Ezodu 4 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono waihu'u pese zarina, Mozési niha hã marĩ te te nasi i'ab'manharĩzé wasu'u

¹ Tawamhã Mozési, 'Re ihâimana u'âsi mono ma, ma te ãne ãma sada'â: — Izaraéu nhihudu norĩ te te ai'ãma siwi ĩzaze da hã mare di. Duré ĩma i'asihâi'rézém na te tãma aiwasu'u za'ra wamhã, te te siwi ĩwapari õ di za.

² Tawamhã 'Re ihâimana u'âsi mono te ãma sadanha ãne: — E marĩ te asib'ratamhã 're i'â. Tawamhã ma sada'â, ãne Mozési hã: — Wedehu wa 're ti'â.

³ Tawamhã 'Re ihâimana u'âsi mono te tãma tinha ãne: — Ti'ai u ma'ãpé me na, ta wedehu hã. Tawamhã ti'ai u te te ime hã ma tô siwahi. Taha ma, te Mozési tawamhã wara, tãma pahi wa.

⁴ Tawamhã Uburé Danhib'apito, te Mozésihi ma waihu'u ãne: — Ma'ãpé asib'rada sô wẽ na, isarébé na âri da apâ! Tawamhã isarébé na ma tô ti'â. Te te âri wi, ma tô apâ siwedehu isib'rata.

⁵ Tahawa te Uburé Danhib'apito tãma tinha ãne: — Ãne te za Izaraéu nhihudu norĩ nho'a hã i'manha, Uburé Danhib'apito, aihi'rata norĩ te, Abra'ãhã te, Izaquihi te, Zacoho te, 'Re ihâimana u'âsi mono, aima ĩsihâi'rézém na te te ãma asaze za'ra da hã.

⁶ Tawamhã te duré tãma tinha ãne: — Ma'ãpé asib'rada hã sẽrẽ, asõ'utu 're. Tawamhã te te tãma inharĩzéb zarina ma tô tinhib'rada hã tisẽ, tinho'utu 're. Tawamhã tinho'utu hawi oto te te wazere wamhã, ma tô i'wa're hâ'a ahâ hã ãma wairébé, rowahâzé pĩni u'ẽne i'a pese ne hã.

⁷ Tawamhã Uburé Danhib'apito, 'Re ihâimana u'âsi mono te duré tãma tinha ãne: — Asib'rada hã ma'ãpé apâ sẽrẽ, asõ'utu 'remhã. Tawamhã Mozési ma tô apâ tinho'utu 're tinhib'rada hã tisẽ. Tawamhã tinhib'rada tinho'utu hawi apâ te te wazere wamhã, ma tô i'wa're aré ãma iwairébé mono hã tãma aimani za'ra õne haré. Tahawa apâ hã oto sib'rata wẽ di, uburé ihâiba hã wẽ na tãma ihâimana ne.

⁸ Tawamhã Uburé Danhib'apito, te ãne Mozésihi ma waihu'u: — Imorĩ'rata na marĩ dama i'manharĩ waihu'u'õ na Izaraéu nhihudu norĩ te te ãma asaze za'ra dai õ wamhã, ãté te za isãna're marĩ dama i'manharĩ waihu'u'õ na si ãma asaze za'ra.

⁹ Te 're iromhõsi mono zarina, maparane marĩ, dama i'manharĩ waihu'u'õ na dama 'manharĩ nherẽ, ãté duré da te dasiwi hã aiwapari õ di za. Ãne wamhã, te za Nilu na pa nho'õmo nhisi hawimhã â hã i'a'â, ti'ai u sa'wari da. Tahawa, te za dawapru na si'manha.

¹⁰ Tawamhã Mozési, ma te 'Re ihâimana u'âsi mono ãma sada'â ãne: — Ĩnhib'apito, tane ĩma iwaihu'u wana ré, niwamhã ĩmreme waihu'u pese na hã ãma ĩhâimana õ di. Wa hã ĩmreme tobre di, duré ĩmreme zani su'u õ di. Duré ĩmreme hã te 're sani mono wamhã, ĩmreme tété hâre di.

¹¹ Tawamhã Uburé Danhib'apito, te ãne tãma tinha: — E 'wa hã ma tô dazadawa ãma 're idamreme zusi mono zéb da hã te te dama 're ab'manharĩ. E 'wa hã dapo'reptõ 'manharĩ'wa, dapo're 're pu'u ãna iré 're idahâimana za'ra mono da hã. E 'wa hã duré damreme'õ 'manhari'wa, damreme õ na 're danomro mono da hã. E 'wa hã datõmo 'manharĩ'wa, da te ãma 're irob'madâ'â za'ra mono zéb da hã. Duré e 'wa hã datõmo wamnarĩ'wa, datob'a na 're danomro mono da hã iré. Wa hã, Uburé Danhib'apito.

¹² Tahawa te za ãhã na awa'awi na datẽme aimo. Wa hã datẽme aimorĩ wamhã, wa za aipawapto, aimreme zani wẽ da, te aima iwaihu'uzéb zarina, ãma dama rowasu'u da hã.

¹³ Tawamhã Mozési, za imorĩ'õzé te tiwi waptẽ ãne: — Ĩnhib'apito mare di. Ãté ĩmorĩ õ di za. Tahawa ma'ãpé ĩnhipai u aimawi hã da'mazatõrĩ, ĩ'upana da'maimorĩ da.

¹⁴ Tawamhã 'Re ihâimana u'âsi mono ma tô sada tinhiti'ru. Tahawa te Mozésihi ma tinha, ãne: — Arã levita hã e adub'rata õ di bété. Ta hã ĩma hã waihu'u pese di, imreme zani wẽ na hã. Ta hã te oto we atẽme mo, te te asõpẽtẽ da. Te te asõpẽtẽ wamhã, tãma rowẽ di za, te te oto ai'madâ'â wa za.

¹⁵ Tawamhã Arãhã ma, a hã rowasu'u wamhã, te za aimreme nhipai u dama tinha. Tawamhã duré wa hã wa za aipawapto wa'wa, niha na dama inharĩ aba zéb da hã. Duré wa za i'ab'manharĩ aba zéb da hã aima waihu'u 'wa.

¹⁶ Tawamhã Arã te za ai'upa na dama rowasu'u. Tawamhã a hã ĩsine 'Re ihâimana u'âsi mono na tãma aihâimana wa, te za marĩ te te i'manharĩzéb da hã ãma tãma i'arowasu'u mo.

¹⁷ Ta wedehu hã ãma âri. E marĩ wa. Taha na te za marĩ dama i'manharĩ waihu'u'õ hã ãma i'ab'manharĩ mo.

Mozési apâ Ezitu u imorĩzé wasu'u

¹⁸ Tawamhã Mozési, timaprewa Zetruhu nhorõwa u ma tô mo. Tahawa, te ãne tãma tinha: — Ĩma rowairébé, a'â Ezitu u apâ ĩmorĩ da wasisabu za'ra da. Wa tô ĩsima wẽ, te sabu za'ra da zahadu rowẽ na 're hâimana za'ra mono zô. Tawamhã Zetru ma te ãma sada'â ãne: — Rowẽ na aimorĩ za!

¹⁹ Tawamhã Midiã na romnhisi ãma zahadu sãmra ré, ma tô Uburé Danhib'apito hã duré tãma tinha ãne, Mozésihi ma: — Te za oto apâ aimo, Ezitu u! E marĩ wa. Te te siwi aiwĩrĩ da, te te sima iwẽ za'ra hã ma tô uburé sô tirobaba za'ra.

²⁰ Tawamhã Mozési, timro, ti'ra norĩ me ma tô awaru po're pore ba nhisiwimhã sõré. Tahawa ma tô Midiã na romnhisi hawimhã oto apâ Ezitu u hã sina siri. Tawamhã 'Re ihâimana u'âsi mono te na tisiwazusizé te tinhib'ratamhã siré ti'â.

²¹ Tahawa, te duré 'Re ihâimana u'âsi mono hã tãma tinha ãne, Mozésihi ma: — Ezitu u apâ aimorĩ wamhã, ma'ãpé ãma pibui pese za, apito Fara'oho nho'a ĩwaihu'u pese zé te aima isõmri zarina, marĩ dama i'manharĩ waihu'u'õ hã nasi 'manharĩ da hã. Tane nherẽ, ta hawi Izaraéu nhihudu norĩ ma, te te waprosi tõ da hã wa za a'â nasi ipẽ'ẽ tede hã tãma tisõ.

²² Tawamhã wa hã Uburé Danhib'apito te iwaihu'uzém na hã te za apito Fara'oho ma ĩzadawa wasu'u ãne: “Izaraéu nhihudu norĩ hã aibâ na dama 're ipoto 'rata za'ra mono ne hã te ĩma 're hâimana za'ra.

²³ Wa tô aima nharĩ pa, ĩ'ra norĩ ma, waprosi da, asa'rui hawimhã wairébé da, ĩ'ãma si oto 're wata za'ra mono da. Tazahã a hã tãma waprosi za'ra õ di, wairébé da hã. Tahawa, wa za ai'ra aibâ na ãma irosõwada 'rada hã aiwi tiwĩ.”

²⁴ Tawamhã Ezitu u si'aba'réi wa, Mozési ti'ra norĩ ré rowãi wa sõtõ wamhã, ma tô Uburé Danhib'apito hã itẽme wi. Ãhã wa, ma tô duré aré tiwĩ.

²⁵ Tawamhã imro Zipora, ma tô ẽtẽ'wa hâdâ hã ti'â. Taha na ti'ra ma tô sihâiwata nhizâ. Duré ti'ra nhihâiwata na ma tô timro Mozési hã ãma para upi. Tahawa te ãne timro ma tinha: — A hã te za ĩmro dawaprui ré hã ĩma 're aihâimana mo.

²⁶ Ti'ra te te isihâiwata nhizârizéb zarina ma tô ãne hã tãma tinha, timro ma hã. Ãne zarina ma tô Uburé Danhib'apito hã ãma rosazâ, te te wĩrĩ tõ da.

²⁷ Uburé Danhib'apito, iwana ré ma tô Arã hã po're pu'u siro ãne: — Mo oto aimorĩ rop si 're irosa'wari mono u, Mozési sõpẽtẽ da. Ãhã wa, Arã morĩ wamhã, ma tô ẽne iwazéb zahi i'rãihâ ãma sõpẽtẽ, Mozési hã. Tawamhã ma tô duré tob'rata hârâ na sawi.

²⁸ Tawamhã Mozési, ma tô uburé tidub'rada Arãhã ma hã tãma wasu'u, 'Re ihâimana u'âsi mono, Ezitu u apâ te te satõrĩ wa, te te tãma iwaihu'uzé hã te te tãma wasu'u da. Duré 'Re ihâimana u'âsi mono, marĩ dama i'manharĩ waihu'u'õ hã za nasi te te i'manharĩzém na, te te ipawaptob na te te tãma iwaihu'uzé hã te sina tãma mreme wasu'u.

²⁹ Tawamhã Mozési norĩ Arãhã me, ma tô oto siré Ezitu u hã tineb zahuré. Tahawa ma tô uburé Izaraéu nhihudu norĩ ma, i'rãnho'u hã 'rã'õtõ zahuré.

³⁰ Tawamhã Arã, Uburé Danhib'apito, Mozésihi ma, te te tãma iwaihu'uzé hã ma tô ta norĩ ma wasu'u za'ra. Taha pari, Mozési ma tô õne haré da'ahâ norĩ nho'a, marĩ dama i'manharĩ waihu'u'õ na hã sãna'rata.

³¹ Tawamhã ma tô uburé ãma saze za'ra, isimirowasu'u na hã. Uburé Danhib'apito itẽme imorĩ za'ra zém na te te sina waihu'u za'ra wa, duré da te tãma 're irob'manharĩ wasété za'ra mono zém na te te 're i'madâ'â za'ra mono na te te sina waihu'u za'ra wa, hi'rãtitõ ma tô asimro, 'Re ihâimana u'âsi mono ãma wata za'ra da hã.