Ezodu 40 - ꞌRe Ihâimana Uꞌâsi Mono Zadawa Wasuꞌu

Romhâ 'manharĩ na 'ri, da te dasiwi iwasisizé wasu'u

¹ Tawamhã Uburé Danhib'apito, Mozésihi ma, te tinha ãne:

² — A'amo isãna'rata te, bâdâ imorĩ'rata ãma, te za romhâ 'manharĩ na 'ri 're, 'Re ihâimana u'âsi mono iwa 're ihâimana mono zé 'ri hã iwasisi mo.

³ Tawamhã te za duré ĩte wedehâ're ĩnhimiroti ré ẽtẽpo iwa isa'wari i'mazé, 'ri para u hã. Tahawa te za duré isõ're na zazahâ hâi wawẽ waré hã isasõ.

⁴ Wedeza hã sãrĩ 'ri paramhã. Sõré na uburé marĩ isisi isimi'wara da hã. Rob'uiwẽzé 'ri para u te za isã. Te za isimizu mono bâ iro'ozéb da i'rãire mono hã tãma i'a'mazai mo za.

⁵ Wedewa'u isadaze da te ãma 're isazu za'ra mono da, ẽtẽ waipo pré oru na wedezane na 're idanhoprub za'ra mono zé hã sãrĩ za, ĩte wedehâ're nho'remhã. Tawamhã duré sasõmri za zazahâ hâi wawẽ 'ri para u za 're idanhisisi mono zéb ãma hã.

⁶ Ĩma danhimizama zatazé 'ri nho're rowimhã sãrĩ za.

⁷ Tawamhã duré danhimizama zatazém norĩ wa'wamhã 'ri me, te za piza'a 're nho'a isã. Tahawa, te za â hã iwa i'masi.

⁸ Taha parimhã 'rimana wi baba te za iwa'ra. Tawamhã dazasizéb ãma te za duré zazahâ hâi wawẽ waré hã isasõ.

⁹ — Azeitona wa'u to robdi'izéb da hã âri, 'ri hã, duré uburé marĩ iwa ihâimana za'ra hã ãma saza za'ra da. Taha zarina te za aimawi sipo'o pese na ĩma isa'ra, iwazéb zahi na si ĩma 're hâimana za'ra mono da.

¹⁰ Taha parip si te za duré danhimizama zatazé hã duré uburé marĩ isiré ihâimana za'ra hã ãma i'azaza. Taha zarina te za tô aimawi ĩma si tihâiba, iwazéb zahi na hã.

¹¹ Tô õne te za duré piza'a 're nho'a hã, duré i'uparizé hã ãma isaza zahuré.

¹² — Arã, i'ra norĩ me 'ri para u 're idanhisisi mono zéb u hã simroi mono. Tawamhã a hã te za duré â na ihâiba upsõ za'ra.

¹³ Taha pari Arã, sasedoti si'uzazém na te za i'uza. Te za duré ĩma i'rãti, aimawi danhiti sasedoti na te te ĩma 're romhuri mono da, da'ãma.

¹⁴ I'ra norĩ i'uza ihâpa tãma séme da hã te za duré we isimroi mo.

¹⁵ Taha pari te za duré a hã, imama za'ra i'rã ti'i ne i'rã ti'i za'ra, sasedoti na te te ĩma 're romhuri za'ra mono da, duré ta norĩ hã. Sasedoti na isihudu sidâpâsi õne u'â te te 're romhuri za'ra mono da, te za ãne hã tãma i'manharĩ za'ra za.

¹⁶ Ãne ma tô Mozési, Uburé Danhib'apito te te tãma i'awaihu'u mono zéb zarina uburé hã ab'manha.

¹⁷ Ãne ma tô a'amo imorĩ'rata te, bâdâ imorĩ'rata ãma, Izaraéu nhihudu norĩ Ezitu hawi iwairébézém na misi wahu aré tô oto isi'utõrĩzéb ãma, ma tô romhâ 'manharĩ na 'ri 're, 'Re ihâimana u'âsi mono iwa 're ihâimana mono zé 'ri na hã te te siwi ãma wasisi.

¹⁸ Tawamhã Mozési ma tô isãna'ratazé hã aza'ra, duré i'uparizéb da hã ma tô te te anhoré. Isimi'rãmi na tãma isimi'wara mono da hã ma tô duré te te aza'ra. Hâiwi tãma isimasa mono da hã, ma tô wede te te duré anhoré.

¹⁹ Tawamhã 'ri upsibizé hã ma tô oto hânhozi isisiwimhã. Ma tô duré aimawi hã isisiwimhã tihi, Uburé Danhib'apito te te tãma iwaihu'uzéb zarina.

²⁰ Taha pari isimiroti ré ẽtẽpo'o norĩ hã ma tô wedehâ're 'remhã tino. Isi'uwazi zapoto 're ma tô duré imramizéb da, wede norĩ hã tãma za zahuré. Duré tawamhã isidâzém na hã ma tô oto sidâ.

²¹ Taha parimhã, wedehâ're 'manharĩ hã ma tô oto duré 'ri para u hã tisẽ. Duré Uburé Danhib'apito te te iwaihu'uzéb zarina ma tô zazahâ hâi wawẽ waré hã i'wawimhã sasõ, 'Re ihâimana u'âsi mono nhimiroti te, wedehâ're, da te 're 'madâ'â zahu za'ra mono tõ da oto.

²² Tawamhã Mozési, wedeza 'ri para u ma tô hâiwa nhimi'e niwĩmhã tisã, zazahâ hâi wawẽ isa'o babarã na.

²³ Tawamhã Uburé Danhib'apito ma, i'u'ẽtẽ wapu na tãma danhoprubzé ma tô isisiwimhã sa'ra, te te tãma iwaihu'uzéb zarina.

²⁴ Tawamhã duré 'ri para u ma tô rob'uiwẽzé hã tisã, wedeza nho're hâiwa nhimire niwĩ.

²⁵ Tawamhã duré Uburé Danhib'apito nho're, ma tô te te tãma iwaihu'uzéb zarina te te ãma azazu, ro'o za'ra da.

²⁶ 'Ri para u, ẽtẽ waipo pré oru na wedezane 'manharĩ, 'Re ihâimana u'âsi mono ma, danhoprubzéb da, wedewati isadaze, da te tãma 're izata za'ra mono, zazahâ hâi wawẽ isa'o nho're, ma tô tisã.

²⁷ Tawamhã ma tô wedewa'u isadaze na hã ãma sazu, Uburé Danhib'apito te te tãma iwaihu'uzéb zarina.

²⁸ Tawamhã duré romhâ 'manharĩ na 'ri para u 're idanhisisi mono zéb ãma, ma tô zazahâ hâi wawẽ hã sasõ.

²⁹ Tame ma tô duré danhimizama zatazém na danhoprubzé hã tisã, 're idanhisisi mono zém nho're. Taha nhisiwimhã ma tô danhimizama zata na duré amnho na tãma tinhopru, Uburé Danhib'apito te te tãma iwaihu'uzéb zarina.

³⁰ Tawamhã piza'a 're nho'a hã ma tô tisã, danhimizama zatazém norĩ wa'wamhã 'ri me. Tahawa, ma tô â hã iwa 'masisi.

³¹ Taha na ma tô Mozési hã Arã, ti'ra norĩ me ãma sisib'rata upsõ za'ra. Duré ma tô ãma sipara upsõ za'ra.

³² Ãne ma tô 'ri para u 're sisisi mono sidâpâsi, duré niha wamhã danhimizama zatazéb u 're nomro mono sidâpâsi te te 're 'manharĩ za'ra, Uburé Danhib'apito Mozésihi ma te te iwaihu'uzéb zarina.

³³ Tawamhã Mozési, 'ri norĩ 'wawi, danhimizama zatazé 'wawi me hã ma tô wa'ra na ãma uirĩ. Ma tô duré dazasizéb ãma zazahâ hâi wawẽ hã sasõ. Ãne ma tô Mozési romhuri hã 'rãsutu.

Hâiwa'a zarob'a, romhâ 'manharĩ na 'ri te te isuwazé wasu'u

³⁴ Tawamhã hâiwa'a zarob'a ma tô romhâ 'manharĩ na 'ri hã suwa. Te te suwai wamhã, ma tô Uburé Danhib'apito hâiba na rowa'a hã sa'ẽtẽ na 'ri 're wa'a.

³⁵ Tahawa Mozési hã sébré waihu'u õ di, 'ri para u hã.

³⁶ Tawamhã hâiwa'a zarob'a, romhâ 'manharĩ na 'ri nhisi ma 're sa'o hâ mono sidâpâsi ma tô Izaraéu nhihudu norĩ tizâmorĩ na hã te te 're uzusi za'ra mono.

³⁷ Tane nherẽ, hâiwa'a zarob'a 'ri ma 're sarõtõ mono õ ré, tô ta hawimhã 're wairébé mono õ di. Nimahã bâtâ na 'ri ma 're sarõtõ mono wapsi ma tô tizâmorĩ na hã te te 're uzusi za'ra.

³⁸ Ãne ma tô bâtâ na Uburé Danhib'apito nhimirowa'a hâiwa'a zarob'a 'ri nhisiwimhã te te 're 'madâ'â za'ra. Duré bara na te unhama ro hâiwa'a 're ihâiba hã te te 're 'madâ'â za'ra, a'uwẽ Izaraéu norĩ 're nomro mono ré hã.