Ezodu 32 - ꞌRe Ihâimana Uꞌâsi Mono Zadawa Wasuꞌu

Oru na powawẽ zapu, da te dasiwi i'manharĩzé wasu'u

¹ Tawamhã Mozési ẽtẽ hawi te te isi'ra su'u õ na da te dasiwi waihu'u wamhã, ma tô Arã hã dasiwi uirĩ ni. Ãne ma tô tãma nharĩ za'ra ni: — Aibâ hã Mozési, Ezitu hawi we te te iwa'awazere ma, niha na tãma iromhâimanazé hã, wa te waihu'u za'ra õ di. Tahawa, ma'ãpé ihâiba'õ norĩ poto awã na niha hã marĩ wama 'manharĩ za'ra na, te te iwanhimroi mono da hã isipai'u.

² Tawamhã Arã, ma te ãma sada'âbâ za'ra ãne: — Ma'ãpé aimro norĩ hã, ẽtẽ waipo pré oru 'manharĩ na ãma 're isipo're za'ru za'ra mono zé hã tiwi sani za'ra wa'aba, ai'ra si'aibâ norĩ te zama, duré ai'ra sipi'õ norĩ te zama, we ĩma 'wasari aba da.

³ Tahawa, Izaraéu nhihudu norĩ, ẽtẽ waipo pré oru 'manharĩ na tipo're za'ruzé mono bâ te te sani za'ra wamhã, ma tô Arãhã ma ãma tãma sito.

⁴ Tawamhã dapo're za'ruzé te te nasi dawi i'awaibu hã ma tô uwa za'ra, powawẽ zapu hâiba na te te 'manharĩ da, ãma 're idawata za'ra mono zéb da hã. Tahawa, te ãne nharĩ za'ra ni: — Izaraéu nhihudu norĩ, ã hã wate za'ra ihâiba'õ 're ihâimana za'ra mono, Ezitu hawi we te te iwazani za'ra!

⁵ Tawamhã Arã, ãne hã te te 'madâ'â wamhã, ma tô danhimizama zatazéb da, sisiwipsi ẽtẽ za'ra hã 'manha, oru na powawẽ zapu hâiba na ropoto 'manharĩ nho'remhã. Tawamhã ma tô timreme na ãma dama rowasu'u ãne: — Awẽmhã Uburé Danhib'apito ma, dasima rowẽzé dato isa'ẽne te za tihâiba.

⁶ Tawamhã awẽm na mararé ma tô danhimizama zata na tãma ãma tanhoprub za'ra ni, duré danhoprubzé ãma idato za'ẽtẽ na zama. Taha pari dasaihuri da, duré da te simihâri za'ra da, ma tô asimro ni. Ma tô duré taha pari tawahutu za'ra ni, da te dasima romhu'u za'ra da hã, duré apâ.

⁷ Tahawa, Uburé Danhib'apito te Mozésihi ma tinha ãne: — Ma'ãpé waptu na ẽtẽ hawimhã sa'ẽtẽ si'ra na, asib'a'uwẽ norĩ Ezitu hawi we isani za'ra hã, ma tô aiwamnarĩ za'ra, duré ma tô siwi iwẽ'õ za'ra.

⁸ Bâdâdi te tãma ipisutu za'ra zé hã ma tô waptu na siwi tirẽ. Duré powawẽ zapu ẽtẽ waipo pré oru na te te siwi i'manharĩ ma, ma tô isõ're nasi tãma aiwẽ'ẽ za'ra. Te duré nasi tãma tinhoprub za'ra, danhimizama zata na. Tahawa, te nasi ãne nharĩ za'ra: “Izaraéu nhihudu norĩ, ãhãta ate za'ra wa'wa ihâiba'õ, Ezitu hawi we te te i'asani za'ra wa'wa hã”.

⁹ Ĩma waihu'u pese di ã hã a'uwẽ norĩ, pẽ'ẽ tete na 're ihâimana za'ra mono na hã.

¹⁰ Tahawa, ĩwi hã robzâri tõ. Sada ĩnhiti'ru za'ra zéb zarina wa za uprosi. Tawamhã romhutu'õmhã aihawimhã wa za da'ahâ na apâ dasiré 're idahâimana za'ra mono da hã 'manha.

¹¹ Tane nherẽ, Mozési, te Uburé Danhib'apito, tite 'Re ihâimana u'âsi mono wi hã ãne rowaptẽ, tinhimirosa'rata na te te ãma saprĩ da: — Ĩnhib'apito, e marĩ da, ma asib'a'uwẽ asiptete na Ezitu hawi we isani za'ra norĩ da hã asiti'rui pe.

¹² Ãne hã tãma 'manharĩ za'ra wamhã, ãté te za ezipsiu norĩ ãne na sima aiwasu'u za'ra: “E taré ẽtẽ ãma tinhib'a'uwẽ te te uprosi pese da, ma tô Ezitu hawimhã sani za'ra.” Tahawa, ãne tõ da, asiti'ru na aihâimanazé wi hã aipi'ra na. Duré asimirosa'rata na ãma saprĩ na, asib'a'uwẽ norĩ nhisiwi robzépatazé ipire hã hâimana tõ da.

¹³ Ma'ãpé asib'a'uwẽ Abra'ã norĩ ãma Izaqui, duré Zaco, ãma aipo're pu'u za'ra na. Duré hâiwa na wasi ahâ uptabi na 're isimasa mono ne, isihudu norĩ ahâ na 're hâimana za'ra mono da, tãma iropisutu za'ra zém na zama ãma aipo're pu'u. Duré isihudu norĩ ma, uburé ti'a za tãma sõmri za'ra wa, itede'wa na õne u'â 're hâimana za'ra mono da, tãma iropisutu za'ra zém na zama aimreme na hã aipo're pu'u.

¹⁴ Tawamhã Uburé Danhib'apito tinhimirosa'rata na ma tô ãma saprĩ. Tahawa, isib'a'uwẽ norĩ zô robzépatazé ipire watobro da, te te aré ãma iropisutuzém na hã ma tô siwi 'ma'rã, te te 'manharĩ tõ da.

¹⁵ Tawamhã Mozési ẽtẽ hawi ma tô si'ra. Te te si'rai wamhã, ma tô 'Re ihâimana u'âsi mono, maparane ẽtẽpo'o hâ su'u na isõ're niwĩ duré iba niwĩ tinhimiroti te te ãma tãma isihâtâ ré hã timra.

¹⁶ Tô 'Re ihâimana u'âsi mono maparane ẽtẽ po te te i'manharĩ zahuré na, ma tô tinhimiroti na ãma romnhihâtâ.

¹⁷ Tawamhã Zozué, dazadari te te wapari wa, ma tô Mozésihi ma tinha ãne: — Dasi'wapéi wa robruru, wa wapa ãhã na, 'ri nhoré ãma hã.

¹⁸ Tawamhã Mozési, ma te ãma tãma wa'rã ãne: — Dasi'wapé na da te da'ãma ai'uté wa, rowẽ te, ropupu'u ne hãi õ di, te iwapari hã. Duré da te da'ãma ai'uté wa, 're idazadari za'ra mono ne hãi õ di. Rowẽ te, idazadawa'a'a si, wa tô wa hã wapa.

¹⁹ Tawamhã Mozési, 'ri nhoré u oto 'râwi wisi wamhã, oru ẽtẽ waipo na powawẽ zapu 'manharĩ hã, duré idasiwapsisizé te te 'madâ'â wamhã, ma tô dazada tinhiti'ru pese. Tahawa, ẽtẽ zahâpâ, maparane ẽtẽpo tinhib'rata te te imrami hã ma tô ti'ai u hã wabzu. Duré ma tô prub zahuré.

²⁰ Tawamhã oru na powawẽ zapu da te dasiwi i'manharĩ hã ma tô unhama ro'o na uwa pese. Taha pari ma tô isizuri na si uprosi, ti'a zaprum na isi'manharĩzéb u. Ma tô duré â na ãma ropé. Tawamhã Izaraéu nhihudu ma, taha â te te âhuri da ma tô tãma 'ru za'ra.

²¹ Tawamhã Mozési, Arãhã ma, te tãma tinha ãne: — E marĩ, ma tô ã hã a'uwẽ norĩ hã 'manharĩ za'ra, 're idasiwasété za'ra mono zé 're ihâimana mono u, a hã itẽme ãwisi za'ra da hã.

²² Tawamhã Arã ma te ãma sada'â ãne: — Ĩzada hã asiti'ru tõ. Aima hã waihu'u pese di, ã hã a'uwẽ norĩ õne u'â marĩ iwasédé te te 're i'manharĩ ze za'ra mono na hã.

²³ Tahawa ta norĩ hã ma tô ãne ĩma nharĩ za'ra: “Aibâ hã Mozési, Ezitu hawi we te te iwa'awazere ma, niha na tãma iromhâimanazé hã, wa norĩ wa te waihu'u za'ra õ di. Tahawa, ma'ãpé ihâiba'õ norĩ poto awã na niha hã marĩ wama 'manharĩ za'ra na, te te iwanhimroi mono da hã isipai'u.”

²⁴ Tahawa, wa hã wa tô tãma 'ru za'ra, ni'wam norĩ po're za'ruzé oru 'manharĩ na tãma ihâimana za'ra hã te te ĩma sani za'ra da, te te ĩma sõmri za'ra da. Tawamhã ta norĩ hã unhama u te sãmra wamhã, ma tô powawẽ zapu hâiba na hã si'manha!

²⁵ Tawamhã Mozési, dasima iwẽ na siwa'ru dahâimana za'ra da, Arã te te dawi isawi õ zém na ma tô waihu'u. Taha zarina te za isitob'ru norĩ hã ãma tiwa'ẽ za'ra.

²⁶ Tawamhã 'ri nhoré u 're idanhisisi mono zéb ãma hâiwi sa wamhã, ma tô ãne dama tinha: — Ni'wa hã, Uburé Danhib'apito niwĩ hâimana wamhã, we ãwa ĩtẽmemhã wisi! Tawamhã levita norĩ, ma tô uburé Mozési hã siwi uirĩ.

²⁷ Tahawa te Mozési hã tãma nharĩ za'ra ãne: — Uburé Danhib'apito, Izaraéu nhihudu norĩ te, 'Re ihâimana u'âsi mono, ma tô ti'ru, aihâiba mono bâ aba ate sib'ézé 'wa pa hã waibui wa'aba mono da, duré 'ri uwa 'rãsutu mono bâ iré ai'aba'ré wa'aba da, taha na asisãnawã norĩ, asiwaihu'u norĩ, duré aiwaptoma 're ihâimana za'ra mono norĩ hã ãma simroi wa'aba mono da.

²⁸ Tawamhã levita norĩ, Mozési te te iwaihu'uzé hã ma tô siwi 'manha. Tahawa taha bâtâ na ma tô aibâ norĩ 3 miu na hã siwi uprosi.

²⁹ Tahawa, Mozési, te levita norĩ ma nharĩ za'ra ãne: — Ã bâtâ na a norĩ wa'wa, ai'ra norĩ hã, duré asisãnawã norĩ wa'wa hã ma tô asiwi i'uprosi 'wa. Ãne wa, Uburé Danhib'apito ma, sasedoti na da'ãma romhuri'wa da hã ma tô asina tãma irowairébé za'ra wa'wa. Duré ãne hã 'manharĩ za'ra wa'aba wa, ma tô 'Re ihâimana u'âsi mono hã iwẽ na aima 'manharĩ za'ra wa'wa, ã bâtâ na hã.

³⁰ Tawamhã Mozési, awẽ bâtâ na te dama tinha ãne: — A norĩ wa'wa hã ma tô aiwasété pese za'ra wa'wa. Tane nherẽ, wa za duré ẽtẽ u sai'uri na sahu, Uburé Danhib'apito ma, te robzanhamri da. Ãté aiwasété za'ra wa'aba wa'âbâzéb da, wa za tãma ĩnhopru, te te aima pari za'ra wa'aba da, i'manharĩ wasété za'ra wa'aba zé hã.

³¹ Tawamhã Mozési, Uburé Danhib'apito ihâimanazéb u apâ morĩ wamhã, te ãne tãma tinha: — Ã norĩ a'uwẽ hã ma tô tiwasété pese za'ra. Ma tô ẽtẽ waipo pré oru na ihâiba'õ norĩ poto awã te te siwi i'manharĩ ãma hã tiwata za'ra.

³² Ĩzawi na hã, ma'ãpé iwasété za'ra zé hã ãma 'madâ'â za'ra tõ! Duré iwasété za'ra zé ãma 'madâ'â za'ra tõ da, asima wẽ'õ wamhã, ma'ãpé ĩnhisi hã 'wa'rutu, ate ibaihâ na asib'a'uwẽ norĩ nhisi na ãma 're iromnhihâtâ za'ra mono zéb 're ihâiba hã.

³³ Tawamhã Uburé Danhib'apito, te Mozésihi ma tinha ãne: — Tiwasédé te te ĩwi 're i'manharĩ za'ra mono norĩ nhisi si hã wa za tô uburé ĩte ibaihâ 'remhã te 're a'wa'rutu.

³⁴ Aimorĩ oto, danhimroi mono da, ro hã te aima ipisutuzéb u. Duré ãma aipo're pu'u za, ĩte hâiwa ãma romhuri'wa za te te i'asaprõnizém na hã. Tane nherẽ, bâdâ hã te za oto wi, ã hã a'uwẽ norĩ iwasété za'ra u'âbâ te ihâ za'ra zéb da hã.

³⁵ Tahawa, Uburé Danhib'apito dahâzé na ma tô Izaraéu nhihudu norĩ hã hâ za'ra. E marĩ wa. Ta norĩ hã Arãhã ma, te te 'ru za'ra wa, oru na powawẽ zapu te te 'manharĩ da hã.