Marcu 3 - ꞌRe Ihâimana Uꞌâsi Mono Zadawa Wasuꞌu

Aibâ isimizu prã hã, romhuri zahârizém na Zezusi te te ipesezé wasu'u

¹ Tawamhã zudeu norĩ te, rowahutuzéb u, ma duré ãzé Zezusi hã. Tame te aibâ hã dame nhamra, isimizu'rã're hã.

² Tame te ni'wam norĩ hã Zezusi hã siwi 'madâ, zudeu norĩ te, romhuri zahârizém na, aibâ hã te te pese zô. E marĩ wa. Sabadu na te te pese wa, te te siwi wẽ'õ da, romhuri zahârizém na roti, te te i'madâ'â õ para.

³ Tawamhã Zezusi hã te aibâ 'mahâ, ãne: — We aimorĩ ãwa.

⁴ Te duré da'ab'mahâ, ãne: — E niha romhuri zahârizém na roti hã. E marĩ, wa za wa te dama 're 'manharĩ za'ra, romhuri zahârizém na, sabadu na hã. E iwẽ na, wa za wa te 're dapawaptob za'ra. E iwasété si, wa za wa te dama 're 'manharĩ za'ra. E romhuri zahârizém na, wa za wa te 're danho'reptu za'ra. E bâtâ na, wa te 're danho'reptu za'ra mono ãna, wa za taré wa te 're da'madâ'â za'ra. Tawamhã ni'wa hã asa te te ãma sada'âbâ õ di, Zezusi te te ãma isadanharĩ za'ra zém na hã.

⁵ Tawamhã Zezusi te da'ab'madâ. Te te ãma irosa'rata norĩ ãma hã, toi õ di. Simirosa'rata wasété nhiptete za'ra wa, ta norĩ ãma pẽ'ẽzé za'ra di. Tawamhã isimizu'rã're ma, te tãma tinha, ãne: — Ma'ãpé, asimizu wahutu. Tawamhã ma tô tinhimizu hã wahutu, aibâ hã. Tahawa, ma tô tinhimizu pese.

⁶ Te te pese pari, ma awa'awi wairé, farizeu norĩ hã. Tawamhã Erodihi niwĩ 're ihâimana za'ra mono norĩ me, ma tô sima ãma roti za'ra, Zezusi te te sima hâiba za'ré za'ra da hã.

Zezusi hã te te ida'apesezé wasu'u

^7-8 Tawamhã Zezusi norĩ hã te ai'aba'ré, Galiléa na isõ'u nhisi u. Da'ahâ uptabi na te isarina hã ai'aba'ré ni, Galiléa hawimhã, duré Zudéa hawib zama, duré Zeruzalẽ hawimhã, duré Idumeza hawimhã, duré Zodã pa zara hawimhã, duré Tiru hawimhã, duré Sidõ hawimhã. Zezusihi wasu'u hã ma tô wapari za'ra ni aré, te te 're ida'apawapto mono zé wasu'u na hã. Tahawa, ma tô itẽme dasito, daro mono bâ.

^9-10 Uburé ihâzé ré norĩ hã te itẽme 're sisãmra, te te siwi upi da, tinhib'rata na. Tahawa, tisiré 're inomro mono norĩ ma, te 'ru za'ra, uba're hã te te 'ma'âri za'ra da dawi, iwap sébré da, da te dasiwi hâiba wati tõ da, dasina hã.

¹¹ Wa'uburé te te 're ida'awamnarĩ mono norĩ hã, Zezusi te te 're 'madâ'â za'ra mono wamhã, hi'rãtitõ te ipapara tãma 're sina. Te duré siwi te te 're 'mahârâ, ãne sa'ẽtẽ: — A hã 'Re ihâimana u'âsi mono 'ra.

¹² Tahawa, wa'uburé norĩ hã 'Re ihâimana u'âsi mono 'ra na te te dama sisi tõ za'ra da, te sina sadawa uwati za'ra, Zezusi hã.

Aibâ 12 na ihâiba za'ra hã, Zezusi te te ipisutu za'ra zé wasu'u

¹³ Tawamhã ẽtẽ 'rãihâ na, ma tô sai'u Zezusi hã. Tame te te sima iwẽzéb uwaibaba, te sitẽme sô tihârâ za'ra, aibâ norĩ zô. Sitẽme sô hârâ za'ra wa, ma tô itẽme aihutu 'râwi.

¹⁴ Tawamhã 12 na ihâiba za'ra hã ma tô pisutu za'ra, isiré a'â 're hâimana za'ra mono da, nimahã na te te datẽme satõrĩ za'ra da, za te te 're ida'anho'reptui mono zé wasu'u na, isõwa te te 're dapo're pu'u za'ra mono da, isadawa para. Tizadawa wasu'u'wa na ma tô ãhã wamhã oto sisi za'ra.

¹⁵ Ma tô duré pisutu za'ra, iwaihu'u pese zarina, wa'uburé norĩ te te dama 're sãmra za'ra mono da hã.

^16-17 Aibâ norĩ hã, 12 na ihâiba hã ãne isisi za'ra hã: Sima hã Pedru na, ma tô sisi té, Zezusi hã. Isiré norĩ hã ãne isisi za'ra hã: Tiagu, Zuwãhã me, Zebedehe 'ra norĩ hã. Bu'anezi na, ma tô sisi téb zahuré, Tiagu norĩ hã Zezusi hã. Bu'anezi na, isisi hã, tãirãrã te wasu'u, isisi té hã.

^18-19 Duré isiré norĩ hã ãne isisi za'ra hã: Ãdré, duré Filipi, duré Batolomeu, duré Mateu, duré Tome, duré Tiagu, Afeuhu 'ra hã, duré Tadeu, duré Sima, Zeroti norĩ niwĩ aré 're ihâimana mono hã, duré Zuda Icarioti, si'uihâ na Zezusihi hâiba nhomri'wa da hã dama. Ãne isisi za'ra hã.

Bezebuhu wasu'u

²⁰ Tawamhã Zezusi hã 'ri tẽme oto morĩ wamhã, da'ahâ na ma duré itẽme dasito. Itẽme dasito mono wa, Zezusi norĩ hã saihuri waihu'u õ di.

²¹ Tawamhã Zezusihi wasu'u te te wapari za'ra wa, ma tô sô ai'aba'ré, 'ri 're, siré 're ihâimana za'ra mono norĩ hã. Ma tô ni'wam norĩ hã i'rã siwamnarĩ na Zezusihi ãma romnomri za'ra. Taha wab zama, te sô ai'aba'ré, Zezusihi zô, ta norĩ hã.

²² 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ hã, Zeruzalẽ hawi datẽme isihutu norĩ hã, ãne te taré sima rowasu'u za'ra, Zezusihi hâiba na: — Õ hã Bezebuhu zadawa para te 're mo, wa'uburé norĩ nhib'apito zadawa para. Bezebu hã romhõsi na te te 're pawapto, wa'uburé te te dama 're anhamra mono da.

^23-26 Tawamhã Zezusi te sima sô tihârâ za'ra, rowahutu'wa norĩ zô, marĩ hã te te tãma waihu'u za'ra da, romnhimiré'é na. Tawamhã itẽme simasa wamhã, ãne te tãma nharĩ za'ra: — E niha te za Satanasi hã tinhib'a'uwẽ norĩ hã te te dama 're sãmra. Te te dama 're isãmra mono da hã, mare di. Ãne wa za aima ãma romnhimiré'é za'ra wa'wa, waihu'u za'ra wa'aba da. Danhib'apito nhib'a'uwẽ norĩ hã 'râwim nherẽ, oto sisada 're simasa mono wamhã, te aré 're si'uprosi. Duré dasisãnawã nherẽ, dasisada 're dasimasa mono wamhã, te aré 're dasi'uprosi, 'râwim nherẽ. Tane duré Satanasihi nhib'a'uwẽ norĩ hã 'râwi sisada 're simasa mono wamhã, te aré 're si'uprosi. Tâibâ aré isib'a'uwẽ norĩ hã. Tahawa, Satanasi hã tinhib'a'uwẽ norĩ hã te te dama 're isãmra mono da hã, mare di.

²⁷ — Ãne wa za duré aima rowasu'u za'ra wa'wa, marĩ hã ãma waihu'u za'ra wa'aba da. Ni'wa hã aibâ isiptete nhorõwa u, sébré wamhã, isibro hã te te tiwi ubumro da, te te tiwi ubumroi waihu'u õ di za, te te sima pawasisi õ ré hã. Te za a'â sima pawasisi. Taha parip si, te za isibro hã tiwi ubumro, 'ri para sa 're iromnhimi'wara mono hã. — Ãne te tãma rowasu'u za'ra, Zezusi hã.

²⁸ — Ma'ãpé, ĩwapari pese za'ra wa'aba za. Dawasédé hã da te 're 'manharĩ za'ra mono nherẽ, duré 'Re ihâimana u'âsi mono ãma, da te ãma 're wasété za'ra mono nherẽ, dawasété na tãma 're dasiwasu'u za'ra mono wamhã, dawasédé hã tãma waihu'u pese di, te te dama 're i'apari mono zéb da hã, te te oto da'ãma 're ab'madâ'â tõ mono da.

^29-30 Tane nherẽ, Ipẽ'ẽzani hã wẽ nherẽ, isimiromhuri na da te 're wẽ'õ pese za'ra mono wamhã, taha na dawasédé hã te te dama 're apari mono õ di za. Te za te te da'ãma 're ab'madâ'â u'âsi, 'Re ihâimana u'âsi mono hã. Ãne Zezusi ma tô tãma waihu'u za'ra, rowahutu'wa norĩ ma, taré te te sima rowasu'u za'ra wa, wa'uburé zadawa para, 're imorĩ na. Ãne wẽ'õ te, ma tô ãne tãma waihu'u za'ra, te te waihu'u za'ra da hã.

Zezusihi na wasu'u, isisãnawã norĩ wasu'u me

³¹ Tawamhã Zezusihi no norĩ hã ma tô itẽme aihutu, tina me. Rowi simasab ré, ma da'maipo're pu'u za'ra, Zezusihi zô da'maihârâ da, itẽme watobro za'ra da.

³² Da'ahâ na te i'rata asimro ni. Tawamhã ni'wam norĩ hã te tãma rowasu'u za'ra, ãne: — Ano norĩ hã te rowi asô aimasa, ana me. Te asô tihârâ za'ra.

³³ Tawamhã tãma irowasu'u'wa norĩ ma, ma tô waihu'u za'ra, ãne: — E 'wa hã ĩna. E 'wam norĩ hã ĩno norĩ.

³⁴ Tawamhã siwi i'uirĩ'wa norĩ 'madâ'â sina, te ãne tinha: — Ãhãta ĩna. Ãhãta ĩno norĩ. Ãhãta ĩhidiba norĩ.

³⁵ Ni'wam norĩ hã 'Re ihâimana u'âsi mono te te sima 're iwẽ za'ra mono zéb zarina, te te tãma ãma 're i'uwaimrami za'ra mono norĩ hã, ta norĩ hã ĩno, duré ta norĩ hã ĩhidiba, duré ta norĩ hã ĩna.