Galata 1 - ꞌRe Ihâimana Uꞌâsi Mono Zadawa Wasuꞌu

^1-2 Wanhib'apito nhib'a'uwẽ norĩ, daza'rui mono bâ Galasia na danhipti'a nho'õmo nhisi 'remhã 're aihâimana za'ra wa'aba mono norĩ, wa hã Paulu, wa ãma asawi za'ra wa'wa. Uburé wasiré isazei'wa norĩ hã te duré timreme na ãma asawi za'ra wa'wa, ĩ'rata isi'ubumro norĩ hã. Ãne wa za ãma aima rob'ui'éré za'ra wa'wa. Wa hã Zezu Cristuhu zadawa wasu'u'wa, wa 're mo, isadawa para. Ni'wam norĩ hã te te siwi ĩpisutu õ di, isadawa wasu'u'wa na 're ĩhâimana mono da hã. Ãne da hã da te dasiwi ĩpisutu õ uptabi di. Zezu Cristuhu si ma tô Wamama me si sima ĩpisutu zahuré, ab're hawi ti'ra te te ihâiwa'utu me si.

³ Wamama 'Re ihâimana u'âsi mono ma, wa ai'ãma 're ĩmreme u'âsi za'ra wa'wa, duré Wanhib'apito Zezu Cristuhu ma zama, isimizawizé hã ai'ãma 're hâimana u'âsi za'ra wa'aba mono da, rowẽ u'âsi, ãma 're anomro aba mono da.

⁴ Wanhib'apito 'Re ihâimana u'âsi mono te te tãma iwẽzéb uwaibaba, ma tô Zezu Cristu hã wazada sisõ, wazada dâ'â da, te te wa'awa'âbâ da, 're wanomro wasété mono wa, 'Re ihâimana u'âsi mono te te wahâ za'ra tõ da, rob'rãsutuzéb ãma hã, duré dapo're'õ na 're idanomro mono norĩ ne, 're wanomro u'âsi tõ mono da.

⁵ Wamama si wẽ uptabi wa, ãma 're wawata u'âsi za'ra wa'aba mono.

Aimawi rowasu'u hã Wanhib'apito wasu'uwẽ ne, aiwa 're i'maihâimana mono õ na rowasu'u

⁶ Ãhã na wa ai'ãma ĩtob'uzu za'ra wa'wa. E marĩ wa. Tãma asawi uptabi za'ra wa'aba wa, ma tô Cristu hã asõ'reptu za'ra wa'wa. Taha zarina, 'Re ihâimana u'âsi mono hã ma tô sima aipisutu za'ra wa'wa, isib'a'uwẽ si oto 're anomro aba mono da. Tane nherẽ, ma tô aiwara sina, 'Re ihâimana u'âsi mono wi 're aipizari za'ra wa'aba mo, asimirosa'rata na, aimawi rowasu'u hã Cristuhu wasu'uwẽ me aiwam newa.

⁷ Aimawi rowasu'u hã Cristuhu wasu'uwẽ me, aiwa 're hâimana mono õ di. Mare uptabi di. E marĩ wa, wa tô ãne aima waihu'u za'ra wa'wa. Ni'wam norĩ hã ma tô sima te te 're wẽ za'ra, Cristuhu wasu'uwẽ upana te te ãma saprĩ za'ra da, aimawi rowasu'u u. Ta norĩ hã ma tô aimawi tinhimirowasu'u na aiwi ãma ro'wa'rutu za'ra wa'wa.

⁸ Wa norĩ hã wa tô aima rowasu'u za'ra wa'aba ni, Zezu Cristuhu wasu'uwẽ na. Tane nherẽ, nimahã na Cristuhu wasu'uwẽ upana, wa te dama 're rowasu'u za'ra mono wamhã, te za 'Re ihâimana u'âsi mono hã te te 're wa'awẽ'õ pese. Tane duré nimahã na hâiwa ãma tãma iromhuri'wa norĩ hã iwasu'uwẽ upana, we te te dama 're rowasu'u za'ra mono wamhã, te za duré te te siwi 're awẽ'õ pese.

⁹ Ãne hã wa tô aima waihu'u za'ra wa'aba ni. Tahawa, wa za duré aima ãma sahu za'ra wa'wa, wa te aima iwaihu'u za'ra wa'aba zém na. Ni'wam norĩ hã wanhimirowasu'u zarina si, Zezu Cristuhu wasu'uwẽ na te te dama 're rowasu'u za'ra mono õ wamhã, te za 'Re ihâimana u'âsi mono hã te te siwi 're awẽ'õ pese.

¹⁰ E ĩnhimiroti na ĩ'ãma 're idawata za'ra mono zéb zô, wa ĩsina 're ĩnhimipari. Mare di. 'Re ihâimana u'âsi mono si ĩ'ãma 're iwata mono zéb zô si, wa ĩsina 're ĩnhimipari. Ti'ai ãma ĩ'ãma 're dawata za'ra mono da, 'râwi ĩsi'uihâ na te ĩsina 're rosa'rata mono 'wa'âhã, Zezu Cristuhu ma romhuri'wa, 're ĩhâimana mono õ di aré.

¹¹ Ĩsisãnawã norĩ, ma'ãpé niha we ĩ'ãma waihu'u za'ra wa'aba. Ti'ai ãma 're idahâimana za'ra mono norĩ nhimirowasu'u zarinai õ di, Zezu Cristuhu wasu'uwẽ te dama 're iwasu'u mono hã.

¹² Ni'wa ãne na hã te te ãma 're ĩpo're pu'u mono õ di, ti'ai ãma wasiré 're iwahâimana za'ra mono norĩ hã. Ni'wa hã te te duré ĩma 're rowasu'u mono õ di, te iwaihu'u pese zéb da hã. Mare di. Si'uihâ na ma we hâiwa hawi ĩma siwaihu'u Zezu Cristu hã, iwasu'uwẽ na te iwaihu'u pese zéb da hã.

Paulu hã Wanhib'apito zadawa wasu'u'wa na te te isãna'ratazém na isiwasu'uzé wasu'u

^13-14 Wa hã wasiré zudeu norĩ nhimizazezéb zarina 're ĩmorĩ ré, wa tô ĩsima wẽ upta, wasiré iwaprédu mono norĩ nhipai u, wahi'rata norĩ nhimiroti zarina si, 're ĩmorĩ da. Ãne 're ĩmorĩ ré, 'Re ihâimana u'âsi mono nhib'a'uwẽ norĩ ma, ĩwasété na wa tô te 're arob'manharĩ aré, Wanhib'apito zazei'wa norĩ ma hã. Wa tô te ĩsima 're awẽ, te 're uprosi mono da. Ãne ma tô ĩwasu'u wasédé hã 're iwapari za'ra wa'aba mo.

^15-16 Tawamhã bâdâ ma tô oto iwa waptãrã, 'Re ihâimana u'âsi mono ti'ra te te ĩma iwaihu'uzém na, i'ra wasu'uwẽ na si, zudeu'õ norĩ ma, te 're wasu'u mono da. Taha da, ĩpoto õ ré, ma tô sima ĩpisutu siro, 'Re ihâimana u'âsi mono hã. Tahawa, tãma ĩzawi uptabi wa, ma tô oto ĩzô hâ, tãma iromhuri'wa na oto 're ĩhâimana mono da. Tawamhã e 'wa hã wa tô sadawa pibu, ãne zarina te dama 're isadawa wasu'u mono da hã. Mare di. Ni'wa hã ãne na te sadawa pibui õ uptabi di wa hã.

¹⁷ Duré Zeruzalẽ u, a'â ĩmorĩ õ di, Cristu hã tizadawa wasu'u'wa da, ĩwana te te sima ipisutu za'ra norĩ u, te sabu za'ra da. Mare di. Daza'rui amoi u si, wa tô a'â mo, Arabia u. Tame ĩnhamra pari, wa tô apâ mo, Damascu na 'ri nho'õmo nhisi u.

¹⁸ Si'ubdatõ ma tô oto ĩ'ãma tiwahu, Wanhib'apito ãma te isasõmrizém na hã. Tawamhã Zeruzalẽ u wa tô oto mo, Pedru hã te hâiba pibu da. Tame ma tô romhuri hã maparane ĩ'ãma ai'utõ, i'rata ĩnhamra ré.

¹⁹ Ãhã wamhã, Pedruhu siré norĩ hã aihĩni te sõpẽtẽ za'ra õ di, Cristuhu zadawa wasu'u'wa norĩ hã. Tiaguhu si, wa tô tawamhã sõpẽtẽ. Wanhib'apito sisémemhã ta hã.

²⁰ Tô sena, wa rob'ui'éré na nherẽ ãma aima rowasu'u za'ra wa'wa, 'Re ihâimana u'âsi mono nho'a.

²¹ Tawamhã Zeruzalẽ hawi wa tô oto watobro, daza'rui u ĩmorĩ da, Siria u, duré Sirisia u.

²² Zahadu te te siwi ĩhâiba pibu za'ra õ di, Zezusihi zazei'wa norĩ hã daza'rui mono bâ, Zudéa na danhipti'a nho'õmo nhisi ãma siré 're isi'rã'õtõ mono norĩ hã.

²³ Taré ma tô ĩwasu'u wẽ si te te 're wapari za'ra, ta norĩ hã. Ãne na ĩwasu'u wẽ hã: “Paulu hã ma tô te te wa'ãma 're arowasété aré, Wanhib'apito ãma, wa te 're sasõmri tõ za'ra mono da. Tane nherẽ, Zezu Cristuhu wasu'uwẽ na te oto te te 're da'apawapto, Wanhib'apito ãma da te 're sasõmri za'ra mono da.” Ãne na si ma tô ĩwasu'u wẽ hã te te 're ropé.

²⁴ Tahawa, Wanhib'apito zazei'wa norĩ hã, 'Re ihâimana u'âsi mono ãma si, te 're wata u'âsi za'ra, te te ĩnho'reptui wẽ te ta hã.