Ezodu 13 - ꞌRe Ihâimana Uꞌâsi Mono Zadawa Wasuꞌu

Da'ra hã aibâ na dama 're ipoto 'rata za'ra mono, 'Re ihâimana u'âsi mono ma, da te tãma 're isõmri za'ra mono zé wasu'u

¹ Tawamhã Uburé Danhib'apito te Mozésihi ma tinha, ãne:

² — Aibâ na aima 're ipoto 'rata za'ra wa'aba mono norĩ hã te za ĩma 're isõmri za'ra wa'aba mo, aimawi ĩte na ĩma 're hâimana za'ra mono da. Uburé Izaraéu nhihudu norĩ ma, i'ra hã aibâ na tãma 're ipoto 'rata za'ra mono norĩ hã duré isimizama norĩ 'ra zama aibâ na tãma 're irere'e mono norĩ hã ĩte hã za.

I'u'ẽtẽ duptoi'õ na dato hã da te dasima 're i'manharĩ za'ra mono zé wasu'u

³ Tawamhã Mozési hã ma tô dama rob'rãzarõtõ, ãne: — Ã bâtâ ãma 're aipo're si'âri za'ra wa'aba mono õ di za, Ezitu hawi i'aiwairébé aba zém na hã, aipawa'âbâ ãna aré dama 're iromhuri za'ra wa'aba mono zém hawimhã. Ã bâdâ hã Uburé Danhib'apito te te we i'asani za'ra wa'aba zé, tiwaihu'u pese na. Tahawa, i'u'ẽne iduptobzém na hã 're huri aba mono õ di za, datozé bâdâ 're ihâimana mono na hã.

⁴ Ã bâtâ na a norĩ wa'wa hã ma tô aiwairébé 'wa, Ezitu hawimhã, a'amo za'ratazé hã imorĩ'rata na Abibe na a'amo nhisi na.

⁵ Uburé Danhib'apito tô sena ma tô duréihã aihi'rata norĩ wa'aba ma hã ropisutu, i'uirĩ na za'ra ti'a te te aima sõmri za'ra wa'aba da, cananeu norĩ te hã, hitita norĩ te hã, amoreu norĩ te hã, heveu norĩ te hã, duré zebuzeu norĩ te zama. Ta hã ti'a hã iwẽ, duré ãma iropoto wẽ. Tawamhã 'Re ihâimana u'âsi mono nimahã bâtâ na ti'ai u te te oto asimroi wa'aba mono wamhã, tawamhã a norĩ wa'wa hã te za dato hã 're i'manharĩ za'ra wa'aba mo, wahub sidâpâsi a'amo za'ratazé imorĩ'rada iwa 're iwaptã'ã mono sidâpâsi.

⁶ Tahawa, 7 na bâdâ hã 're ne mono ré hã te za i'u'ẽtẽ duptoi'õ hã 're ihuri aba mo. 7 bâtâ na si te za oto dato hã asiwi 're i'manharĩ za'ra wa'aba mo, 'Re ihâimana u'âsi mono asiwi 're wazéb za'ra wa'aba mono sina.

⁷ Bâdâ hã 7 na 're ne mono ré hã, te za tô i'u'ẽtẽ duptoi'õ hã 're ihuri aba mo. Uburé asipti'a za'ra wa'aba ãma i'u'ẽtẽ wapuzé ihâimana da hã mare di za, duré iwapuzém na i'u'ẽtẽ 'manharĩ hã.

⁸ Ã bâtâ mono na hã te za ai'ra norĩ ma ãne na 're irowasu'u za'ra wa'aba mo: “Uburé Danhib'apito hã Ezitu hawi iwawairébézém na iwẽ hã te te wama i'manharĩ za'ra zéb zarina, wa ãne hã wa te 're 'manharĩ u'âsi za'ra, dato hã.” Ãne te za ai'ra norĩ ma, ãma 're irowasu'u u'âsi za'ra wa'aba mo.

⁹ Uburé Danhib'apito, tiwaihu'u pese na ma tô asani za'ra wa'wa, Ezitu hawimhã. Tahawa, ã hã dato hã ãma 're i'asipo're pu'u za'ra wa'aba mono zéb da hã, te za 're i'manharĩ za'ra wa'aba mo, dasipo're pu'uzéb da, marĩ hã danhimizu na, niha wamhã duré da'uihâ na da te 're iwasisi za'ra mono ne. Ãne wa, te za te te 're aipawaptob za'ra wa'wa, 're aipo're si'âri za'ra wa'aba mono ãna, asisõ'a aimreme 'rãihâ na ãma 're asiwapari za'ra wa'aba mono da, duré ãma 're romnhoré za'ra wa'aba mono da, 'Re ihâimana u'âsi mono nhimiroti na hã.

¹⁰ Tahawa, ã hã dato ato sina te za 're i'madâ'â za'ra wa'aba mo, bâdâ ipisutu zarina, wahup sidâpâsi.

Da'ra aibâ na dama ipoto'rata norĩ wasu'u

¹¹ — Uburé Danhib'apito, cananeu norĩ nhipti'ai u asisisi aba da, te za aima 'manharĩ za'ra wa'wa, te te aima iropisutu za'ra wa'aba zéb zarina, duré aihi'rata norĩ ma, te te iropisutuzéb zarina. Ti'a te te aima sõmri za'ra wa'aba wamhã,

¹² te za Uburé Danhib'apito ma, aibâ na ai'ra aima 're ipoto 'rata za'ra wa'aba mono hã tãma 're isõmri za'ra wa'aba mo. Uburé asimizama 'ra norĩ aibâ na 're ipoto 'rata za'ra mono hã te za tãma 're hâimana za'ra.

¹³ Awaru po're pore 'ra si'aibâ ipoto 'rada dâ'â ãna 're 'maza mono da, asima 're wẽ za'ra wa'aba mono wamhã, te za 'Re ihâimana u'âsi mono ma, i'upana pone'ẽrebâ zéré mapure na hã ãma tãma 're asõprub za'ra wa'aba mo. Tane nherẽ, duré asima 're wẽ za'ra wa'aba mono õ wamhã, te za awaru po're pore 'ra hã ibutu nhi'ẽ za'ra wa'wa. Tawamhã te za uburé ai'ra si'aibâ norĩ aima 're ipoto 'rata za'ra wa'aba mono hã Uburé Danhib'apito wi asima 're iwa'âbâ za'ra wa'aba mo, apâ aima 're hâimana za'ra wa'aba mono da.

¹⁴ Tawamhã niwa apto'oré ai'ra norĩ, marĩ te te iwasu'u na te te ãma 're asadanharĩ za'ra wa'aba mono wamhã, te za ãma 're isada'âbâ za'ra wa'aba mo, ãne: “Uburé Danhib'apito tiwaihu'u pese na ma tô Ezitu ãma wapawa'âbâ ãna wa te 're iromhuri za'ra mono zém hawimhã we wa'awaze.

¹⁵ Apito Fara'o pẽ'ẽ tete na hâimana wa, te te wama rowairébé za'ra õ wamhã, ma tô Uburé Danhib'apito, Ezitu ãma uburé da'ra si'aibâ dama 're ipoto 'rata za'ra mono hã, duré danhimizama 'ra si'aibâ ipoto'rata norĩ zama hã uprosi. Tahawa, wa wa norĩ hã Wanhib'apito ma hã ãma tãma 're wanhoprub za'ra, wanhimizama 'ra si'aibâ norĩ poto'rata na hã. Wa duré wa'ra norĩ apâ wama 're ihâimana za'ra mono zéb da hã wa te wasima ãma tiwi 're wa'âbâ za'ra.

¹⁶ Ã hã Uburé Danhib'apito tiwaihu'u pese na Ezitu hawi te te iwa'awazerezém na te za ãma 're i'asipo're pu'u u'âsi za'ra wa'aba mono zéb da hã aima 're hâimana za'ra wa'wa, asib'rata na, niha wamhã duré ai'uihâ na marĩ 're iwasisi za'ra wa'aba mono ne.”

Hâiwa'a norĩ, unhama ro'o me isima'warazé wasu'u

¹⁷ Tawamhã apito Fara'o, Izaraéu nhihudu norĩ wairébé da, te te tãma sa'ré za'ra wamhã, 'Re ihâimana u'âsi mono, filisteu norĩ te, ti'ai wa'õtõ nho'õmo wa'waibaba bâdâdi awa'awi na nherẽ, romhutu na te te simroi mono õ di. E marĩ wa. Te te sima rosa'rata wa, ãne: “Izaraéu nhihudu norĩ hã dasi'wapé te te sina waihu'u za'ra wamhã, ãté te za tinhimirosa'rata na saprĩ za'ra, apâ Ezitu u si'aba'ré da hã.”

¹⁸ Tahawa, 'Re ihâimana u'âsi mono, ma tô Izaraéu nhihudu norĩ hã rop si 're irosa'wari mono bâdâdi na te te ãma sa'oto za'ra, Âpré na â poré nhisi 're ihâimana mono nho'õmoi baba. Tawamhã Izaraéu nhihudu norĩ Ezitu hawi wairébé wamhã, ma tô dasi'wapéi wab da 'wamnhasite, si'wapé za'ra zéb ré hã wairé.

¹⁹ Tawamhã Mozési, Zuzéhé hi hã ma tô siré ti'â. E marĩ wa. Zuzé hã, ãne Izaraéu nhihudu norĩ te te siwi 'manharĩ da, te te tiwi waptẽrẽ za'ra wa, te te sina tãma iropisutu za'ra da hã. Ãne ma tô tãma sina nharĩ siromo za'ra tawamhã: “Niwa apto'oré 'Re ihâimana u'âsi mono ã hawi te te asõ'reptu za'ra wa'aba wamhã, ĩhi hã ma'ãpé ã hawimhã asiwi duri aba za asiré.”

²⁰ Tawamhã Izaraéu nhihudu norĩ Sucoti na romnhisi hawi oto wairébé wamhã, ma tô Etã na romnhisi ãma romhâ 'manharĩ na sima 'ri nhoré za'ra, rop si 're irosa'wari mono zada'ré ãma.

²¹ Tawamhã Uburé Danhib'apito te bâtâ sidâpâsi hâiwa'a isarob'a ipisutu pese 're isõwab za'ra hã ne mono, bâdâdi te te tãma hâi'ré za'ra mono da hã. Mara sidâpâsi te duré isõwab za'ra unhama ro'o pisutu pese na, bâdâdi te te tãma uiwẽ za'ra mono da hã ne mono, taha zarina si bâtâ na hã, duré mara na hã ãma si'aba'ré da.

²² Tawamhã hâiwa'a isarob'a pisutu pe hã te õne u'â bâtâ mono na hã isõwab za'ra hâimana mono. Duré mara mono na hã te õne u'â unhama ro'o ne hã isõwab za'ra hâimana mono.