ai'ra wasu'u ma, aipahi tõ. Ĩwétési ĩ'umnhasi, te aipawaptob da. Ni'wa hã isiré morĩ tõ da, ma tô pisutu za'ra, Pedru norĩ hã Tiagu, Zuwã norĩ me si, isiré si'aba'réi da, Zairuhu 'ra u. Tiagu, duré Zuwã, ta norĩ hã tisisãnawã zahuré.

³⁸ Tawamhã Zairuhu nhorõwa u sihutu wamhã, ma tô da'ab'madâ, Zezusi hã. Azarutu ãma te ta'ru'ru ni, dawawai 'rãihâ sina. Tahawa, ro'wa'rutu di 'ri paramhã.

³⁹ Tawamhã te dama tinha, ãne: — E marĩ wa, te ai'ahâ na aiwa'õ za'ra wa'wa. Azaruture hã dâ'â õ di. Taré te nhono.

⁴⁰ Tawamhã asa te tãma nharĩ za'ra, ãne: — Oro taré sõtõ za. Pẽ'ẽzani õ di. Tawamhã Zezusi hã ma tô dama rob'ru, rob u dawairébé da, uburé. Si'ubdatõ isiré 're inomro mono norĩ hã ma tô isiré asisi, 'ri 're wa'wa u, inomrozéb u hã. Ina norĩ si, ma tô isiré tizasi zahuré.

⁴¹ Tawamhã ma tô pa'â, Zezusi hã. Ãne te tãma tinha: — Tarita tumi. Ãne ãma isaprĩzé hã: “Azaruture ai'utu.”

⁴² Tô awa'awi azaruture hã ma udu, 12 na ãma iwahu hã. Para na te oto 're mo. Tawamhã uburé 'ri para isimasam norĩ hã ma ãma titob'uzu za'ra.

⁴³ Tawamhã Zezusi te ina norĩ ma nharĩ zahuré, rowasu'u na te te dama ãma ropé zahuré tõ da. Mram na si, te duré wada'uri zahuré, ti'ra ma, te te a zahuré da hã.