Ezodu 17 - ꞌRe Ihâimana Uꞌâsi Mono Zadawa Wasuꞌu

Refidĩ na romnhisi ãma, â ẽtẽ tõmo wawẽ hawi ipu'uzé wasu'u

¹ Tawamhã Izaraéu nhihudu norĩ, rop si 're irosa'wari mono ãma Sĩ na romnhisi hawi ma tô oto wairé. Wairébé wamhã, ma tô 're nomro, ro mono bâ Uburé Danhib'apito te te tãma iwaihu'u za'ra zéb zarina. Refidĩ na romnhisi ãma ma tô tawamhã sima 'ri nhoré za'ra. Tane nherẽ, tamemhã â hã 'maihâimana õ di, te te i'âhuri da hã.

² Tahawa, Mozésihi zada hâimana za'ra wa, tãma siwapsari za'ra wamhã, ma tô ãne tãma nharĩ za'ra: — Â hã ma'ãpé wama sõmri za'ra na, wa te i'âhuri da hã. Tawamhã Mozési, ma ãma sada'âbâ za'ra ãne: — E marĩ wa, te ĩma aiwapsari za'ra wa'wa. Duré e marĩ da, te Uburé Danhib'apito hã niha marĩ te te i'manharĩzéb zô asiwi isib'raptẽrẽ 'wa.

³ Tane nherẽ, 'rubu na dahâimana za'ra wa, ma tô dasiwapsari na hã ãma uzusi za'ra ni. Tahawa, Mozésihi da, dahâimana za'ra wa, te sa'ẽtẽ nasi dasiwi 'mahârâ ni. Ãne te tãma nharĩ za'ra ni: — E marĩ da, ma tô Ezitu hawimhã we iwa'awaze bété. E 'rubu na taré wanhimro da bété, duré wa'ra norĩ zama taré wazu ãma simro da, duré wanhimizama norĩ zama taré wazu ãma simro da.

⁴ Tahawa, Mozési te Uburé Danhib'apito wi hã rowaptẽ ãne: — E marĩ, wa za ã hã a'uwẽ norĩ ma hã 'manha. Te za ĩ'ãma sima rosa'rata za'ra, ẽtẽ na te te siwi ĩwĩrĩ da hã.

⁵ Tawamhã Uburé Danhib'apito, te Mozésihi ma tinha ãne: — Ma'ãpé danhib'ihâ'a norĩ hã 'maipisutu za'ra na, ta norĩ siré danhowa ime i'aimorĩ za'ra da hã. Tahawa te za asiwazusizéb zama asiré hã i'â, panho'u Nilu na isisi ãma i'azârizé hã.

⁶ Tawamhã wa hã wa za ẽtẽ nhisiwimhã asõ'remhã za, Sina'i na ẽtẽ nhisi ãmamhã. Tawamhã a hã te za ẽtẽ tõmo wawẽ hã i'azâ, ihawi â ipu'u da hã, da te âhuri da. Ãne ma tô Mozési hã 'manha, Izaraéu nhihudu nhib'ihâ'a norĩ nho'a.

⁷ Tahawa, Mozési, ã hã ro hã ma tô sisi ãne, isisi maparane 're hâimana mono da, Masa na duré Meriba na. E marĩ wa. Izaraéu nhihudu norĩ hã, Mozésihi ma siwapsari za'ra wa, duré Uburé Danhib'apito hã niha marĩ te te i'manharĩzéb zô te te siwi pibui wa, te te ãne siwi sadanharĩ wa: — Wanhib'apito, e te wasiré aihâimana za'ra. E mare di.

Amalequita norĩ 'wapé za'ra zé wasu'u

⁸ Tawamhã amalequita norĩ, ma tô Izaraéu nhihudu norĩ zô hã tipra. Ãhã wa, Refidĩ na romnhisi ãma te oto ai'wapé za'ra.

⁹ Tawamhã Mozési, Zozuéhé ma, ma te ãne tãma waihu'u: — Ni'wam norĩ aibâ hã, ma'ãpé pisutu za'ra na, awẽ mararé ime aimorĩ za'ra da, amalequita norĩ 'wapé za'ra wa'aba da. Tawamhã wa hã wa za ẽtẽ nhisiwi hã za, ĩsiwazusizé 'Re ihâimana u'âsi mono te te ĩma ipisudu te tété sina.

¹⁰ Tawamhã Zozué, Mozési te te tãma iwaihu'uzéb zarina, ma tô amalequita norĩ siré te te a'wapé da hã mo. Taha ré Mozési norĩ, Arãhã me, Hur na isisi me, ma tô ẽtẽ na siré sai'uri za'ra.

¹¹ Mozési hã tipaihi hâimo nasi apâ te te sarõtõ wamhã, Izaraéu nhihudu norĩ hã te nasi aré oto tô da'ãma ai'uté za'ra. Tane nherẽ, paihi zadâ'â wa, te te si'rai wamhã, amalequita norĩ te nasi aré oto tô duré asa ãma ai'uté za'ra.

¹² Tawamhã paihi zadâ'â wa, Arã norĩ, Hur na isisi me, ma tô ẽne hã tãma 'maihiri zahuré, Mozési ãma isãmrazéb da hã. Tahawa, paihi si'uiwa na ma tô paihi upari zahuré hâimom haré. Tawamhã bâdâ isébrézéb u ma tô tipaihi hâimo te te wẽ haré nhamra.

¹³ Ãne Zozué, amalequita norĩ ãma uburé te te i'ai'uté za'ra zé hã.

¹⁴ Tahawa, Uburé Danhib'apito Mozésihi ma, te tinha ãne: — Da'ãma i'ai'uté za'ra wa'aba zém na hã ma'ãpé ãma romnhihâtâ, ãma 're i'asipo're pu'u u'âsi za'ra wa'aba mono zéb da hã. Duré Zozuéhé ma, ĩzadawa wasu'u na, wa hã wa za amalequita norĩ hã uprosi za.

¹⁵ Tawamhã Mozési, ma tô ẽtẽ za'ra hã 'manha. Tahawa, ma tô ãne sisi: “Uburé Danhib'apito, dasi'wapé da, zazahâi waré hâimo isipra tẽme 're idasito mono ne, te ĩnhiptetezé hã ĩma tihâiba.”

¹⁶ Taha pari te ãne tãma tinha: — Uburé Danhib'apito te, zazahâi waré hâimom haré asiwi tété wẽ u'âsi aba! Ta hã te za õne u'â amalequita norĩ hã te te 're a'wapé za!