Ezodu 14 - ꞌRe Ihâimana Uꞌâsi Mono Zadawa Wasuꞌu

Âpré na â poré nhisi na Izaraéu nhihudu norĩ te te isaprĩ za'ra zé wasu'u

¹ Tawamhã Uburé Danhib'apito te Mozésihi ma tinha, ãne:

² — Ma'ãpé Izaraéu nhihudu norĩ apâ si'aba'ré da hã tãma nharĩ za'ra na, Pi-Hairote na 'ri wa'õtõ nhisi nho're te te duré sima 'ri nhoré za'ra da Baau-Zefõ 'rata, Migdo norĩ wa'wa Âpré na â poré nhisi me hã.

³ Ãne wamhã, te za apito Fara'o ãma rosa'rata za'ra, Izaraéu nhihudu norĩ rop si 're irosa'wari mono te te tiwi romnhitob za'ra wa, siwa'ru 're inomro mono na hã.

⁴ Wa hã wa za apito Fara'o pẽ'ẽ tete na hâimana da hã tãma 'manha, asarina za'ra wa'aba 're morĩ da a'â. Tane nherẽ, apito ãma duré ite dasi'wapéi 'manharĩ'wa norĩ ãma hã wa za ai'uté za'ra, ãne na ĩwaihu'u pese zé hã te tãma hâi'ré za'ra da. Ãhã wamhã, te za ezipsiu norĩ siwi ĩwaihu'u, wa hã Uburé Danhib'apito 're ĩhâimana mono na hã. Tawamhã Izaraéu nhihudu norĩ ma tô imreme zarina 'manharĩ za'ra.

⁵ Tawamhã Ezitu te apito Fara'oho ma, Izaraéu nhihudu norĩ isimani za'ra zé, da te tãma wasu'u za'ra wamhã, ma tô tite romhuri'wa norĩ me tinhimirosa'rata na ãma saprĩ za'ra, ãne: — E marĩ wa tô bété 'manharĩ za'ra ni! Izaraéu nhihudu norĩ pawa'âbâ ãna romhuri na wama 're hâimana za'ra mono zahã, wa tô taré wahawi isimani za'ra da hã tãma rowairébé za'ra ni!

⁶ Tahawa, apito Fara'o tite awaru na wedewara zapore na dasi'wapézé, da te ãma tãma wasisi da hã, ma tô dama ti'ru. Tahawa, tite dasi'wapéi 'manharĩ'wa norĩ hã ma tô te te siré simro.

⁷ Tawamhã uburé Ezitu ãma awaru na wedewara zapore na dasi'wapézém na ma tô wairé. Iwẽ si hã 600 na dasiré hã, iwada'uri'wai mono bâ hã.

⁸ Uburé Danhib'apito, apito Fara'o pẽ'ẽ tete na a'â hâimana da hã, ma tô tãma 'manha. Tahawa, ma tô Izaraéu nhihudu norĩ zarina hã mo, te te ãma ai'uté za'ra wẽ te, siwamnhasi sina iwairébé zarina hã.

⁹ Tawamhã ezipsiu norĩ, uburé tite awaru na, awaru na wedewara zapore na dasi'wapézéb ré na duré awaru na 're isi'wapé za'ra mono na, Izaraéu nhihudu norĩ zarina iwairébé hã, ma tô Âpré na â poré nhisi zaihâ na te te sima i'ri nhoré za'ra zéb ãma siwi sasãmri za'ra, Pi-Hairote na romnhisi norĩ 'rata, Baau-Zefõ na romnhisi 'rata me.

¹⁰ Tawamhã Izaraéu nhihudu norĩ, apito Fara'o tite dasi'wapéi 'manharĩ'wa norĩ me te te 'wapé za'ra da, sisõré pese na te te iropãrĩ za'ra mono na te te 'madâ'â za'ra wamhã, ma tô tãma tipẽ'ẽwara pese za'ra. Tahawa, ma tô Uburé Danhib'apito te te pawaptob za'ra da hã mreme 'rãihâ na tiwi rowaptẽrẽ za'ra.

¹¹ Tahawa, ma tô Mozésihi ma nharĩ za'ra ãne: — E Ezitu ãma da te 're idanheme mono zé ab're hâimana ã bâ, ma tô rop si 're irosa'wari mono ãma wasi'utõrĩ da, we ãwamhã bété iwanhimroi mo. E marĩ ma tô wama i'manharĩ za'ra, we iwazani za'ra zém na hã.

¹² Ezitu ãma hã wa tô aima nharĩ za'ra ni aré, ãne: Wawasutu za'ra tõ! Wasima iwẽ na wahâimana za'rare. Ezipsiu norĩ ma, wapawa'âbâ ãna wa te tô 're romhuri za'ra mono! Wama wẽ za'ra di aré, ezipsiu norĩ ma, wa te 're iromhuri za'ra mono da hã. Oto tô rop si 're irosa'wari mono ãmap si iwasété uptabi hã iwasi'utõrĩ da hã ãme!

¹³ Tane nherẽ, Mozési, ma te ãne ãma sada'âbâ za'ra: — Aipahi za'ra wa'aba tõ. Ma'ãpé asiptete na aihâimana za'ra wa'aba. Tawamhã te za i'madâ'â za'ra wa'wa, ã bâtâ na Uburé Danhib'apito te te i'asõ'reptu za'ra wa'aba zé hã. Tahawa ã hã ezipsiu norĩ, niwamhã ihâiba pibu zahu za'ra wa'aba da hã, mare di za.

¹⁴ A norĩ wa'wa, marĩ hã 'manharĩ za'ra wa'aba dai õ di. Uburé Danhib'apito si te za ai'ãma ai'wapé za'ra wa'wa.

¹⁵ Tawamhã Uburé Danhib'apito, te Mozésihi ma tinha ãne: — E marĩ da, ma tô te i'aipawaptobzé hã ĩwi iwaptẽ. Ma'ãpé dama nharĩ za'ra na 'ri awã tétézé da te sani za'ra da, taha pari duré oto dasisarina si dasi'aba'ré da.

¹⁶ Ma'ãpé â poré nhisiwi asiwazusizé hã wẽ na hâimo. Tawamhã â isi'ridawa zarina te za sima aiwãnhiza, Izaraéu nhihudu norĩ ti'ai 'ré na â wa'waibaba te te ãma saprĩ za'ra da hã.

¹⁷ Tane nherẽ, wa hã wa za ezipsiu norĩ pẽ'ẽ tete na hâimana za'ra da hã tãma 'manharĩ za'ra, ta norĩ Izaraéu nhihudu norĩ zarina â wa'wa u a'â sisisi da hã. Tawamhã apito Fara'oho ãma, uburé ite dasi'wapéi 'manharĩ'wa norĩ ãma, ite za'ra wedewara zapore na dasi'wapézéb ãma, duré awaru na 're isi'wapé za'ra mono norĩ ãma te i'ai'uté za'ra na hã dama ĩwasu'u za'ẽtẽ di za.

¹⁸ Wa hã ezipsiu norĩ ãma te ai'uté za'ra wamhã, te za siwi ĩwaihu'u, wa hã Uburé Danhib'apito na 're ĩhâimana u'âsi mono na hã.

¹⁹ Tawamhã Hâiwa ãma 'Re ihâimana u'âsi mono ma Romhuri'wa, Izaraéu nhihudu norĩ nhowa ine mono hã ma tô oto te te sa'u za'ra. Duré hâiwa'a zarob'a pisutu pese zama isõwab za'ra ine mono hã ma tô oto te te isa'u za'ra mono na tihâiba,

²⁰ ezipsiu norĩ wa'wamhã, Izaraéu nhihudu norĩ me. Tahawa, ezipsiu norĩ ma hã, ma tô hâiwa 'rãdâ'â pe hã tãma tihâimana za'ra. Tane nherẽ, Izaraéu nhihudu norĩ ma hã, ma tô rowa'a si tãma tihâimana za'ra. Ãne wa, marabâre Ezitu te dasi'wapéi 'manharĩ'wa norĩ, Izaraéu nhihudu norĩ hã te te sina tété waihu'u za'ra õ di.

²¹ Tawamhã Mozési â nhisiwi tinhib'rada te te oto wẽ wamhã, Uburé Danhib'apito, ma tô rowa'u isiptede bâtâ pusizém hawi iwatobro da hã tãma rob'ru, â te te isiwasi da hã. Tawamhã marabâre rowa'u isiptede te te â wapõrĩ u'âsi wa, ma tô â poré wa'wam nherẽ, siti'ai'ré. Tahawa, â sima siwãnhizari wamhã,

²² ma tô â nhitõmo si'uiwa norĩ wa'wamhã Izaraéu nhihudu norĩ ti'ai 'ré na oto saprĩ za'ra.

²³ Tawamhã ezipsiu norĩ isarina isi'aba'ré hã awaru na, wedewara zapore na dasi'wapézém na hã, duré awaru na 're isi'wapé za'ra mono hã ma tô uburé â wa'wa u hã isarina za'ra sisa're.

²⁴ Tawamhã awẽ wi unhama ro'o pisutu pese hawi, duré hâiwa'a isarob'a pisutu pese hawi, ma tô Uburé Danhib'apito, ezipsiu norĩ dasi'wapéi 'manharĩ'wa hã 'madâ'â za'ra sipapara, i'rãiwaihu'u'õ te te tãma i'manharĩ za'ra zarina sitẽme siwa'ru te te iro'rahâri za'ra mono zé te te tãma 'manharĩ za'ra da.

²⁵ Tahawa, wedewara zapore na dasi'wapézé hã sisa'rei waihu'u õ di. E marĩ wa. 'Re ihâimana u'âsi mono, ti'ai wai'o na para nhisisi da, te te tãma 'manharĩ za'ra wa. Tawamhã te ezipsiu norĩ nharĩ za'ra ãne: — Oto Izaraéu nhihudu norĩ hawimhã wasisa'rei wa'aba mono! Uburé Danhib'apito, te ihâiba za'ra u'âbâ hã wazada tihâimana za'ra.

²⁶ Tawamhã Uburé Danhib'apito, te Mozésihi ma tinha ãne: — Asib'rada hã, ma'ãpé duré â nhisiwimhã wẽ na, apâ sitẽme sitob da, ezipsiu norĩ hã ite wedewara zapore na dasi'wapézé hã, duré awaru na 're isi'wapé za'ra mono norĩ hã, te te uburé pese suwa za'ra da.

²⁷ Tawamhã Mozési â nhisiwi tinhib'rada ma tô wẽ. Duré oto awẽ wamhã, ma tô â hã apâ iharé na tihâiba. Tahawa, ezipsiu norĩ â wi sisõ'reptu za'ra da, ma tô aré sisa're. Tane nherẽ, Uburé Danhib'apito hã ma tô â wa'wa u apâ sãmra.

²⁸ Â apâ sitẽme sito wamhã, ma tô wedewara zapore na dasi'wapézé hã, awaru na 're isi'wapé za'ra mono norĩ hã, duré uburé ezipsiu norĩ â na Izaraéu nhihudu norĩ zarina isisa'rei mono hã suwa za'ra. Hâiba ré hã si'mairẽme waihu'u õ di.

²⁹ Tane nherẽ, Izaraéu nhihudu norĩ hã ma tô â wa'waibaba ti'ai 'ré na hã saprĩ za'ra, â nhitõmo si'uiwa wa'wamhã.

³⁰ Uburé Danhib'apito tô taha bâtâ na ezipsiu norĩ wi, Izaraéu nhihudu norĩ te te sõ'reptu za'ra wamhã, ma tô isi'utõrĩ norĩ â zaihâ na supara wa isimi'wara mono hã 'madâ'â za'ra.

³¹ Tawamhã Izaraéu nhihudu norĩ hã Uburé Danhib'apito tiwaihu'u pese na ezipsiu norĩ ãma te te i'ai'uté za'ra zé te te 'madâ'â za'ra wamhã, ma tô ãma itob'uzu za'ra zéb zarina oto wazéb za'ra. Tahawa, ma tô Uburé Danhib'apito hã oto siwi umnhasi. Duré tãma romhuri'wa Mozésihi zama te oto umnhasi na hã tãma tihâimana za'ra.