Ezodu 18 - ꞌRe Ihâimana Uꞌâsi Mono Zadawa Wasuꞌu

Zetru na isisi, Mozési te te isabuzé wasu'u

¹ Tawamhã Zetru, sasedoti, Mozésihi maprewa, Midiã na romnhisi ãma 're ihâimana mono hã, ma tô 'Re ihâimana u'âsi mono, uburé Mozésihi ma, duré Izaraéu nhihudu norĩ ma, te te 're i'ab'manharĩ wẽ mono zé hã waihu'u. Duré Ezitu hawi te te isani za'ra zéb zama ma tô waihu'u.

² Tahawa, Mozésihi hâimanazéb u hã ma tô mo. Mozésihi mro Zipora hã te siré saprõ. Mozési, ma tô aré Ziporaha ma rob'ru, i'ra maparane norĩ ré, Zetru nhorõwa u morĩ da hã.

³ Isisi hã Gésõ na. E marĩ wa. Mozési hã te te nharĩ wa ãne: “Wa hã, wa tô wasiré a'uwẽ'õ norĩ nhipti'ai ãma 're ĩhâimana.”

⁴ Ihâiba amo nhisi hã, Eriézé na. E marĩ wa. Mozési te te nharĩ wa ãne: “Ĩmama te, 'Re ihâimana u'âsi mono ma tô ĩnho'reptu, Ezitu ãma apito Fara'oho nhi'wa pa wi hã.”

⁵ Tawamhã Zetru, Mozésihi maprewa, ti'ra sipi'õi ré, maparane i'ra norĩ ré, ma tô supara 'ré na ropsi 're iropsa'wari mono ãma Mozési te te sima i'ri nhoré u hã mo, ẽne iwazéb zahi ãma.

⁶ Ma tô tisiwana tisa'õmo ma timreme hã tisõ, za oto ti'ra sipi'õi ré, duré maparane i'ra norĩ ré iwisi na hã.

⁷ Tawamhã Mozési, Zetru te te sina uzusi da ma tô watobro. Oto itẽme wisi wamhã, ma tô tãma iwazéb zarina tãma aiwẽ'ẽ. Tob'rata hârâ na ma tô duré sawi. Rowẽ zô te duré sadanharĩ zahuré. Taha pari Mozésihi nhorõwa u ma te oto tizasi zahuré siré.

⁸ Tawamhã timaprebaba ma, Uburé Danhib'apito Izaraéu nhihudu norĩ tãma isawi zarina, Ezitu te apito Fara'oho ma, duré ezipsiu norĩ ma, uburé marĩ te te tãma i'manharĩ za'ra zé hã ma tô tãma wasu'u. Duré rom na 're danomro mono ré, ropire dama hâimana za'ra wa, te te ida'anho'reptu na zama ma tô tãma wasu'u.

⁹ Ãne hã Zetru te te wapari wamhã, tãma hã rowẽ uptabi di, Uburé Danhib'apito, Izaraéu nhihudu norĩ ma, te te i'manharĩzéb zabâdâ hã, Ezitu hawi te te isani za'ra zém na hã.

¹⁰ Tahawa, te ãne tinha: — Uburé Danhib'apito ãma wa ĩwata, ezipsiu norĩ nhib'rata hawi, duré ta norĩ nhib'apito nhib'rata hawi te te ai'awazere aba wa!

¹¹ Wa tô oto waihu'u ãhã na awa'awi na hã Uburé Danhib'apito, isiptete uptabi na hã uburé ihâiba'õ norĩ nhiptete nhipai u. E marĩ wa. Ta hã Izaraéu nhihudu norĩ, ezipsiu norĩ nhiptetezém hawi te te sõ'reptu za'ra wa, tãma iwazéb'õ za'ra sina, marĩ te te tãma 're 'manharĩ wasété za'ra mono ré.

¹² Tawamhã Zetru, Mozésihi maprewa, 'Re ihâimana u'âsi mono ma, ma tô tinhimizama zata na tãma tinhopru. Tahawa, ma tô Arã norĩ hã, uburé Izaraéu nhihudu nhib'ihâ'a norĩ me hã ime ai'aba'ré, 'Re ihâimana u'âsi mono nho're imaprebaba siré saihuri da hã.

Mozési tipawapto'wa da, te te ipisutu za'ra norĩ wasu'u

¹³ Tawamhã awẽ bâtâ na Mozési ma tô dama nhamra, niha na te te dama arowairébé da hã. Taha ré ma tô mararé hawim haré, ãma imarazéb u hã tihâiba, te te dama arowairébé ré.

¹⁴ Tawamhã Zetru, Mozési, uburé marĩ te te dama i'manharĩzé te te 'madâ'â wamhã, ma tô tãma tinha ãne: — E marĩ da, ma tô ãne hã i'manha. E marĩ da, ma tô duré asiwaprosi marĩ na hã dama i'arowairé. Uburé hâiwi idasimasam norĩ mararé hawim haré, marazéb u hã ma tô dahi zé ãna dasiwi ai'uirĩ ni.

¹⁵ Tawamhã Mozési ma te ãma tãma wa'rã ãne: — We ĩzô danhopré wa, 'Re ihâimana u'âsi mono marĩ te te sima iwẽzé hã da te waihu'u za'ra da.

¹⁶ Ni'wam norĩ, marĩ na sisada ihâimana zahuré hã, te za we ĩtẽme tineb zahuré, te ãma tãma rowairébé zahuré da, i'uwaibaba na. Tawamhã wa za duré 'Re ihâimana u'âsi mono nhimiroti na hã uburé ãma tãma rowasu'u zahuré za.

¹⁷ Tawamhã Zetru, te tãma tinha ãne: — Marĩ i'manharĩ hã, isarinai õ di.

¹⁸ Ãne wamhã, aiwasutu uptabi di za. Duré asiré a'uwẽ norĩ zama wasutu uptabi za'ra di za. Ã hã romhuri hã pire uptabi di, asiwaprosi i'manharĩ da hã.

¹⁹ Awa'awi na hã te za ĩwapa, aima ĩnhimirotizém na hã. Tawamhã 'Re ihâimana u'âsi mono si te za aipawapto za! A hã danhib'ihâ'a na te tô rob'uwaibaba na si 'Re ihâimana u'âsi mono nho'remhã 're aihâimana mo. Te duré tô rob'uwaibaba na si niha hã date romreme mono hã tãma 're i'a'wapéi mo.

²⁰ Tawamhã a hã te za 'Re ihâimana u'âsi mono nhimiroti na hã ãma tãma 're i'arowasu'u mo. Duré te za ãma tãma 're i'azaprĩ mo isimiroti na hã, za marĩ te te 're i'manharĩ za'ra mono zéb da hã, duré niha na za 're ihâimana za'ra mono zéb da hã.

²¹ Te za ni'wam norĩ aibâ marĩ tãma i'manharĩ waihu'u pe hã ipisutu za'ra, danhib'ihâ'a na dama 're hâimana za'ra mono da hã, miu na dahâiba norĩ nhib'ihâ'a da hã, 100 na, 50 na, duré 10 na. Aibâ norĩ 'Re ihâimana u'âsi mono te te 're iwazé pese za'ra mono hã, dama i'umnhasi za'ẽtẽ za'ra norĩ, sena na 're ihâimana za'ra mono hã.

²² Ta norĩ si te za marĩ na hã te te dama 're rowairébé za'ra. Duré te za dama ipire si niha na romreme hã te te aima 're ãwisi za'ra. Dama iwapu norĩ na si te za tô õ norĩ hã niha na marĩ na te te dama 're rowairébé za'ra. Ane wamhã, te za tô aima tiwapu za. E marĩ wa. Õ norĩ hã te za romhuri ipire na hã te te siwi 're aipawapto.

²³ Ane hã a hã 're 'manharĩ mono wamhã, duré 'Re ihâimana u'âsi mono ãne hã te te aima pisutu wamhã, te za asiptete na sada mono hã 're aihâimana mo. Tawamhã te za uburé dama 're i'arowairébé mono zéb ré apâ danhorõwa u hã dato sina da te dasina 're siri za'ra za.

²⁴ Tawamhã Mozési, Zetruhu nhimiroti na te te ãma sazei wa,

²⁵ ma tô Izaraéu nhihudu norĩ 'remhã aibâ norĩ marĩ tãma i'manharĩ waihu'u pese za'ra hã pisutu za'ra. Tahawa, miu na dahâiba norĩ nhib'ihâ'a da hã, 100 na dahâiba norĩ nhib'ihâ'a da hã, 50 na dahâiba norĩ nhib'ihâ'a da hã, duré 10 na dahâiba norĩ nhib'ihâ'a da hã, ma tô oto sõré.

²⁶ Tawamhã ta norĩ hã, marĩ na te te dama 're irowairébé za'ra mono na hã, ma tô ãma 're hâimana u'âsi za'ra. Niha hã marĩ dama ipire si ma tô Mozésihi ma hã niha na romreme hã te te tãma 're ãwisi za'ra. Niha hã marĩ iwapu na si, ma tô õ norĩ hã 'râwi te te dama ãma 're rowairébé za'ra.

²⁷ Tawamhã Mozési norĩ timaprebaba me sisawi zahuré wamhã, ma tô apâ tinhipti'ai u hã mo, Zetru hã.