Ezodu 19 - ꞌRe Ihâimana Uꞌâsi Mono Zadawa Wasuꞌu

Izaraéu nhihudu norĩ Sina'i na ẽtẽ nhisi zahâpâ u isihutuzé wasu'u

^1-2 Tawamhã Izaraéu nhihudu norĩ, ma tô Refidĩ na romnhisi hawimhã ai'aba'ré. Ezitu hawi iwairébézém na si'ubdatõ a'amo ãma si'utõrĩ za'ra pari, tô taha bâtâ na ma tô a'ubuni wi rop si 're irosa'wari mono u hã aihutu, Sina'i ẽtẽ 'rãihâ zahâpâ u hã. Tame ma tô isahâpâ 'ri hã te te sima sõré.

³ Tawamhã Mozési, 'Re ihâimana u'âsi mono te te sõpẽtẽ da, ma tô ẽtẽ na sai'u. Tawamhã Uburé Danhib'apito ma tô ẽtẽ nhisi hawi 'mahâ, Mozési hã. Ãne te tãma tinha: — Zacoho nhihudu norĩ ma, te za tãma inharĩ za'ra, Izaraéu nhihudu norĩ ma, ãne:

⁴ “Wa hã Uburé Danhib'apito, ezipsiu norĩ ma, te i'manharĩzé ma tô atõmo na a norĩ wa'wa hã i'madâ'â za'ra wa'wa. Si'õmo wawẽ tipaihi na ti'ra te te 're i'upari za'ra mono ne, 'râwi te we ĩsitẽme i'asimroi wa'aba mono zéb zama ma tô atõmo na hã i'madâ'â za'ra wa'wa.

⁵ Ãne ãhã na hã wa za aima waihu'u za'ra wa'wa. A norĩ wa'wa hã 're ĩwapari pese za'ra wa'aba mono wamhã, duré ĩnhimiroti na ãma 're uwaimrami za'ra wa'aba mono wamhã, ĩnhib'a'uwẽ te za ĩma 're aihâimana za'ra wa'aba mo. Ropâ uburé 're idahâimana za'ra mono, tô ĩte hã. Tane nherẽ, a norĩ wa'aba si te za tô ĩnhib'a'uwẽ na ĩma 're aihâimana za'ra wa'aba mo, te ĩsima aipisutu za'ra wa'aba wa.

⁶ A norĩ wa'wa aimawi te za ĩnhib'a'uwẽ na ĩma si 're aihâimana za'ra wa'aba mo, sasedoti na ĩma 're romhuri za'ra wa'aba mono da.” Ãne te za Izaraéu nhihudu norĩ ma irowasu'u za'ra.

⁷ Tawamhã Mozési ma tô apâ ẽtẽ na hã si'ra. Tahawa, dama i'rãnho'õmo norĩ zô te hâ, Uburé Danhib'apito te te tãma iwaihu'uzé hã te te tãma wasu'u za'ra da.

⁸ Tawamhã uburé ma tô aiwapsi ãma sada'âbâ za'ra ni ãne: — Uburé Danhib'apito te te iwaihu'uzé hã, wa za tô wasiwi 'manharĩ ni uburé. Tawamhã Mozési, da te ãma isada'âbâ za'ra zém na hã, ma tô Uburé Danhib'apito ma hã ãma tãma siri apâ.

⁹ Tahawa, õ hã te duré Mozésihi ma tinha ãne: — Wa te wasima irobzanhamrizé da te wapari za'ra wa, ta hawim haré oto da te dasiwi 're ai'umnhasi mono da hã, wa za hâiwa nhirõno i'rãdâ'â hawi aima tinha. Tawamhã Mozési, da te ãma isada'âbâ za'ra zé, te Uburé Danhib'apito ma hã wasu'u uburé.

¹⁰ Uburé Danhib'apito te duré tawamhã tãma tinha ãne: — Ma'ãpé aimorĩ, dama nharĩ za'ra da hã, ã bâtâ na duré awẽmhã dasipese za'ra da, ĩ'ãma idawata za'ra zéb da hã. Duré da'uza hã te za hâ'upsõ za'ra ni za.

¹¹ Tawamhã awẽb amo na da, te za danhimire sina tahâimana za'ra ni. Taha bâtâ na wa za Sina'i na ẽtẽ 'rãihâ nhisi u hã si'ra, za da te dasiwi ĩ'madâ'â da hã.

¹² Ma'ãpé duré ẽtẽ zahâpâi baba iwawi na hã ãma uirĩ na, ãma dazaihâ za'ra tõ da, iwawizém na hã. Duré dama nharĩ za'ra na ẽtẽ na da'mazai'uri tõ da, duré 'râwimhã itẽme da'maiwisi tõ da. Ni'wa duré tipara na te te upi wamhã, za da te dasiwi wĩrĩ õ'umnhasite.

¹³ Ni'wa, tinhib'rata na hã te te upi õ di za. Ẽtẽ na, niha wamhã, duré ti'i na te za dasiwi wĩrĩ ni za. Ãne te za dama i'manharĩ za'ra wa'wa, abaze norĩ ma zama. Danhimnhihârâzé hârâ wapsi te za ẽtẽ u hã dasina rotété za'ra ni za.

¹⁴ Tawamhã Mozési ẽtẽ hawi te te si'rai wamhã, ma tô 'Re ihâimana u'âsi mono ãma dawata za'ra da, dasipesezé hã dama ti'ru. Tahawa, ma tô dasi'uzazé hã da te hâ'upsõ.

¹⁵ Tawamhã Mozési te dama tinha ãne: — Ma'ãpé awẽ amo na da, asimire sina aihâimana za'ra wa'aba, pi'õ na asiwaihu'u na aihâimana za'ra wa'aba ãna.

¹⁶ Tawamhã si'ubdatõ bâtâ ãma mararé ma tô tãirãrã hã, duré tã si'ubuzi hã watobro. Hâiwa 'rãdâ hã ma tô duré ẽtẽ nhisiwimhã sihâi'ré. Tahawa, ma tô danhimnhihârâzé hârâ hã wapari za'ra ni. Tawamhã uburé 'ri nhoré ãma idahâimana za'ra hã ma tô dapahi te tarẽrẽ'ẽ za'ra ni.

¹⁷ Tawamhã Mozési 'ri nhoré hawimhã, 'Re ihâimana u'âsi mono da te dasiwi sõpẽtẽ da, te te oto danhimroi mono wamhã, ma tô ẽtẽ zahâpâ mazahâri za'ra ni.

¹⁸ Tahawa, romnhizé ma tô Sina'i na ẽtẽ nhisi hã upsi. E marĩ wa. Uburé Danhib'apito ẽtẽ nhisiwi unhama wa'wa te te ãma si'rai wa. Romnhizé hã te hâimo si'réi mono, robzebrezém hawi unhama nhizé 're isi'réi mono ne. Ãhã wa, ma tô aihĩni tãma tarẽrẽ'ẽ za'ra ni.

¹⁹ Tawamhã danhimnhihârâzém hârâ hã ma tô hârâ nhiptete mono. Tawamhã Mozési te tinha. Ãhã wa, ma tô 'Re ihâimana u'âsi mono hã tãirãrã'ã siwa'ro'o sada'â.

²⁰ Tawamhã Uburé Danhib'apito Sina'i na ẽtẽ nhisi u ma tô si'ra. Te te si'rai wamhã, ma tô Mozési hã 'mahâ, itẽme morĩ da 'râwi. Tahawa, te te itẽme sai'uri wamhã,

²¹ ma tô Uburé Danhib'apito tãma tinha ãne: — Dapo're pu'u za'ra da hã datẽme si'ra na, ti'ai wawizém na hã ãma dazaihâ za'ra tõ da, da te dasiwi ĩ'madâ'â da hã. Ãma dazaihâ za'ra wamhã, te za da'ahâ na tadâ'â za'ra ni.

²² Sasedoti norĩ zama po're pu'u za'ra na, ta norĩ hã duré sipese za'ra da, 'râwi ĩtẽme te te sina rotété za'ra da. Dame sipese za'ra õ wamhã, wa za uprosi za.

²³ Tawamhã Mozési, Uburé Danhib'apito ma, te tinha ãne: — Ẽtẽ u hã dasi'aba'réi õ di za. E marĩ wa. A hã ma tô wama iwaihu'u za'ra, ã hã ẽne iwazéb zahi uptabi na ihâiba hã wa te wasiwi wazéb da. Ma tô duré i'ru, isahâpâi baba ti'ai wawizé hã hâimana da.

²⁴ Uburé Danhib'apito, ma te ãma sada'â tawamhã ãne: — A'â tô si'ra na. Tawamhã te za Arãhã me we apâ ẽtẽ na isai'uri 'wa za. Tane nherẽ, sasedoti norĩ, a'uwẽ norĩ me hã, ti'ai wawi na hã we ãma zaihâ za'ra tõ, ĩhâimanazéb u we ĩtẽme te te isai'uri za'ra da hã. Ãnei õ wamhã, wa za uprosi.

²⁵ Tawamhã Mozési, idahâimana za'ra zéb u te te si'rai wamhã, ma tô 'Re ihâimana u'âsi mono te te inharĩzé hã tãma wasu'u za'ra.