Ezodu 15 - ꞌRe Ihâimana Uꞌâsi Mono Zadawa Wasuꞌu

Mozési isõ'rezé wasu'u

¹ Tawamhã Mozési, Izaraéu nhihudu norĩ me, Uburé Danhib'apito ãma hã ma tô tinho're za'ra ãne: Uburé Danhib'apito ma, wa za tãma 're ĩnho're u'âsi. E marĩ wa. Õ hã te te da'ãma ai'uté wẽ dâ'âsina; Õ hã ma tô awaru norĩ hã, duré awaru na isi'wapéi'wa norĩ hã, â u hã sãmra.

² Uburé Danhib'apito hã siptete na ĩ'wawi 're isimapa mono 'wa; Õ hã ma tô ĩnho'reptu. Õ hã, ĩte 'Re ihâimana u'âsi mono wa, wa za ãma ĩwata. Õ hã duré, ĩmama te 'Re ihâimana u'âsi mono. Iwaihu'u pese na zama ĩnho're na hã wa za duré ãma 're ĩwata u'âsi.

³ Uburé Danhib'apito hã isi'wapéi'wa; isisi hã Uburé Danhib'apito.

⁴ Õ hã ma tô Ezitu te dasi'wapéi 'manharĩ'wa norĩ hã, duré wedewara zapore na dasi'wapézé hã, â u hã sãmra; duré dasi'wapéi 'manharĩ'wa norĩ nhib'ihâ'a iwẽ hã, ma tô Âpré na â nhisi na hã asisi.

⁵ Ma tô â 'rehâ uptabi hã suwa za'ra; ẽtẽ ne, ma tô duré â 'rehâ uptabi u hã asisi.

⁶ Uburé Danhib'apito asib'rata nhimire niwĩmhã, asiptede hã sa'ẽtẽ uptabi di; ta hã ma tô asitob'ru norĩ hã te te nhinhizu pese za'ra.

⁷ E niha iwẽ uptabi da'ãma i'ai'utézé hã! Asitob'ru norĩ ãma ai'uté za'ra wa, sada i'asiti'rui watobro za'ra zarina, ma tô duré a hã amnho teihi 'ré ne hã ãma isazu za'ra.

⁸ A hã â sa'uri wamhã, ma tô â hã ti'âtâ; ma tô isitõmo si'uiwa na taré ti'rãihâ zahuré, duré ma tô â 'rehâ uptabi 'rowimhã â u'ẽtẽ ne â hã titete.

⁹ Tahawa, te wanhitob'ru norĩ hã nharĩ za'ra ãne: “Isarina wasi'aba'réi wamhã, wa za wasiwi sasãmri za'ra ni za; tawamhã marĩ tãma ihâimana za'ra wa te tiwi iwaibu za'ra hã, te za uburé wama tihâimana za'ra. Tawamhã duré wate sib'ézé 'wa pa na hã wa za wasiwi uprosi ni za.”

¹⁰ Tane nherẽ, a hã Uburé Danhib'apito, â sa'uri wa, ma tô â hã suwa za'ra, ezipsiu norĩ hã; duré marĩ pire zém ne hã ma tô â za'ẽtẽ 'rowimhã asisi.

¹¹ Uburé Danhib'apito, ni'wa asine hã hâimana õ di, ãma 're idawata za'ra mono hã! E 'wa te asine ipire uptabi hã 're hâimana, iwasété'õ hã. E 'wa hã te za duré dama iwaihu'u'õ hã te te 're ab'manharĩ, a hã marĩ 're i'ab'manharĩ mono ne.

¹² Asib'rata nhimire hâimo wẽ wamhã, wa'rui'wa norĩ wei wazarina isisa'rei mono hã, ma tô ti'a hã suwa za'ra.

¹³ Asimizawizé aima 're ihâimana mono zarina a hã isõ'reptu za'ra norĩ hã ma tô i'anhimroi mo; asiptede sa'ẽtẽ na aima 're ihâimana mono zarina, ma tô duré asipti'a iwazéb zahi u hã ida'anhimroi mo.

¹⁴ Tawamhã daza'rui mono bâ a'uwẽ 're ihâimana za'ra mono, asimi'manharĩzé te te wapari za'ra wamhã, ma tô pahi te hã tirẽrẽ'ẽ za'ra. Duré Filistéa ãma a'uwẽ norĩ hã ma tô tãma tipẽ'ẽwara pese za'ra.

¹⁵ Edomita norĩ nhib'ihâ'a norĩ hã ma a'rãmi za'ra, moabita norĩ siptete na 're ihâimana za'ra mono hã ma tô sib'ru haimani za'ra, duré uburé cananeu norĩ hã, ma tô tãma tipopo'o za'ra.

¹⁶ Tawamhã ipahi uptabi za'ra hã ma tô iwap sisisi. Tawamhã duré ta norĩ aiwaihu'u pese na tãma irob'manharĩ za'ra zé te te 'madâ'â za'ra wamhã, ma tô ẽtẽ ne rési ãna simizahâri za'ra haré aimasa, asib'a'uwẽ norĩ te te a'â iro'rahâri za'ra zéb u, pawa'âbâ ãna te te 're iromhuri za'ra mono isõ'reptu za'ra hã.

¹⁷ Uburé Danhib'apito, a hã asib'a'uwẽ, ẽtẽ nhisiwi 're i'aihâimana mono zéb u te za duré i'anhimroi mo, ro hã asima ipisutuzéb u, asõrõwa da, 'ri asima i'ri u hã.

¹⁸ A hã Uburé Danhib'apito, te za Danhib'apito na hã õne u'â 're aihâimana u'âsi mo!

Miriã isõ'rezé wasu'u

¹⁹ Izaraéu nhihudu norĩ, âporé wa'wa ti'ai 'ré na ma tô saprĩ za'ra. Tane nherẽ, ezipsiu norĩ te wedewara zapore na dasi'wapézé hã, ite za'ra awaru na dasi'wapézé hã, duré awaru na isi'wapéi norĩ, â wa'wa u sisarina sisisi wamhã, ma tô Uburé Danhib'apito apâ â tiwi sitob za'ra da hã tãma tinha, te te suwa za'ra da.

²⁰ Tawamhã 'Re ihâimana u'âsi mono zadawa 'mahârâ'wa sipi'õ Miriã, Arãhã hidiba hã ropta'azé tamborĩ na isisi hã ma tô ti'â. Te te âri wamhã, ma tô uburé pi'õ norĩ hã isiré ai'aba'ré, te te ropta'a za'ra mono sina, duré iré siwapsisi mono sina.

²¹ Ãne Miriã, te tawamhã tãma tinho're za'ra: Uburé Danhib'apito ma, te za tãma 're asõ're u'âsi za'ra wa'aba mo, aipẽ'ẽ 're ãma 're aiwata za'ra wa'aba mono sina. E tihai wa. Õ hã iwẽ uptabi na hã te te da'ãma ai'uté wa; Õ hã ma tô awaru hã, duré awaru na isi'wapéi'wa norĩ hã, â wa'wa u sãmra.

 isé wasu'u

²² Taha pari Mozési, Âpré na â nhisi hawi Su na rop si 're irosa'wari mono nhisi u ma tô Izaraéu nhihudu norĩ hã te te oto simro. Tahawa, supara 'ré si ro 're isa'wari mono na si'ubdatõ bâtâ na si'aba'ré nherẽ, â hã te te siwi 'masãmri waihu'u õ di.

²³ Tawamhã Mara na rowamri u sihutu wamhã, tamemhã â te te âhuri waihu'u õ di, â isé na hã hâimana wa. Tahawa, ta rowamri nhisi hã Mara na.

²⁴ Tahawa, Mozésihi ma, dasiwapsari za'ra wa, ma tô ãne dasiwi sadanharĩ ni: — E marĩ wa za âhuri ni.

²⁵ Tawamhã Mozési, mreme 'rãihâ na Uburé Danhib'apito wi te te rowaptẽrẽ wa, ma tô wedehu waré wa'õno hã tãma hâi'ré. Ta hã âi ba te te mei wamhã, ma tô â te te i'âhuri da hã oto tãma sihiri wẽ za'ra. Ã hã rob ãma, ma tô Uburé Danhib'apito hã Izaraéu nhihudu norĩ ma, tinhimiroti hã tãma sõmri za'ra. Tame ma duré oto pibu za'ra.

²⁶ Tahawa, te ãne tãma nharĩ za'ra: — Te aima inharĩ za'ra wa'aba zém na ĩwapari pese za'ra wa'aba wamhã, i'uwaibaba na marĩ 're 'manharĩ za'ra wa'aba mono wamhã, duré aima ĩnhimiroti za'ra wa'aba zé hã asima 're tété za'ra wa'aba mono wamhã, wa hã aihâzé na te i'aihâ za'ra wa'aba da hã mare di za, ezipsiu norĩ te ãma ihâ za'ra zém ne hã. Wa hã Uburé Danhib'apito, te 're i'aipese za'ra wa'aba mono 'wa.

²⁷ Taha parimhã Izaraéu nhihudu norĩ, Erĩ na rowamri u hã ma tô aihutu, 12 na â nhana'rada hã, duré 70 na norõsu ne 're ihâimana za'ra mono zéb u hã. Tawamhã tame â ihâimana 'rata, ma tô sima 'ri nhoré za'ra.