Ezodu 25 - ꞌRe Ihâimana Uꞌâsi Mono Zadawa Wasuꞌu

Romhâ 'manharĩ na 'ri iwazéb zahi wa, 're idanhoprub za'ra mono zé wasu'u

¹ Tawamhã Uburé Danhib'apito te Mozésihi ma tinha ãne:

² — Izaraéu nhihudu norĩ ma tãma nharĩ za'ra na, tinhoprubzé te te ĩma sõmri za'ra da. Ta norĩ pẽ'ẽ to sina te te isõmri za'ra si te za isõprub za'ra zé hã i'awaibu.

³ Niha wamhã, danhoprubzém norĩ hã ẽtẽ waipo pré oru na hã, niha wamhã ẽtẽ waipo prã prata na hã, niha wamhã isi'uwazi topsada brõzi na hã;

⁴ danhimizama zéré nhorõ uzé na hã, niha wamhã isõrõ uzéi pese na hã, niha wamhã isõrõ pré ro'o pese na hã; zazahâ isõrõ hâipesere na i'manharĩ na hã, duré zazahâ pone'ẽrebâ uzé zéré 'manharĩ na hã;

⁵ pone'ẽrebâ zéré mapure si'aibâ hâ da te 're ihâpré za'ra mono hã; danhimizama hâsu'ure hâi'ré hã, duré wede acacia na iwamri hã;

⁶ azeitona wa'u to rob'uiwẽzéb da hã; marĩ wa'u zadaze, azeitona wa'u to wazarizéb da, da'rã ti'izéb da hã, da te ãma sazui wa, te te irobzadazezéb da hã;

⁷ ẽne ônex na iwamri hã, duré ẽne ihâiba amo iwa'âbâ za'ẽne hã sasedoti ipire nho'utu ubuzéb ãma da te ihiri da hã.

⁸ Izaraéu nhihudu norĩ te za romhâ 'manharĩ na 'ri iwazéb zahi hã ĩma 'manharĩ za'ra, iwa'wab za'ra iwa 're ĩhâimana mono zéb da hã.

⁹ — Wa hã te aima ihâi'ré zarina, ma'ãpé romhâ 'manharĩ na 'ri hã, i're uburé marĩ 're isimasa mono zéb da zama hã 'manharĩ.

'Re ihâimana u'âsi mono te, wedehâ're 'manharĩzé wasu'u

¹⁰ — Izaraéu nhihudu norĩ ma nharĩ za'ra na, wede acacia na iwamri na wedehâ're te te siwi 'manharĩ da, misi metru na isadarata pibuzém na, 66 centimetru na i'a're si'uiwa u ipibuzém na, duré 66 centimetru na hâimomhã ipibuzém na.

¹¹ Te za duré baihâi pese na oru asiwi ãma isa'ra wa'aba mo, wedehâ're mana wawimhã, duré i'remhã. Te za isada'ré na hã ãma i'uirĩ za'ra wa'wa, oru 'manharĩ na hã.

¹² Tawamhã isi'uwazi zapodo hã te za duré asiwi i'manharĩ 'wa oru na. Ta norĩ hã te za ipara mono bâ ãma isasõmri za'ra wa'wa, si'uiwa na maparane si ãma simnhatã da.

¹³ Imramizéb da, te za wede acacia na iwamri na asiwi i'umoi wa'wa. Te za duré ta norĩ na hã baihâi pese na oru hã ãma asiwi isa'ra wa'aba mo.

¹⁴ Imramizéb da, te za isi'uwazi zapoto 'remhã asiwi tãma izai wa'wa, sahuré.

¹⁵ Tawamhã imramizéb da, wede umo, da te tãma iza zahuré hã da te dasiwi isani da hã mare di za.

¹⁶ Maparane ẽtẽpo hã za te aima isõmri zahuré hã te za wedehâ're 'remhã iza, ĩnhimiroti na rob'ui'éré ré hã.

¹⁷ — Oru uptabi na isidâzéb zama asiwi 'manharĩ aba, 1 metru na isadarata pibuzém na, duré 66 centimetru na i'a're si'uiwa u ipibuzém na.

¹⁸ Maparane ropodo sitẽme ipaihi papo 'rãsutu zahuré hã te za asiwi i'manharĩ 'wa ãma itété na oru na hã,

¹⁹ si'uiwa na isidâzé 'rãsutu hawi sitẽme isõ're zahuré da hã. Ã hã isidâzém na ãma isitom na te za asiwi i'manharĩ 'wa, misi haré i'manharĩ na.

²⁰ Tawamhã ropodo hã te za sitẽme tinho're zahuré, isidâzé te te 'madâ'â zahuré sina. Duré ipaihi zahuré te za tipapo na isidâzé hã upsibi zahuré.

²¹ Ẽtẽpo maparane za te aima isõmri zahuré hã, te za wedehâ're 're iza zahuré. Te za duré taha pari isidâzém na hã isidâ.

²² Tame isidâzém nhisiwi ropoto norĩ wa'wamhã wa za nasi asõpẽtẽ, Izaraéu nhihudu norĩ udâna ĩnhimiroti te aima sõmri da hã.