Ezodu 34 - ꞌRe Ihâimana Uꞌâsi Mono Zadawa Wasuꞌu

Ẽtẽpo itém na 'Re ihâimana u'âsi mono tinhimiroti na te te duré ãma irob'ui'éré zahu zé wasu'u

¹ Tawamhã Uburé Danhib'apito, Mozésihi ma hã te tinha ãne: — Ma'ãpé iprub zahuré sine hã, ẽtẽpo maparane wa'õtõ zahuré na. Tawamhã wa hã, ta norĩ na wa za duré tô ĩmreme na hã apâ ãma rob'ui'éré zahu zahuré, imorĩ'rata na ẽtẽpo ihâimana zahuré na te ãma irob'ui'éré na hã.

² Te za asisa'ra wẽ, awẽmhã mararé Sina'i na ẽtẽ nhisi na sai'uri da, tame isisi ĩnhopẽtẽ da.

³ Ni'wa asiré te te sa'uri õ di za. Duré ni'wa siwa'ru ẽtẽ na hã asiré hâimana õ di za. Duré pone'ẽrebâ hã, pone'ẽrebâ zéré uzé norĩ hã, powawẽ norĩ hã, Sina'i na ẽtẽ 'ratamhã du hã te te 're ihuri mono da hã mare di za.

⁴ Tawamhã Mozési, maparane ẽtẽpo hã imorĩ'rata na ihâimana zahuré ne ma tô wa'õtõ zahuré. Tahawa, awẽ wi Uburé Danhib'apito te te tãma iwaihu'uzéb zarina, ma tô Sina'i ẽtẽ na sai'u, ẽtẽpo te te siré mrami sina.

⁵ Tawamhã Uburé Danhib'apito hâiwa'a zarob'a na ma tô si'ra. Te te si'rai wamhã, ma tô Mozésihi siré tame tihâiba. Ma tô duré tãma sisisi, Uburé Danhib'apito na.

⁶ Tawamhã Mozésihi nho're te te oto ro'razâri wamhã, ma tô mreme 'rãihâ na tinha ãne: — Wa hã Uburé Danhib'apito, 'Re ihâimana u'âsi mono! Wa hã da'ãma 're ĩsiwãrĩ wẽ mono 'wa, duré da'ãma 're ĩpẽ'ẽzé mono 'wa. Dazada hã 're ĩnhiti'ru su'u mono õ di. Duré dama ĩ'umnhasizé, ĩnhimizawizé me hã sa'ẽtẽ uptabi zahuré di.

⁷ Tahawa, danhihudu dasitébré mono sidâpâsi wa õne u'â ĩnhimiropisutuzém na hã te tãma ãma 're a'uwaimrami. Duré marĩ iwasédé da te 're i'manharĩ za'ra mono zém na hã, duré 're idawasété za'ra mono zém na hã te da'ãma 're ab'madâ'â mono õ di, nima norĩ ãma hã. Tane nherẽ, damama tiwasédé te te 're i'manharĩ za'ra mono u'âbâmhã i'ra norĩ ma hã, isihudu norĩ ma hã, isihudu 'ra norĩ ma hã, duré isihudu 'ra 'ra norĩ ma hã, ĩnhimihâzé hã te tãma 're ba'a waihu'u za'ra mono õ di.

⁸ Tawamhã Mozési hi'rãtitõ ma tô nhamra. Sãmra wamhã, ma tô ti'ubu na ti'ai u hã ropto. Tawamhã ma tô 'Re ihâimana u'âsi mono ãma hã tiwata.

⁹ Tahawa, te ãne tinha: — Ĩnhib'apito, sena na ĩzabâdâ aima rowẽ wamhã, wa za aiwi waptẽ, ãma wasiré aimorĩ za'ra da hã. Ã hã a'uwẽ norĩ hã pẽ'ẽ tete siroptub za'ra nherẽ, wawasédé hã, duré marĩ wa te 're i'manharĩ wasété za'ra mono zé hã wa'ãma 'madâ'â za'ra õ di za. Duré asib'a'uwẽ na aima 're wahâimana za'ra mono da, asima wawẽ za'ra na.

'Re ihâimana u'âsi mono me, apâ idasisaze za'ra zé wasu'u

¹⁰ Tawamhã Uburé Danhib'apito, Mozésihi ma te tinha ãne: — Asib'a'uwẽ norĩ me, wa za oto wasisaze za'ra zé hã wasiwi 'manharĩ ni. Isõ'a za'ra hã niwa uburé daro mono bâ 're idahâimana za'ra mono norĩ ma, te i'manharĩ'õ, wa za marĩ ipire iwaihu'u'õ hã tãma 'manharĩ za'ra. Tawamhã uburé te za wa hã Uburé Danhib'apito ĩnhimirob'manharĩzé dama iwaihu'u'õ hã 'madâ'â za'ra.

¹¹ Ma'ãpé ĩnhimiroti ãhã na te aima isõmri za'ra wa'wa hã 're wapari pese za'ra wa'aba mono. Tahawa, aiwana wa'aba wa za amoreu norĩ hã, cananeu norĩ hã, hitita norĩ hã, perizeu norĩ hã, heveu norĩ hã, duré zebuzeu norĩ hã te wano'õ za'ra za, ti'ai hawimhã.

¹² Itẽme i'ai'aba'réi wa'wa ti'ai 're, 're ihâimana za'ra mono norĩ me hã marĩ na 're asisaze za'ra wa'aba mono õ di za. E marĩ wa. Ta norĩ hã asisitob za'ra wa'aba zém ne hã za aima 're hâimana za'ra wa'aba mono õ'umnhasite.

¹³ Tahawa, te za ihâiba'õ norĩ ma, isimizama zatazéb za'ra hã asiwi ipru wa'wa, duré ta norĩ te romhâiba tete uparizé hã, ẽtẽ pisutu pese 'manharĩ zama. Duré ta norĩ uparizé wede 'manharĩ zama te za asiwi ina wa'aba mo za.

¹⁴ — Ihâiba'õ ãma hã 're aiwata za'ra wa'aba mono õ di za. E marĩ wa. Wa hã Uburé Danhib'apito 'râwi 're ĩsisisi mono hã ãne: Aimawi ihâiba'õ norĩ ãma dawatazéb zarina 're ĩnhiti'rui pusi mono. Tahawa wa aima ĩsi'ru za'ra wa'wa, ĩ'ãma si 're aiwata za'ra wa'aba mono da.

¹⁵ Ti'ai 're, 're ihâimana siromo za'ra mono norĩ me hã marĩ na 're asisaze za'ra wa'aba mono õ di za. Ta norĩ hã te tite ihâiba'õ norĩ ãma 're wata za'ra mono da, 're si'rã'õtõ. Te duré tinhimizama zata na hã ãma tãma 're sõprub za'ra. Tawamhã ihâiba'õ norĩ ma, 're isi'rã'õtõ mono zéb u 're anomro aba mono da hã te za asô 're hãsi 'wa. Tawamhã tite ihâiba'õ norĩ ma tinhoprubzé te te 're isõmri za'ra mono 're huri aba mono da hã ãté te za asima 're iwẽ za'ra wa'aba mo, 're tẽ'ẽ za'ra wa'aba mono da.

¹⁶ Ai'ra norĩ wa'wa hã asiré a'uwẽ'õ norĩ sipi'õ na 're mro za'ra mono wamhã, tawamhã te aré ta norĩ hã ĩ'ãma 're ihâimana za'ra mono zém hawimhã ãma tipahâ za'ra, ĩ'upana ihâiba'õ norĩ ãma 're iwata za'ra mono na ãma 're wata za'ra mono da isiré.

¹⁷ — Isi'uwazi na romhâiba hã ãma 're aiwata za'ra wa'aba mono da, 're 'manharĩ za'ra wa'aba mono tõ, tô'ã!

¹⁸ — I'u'ẽtẽ duptoi'õ na dato isa'ẽtẽ nhisi na hã te za asima 're iromhu'u u'âsi za'ra wa'aba mo. Te aima iwaihu'u za'ra wa'aba zéb zarina, te za i'u'ẽtẽ wapu duptoi'õ na asa hã 're ihuri aba mo, Abibe na a'amo nhisi 're 7 bâtâ 'rem na, taha a'amo na tô Ezitu hawi we aiwairébé aba dâ'âsina.

¹⁹ — Uburé da'ra ipoto'rata norĩ ĩte, duré danhimizama 'ra poto'rata norĩ zama hã ĩte.

²⁰ Awaru po're pore 'ra si'aibâ ipoto 'rada dâ'â ãna 're 'maza mono da, asima 're wẽ za'ra wa'aba mono wamhã, te za 'Re ihâimana u'âsi mono ma, i'upana pone'ẽrebâ zéré mapure na hã ãma tãma 're asõprub za'ra wa'aba mo. Tane nherẽ, asima 're wẽ za'ra wa'aba mono õ wamhã, te za awaru po're pore 'ra hã ibutu nhi'ẽ za'ra wa'wa. Tawamhã te za uburé ai'ra si'aibâ norĩ aima 're ipoto 'rata za'ra wa'aba mono hã Uburé Danhib'apito wi asima 're iwa'âbâ za'ra wa'aba mo, apâ aima 're hâimana za'ra wa'aba mono da. — Ni'wa hã tinhoprubzé te te ĩma 're a'wapéi mono õ nherẽ, ĩnho're u 're isihâi'ré mono da hã mare di za.

²¹ — 6 si bâtâ 'rep si te za asimiromhuri ré hã 're aihâimana za'ra wa'aba mo. Tane nherẽ, 7 bâtâ ãma 're romhuri za'ra wa'aba mono õ di za, da te 're iti'a hâipo'o mono zép te a'amo na nherẽ, duré da te 're iroptehâri mono zé a'amo na nherẽ.

²² — Imorĩ'rata na amnho trigu tehâri na isãna'rata za'ra wa'aba zém na te za asima 're iromhu'u za'ra wa'aba mo. Duré wahub 'rãsutu u rob'rã norĩ da te 're isinarĩ za'ra mono zém na te za asima 're iromhu'u za'ra wa'aba mo.

²³ — Si'ubdatõ wahub 'remhã te za uburé Izaraéu nhihudu norĩ si'aibâ, Uburé Danhib'apito, Izaraéu nhihudu norĩ te, 'Re ihâimana u'âsi mono ãma ĩ'ãma 're wata za'ra mono da, ĩtẽme 're isihâi'ré za'ra mono na hã te te 're sahu za'ra.

²⁴ Wa za wa hã aiwana za'ra wa'aba aimawi a'uwẽ norĩ hã te 're azani. Ãne wamhã, te za asipti'a hã aima tiza'ẽtẽ za'ra wa'wa. Tawamhã si'ubdatõ dato isa'ẽne ihâimana siwaprã, ĩ'ãma 're aiwata za'ra wa'aba mono da, we ĩtẽme 're anomro aba mono wamhã, ni'wam norĩ asipti'ai aba zô te te sima 're irob'ruiwapari za'ra mono da hã mare di za.

²⁵ — Asimizama pãrĩ na ĩma 're asõprub za'ra wa'aba mono wamhã, i'u'ẽtẽ wapu duptobzém na i'manharĩ hã we 're 'wasari aba mono õ di za. Duré dato isa'ẽne Pascowa na isisi na asimizama pãrĩ na 're i'asõprub za'ra wa'aba mono si'azazâri hã asisa 're sa'ra wa'aba mono õ di za, awẽb da hã.

²⁶ — Wahup sidâpâsi te za Uburé Danhib'apito, ate za'ra wa'wa 'Re ihâimana u'âsi mono nhorõwa u imorĩ'rata na amnho 're itehâri za'ra wa'aba mono hã we 're i'wasari aba mo. — Tahawa pone'ẽrebâ zéré mapure 'ra na hã, duré pone'ẽrebâ zéré uzé 'ra na hã, ina hâiwa'u zu inhi na hã ãma 're asipi za'ra wa'aba mono õ di za.

²⁷ Tawamhã Uburé Danhib'apito te Mozésihi ma zahadu tãma tinha ãne: — Ã hã ĩmreme hã anhihâtâ mono. E marĩ wa. Ãhã zarina wasisazezé hã te aima 'manharĩ wa, duré Izaraéu nhihudu norĩ ma hã.

²⁸ Tawamhã Mozési, Uburé Danhib'apito siré ma tô tamemhã tihâiba, 40 bâtâ na, 40 mara na sai ãna duré te te hâ'rẽne ãna. Tawamhã ma tô ẽtẽpo'o na 10 sina 'Re ihâimana u'âsi mono nhimirotizém na hã ãma rob'ui'éré zahuré.

Mozési Sina'i hawi te te isi'razé wasu'u

²⁹ Tawamhã Mozési, roti na rob'ui'érézéb ré ẽtẽpo tinhib'rata te te mrami sina, Sina'i hawi te te si'rai wamhã, ma tô i'ubu na rowa'a hã tihâiba, 'Re ihâimana u'âsi mono ma, te te irobzanhamri zéb zarina. Tane nherẽ, ãne na we tihâimanazé hã te te õ hã sina waihu'u õ di.

³⁰ Tawamhã i'ubu na rowa'a, Arã norĩ Izaraéu nhihudu norĩ me te te 'madâ'â za'ra wamhã, ma tô Mozésihi tẽme 'râwi te te sina irotété za'ra da hã tãma tipahi za'ra.

³¹ Tane nherẽ, Mozési, Arãhã zô ma tô hâ. Duré uburé dama i'rãnho'õmo norĩ zô hã ma tô tihârâ za'ra. Tahawa, ma tô uburé norĩ ma hã dama siwasu'u.

³² Taha pari ma tô uburé Izaraéu nhihudu norĩ hã Mozésihi u hã sina rotété za'ra. Tawamhã ma tô Uburé Danhib'apito nhimiroti hã tãma sõré za'ra imono bâ, Sina'i ẽtẽ nhisi ãma tinhimiroti te te tãma isõmri hã.

³³ Tawamhã Mozési te te dama rowasu'u parimhã, ma tô zazahâ ihâihâ za'é na hã si'ubu ubu.

³⁴ Tawamhã Mozési hã Uburé Danhib'apito nho're 're hâimana mono da, romhâ 'manharĩ na 'ri iwazéb zahi u, 're zasi mono sidâpâsi, ma tô zazahâ ihâihâ za'é hã te te 're sani. Duré apâ 're pusi mono sidâpâsi, ma tô uburé Izaraéu nhihudu norĩ ma, te te 're awasu'u, 'Re ihâimana u'âsi mono te te tãma 're i'rui mono, te te dama 're i'awasu'u mono da hã.

³⁵ Taha sidâpâsi ma tô i'ubu na rowa'a hã da te 're 'madâ'â za'ra. Tawamhã taha sidâpâsi ma tô duré Mozési apâ zazahâ ihâihâ za'é na hã ãma 're si'ubu ubu, 'Re ihâimana u'âsi mono ma, te te 're robzanhamri mono da, romhâ 'manharĩ na 'ri u apâ 're izasi mono zéb u.