Marcu 4 - ꞌRe Ihâimana Uꞌâsi Mono Zadawa Wasuꞌu

Aibâ hã amnho te te i'anhamra mono zé wasu'u

¹ Tawamhã Zezusi hã te duré dama rowahutu, Galiléa ãma, isõ'u zapoto 'rata. Da'ahâ uptabi na itẽme dasito mono wa, ma uba're wa ãzé, â zada'ré prã na.

² Tawamhã sa'ẽtẽ na ma tô dama rowaihu'u marĩ na, tinhimirowasu'u na te te iromnhimiré'é na. Ãne te dama tinha:

³ — Ma'ãpé ĩwapari pese za'ra wa'aba za. Amnho poto wasu'uzém na hã, wa za ãma aima rowasu'u za'ra wa'wa. Aibâ hã te buru u mo, ti'ai hâibâdâ wa, amnho hã te te anhamra mono da, poto mono da.

⁴ Tawamhã ta hã amnho te te anhamra mono wamhã, nima norĩ hã bâdâdi zababamhã ma tô rere'e. Tawamhã ta hã sire ma te te uprosi uburé, poto mono õ ré.

⁵ Ẽtẽ nhisiwi ma duré nima norĩ hã rere'e. Tawamhã duré ta hã ti'ai baihâire wa, ma tô romnhamare hã 'wanhipré su'u.

⁶ Tawamhã bâdâ hã oto 'rãiwatobro wamhã, rowa'ro wa, ma tô ti'wanhipré 'ré za'ra, isari hã te te rowa'réi mono õ wa sina hã.

⁷ Nima norĩ hã ma duré rere'e, wab'ru wazari. Tawamhã siré ma tô duré ta hã 'wanhipré. Siré 'wanhipré mono wamhã, ma tô te te ubu, wab'ru hã. Tahawa, 'rãi mono õ di, duré ta norĩ hã.

⁸ Ti'ai wẽ wa, ma duré nima norĩ hã rere'e. Tawamhã oto 'wanhipré 'rãihâ mono wamhã, ma tô duré oto ta norĩ hã ti'rã za'ra. 'Rãi mono wamhã, nima niwĩmhã 'rãi pese mono prã ti, rob're hã. Duré nima niwĩp si hã 'rãi pese uptabi mono di.

⁹ Tawamhã ãne ma tô ãma dama 'rãsutu, timreme na: — Asimipari pese za'ra wa'aba wamhã, ma'ãpé ĩwapari pese za'ra wa'aba, ĩnhimirowasu'u na hã waihu'u za'ra wa'aba da.

¹⁰ Tawamhã dazahutu parip si, ni'wam norĩ dame isimasa hã ma tô itẽme sina rotété za'ra dawa'rãmi, aibâ 12 na ihâiba norĩ me. Tawamhã ãne te siwi 'mahâ: — E niha amnho potozém na ãma irowasu'uzé hã.

^11-12 Tahawa, Zezusi asa ma tô ãma sada'âbâ za'ra, ãne: — 'Re ihâimana u'âsi mono hã a norĩ wa'aba ma si, ma tô aima waihu'u za'ra wa'wa, dama iwaihu'u'õ hã, da'ãma 're isib'a'uwẽ mono zém na hã, sõ'awi te te dama waihu'u õ nherẽ. Ĩzazei'õ'wa norĩ ma, wa za ĩnhimiromnhimiré'é na si te tãma ãma 're rowasu'u za'ra. Tawamhã ta norĩ hã titõmo na te te 're rob'madâ'â za'ra mono nherẽ, taré te za te te 're rob'madâ'â za'ra. Duré 're simipari za'ra mono nherẽ, taré te za duré 're simipari za'ra, te te 're waihu'u za'ra mono ãna. Te te 're waihu'u za'ra mono wamhã, te aré tiwasété wi 're sipizari za'ra, 'Re ihâimana u'âsi mono niwĩ, iwasédé hã te te ãma 're ab'madâ'â tõ mono da.

¹³ Tawamhã ma duré tãma waihu'u za'ra, ãne: — A norĩ wa'wa hã waihu'u za'ra wa'aba õ wamhã, amnho potozém na te irowasu'u hã, e niha te za tawamhã ĩnhimirowasu'u amo hã iwaihu'u za'ra wa'wa.

¹⁴ Tawamhã ma duré tãma waihu'u za'ra: — Amnho hã aibâ te te i'anhamra mono hã, 'Re ihâimana u'âsi mono zadawa wasu'u, te wasu'u.

¹⁵ Ni'wam norĩ hã 'Re ihâimana u'âsi mono zadawa wasu'u hã, tipo're na te te 're iwapari za'ra mono hã, aiwa amnho hã bâdâdi zababa irere'e mono ne, te za 're hâimana za'ra. Awa'awi waptu na 'Re ihâimana u'âsi mono zadawa wasu'u te te wapari za'ra wamhã, Satanasi hã te za itẽme tiwisi za'ra, te te apâ tiwi wazere za'ra da, ipo're hawimhã.

¹⁶ Ni'wam norĩ hã aiwa amnho hã ẽtẽ nhisiwi irere'e mono ne, te za 're hâimana za'ra. 'Re ihâimana u'âsi mono zadawa wasu'u hã te te 're wapari za'ra mono wamhã, te za te te 're saze za'ra awa'awi, to sina.

¹⁷ Tane nherẽ, te za te te 're sazei hutu za'ra. Tawamhã ãté robzépada hã duré rowasédé hã te za isazei'õ'wa norĩ hã te te tãma 're 'manharĩ za'ra. Tawamhã 'Re ihâimana u'âsi mono zadawa wasu'u hã aré te te 're isaze za'ra mono zé hã, te za te te 're sazei utõrĩ za'ra za.

¹⁸ Ni'wam norĩ hã aiwa amnho hã wab'ru wazari irere'e mono ne, te 're hâimana za'ra. 'Re ihâimana u'âsi mono zadawa wasu'u hã te za te te 're wapari za'ra, taré.

¹⁹ Ãté marĩ na si te za duré te te 're rosa'rata za'ra. Ãté danhibro pese na si, te za te te sima 're rosa'rata za'ra, iwẽ uptabi newa. Ãté marĩ hã te za te te sima 're wẽ uptabi za'ra. Tawamhã rob're i'rãi õ ne, tãma 're hâimana wẽ za'ra mono õ di za, duré ta norĩ hã.

²⁰ Ni'wam norĩ hã aiwa amnho hã ti'ai wẽ wa irere'e mono ne, te za duré 're hâimana za'ra. Ta norĩ hã 'Re ihâimana u'âsi mono zadawa wasu'u hã te te 're wapari za'ra mono wamhã, te za te te sima 're wẽ pese za'ra. Tawamhã rob're i'rãi pese uptabi ne, te za hâimana wẽ uptabi na duré ta norĩ hã 're hâimana za'ra.

Rob'uiwẽzé wasu'u

²¹ Tawamhã te duré tãma rowasu'u za'ra, ãne: — Rob'uiwẽzé hã 'ri 're wa'wa u, da te âri wamhã, e piza'a na te za upsibi ni. E daza'warizéb 'rowi, te za duré sãrĩ ni. Mare di. Isima'warazém na si te za sõ'awi da te 're sõré, te te dama 're rob'uiwẽ za'ra mono da hã.

^22-23 Tahawa, marĩ hã a'â dama iwaihu'u za'ra õ hã, niwapsi dama waihu'u pese za'ra di za. Aipo're na ma tô ĩnhimiroti hã iwapari za'ra wa'wa. Tahawa, ma'ãpé ãma 're rosa'rata za'ra wa'aba mono, 're waihu'u za'ra wa'aba mono da.

^24-25 — Ni'wam norĩ hã 'Re ihâimana u'âsi mono hã isimirowaihu'u na te te 're 'ruiwapari u'âsi za'ra mono wamhã, taha zarina te za 'Re ihâimana u'âsi mono hã sa'ẽtẽ na tãma ãma 're sõprub za'ra, te te aré 're iwaihu'u za'ra mono zém nhipai u, te te waihu'u pese za'ra da oto. Tane nherẽ, ni'wam norĩ hã isimirowaihu'u na te te 're 'ruiwapari za'ra mono õ wamhã, ta norĩ wi te za tinhimirowaihu hã tãma waihu'u pese za'ra õ nherẽ, te te tiwi 're awaibu 'Re ihâimana u'âsi mono hã, te te aré ãma 're iwaihu'u za'ra mono zé hã.

Amnho potozé wasu'u

²⁶ Tawamhã ma duré tãma waihu'u za'ra, ãne: — 'Re ihâimana u'âsi mono hã da'ãma 're isib'a'uwẽ mono zém na, wa za aima rowasu'u za'ra wa'wa, ãne. Aibâ hã ti'ai wa, te za amnho hã te te anhamra, poto mono da.

²⁷ Tawamhã aibâ hã rĩtĩ ré nherẽ, duré sõtõ ré nherẽ, si'uihâ na te za ti'wanhipré za'ra, amnho hã. Te za duré ti'rãihâ za'ra. E niha te za ti'wanhipré za'ra. E niha te za duré ti'rãihâ za'ra. Aibâ hã te te waihu'u õ di.

²⁸ Ti'ai 'rowim nherẽ, te za si'uihâ na 're 'wanhipré za'ra, 're 'rã za'ra mono da. Te za a'â ti'wanhipré za'ra. Taha parip si, te za 're sitoro wairébé. Taha parip si te za duré oto 're 'rã za'ra.

²⁹ 'Rãi 'ré wapsi, te za oto 'rãihâ, ro'wa na aibâ hã, bâdâ hã oto iwa waptã'ã wa, te te itehârizéb da hã.

Mostada nhama 'rare wasu'u

³⁰ Tawamhã ma duré tãma waihu'u za'ra, ãne: — 'Re ihâimana u'âsi mono, da'ãma 're isib'a'uwẽ mono zé hã, e marĩ na, wa za ãma romnhimiré'é.

³¹ Mostada nhamare na, wa za aima ãma romnhimiré'é za'ra wa'wa, 'Re ihâimana u'âsi mono, da'ãma 're isib'a'uwẽ mono zé hã. Mostada nhamare hã suru uptabire di, aimawi norĩ ma hã.

³² Tazahã da te 're zuri mono wa, 're 'wanhipré za'ra mono wamhã, te za ti'rãihâ za'ra. Uburé aimawi rob're nhipai'u. Papo za'ẽtẽ wamhã, isu 'rowi te za si norĩ hã te te sima 're sasi za'ra. Ãne wa aima ãma romnhimiré'é za'ra wa'wa.

³³ Ãne ma tô Zezusi hã tinhimirowasu'u ahâ na te te ãma 're romnhimiré'é, marĩ hã da te ãma 're iwaihu'u za'ra mono zéb da hã.

³⁴ Tinhimiromnhimiré'é na si, ma tô te te dama 're rowasu'u. Tisiré 're inomro mono norĩ ma si, ma tô hâiba pisutu za'ra, te te tãma 're awaihu'u pese, sõ'awi.

Zezusi hã rowa'u'u ma, te te inharĩzé wasu'u

³⁵ Tawamhã Zezusi hã bara na ma tô satõrĩ za'ra, tisiré 're inomro mono norĩ hã: — Oto zara u, wa te saprĩ za'ra wa'aba.

³⁶ Tawamhã te a'â dazatõrĩ za'ra, apâ dasi'aba'ré da. Taha pari, Zezusi hã uba're 're isébrézéb 're, ma asisi isarina, zara u te te saprĩ za'ra da. Ni'wam norĩ hã te duré siré sari za'ra uba're hã, Zezusihi zarina.

³⁷ Tawamhã rowa'u hã ma tô watobro, sa'ẽtẽ na. Tawamhã âsisasi hã sa'ẽtẽ wamhã, ma tô nasi asisi, uba're wa. Â hã te te i'masisizéb u hã romhuture di oto.

³⁸ Tane nherẽ, te Zezusi hã nhono, uba're na're ãma. Da'rã zaparizém na te 'rã zapa. Tahawa, ma tô siwi utu. Ãne te oto siwi 'mahâ: — Rowahutu'wa, wa za ai'utõrĩ ni. E wa'ãma aipẽ'ẽzé za'ra õ di za.

³⁹ Tawamhã ma tô wahudu. Wahutu wamhã, rowa'u'u ma, te tinha, wa'u'utu da. Duré âsisasisi ma zama, te tinha, ãne: — Ma'ãpé ai'âtu na. Tawamhã ma tô sazâ, rowa'u hã. Ma tô duré ti'âtu oto.

⁴⁰ Tawamhã Zezusi hã te ãne tãma nharĩ za'ra: — E marĩ da, ma aipahi za'ra wa'wa. E niha zahadu asiwi 're ĩ'umnhasi za'ra wa'aba mono zé hã aima 're hâimana za'ra wa'aba mono õ di.

⁴¹ Tawamhã te sima rowasu'u za'ra, ãne: — Pra, e niha õ hã iwaihu'u pe. Isadawa hawi ma rowa'u hã, duré âsisasisi zama hã sazâ. Õne hã tãma sa'rese za'ra õ wa, ma tô tãma tipahi pese za'ra.