Galata 2 - ꞌRe Ihâimana Uꞌâsi Mono Zadawa Wasuꞌu

Tiagu norĩ u, Paulu norĩ isihutuzé wasu'u

¹ Tawamhã 14 na ĩ'ãma wahu pari, wa tô apâ mo, Zeruzalẽ u. Tawamhã tamomo ĩmorĩ wamhã, ma tô Banabé hã ĩsiré mo. Taha wamhã, Titu hã wa duré ĩsiré saprõ.

² 'Re ihâimana u'âsi mono hã za apâ ĩmorĩzém na, te te ĩma waihu'u siromo wa, wa tô apâ hã mo. Tawamhã 'ri nho'õmo u wasihutu wamhã, aibâ dama ipire na 're ihâimana za'ra mono norĩ me, wa tô wahâiba pisutu wasi'rã'õtõ ni. Tahawa, wa tô ta norĩ ma ĩsiwaihu'u, zudeu'õ norĩ ma, Wanhib'apito wasu'uwẽ hã te tãma 're iwaihu'u za'ra mono zém na. Te te ãma ĩzaze za'ra zô, wa tô ĩnhimiromhurizém na tãma ĩsiwasu'u za'ra, te te ãma ĩzaze za'ra õ wamhã, taré 're hâimana mono tõ da, ĩnhimiromhurizé hã.

³ Tawamhã ma tô ta norĩ hã ãma ĩzaze za'ra, zudeu'õ norĩ ma, te tãma 're irowasu'u za'ra mono zém na. Tahawa, te te siwi pisutu za'ra õ di, Titu hã ĩsiré 're imorĩ hã, sizudeu da. Titu hã gregu na ipodo, zudeu'õ. Ãne nherẽ, te te siwi pisutu õ di, sihâiwata nhizâri ré 're imorĩ da hã, sizudeu da.

⁴ Ni'wam norĩ si, zudeu norĩ hã ma tô i'upana sima wẽ za'ra, Titu hã sihâiwata nhizâri ré 're imorĩ da hã. Ta norĩ hã wasiré Wanhib'apito zazei uptabi 'wa 're nomro mono newa, ma tô hâimana nhipese sina wasiré 're si'rã'õtõ, dama wapsãi'a'wa ne wahâimanazé ma, te te 're ropibu za'ra mono da, rowẽ na 're iwahâimana za'ra mono zéb zô, Cristu Zezusihi ãma. Ta norĩ hã zudeu norĩ hã, ma tô sima wawẽ za'ra, isine 'Re ihâimana u'âsi mono nhimiroti 'rata na rob'ui'éré zarina, wa te 're rob'manharĩ u'âsi za'ra mono da, taha zarina wanho'reptuzé hã wa te wasina 're uwaimrami za'ra mono da newa.

⁵ Tane nherẽ, ta norĩ nhimirosa'rata na hã, wa te ãma saze za'ra õ di. Mare uptabi di. Wa tô wasima wẽ za'ra ni, Zezu Cristuhu wasu'uwẽ uptabi si, aima 're hâimana za'ra wa'aba mono da. Tahawa, ta norĩ nhimirosa'rata na hã wa te ãma saze za'ra õ di.

⁶ Dama ipire za'ra norĩ ma, ĩnhimiromhurizém na tãma ĩsiwaihu'u za'ra parimhã, marĩ asa te te ĩma waihu'u za'ra õ di, imreme za'ra nhipai u, zudeu'õ norĩ ma, te tãma 're irowasu'u za'ra mono zéb da na hã. Ta norĩ hã pire na dama 're hâimana za'ra mono nherẽ, ipire na te ãma 're rosa'rata za'ra mono õ di, wa hã. E marĩ wa. 'Re ihâimana u'âsi mono hã dapire na te te da'ãma 're rosa'rata mono õ wa, tãma hã taré wa.

⁷ Ãne si ma tô aibâ norĩ hã siwi ĩwaihu'u za'ra, 'Re ihâimana u'âsi mono tô sena te te ĩpisutu na, zudeu'õ norĩ ma, Wanhib'apito wasu'uwẽ hã te tãma 're wasu'u za'ra mono da, Pedru hã te te ipisutu ne, tisiré zudeu norĩ ma, te te 're rowasu'u mono da.

⁸ 'Re ihâimana u'âsi mono hã ma tô Pedru hã te te 're pawapto tiwaihu'u pese na, tisiré zudeu norĩ ma, Cristu hã te te tãma 're iwasu'u za'ra mono zéb da hã, ta norĩ u si te te satõrĩ wa. Tane duré wa hã tiwaihu'u pese na ma tô te te 're ĩpawapto, zudeu'õ norĩ ma, Cristu te tãma 're iwasu'u za'ra mono zéb da hã, ta norĩ u si te te ĩzatõrĩ na dâ'âsina, wa hã.

⁹ Tahawa, ma tô oto Tiagu norĩ hã ĩ'ãma waihu'u za'ra, tãma ĩzawi pese wa, 'Re ihâimana u'âsi mono te te sima ĩpisutuzém na hã. Õ norĩ hã isimiroti pire na ma tô Wanhib'apito zazei'wa norĩ hã ãma waihu'u za'ra, Tiagu hã, Pedru hã, duré Zuwã. Tawamhã ta norĩ hã 'Re ihâimana u'âsi mono te te ĩpisutuzém na te te ĩ'ãma waihu'u za'ra wa, ma tô tinhib'rata na siwi wazawi za'ra, Banabéhé me. Wama wẽ za'ra di, wa norĩ hã zudeu'õ norĩ u si 're waneb da, Cristuhu wasu'uwẽ na, wa te tãma 're romhuri za'ra mono da. Duré wama wẽ za'ra di, Tiagu norĩ si, tisiré zudeu norĩ u si 're inomro mono da hã, Pedru norĩ me. Ãne na wa tô wanhimirosa'rata na wasisaze za'ra ni.

¹⁰ Ãne si ma tô wama waihu'u za'ra, Tiagu norĩ hã, Wanhib'apito zazei'wa norĩ isimarĩ'õ norĩ hã wanhimarĩ na wa te 're pawaptob u'âsi za'ra mono da, 're wapo're simrami za'ra mono ãna. Ãne zô, wa ĩsima te 're rosa'rata u'âsi, iwẽ na si te 're da'apawapto mono da.

Paulu hã Pedruhu ma te te irowaihu'uzé

^11-12 Tawamhã Ãtioquia ãma ĩnhamra ré, ma tô Pedru hã ãma ĩzarina wi. Tawamhã zudeu'õ norĩ ãma tinhimirosa'rata na te te upai wa, wa tô danho'a tãma rowaihu'u. Ãne tinhimirosa'rata na te te i'upazé hã. Ãtioquia u wisi wamhã, ma tô aré zudeu'õ norĩ me 're sa, Wanhib'apito zazei'wa norĩ me hã. Tawamhã isarina si ma duré aibâ norĩ hã aihutu, Tiaguhu hawimhã. Ta norĩ hã ma tô te te sima 're wẽ za'ra, Wanhib'apito zazei'wa norĩ zudeu'õ hã, sihâiwata nhihâri ré si 're nomro mono da, tawapsi sizudeu za'ra na 're hâimana za'ra mono da. Tawamhã zudeu'õ norĩ hã, Wanhib'apito zazei'wa oto wasiré 're wahâimana za'ra mono nherẽ, ma tô Pedru hã tiwi sisawi za'ra, oto dasiré 're sa tõ mono da. E marĩ wa. Zudeu'õ norĩ siré 're sai u'âsi mono wa, te te siwi wẽ'õ za'ra õ'umnhasite, we isihutu norĩ hã.

¹³ Tawamhã Pedruhu ne dazadamnhasi te, te oto isiré zudeu norĩ hã tiwi sisawi za'ra, zudeu'õ norĩ wi, Wanhib'apito zazei'wa oto wasiré 're wahâimana za'ra mono nherẽ. Banabéhé zama ma tô dazadamnhasi te, tiwi sisawi za'ra.

¹⁴ Ãne na ma tô Pedru norĩ hã tinhimirosa'rata na upa za'ra, zudeu'õ norĩ ãma hã. Tô sena Cristuhu wasu'uwẽ zarina si oto dama 're hâimana za'ra mono õ di, Pedru norĩ hã. Ãne wa tô ãma waihu'u za'ra. Tahawa, wa tô Pedruhu ma tinha, uburé Wanhib'apito zazei'wa norĩ nho'a, ãne: “A hã zudeu nherẽ, ma tô zudeu'õ norĩ siré 're asai mo aré, a hã zudeu'õ 're aihâimana mono newa. E niha ma tô bété oto tiwi asisawi za'ra, zudeu'õ norĩ wi, a'â sizudeu za'ra da, isazei'wa norĩ hã.” Ãne wa tô tãma tinha.

¹⁵ Wa norĩ hã zudeu na wa tô wapoto ni. Zudeu'õ na wapoto õ di, siwa'ru 're inomro mono norĩ ne.

¹⁶ Wa norĩ hã wa tô oto marĩ hã waihu'u ni, 'Re ihâimana u'âsi mono te te 're ida'awẽsãmri mono zém na hã. Zezu Cristu, Danho'reptui'wa na da te dasina 're umnhasi za'ra mono wamhã, 'Re ihâimana u'âsi mono, dawasédé hã te te da'ãma 're i'ab'madâ'â mono õ zéb zarina, te oto te te 're da'awẽsãmri. Taha zarina, dawasété 'ru te, te te dahâ za'ra õ di za, rob'rãsutuzéb ãma hã. Isimiroti na Mozési te te irob'ui'éré 'rata zarina, da te 're rob'manharĩ za'ra mono nherẽ, taha zarina te te dama 're apari mono õ di za, dawasédé hã. Ãne na wa tô oto waihu'u ni, wa norĩ hã.

¹⁷ Tahawa, Cristu Zezusi hã wa tô wasina umnhasi za'ra ni, taha zarina si wawasédé hã te te oto wa'ãma 're ab'madâ'â tõ mono da, tawapsi te te 're wa'awẽsãmri mono da, 'Re ihâimana u'âsi mono hã. Isimiroti na rob'ui'éré zarina, da te 're rob'manharĩ za'ra mono nherẽ, taha zarina te te dama 're awaihu'u mono õ di za, dawasédé te te da'ãma 're i'ab'madâ'â mono õ na. Tahawa, wa norĩ hã 'Re ihâimana u'âsi mono nhimiroti 'rata na rob'ui'éré zarina, wa te 're irob'manharĩ mono zém na wa te 're 'madâ'â mono õ di oto, taha zarina wawasédé hã te te wa'ãma 're i'ab'madâ'â mono õ zéb zarina, te te 're wa'awẽsãmri mono da, 'Re ihâimana u'âsi mono hã. Wa norĩ hã Cristu, Danho'reptui'wa na wa tô wasina saze ni, taha zarina si wawasédé hã te te wa'ãma 're ab'madâ'â tõ mono da, tawapsi oto duré te te wawẽsãmri mono da, 'Re ihâimana u'âsi mono hã. Isimiroti na rob'ui'éré 'rata zarina wa te 're irob'manharĩ mono zém na, wa te 're 'madâ'â mono õ di oto, taha zarina, te te wanho'reptu dai õ wa. Ãne wa, ma tô ni'wam norĩ hã wama nharĩ za'ra, zudeu norĩ hã, wanhimirosa'rata na wa te ãma upa newa, aimawi na. E tô i'uwaibaba ãne hã. Mare di. Cristu te te wama iwaihu'uzéb zarina, wanhimirosa'rata na wa te ãma upai 'wa'âhã, te aré Cristu hã wanhowa ãma upa na'rata, te te wama iwaihu'uzém na hã. E tô sena, ma tô Cristu hã wanhowa ãma upa na'rata. Mare di. Te te ãma upai waihu'u õ di. Mare uptabi di.

¹⁸ Wa hã wa oto te dama 're awaihu'u u'âsi, 'Re ihâimana u'âsi mono nhimiroti 'rata na rob'ui'éré zarina, da te 're rob'manharĩ za'ra mono nherẽ, taha zarina, 'Re ihâimana u'âsi mono za te te 're ida'anho'reptui mono õ na. Tawamhã nimahã na ĩnhimirosa'rata na te saprĩ wamhã, wa za tô tãma ãma upa. Tawapsi ĩwẽ'õre di za.

^19-20 Ãne te aré ĩnhimirosa'rata 'rada hã ĩma 're hâimana: 'Re ihâimana u'âsi mono nhimiroti 'rata na rob'ui'éré zarina te 're rob'manharĩ mono wamhã, taha zarina si ĩwasédé hã te te ĩ'ãma 're 'madâ'â mono õ di za. Tawapsi te za oto te te 're ĩwẽsãmri. Taha zarina ĩwasété 'ru te, rob'rãsutuzéb ãma te te ĩ'azâri õ di za, 'Re ihâimana u'âsi mono hã. Ãhã na ĩnhimirosa'rata 'rada hã te oto ĩza'u 're simi'wara. Ta hã wa tô oto rẽme pese ĩsipara, 'Re ihâimana u'âsi mono te te ĩma iwaihu'uzéb uwaibaba si 're ĩmorĩ da. Zezu Cristu, wedepo'o nhonhi'rãmi na dâ'â wa, isiré ĩdâ'â ne, ĩsi'uihâ na te ĩsima 're irosa'rata mono zém na 're ĩhâimana mono õ di oto, Cristuhu si oto ĩpẽ'ẽ 're, 're hâimana mono wa, 're ĩwada'uri wẽ mono 'wa da hã. Cristu hã, 'Re ihâimana u'âsi mono 'ra. Ta hã te te 're ĩzawi pese mono wa, ma tô ĩzada sisõ, ĩzada dâ'â da. Tahawa, 'Re ihâimana u'âsi mono 'ra umnhasi sina, wa oto 're ĩhâimana.

²¹ Wa hã te ĩsiwi 're wẽ'õ mono õ di oto, 'Re ihâimana u'âsi mono te te 're ĩzawi pese mono zé hã, Cristu te te ĩwa'âbâzém na dazada idâ'âzém na hã. Tahawa, ĩsi'uihâ na ĩsisõ'reptu dai õ wa, 'Re ihâimana u'âsi mono nhimiroti 'rata na rob'ui'éré zarina te 're irob'manharĩ mono zém na, te 're ab'madâ'â mono õ di oto, taha zarina, ĩwasédé hã te te ĩ'ãma 're ab'madâ'â tõ mono da, te te 're ĩwẽsãmri mono da oto, 'Re ihâimana u'âsi mono hã. Dasi'uihâ na dasisõ'reptu dai õ wa, 'Re ihâimana u'âsi mono nhimiroti 'rata na rob'ui'éré zarina, da te 're rob'manharĩ za'ra mono nherẽ, taha zarina te te dama 're apari mono õ di dawasédé hã, da te 're i'manharĩ za'ra mono zé hã. Ãne 'wa'âhã, aré marĩ dai õ di, Zezu Cristu dazada idâ'âzé hã. Tahawa, te oto ĩsiwi 're wẽ'õ mono õ di, 'Re ihâimana u'âsi mono te te 're ĩzawi pese mono zé hã, Cristu te te ĩwa'âbâzém na, dazada idâ'âzém na hã. Mare uptabi di. Ãne Pedruhu ma, te tãma ãma irowaihu'uzé mono hã.