Ezodu 31 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono, 'ri 're marĩ na romhuri'wa da, isipese norĩ te te ipisutu za'ra zé wasu'u

¹ Tawamhã Uburé Danhib'apito te Mozésihi ma tinha ãne:

² — Wa hã, Hur nhihudu hã Urihi 'ra, Bezareu hã, Zudaha nhihudu hawi a'uwẽ hã wa tô pisutu,

³ ĩpẽ'ẽzani sa'ẽtẽ na te tãma sõmri da. Wa tô rowaihu hã, isipe hã, duré uburé marĩ te te ãma 're i'ab'manharĩ waihu'u pese mono zé hã tãma tisõ,

⁴ ropodo te te ãma 're i'ab'manharĩ mono zéb da hã, oru na hã, ẽtẽ waipo prã prata na hã, duré isi'uwazi waipo na hã.

⁵ Ẽtẽ nhihârizé, duré marĩ nhi'riti wa te te 're i'aza'ra mono da hã iwa, wa tô isimiromhuri nhipe hã tãma tisõ, wede umozéb da hã, duré uburé marĩ imono bâ tinhib'rata na te te ãma 're i'ab'manharĩ mono zéb da hã.

⁶ Aisamatihi 'ra, Aoliabe, Dãhã nhihudu hawi a'uwẽ hã wa tô duré pisutu, isiré te te 're iromhuri mono da hã. Uburé marĩ tinhib'rata na te te 're i'manharĩ za'ra mono norĩ ma zama wa tô duré isimiromhuri waihu'u pese za'ra zé hã tãma sõmri za'ra, uburé te aima i'ru hã te te 'manharĩ za'ra da hã ãne:

⁷ Romhâ 'manharĩ na 'ri, 're ĩhâimana mono zé hã, ĩnhimiroti ré ĩte wedehâ're hã, taha nhidâzé hã, duré uburé 'ri 're marĩ 're ihâimana za'ra mono da hã,

⁸ wedeza hã, iwa marĩ 're isimi'wara mono da hã, oru uptabi na rob'uiwẽzé sima'warazé, uburé isiré marĩ norĩ hã, duré danhoprubzéb da, wedewa'u isadaze na da te ãma 're isazu za'ra mono zé hã,

⁹ danhoprubzéb da, danhimizama zatazé hã, uburé marĩ isiré ihâimana za'ra mono da hã, duré piza'a 're nho'a isima'warazéb ré hã,

¹⁰ zazahâ ihâi baihâire hã, duré da'uza iwazéb zahi, sasedoti Arã norĩ, ti'ra norĩ me ãma 're isi'uza za'ra mono da hã, sasedoti na te te da'ãma ĩma 're romhuri za'ra mono da wamhã,

¹¹ azeitona wa'u to da'rã ti'izéb da hã, duré wedewa'u isadazei ro, 'Re ihâimana u'âsi mono te 'ri 're wa'wa iwazéb zahi ãmab da hã. Uburé ã norĩ imono bâ, te aima ipisutu pese zéb zarina te za 'manharĩ za'ra.

Sabadu romhuri 'rãsudu dawa'utuzé wasu'u

¹² Tawamhã Uburé Danhib'apito Izaraéu nhihudu norĩ ma, te te tãma nharĩ za'ra da hã,

¹³ ma tô Mozésihi ma waihu'u ãne: — Ma'ãpé sabadu hã 're wazé pese za'ra wa'aba mono, ĩwa'utuzé bâtâ wa. Ã hã a norĩ wa'aba me iwasisaze za'ra zé hã te wasu'u, duré asihudu aba mono sidâpâsi, wa hã Uburé Danhib'apito ĩnhib'a'uwẽ da, te ĩsima i'aipisutu za'ra wa'aba zém na asiwi ãma 're ĩwaihu'u za'ra wa'aba mono zéb da hã.

¹⁴ Tahawa, dawa'utuzé bâdâ hã 're 'madâ'â pese za'ra wa'aba mono. E marĩ wa. Aima za'ra wa'aba hã bâdâ iwazéb zahi na 're hâimana mono wa. Duré ni'wa hã te te 're iwazé pese mono õ zarina, taha bâtâ na nherẽ, te te 're romhuri mono wamhã, te za dasiwi hã wĩrĩ ni.

¹⁵ 6 si bâtâ 're, 're iromhuri za'ra wa'aba mono da hã te aima 're hâimana za'ra wa'wa. Tane nherẽ, bâdâ ipire te 7 bâtâ ãma dawa'utuzé hã 're hâimana, ĩte hã. Tahawa, ni'wa taha bâtâ na siwa'ru marĩ na te te 're romhuri mono wamhã, te za dasiwi wĩrĩ ni.

¹⁶ Tahawa, te za Izaraéu nhihudu norĩ, ã hã bâdâ hã te te 're wazé pese za'ra, iwasisaze za'ra zé wasu'u 're hâimana u'âsi mono wa.

¹⁷ Õne u'â Izaraéu nhihudu norĩ me iwasisaze za'ra zé hã te tô wasu'u. E marĩ wa. Wa hã Uburé Danhib'apito, 6 si bâtâ 'remhã wa tô hâiwa norĩ ti'ai me hã 'manharĩ zahuré. Duré 7 bâtâ ãma hã wa tô romhuri hã sazâ. Wa tô oto wa'udu taha na.

¹⁸ Tawamhã 'Re ihâimana u'âsi mono, Mozésihi ma, Sina'i na ẽtẽ nhisi ãma te te nharĩ mono parimhã, ma tô ẽtẽpo hã tãma sõmri zahuré, tinhiptõmo na tinhimiroti na te te ãma tãma irob'ui'éré ré hã.