Ezodu 10 - ꞌRe Ihâimana Uꞌâsi Mono Zadawa Wasuꞌu

8 ãma dama rob'manharĩzé wasu'u, 'riti na

¹ Tawamhã Uburé Danhib'apito te Mozésihi ma, duré tãma tinha ãne: — Apito u, te za apâ aimo. E marĩ wa. Wa hã tite romhuri'wa norĩ me apâ tipẽ'ẽ tete na tihâimana za'ra na te te ãma uzusi za'ra mono da hã, wa tô tãma 'manharĩ za'ra, duré a'â nasi ĩnhimiromhõ iwa'wab za'ra te 'manharĩ za'ra da.

² Ta hã ãne na ĩnhimi'manharĩzé ai'ra norĩ ma zama 're wasu'u za'ra wa'aba mono da, duré asihudu norĩ wa'aba ma, ezipsiu norĩ simiza'rese'õ ne ihâimana za'ra zém na ĩnhimiromhõsi pipa te tãma ĩ'manharĩ za'ra zéb zarina. Ãne da, wa tô a'â wa hã nasi 'rãnhitob za'ra. Ãne zarina te za a norĩ wa'wa hã duré asiwi ĩwaihu'u 'wa, wa hã Uburé Danhib'apito na hã.

³ Tawamhã Mozési norĩ, Arãhã me, Ezitu te apito u neb zahuré wamhã, ma tô ãne tãma rowasu'u zahuré: — Uburé Danhib'apito, hebreu norĩ te 'Re ihâimana u'âsi mono, te we ãne aima tinha: “E momo te za aiwapu na aihâimana da, asima iwẽ'õzé aihâimana na ãma i'uzusi mono zé ĩnho'remhã ti'rãsutu. E niwa te za ĩma aiwairo. Tahawa te za oto ãhã na ĩnhib'a'uwẽ norĩ ma iwaprosi za'ra, ate ti'ai wa'õtõ nho'õmo hawi wairébé da, ĩ'ãma si oto 're wata za'ra mono hâ.

⁴ Mare wamhã, awẽ wa za 'ridi hã ahâ uptabi na ate ti'ai wa'õtõ nho'õmo u hã waze.

⁵ Tawamhã ti'a da te dasiwi i'madâ'â waihu'u da hã mare di za. E marĩ wa. Nemo Ezitu ti'ai 'remhã za te te rob'rãi'ré mono wa. Ta hã te za duré tãzâ te te i'uprosi mono õ hã te te huri. Wede isi'mairẽme norĩ zama te za uburé te te uprosi za'ra.

⁶ Nemo te za tawamhã duré asimiromhurizé 'ri za'ẽne hã siwi 'ri 're nhito. Duré aima romhuri'wa norĩ nhorõwa zama hã, duré asib'a'uwẽ norĩ nhorõwa zama hã te za uburé te te siwi 'ri 're nhito. Ã hã aimama norĩ, duré aihi'rata norĩ te te 're i'madâ'â za'ra mono nhipai u te za iwasété uptabi hã aima tihâimana za'ra wa'wa.” Tawamhã Mozési, ãne na te te tãma rowasu'u pari, ma tô õne haré isimiromhurizé 'ri hawimhã oto watobro.

⁷ Tawamhã ihawi pusi za'u, te apito nhimiromhurizé 'ri za'ẽtẽ 're, te te tãma 're iromhuri za'ra mono tãma nharĩ za'ra ãne, apito ma: — E momo te za ã hã aibâ nhimimnhasizé wama za'ra hã ti'rãsutu. Ma'ãpé, aibâ norĩ satõrĩ waré za'ra na si'aba'ré da, tinhib'apito 'Re ihâimana u'âsi mono ãma, 're wata za'ra mono da. E waihu'u ã bâ bété, Ezitu 're iropsiwamnarĩ pese zém na hã.

⁸ Tawamhã Mozési norĩ Arãhã me, apito apâ sô hârâ zahuré wa, te te sina siri zahuré wamhã, ma tô ãne oto tãma rob'ru zahuré: — Te za oto ai'aba'réi wa'wa, Uburé Danhib'apito ate 'Re ihâimana u'âsi mono ãma si 're aiwata za'ra wa'aba mono da. Tane nherẽ, wa tô ĩsima wẽ, te iwaihu'u da si, ni'wam norĩ asiré wa'aba za isi'aba'ré da hã.

⁹ Tawamhã Mozési ma te ãma tãma wa'rã ãne: — Wa norĩ hã uburé aihĩni pese wa za ai'aba'ré ni, ai'uté norĩ me, duré ihâiba prédum norĩ me. Wa'ra si'aibâ norĩ, wa'ra sipi'õ norĩ, uburé pese marĩ wama 're ihâimana za'ra mono wanhimizama pone'ẽrebâ norĩ hã, pone'ẽrebâ zéré uzé norĩ hã, duré powawẽ norĩ hã, wa za wasiré hã wa te simro za'ra, Uburé Danhib'apito wama iwazéb za'ra zarina dato isa'ẽne wa te ãma tãma 're i'manharĩ za'ra mono zéb da hã.

¹⁰ Tawamhã apito te ãne tãma nharĩ zahuré: — Asib'apito wa'wa hã tô asiré wa'aba morĩre! Tane nherẽ, wa hã aimro norĩ wa'wa hã, duré ai'ra norĩ wa'wa hã asiré simroi wa'aba mono da, te aima isa'ré za'ra wa'aba da hã mare di za. Asimirosa'rata waima zarina ĩzada i'aihâimana za'ra wa'aba zém na hã wa tô ĩsina aiwaihu'u za'ra wa'wa. Ĩma hã waihu'u di.

¹¹ Tahawa aihĩni ai'aba'réi wa'aba da nherẽ, mare uptabi di za. Aibâ si te za ai'aba'réi wa'wa, Uburé Danhib'apito ãma aiwata za'ra wa'aba da hã, ãne hã asima iwẽ za'ra wa'aba zéb zarina. Tawamhã Mozési norĩ Arãhã me, ma tô apito hawimhã rob u oto tãma rob'ru zahuré ni.

¹² Tawamhã Uburé Danhib'apito te Mozésihi ma tinha ãne: — Ma'ãpé, asib'rada hã Ezitu nhisiwi wẽ na, 'ridi hã we si'réi mono da. Tawamhã ta norĩ hã te za ro'wanhipré uburé te te huri, tã zâ te te i'uprosi si'atarẽme mono hã.

¹³ Tawamhã Mozési, Ezitu nhisiwi tinhiwã te te wẽ wamhã, ma tô Uburé Danhib'apito bâtâ pusizém hawi, rowa'u'u za'ẽne ti'ai wa'õtõ nho'õmo mono bâ bâtâ bâre duré marabâre te te rowapõrĩ da hã tãma rob'ru. Duré oto awẽ wamhã, ma tô mararé rowa'u'u za'ẽne hã 'ridi nemo we te te sate.

¹⁴ Tahawa, ta norĩ hã Ezitu ti'ai 're uburé te te iropéi mono hã ma tô ahâ uptabi na nemo te te rob'rãi'ré, daro mono bâ. Romhâimana wana ré niwa ãne na ihâimana õ, duré niwa ãne na iromhâimana da hã mare di za oto.

¹⁵ Tawamhã ti'a te te upsibi mono wamhã, ma tô nemo te te robra. Uburé ma tô wede norĩ, duré rob'rã norĩ te te siwi uprosi, tãi pĩni nhama na, isi'utõrĩ'õ mono hã. Tahawa, wede norĩ sui mono hã, duré rob're sui mono hã, Ezitu 'remhã 'masi'atarẽme õ di oto.

¹⁶ Tawamhã apito Fara'o, Mozési norĩ zô Arãhã me, awa'awi sô hârâ zahuré wamhã, te ãne tãma nharĩ zahuré: — Wa hã, tô sena wa tô Uburé Danhib'apito, ate za'ra wa'wa 'Re ihâimana u'âsi mono zada hã ĩwasété. Asada wa'aba zama wa tô duré ĩwasété.

¹⁷ Tahawa ã hã ĩwasété na duré asada aba ĩhâimanazém na hã ĩ'ãma 'madâ'â aba õ di za. Te za Uburé Danhib'apito, ate 'Re ihâimana u'âsi mono ma, ĩ'ãma aimreme 'wa, tinhimihâzé ipire te te ĩhawimhã wazere da, ĩdâ'â tõ da.

¹⁸ Tawamhã Mozési, apito Fara'oho hawi rob u watobro wamhã, ma tô Uburé Danhib'apito ma hã mre, te te tiwi irowaptẽrẽzéb zarina.

¹⁹ Tawamhã Uburé Danhib'apito rowa'u'u za'ẽne bâtâ zasizém hawi isiptede te te rowapõrĩ da hã ma tô tãma rob'ru. Tahawa, ta hã ma tô apâ 'ridi hã te te sate. Duré ma tô sãmra, Âpré na â wamri u. Tawamhã uburé Ezitu ti'ai 'remhã 'maihâimana õ di apâ.

²⁰ Tane nherẽ, Uburé Danhib'apito, apito tipẽ'ẽ tete na te te ãma uzusi da hã ma tô apâ 'rãnhito. Tahawa Izaraéu nhihudu norĩ si'aba'ré da hã te te duré tãma waprosi za'ra õ di.

9 ãma robra na dama rob'manharĩzé wasu'u

²¹ Tawamhã Uburé Danhib'apito te Mozésihi ma, duré tãma tinha ãne: — Hâiwa u te za oto asib'rada hã hâimo iwẽ, Ezitu 're uburé robra ihâza'õtõ si nomro da, a'uwẽ 're ihâimana za'ra mono tinhib'rata na te te 're i'upi waihu'u pese za'ra mono da hã.

²² Tawamhã Mozési tinhib'rada hâimo te te wẽ wamhã, ma tô Ezitu ro hã si'ubdatõ bâtâ na robra hã suwa.

²³ Tawamhã ezipsiu norĩ sisãmri waihu'u za'ra õ wa, taha bâtâ na hã ni'wa 'ri hawimhã watobro waihu'u õ di. Tane nherẽ, Izaraéu nhihudu norĩ 're isi'ubumroi mono zéb ãma hã, robra õ di. Rowa'a na si ma tô ta norĩ tihâimana za'ra dawaprã.

²⁴ Tawamhã apito Fara'o te sô hâ, Mozésihi zô. Tahawa te duré tãma tinha ãne: — Te za oto ai'aba'réi wa'wa, Uburé Danhib'apito ãma 're aiwata za'ra wa'aba mono da. Aimro norĩ zama, duré ai'ra wa'aba norĩ zama te za ãma isimroi wa'aba mo. Tane nherẽ, asimizama za'ra wa'wa pone'ẽrebâ norĩ hã, pone'ẽrebâ zéré uzé norĩ hã, duré powawẽ norĩ hã ãma asiwi simroi wa'aba mono õ di za, asiré. Rési ãna te za ãme aimasa.

²⁵ Tawamhã Mozési ma tô ãma tãma wa'rã ãne: — Mare di. Te za tô wanhimizama zama wama isa'ré za'ra, Uburé Danhib'apito, wa te 'Re ihâimana u'âsi mono ma, ãma tãma 're wanhoprub za'ra mono wa, wa te duré tãma 're zata za'ra mono da.

²⁶ Tahawa wa za uburé wanhimizama hã wa te ãma wasiré simro. Duré wa te wasiwi i'mairẽme da hã mare di za. E marĩ wa. Za wa te wasiwi 'maipisutu dâ'âsina, 'Re ihâimana u'âsi mono Uburé Danhib'apito ãma 're iwawata za'ra mono zéb da hã wa te wasiwi isõmri da hã. Duré ro te te wama ipisutu za'ra zéb u zahadu wasihutu õ ré, wa norĩ hã wa te wasiwi iwaihu'u da hã mare di, za nimahã Uburé Danhib'apito ma wanhimizama za'ra na wanhoprubzé wa te tãma isõmri za'ra zé hã.

²⁷ Tawamhã Uburé Danhib'apito, apito tihâimana wasété na te te ãma uzusi da hã, ma tô 'rãnhito, a'â pẽ'ẽ tete na duré hâimana da hã. Tahawa Izaraéu nhihudu norĩ, Ezitu hawi wairébé da hã te te tãma waprosi waihu'u za'ra õ di.

²⁸ Tawamhã apito sahi sina, te Mozésihi ma, duré tãma tinha ãne: — Mo oto, aiwatobro ĩhâimanazém hawimhã. Niwamhã we ĩtẽmemhã aimorĩ na sahu tõ. Duré aipo're ãna we ĩzabu na sahu wamhã, te za oto atâ.

²⁹ Tawamhã Mozési ma te ãne ãma tãma wa'rã: — Tane tô. Tô i'uwaibaba ma te ĩma iwaihu. We tô te asabu na sahu õ di za oto.