Ezodu 20 - ꞌRe Ihâimana Uꞌâsi Mono Zadawa Wasuꞌu

10 na 'Re ihâimana u'âsi mono tinhimiroti te te i'manharĩzé wasu'u

¹ Tawamhã 'Re ihâimana u'âsi mono ma tô tinha ãne:

² — Wa hã Uburé Danhib'apito, ate 'Re ihâimana u'âsi mono 'wa. Wa hã wa tô Ezitu ti'ai hawimhã, aipawa'âbâ ãna 're iromhuri za'ra wa'aba mono zém hawimhã ai'awazere 'wa.

³ — Aimawi ihâiba'õ ãma 're aiwata za'ra wa'aba mono õ di za. Ĩ'ãma si te za 're aiwata za'ra wa'aba mo.

⁴ — Romhâiba ãma 're aiwata za'ra wa'aba mono da, asima 're 'manharĩ za'ra wa'aba mono tõ, siwa'ru hâiwa na marĩ 're ihâimana za'ra mono na, ti'ai ãmam na, duré â 're ti'ai 'rowi uptabi 're ihâimana za'ra mono na hã.

⁵ Romhâiba nho're aihi'rãtitõ tãma 're asimroi wa'aba mono tõ. Ãma 're aiwata za'ra wa'aba mono tõ. E marĩ wa. Wa hã Uburé Danhib'apito, ate wa'wa 'Re ihâimana u'âsi mono. Ĩ'upana aimawi ihâiba'õ norĩ ãma dawata da hã ĩma 'ru ti. Ĩzada 're isiti'rui wairébé za'ra mono norĩ hã, wa te te 're hâ za'ra, isihudu 'ra norĩ hã, duré isihudu 'ra i'ra norĩ u zama, maparane si'uiwa na dapodo ihâimana u hã.

⁶ Tane nherẽ, wa hã te te 're ĩzawi pese za'ra mono norĩ ma hã, duré ĩnhimiroti te te 're iwapari pese za'ra mono norĩ ma hã, wa iwẽ na hã tãma 're ĩhâimana za'ra. Duré ta norĩ u'âbâ isihudu mono sidâpâsi, wa iwẽ hã te tãma 're 'manharĩ u'âsi za'ra.

⁷ — Ĩnhisi na asiwi 're ĩwazé wa'aba mono ãna taré ãma 're nharĩ za'ra wa'aba mono tõ. E marĩ wa. Wa hã Uburé Danhib'apito, ate wa'wa 'Re ihâimana u'âsi mono, wa ĩnhisi te te 're iwazéb za'ra mono õ norĩ ma te tãma 're arob'manharĩ.

⁸ — Sabadu dawa'utuzé iwazéb zahi hã 're 'madâ'â pese za'ra wa'aba mono, taha bâtâ na ĩma si 're aihâimana za'ra wa'aba mono da.

⁹ 6 bâtâ 'rep si te za asimiromhuri ré hã 're aihâimana za'ra wa'aba mo.

¹⁰ Tane nherẽ, sabadu 7 bâtâ ãma hã dawa'utuzéb da si hã, Uburé Danhib'apito, ate za'ra wa'wa 'Re ihâimana u'âsi mono te wa. Taha bâtâ na 're romhuri za'ra wa'aba mono õ di za, ai'ra si'aibâ norĩ, ai'ra sipi'õ norĩ, pawa'âbâ ãna aima romhuri'wa norĩ zama, duré asimizama aba norĩ zama. Asiré a'uwẽ'õ norĩ asipti'ai 're, 're ihâimana za'ra mono norĩ zama te te 're romhuri za'ra mono õ di za.

¹¹ Wa hã, Uburé Danhib'apito, 6 bâtâ 're, wa tô hâiwa hã, ti'a hã, duré â wa 're ihâimana za'ra mono da hã ab'manha. Tawamhã 7 bâtâ ãma wa tô oto wa'udu. Tahawa wa tô sabadu bâdâ iwazéb zahi na aimawi 're ihâimana mono da hã pisutu.

¹² — Aimama hã, duré ana te za 're iwazé pese za'ra wa'aba mo, ti'a te aima isõmri za'ra wa'aba 're, 're aihâimana hâ za'ra wa'aba mono da.

¹³ — 'Re danhimroi wa'aba mono tõ.

¹⁴ — Aimro na asiwi 're asimisaihuri za'ra wa'aba mono tõ.

¹⁵ — Dawi 're romnhimi'uri za'ra wa'aba mono tõ.

¹⁶ — Asadawa nhipese na dama 're dawasu'u wasété za'ra wa'aba mono tõ.

¹⁷ — Asiré nhorõwa hã 're 'ruiwapari za'ra wa'aba mono tõ. Duré asiré mro hã 're 'ruiwapari za'ra wa'aba mono tõ, pawa'âbâ ãna tãma romhuri'wa norĩ zama, ite powawẽ hã, duré ite awaru po're pore hã. Siwa'ru uburé marĩ tãma 're ihâimana za'ra mono hã 're 'ruiwapari za'ra wa'aba mono tõ.

Dapahi na idahâimana za'ra zé wasu'u

¹⁸ Tawamhã tãirãrã, duré danhimnhihârâzé hârâ hã ma tô wapari za'ra ni. Ma tô tã si'ubuzi hã, duré romnhizé ẽtẽ hawi iwatobro hã 'madâ'â za'ra ni. Tawamhã tãma darẽrẽ'ẽ za'ra wa, ma tô romhâ na tahâimana za'ra ni.

¹⁹ Tahawa, Mozésihi ma, te ãne tãma nharĩ za'ra ni: — A hã wama nharĩ za'ra wamhã, wa za wasiwi aiwapari ni, iwẽ na hã. Tane nherẽ, 'Re ihâimana u'âsi mono si te te wama nharĩ za'ra õ di za, wasi'utõrĩ tõ da.

²⁰ Tawamhã Mozési, ma ãma da'azada'â ãne: — Aipahi za'ra wa'aba tõ. E marĩ wa. 'Re ihâimana u'âsi mono hã te sima wẽ, te te aipibu za'ra wa'aba da, tãma 're i'aipahi za'ra wa'aba mono zéb ré 're aihâimana u'âsi za'ra wa'aba mono wa, aiwasété wi 're aipizari za'ra wa'aba mono da.

²¹ Tawamhã romhâ na te aimasam ni. Mozésihi si te hâiwa 'rãdâ'â ãma 'Re ihâimana u'âsi mono ihâimanazéb u 'râwi itẽmemhã sina rotété.

Sisiwipsi ẽtẽ za'ra na rotizé wasu'u

²² Uburé Danhib'apito, Izaraéu nhihudu norĩ ma, te te tãma nharĩ za'ra da, ma tô Mozésihi ma waihu'u ãne: — Hâiwa hawi te inharĩzé hã, ma tô a norĩ wa'wa hã i'madâ'â za'ra wa'wa.

²³ Romhâiba hã ẽtẽ waipo prã prata na duré ẽtẽ waipo pré oru na asima 're 'manharĩ za'ra wa'aba mono tõ, ĩ'ãma 're i'aiwata za'ra wa'aba mono siré hã, ãma 're aiwata za'ra wa'aba mono da hã.

²⁴ Ma'ãpé ti'a na ĩma danhimizama zatazéb da hã asiwi 're 'manharĩ aba mono, taha nhisiwi ate pone'ẽrebâ zéré mapure hã, duré powawẽ hã 're zata za'ra wa'aba mono da hã, danhoprubzé ãma irowẽ zanizé hã. Ro ĩ'ãma 're aiwata za'ra wa'aba mono da, te aima 're i'apisutu aba mono zéb sidâpâsi, wa za ãma atẽme wa'aba hã 're ĩne, iwẽ na hã te 're aipawaptob za'ra wa'aba mono da.

²⁵ Ĩma danhimizama zatazéb da, ẽtẽ za'ra na asiwi 're 'manharĩ aba mono da wamhã, ẽtẽ nhizâri siromo na asiwi 're 'manharĩ aba mono õ di za. E marĩ wa. Isi'uwazi na 're sihâri za'ra wa'aba mono wamhã, ibâi õ di za ĩma hã. Te za wamna za.

²⁶ Ĩma danhimizama zatazém na ãma 're idazai'uri za'ra mono zéb da hã asiwi 're 'manharĩ aba mono õ di za, taha na asahâpâi baba ti'ai hawi asimarĩ za'ra wa'wa ai'uza zaroma aiwi 're isihâi'ré za'ra wa'aba mono hã sõ'awi da te aiwi 're 'madâ'â za'ra wa'aba mono tõ da.