Ezodu 9 - ꞌRe Ihâimana Uꞌâsi Mono Zadawa Wasuꞌu

Imrotõ ãma dama rob'manharĩzé wasu'u, danhimizama dawi isi'utõrĩzém na

¹ Tawamhã Uburé Danhib'apito te Mozésihi ma tinha ãne: — Apito Fara'oho u aimorĩ, Uburé Danhib'apito, hebreu norĩ te 'Re ihâimana u'âsi mono, ãne na te inharĩzém na tãma ĩzadawa wasu'u da: “Ĩnhib'a'uwẽ norĩ ma, ma'ãpé tãma waprosi za'ra na, ã hã ti'ai wa'õtõ nho'õmo hawimhã wairébé da, ĩ'ãma 're wata za'ra mono da.

² A hã duré tãma waprosi za'ra õ wamhã, duré si'aba'ré tõ da tiwi rosawi zahu za'ra wamhã,

³ wa hã wa za dahâzé ipire na hã, uburé danhimizama awaru norĩ hã, awaru po're pore norĩ hã, awaru ba'õmo norĩ hã, duré powawẽ norĩ hã, pone'ẽrebâ zéré mapure norĩ hã, duré pone'ẽrebâ zéré uzé norĩ hã, dawi hâ za'ra.

⁴ Tawamhã wa za duré Izaraéu nhihudu nhimizama 'rem norĩ, ezipsiu norĩ nhimizama norĩ 're me, aiwab õ na romhâimanazé hã tãma 'manharĩ zahuré za. Tahawa Izaraéu nhihudu norĩ nhimizama i'matâ'â da hã mare di za.

⁵ Wa hã Uburé Danhib'apito, wa bâdâ hã ĩsima pisutu: awẽ wa za ãne hã 'manha.”

⁶ Tawamhã awẽ bâtâ na ma tô Uburé Danhib'apito hã oto tô 'manha. Te te inharĩzéb zarina ma tô uburé ezipsiu norĩ nhimizama hã nemo tiwi si'utõrĩ. Tane nherẽ, tawamhã Izaraéu nhihudu norĩ nhimizama si, si'utõrĩ õ di.

⁷ Tawamhã apito Fara'o, ma tô Izaraéu nhihudu norĩ 're ihâimana za'ra mono zéb u hã da'mazatõ, niha hã romhâimanazé te te waihu'u da. Ãhã wa, ma tô Izaraéu nhihudu norĩ nhimizama si'utõrĩ'õ na wẽ na isimasam na tãma 'mairowasu'u ni. Tane nherẽ, te tawamhã zahadu simirosa'rata wasété nhiptete u'âsi, tihâimana na hã te te ãma uzusi.

Imropâ ãma dama rob'manharĩzé wasu'u, da'wa're tob'mai'ãsi na

⁸ Tawamhã Uburé Danhib'apito te Mozési norĩ ma, Arãhã me, tãma nharĩ zahuré ãne: — 'Ru'a te za asib'rata na i'aza'ãi wa'wa, ti'a u'ẽne, da te 're isebre za'ra mono zéb 're, 're isimi'wara mono hã. Tawamhã a hã, Mozési te za 'ru'a hã nasi hâimo i'anha za, rowa'u'u nho'rãmi Ezitu te apito nho'a.

⁹ Tawamhã ta hã isum hâi pesere te za Ezitu ti'ai 're daro mono bâ hã te te ropé. Ta hã te za duré a'uwẽ 're ihâimana za'ra mono norĩ hã, duré danhimizama 're isimasa mono norĩ zama hã nemo i'wa're to'mai'ã hã te te duri.

¹⁰ Ãne Mozési norĩ, Arãhã me, 'ru'a tinhib'rata na te te amrami zahuré wamhã, ma tô apito nho're para na hâiwi iré aima'wa. Tawamhã Mozési hâimo te te sãmra wamhã, ma tô a'uwẽ 're ihâimana mono wa're to'mai'ãsi na hã duré danhimizama 're isimasa mono wa're to'mai'ãsi na hã si'manharĩ za'ra.

¹¹ Tawamhã marĩ 'manharĩ waihu'u nhipese'wa norĩ hã, Mozési u hã sihâi'ré za'ra õ di. E marĩ wa. Tisiré ezipsiu norĩ ne, iwa're to'mai'ã hã te te hâiba'utõrĩ za'ra wa.

¹² Tane nherẽ, te duré apito simirosa'rata wasété nhiptete na zahadu tihâimana na hã te te uzusi, Uburé Danhib'apito niha na a'â hâimana da, te te tãma i'manharĩzéb zarina. Duré Uburé Danhib'apito, Mozésihi ma, te te inharĩzéb zarina, Arãhã me, te te tiwi irowaptẽrẽ zahuré zém na hã te te wapari zahuré õ di ãma, apito Fara'o hã.

7 ãma dama rob'manharĩzé wasu'u, tãnhama na

¹³ Tawamhã Uburé Danhib'apito te Mozésihi ma tinha ãne: — Mararé uptabi te za apito u aimo, Uburé Danhib'apito, hebreu norĩ te 'Re ihâimana u'âsi mono, ãne na te inharĩzém na hã tãma ĩzadawa wasu'u da: “Ã hã ti'ai wa'õtõ nho'õmo hawi wairébé da, te za oto ĩnhib'a'uwẽ norĩ ma waprosi za'ra, ĩ'ãma 're wata za'ra mono da.

¹⁴ E marĩ wa. Ãhã na tãma waprosi za'ra õ wamhã, wa hã wa za ĩnhimirob'manharĩ pipa na hã ai'azâ. Aima romhuri'wa norĩ zama hã, duré ate a'uwẽ norĩ zama hã wa za hâ za'ra, a hã waihu'u da, ti'ai ãma ni'wa ĩsine ihâimana õ na hã.

¹⁵ Tawamhã duré a hã aihâzé ipire na te ai'azâri 'wa'âhã, duré ate a'uwẽ norĩ ihâzé ipire na te hâ za'ra 'wa'âhã, te aré õne haré uburé pese misi haré ai'utõrĩ 'wa.

¹⁶ Tane nherẽ, a'â 're aihâimana mono da hã wa tô bâdâ hã aima apraba, ĩwaihu'u pese na 're ĩhâimana mono zé hã te a'â aima hâi'ré da, duré uburé daro mono bâ ĩnhisi, da te waihu'u za'ra da hã.

¹⁷ Tane nherẽ, te zahadu a hã 're i'asi'madâ'â zei mono na aihâimanazém na hã ãma i'uzusi mo. Tahawa duré ĩnhib'a'uwẽ si'aba'ré da, tãma irowairébé za'ra da hã asima wẽ õ di.

¹⁸ Tahawa, awẽmhã mararé ãne bâtâ na wa za tãzâ isiptede ta'a da hã 'manha, niwa Ezitu 're iwatobro na iwasu'u hã ihâimana õ na.

¹⁹ Tahawa ma'ãpé rom na ate powawẽ ihâimana za'ra hã dama 'ru na we da te ubumroi mono da 'ri u. Duré ni'wam norĩ rom na ihâimana za'ra, danhimizama powawẽ norĩ me, ta norĩ 'ri u isi'aba'réi õ norĩ, oto tãzâ ta'a wamhã, te za uburé pese ai'utõ.”

²⁰ Tawamhã apito ma romhuri'wa norĩ, ãne na Uburé Danhib'apito te te dama iropipa wasu'u te te iwapari za'ra zé ma hã, ma tô tipahi pese za'ra. Tahawa tite pawa'âbâ ãna buru na te te tãma 're iromhuri za'ra mono norĩ hã ma tô tinhimizama siré hã 'ripara u te te 'mazasi za'ra.

²¹ Tane nherẽ ni'wam norĩ, Uburé Danhib'apito te te iwaihu'uzé te te iwapari za'ra õ norĩ, ma tô tite pawa'âbâ na te te tãma 're iromhuri za'ra mono hã, duré tinhimizama norĩ rom na sõ'awi hâimana za'ra da hã rẽme za'ra.

²² Tawamhã Uburé Danhib'apito te Mozésihi ma tinha ãne: — Hâiwa'u te za oto asib'rada hâimo iwẽ. Asib'rada wẽ wamhã, te za uburé Ezitu ti'ai 'remhã tãzâ hã tita'a. Duré te za a'uwẽ 're ihâimana za'ra mono nhisiwimhã, danhimizama 're isimasa mono nhisiwib zama hã, duré rob're nhisiwib zama hã tita'a.

²³ Tawamhã Mozési tisiwazusizé hâimo hâiwa u te te wẽ wamhã, ma tô Uburé Danhib'apito, tãirãrã'ã ma hã rob'ru. Duré ti'ai wa'õtõ nho'u hã, tã nhama na, duré tãi wapsa'a na ma tô azâ. Tawamhã tã ipĩni nhama ré pĩni nhiptete na

²⁴ Ezitu ti'ai 're uburé 'ri nho'u 're ihâimana za'ra mono na ta'a da hã ma tô 'manha. Tawamhã tã hã wapsa'a ré pĩni nhimizazâri ãna ma tô tita'a. Ã hã niwa Ezitu ãma ihâimana õ, ma tô wa'u'u nhiptete na hã watobro.

²⁵ Tawamhã Ezitu ti'ai 're uburé rom na siwazari marĩ 're ihâimana za'ra mono hã ma tô te te uprosi, tãzâ ita hã. Duré a'uwẽ norĩ zama, duré danhimizama zama, ma tô te te anho'remhâri. Uburé rob're norĩ zama, duré wede norĩ zama, ma tô uburé pese te te na.

²⁶ Tawamhã Gosẽ ti'ai ãma Izaraéu nhihudu norĩ 're ihâimana za'ra mono zéb ãma si tãzâ hã ta'a õ di.

²⁷ Tawamhã apito, Mozési norĩ zô, Arãhã me itẽme neb zahuré da, te te da'mazatõrĩ wa, oto itẽme neb zahuré wamhã, te ãne tãma siwasu'u zahuré: — Ãhã na wa hã wa tô ĩwasédé hã 'manha. Uburé Danhib'apito si te i'uwaibaba na 're hâimana. Tahawa wa norĩ hã ĩnhib'a'uwẽ norĩ me hã, marĩ na i'upai'wa na hã wa tô wahâimana za'ra ni.

²⁸ Ma'ãpé, Asib'apito wa'aba ma, aimreme aba. Tãirãrã hã tã ipĩni nhama ré hã sipari zahuré hâ. Pipa uptabi di! Tawamhã ai'aba'réi wa'aba da hã wa za oto aima waprosi za'ra wa'wa. Tawamhã duré oto i'asimipari zahu aba da hã mare di za.

²⁹ Tawamhã Mozési, ma te ãma tãma wa'rã ãne: — Ã hã 'ri nho'õmo hawi ĩwatobro wamhã, wa za ĩnhib'rada hâimo wẽ zahuré, Uburé Danhib'apito ma, ĩmreme da. Tawamhã tãma ĩmreme wamhã, tãirãrã hã te za sazâ za. Duré niwamhã oto tã ipini nhama ré ita'a zahu da hã mare di za. Apito, 'Re ihâimana u'âsi mono te ti'a ihâimana na, ãne hã duré ãma waihu'u da, te za tãzâ hã sazâ.

³⁰ Tane nherẽ, ĩma aiwaihu'u pese di, a hã aima romhuri'wa norĩ me, Uburé Danhib'apito 'Re ihâimana u'âsi mono ma, zahadu asiwi 're iwazé wa'aba mono õ na hã.

³¹ Tawamhã amnho linho norĩ, amnho cewada me hã ma tô tãzâ hã te te pari, cewada 'rã siromo hâimana nherẽ, duré linho hã sirãrã siromo hâimana nherẽ.

³² Tane nherẽ, trigu norĩ, amnho imono bâ ihâimana za'ra mono me hã te te uprosi mono õ di. E marĩ wa. Zahadu ta norĩ 'wanhipré za'ra mono õ wa.

³³ Tawamhã ãne Mozési, apito hawi oto watobro wa, duré oto 'ri nho'õmo hawib zama watobro wamhã, ma tô hâimo tinhib'rada hã wẽ zahuré, Uburé Danhib'apito ma, mreme da. Tawamhã awa'awi tãirãrã'ã norĩ, tã ipini nhama ré me hã ma tô oto sazâri zahuré.

^34-35 Tawamhã apito Fara'o, tã isiparizé te te 'madâ'â wamhã, tãirãrã isimizazârizé te te waihu'u wamhã, duré tãzâ oto ita'a'õzé te te 'madâ'â wamhã, ma tô apâ tinhimirosa'rata na hã saprĩ, romharé na apâ tãma romhâimana wẽ te. Tahawa, ma tô duré tite romhuri'wa norĩ me hã apâ tipẽ'ẽ tete na hã ãma uzusi za'ra. Uburé Danhib'apito, Mozésihi ma, te te iwaihu'u siromo zéb zarina, tawamhã apito hã, Izaraéu nhihudu norĩ ma, si'aba'ré da hã te te tãma waprosi za'ra õ di.