Ezodu 1 - ꞌRe Ihâimana Uꞌâsi Mono Zadawa Wasuꞌu

Ezitu ãma, Izaraéu nhihudu norĩ te te 're irobzépata za'ra mono zé wasu'u

¹ Ã hã Zacoho 'ra norĩ nhisi, Ezitu u isiré isi'aba'ré, ihawi a'uwẽ norĩ ré hã:

² Rubẽ, Simiã, Levi, Zuda,

³ Isaca, Zébulõ, Bẽzami,

⁴ Dã, Naftali, Gadi, Asé.

⁵ Zacoho hâiba hawimhã i'ra norĩ isihudu norĩ me hã 70 na ihâiba za'ra hã. Tawamhã Zacoho 'ra, imro dub amoi wamhã, Zuzé na isisi ma tô Ezitu ãma tisisãnawã norĩ wana tihâiba.

⁶ Tawamhã wahub ahâ pari, ma tô Zuzé norĩ hã ai'utõ, tisisãnawã norĩ me hã. Uburé pese ma tô duré ai'utõrĩ ni, isiré 're idahâimana za'ra mono hã.

⁷ Tane nherẽ, Izaraéu nhihudu norĩ ma tô Zuzéhé uirĩ na Ezitu ãma 're hâimana za'ra mono ré hã atébré za'ẽtẽ za'ra, ahâ uptabi na. Tahawa, siptete na duré dama simimnhasi na ma tô 're hâimana za'ra. Tahawa daza'rui mono bâ ma tô te te ropé.

⁸ Tawamhã Zuzéhé uirĩ na Zuzé tãma isa'rese'õ hã ma tô apito ité hã ãzé, Ezitu ãma.

⁹ Tawamhã ta hã ma tô tinhib'a'uwẽ norĩ ma nharĩ za'ra ãne: — Ĩwapari pese za'ra wa'aba. Izaraéu nhihudu norĩ isiptede wanhipai u za'ra waptu na ma tô sina hâ.

¹⁰ Wanhitob'ru norĩ, niwamhã te te wazahui wamhã, ãté Izaraéu nhihudu norĩ zama te za wazada dasiré si'rã'õtõ. Tawamhã te te wa'wapé za'ra parimhã, ãté te za duré wate ti'ai wa'õtõ nho'õmo hawimhã wairé. Taha õ'umnhasite, wa za niha na hã tãma rob'manharĩ za'ra ni, waptu na sina hâ'â pese tõ da.

¹¹ Tawamhã ezipsiu norĩ hã Izaraéu nhihudu norĩ, ma tô te te 're wada'uri pese za'ra, romhuri pire na te te 're romhuri pese za'ra mono da, pawa'âbâ õ nherẽ. Tahawa, ma tô duré 'ri wa'õno hã siwi tébré zahuré, Pitõ na 'ri wa'õtõ nhisi, Ramesé na 'ri wa'õtõ nhisi me. Amnho ubumrozéb da, ma tô Apito Fara'oho nhimiwada'uri zarina dasiwi tébré zahuré ni.

¹² Tane nherẽ, ezipsiu norĩ, Izaraéu nhihudu norĩ ma, te te 're rob'manharĩ wasété za'ra mono nherẽ, te we duré 're sitébré u'âsi, ipa 'rowib za'ra nherẽ. Tahawa, ezipsiu norĩ ma tô tãma tipahi za'ra.

¹³ Tahawa sa'ẽtẽ ma tô te te 're wada'uri pese za'ra.

¹⁴ Te te 're robzépata za'ẽtẽ za'ra mono da ma tô te te tãma 're 'manharĩ za'ra. Ti'a u'ẽtẽ na, 'ri 'manharĩ na, duré buru na rob're na te te 're romhuri za'ra mono da hã, ma tô te te 're wada'uri pese za'ra. Tawamhã Izaraéu nhihudu norĩ iwada'uri wasété zarina, ma tô uburé marĩ te te 're 'manharĩ za'ra.

¹⁵ Tawamhã Ezitu te apito, ma tô pi'õ norĩ ma nharĩ zahuré, Izaraéu nhihudu norĩ ma, ai'uté zapari'wai ma. Isisi zahuré hã, Sifra na, duré Pua na. Ãne ma tô ta norĩ ma waihu'u zahuré:

¹⁶ — Izaraéu nhihudu norĩ iwasã ãma 're sépu'u za'ra mono wamhã, ãne te za tãma 're i'arob'manharĩ aba mo: Ai'uté 'watébrémi na tãma 're poto za'ra mono wamhã, te za 're i'mapãrĩ aba mo za. Pi'õ na tãma 're poto za'ra mono wamhã, 're 'mapãrĩ aba mono õ di za.

¹⁷ Tane nherẽ, ai'uté zapari'wa norĩ te 'Re ihâimana u'âsi mono hã te te 're wazé pese zahuré. Tahawa, Ezitu te apito, te te tãma i'ru zahuré zé hã te te wapari zahuré õ di. Tahawa aibâ na 're ipoto za'ra mono hã te te 're a'mapãrĩ zahuré mono õ di.

¹⁸ Tawamhã apito, ai'uté zapari'wa norĩ zô ma tô tihârâ zahuré, te te sadanharĩ zahuré da, ãne: — E marĩ wa, ĩwapari aba õ di. E marĩ wa, aibâ na 're ipoto za'ra mono hã 're 'mapãrĩ aba mono õ di, ai'uté hã.

¹⁹ Tawamhã ma ãne ãma sada'âbâ zahuré: — Izaraéu nhihudu norĩ nhipi'õi ãma iwasã 're sépu'u za'ra mono wamhã, sé hutu na te tãma 're poto za'ra, waptu na. Ezipsiu norĩ nhipi'õi wasã, ãma 're isépu'u za'ra mono nei õ di. Ta norĩ wasã si sé hâ uptabi di. Tahawa wawana te ai'uté hã tãma 're poto u'âsi za'ra, 're wasimasisi mono õ ré, itẽmeb za'ra hã.

^20-21 Tawamhã ai'uté zapari'wa norĩ, 'Re ihâimana u'âsi mono te te 're wazé pese zahuré mono wa, ma tô 'Re ihâimana u'âsi mono iwẽ hã te te tãma 're anhomri zahuré. Taha zarina ma tô siwabzuri za'ẽtẽ zahuré da hã tãma 'manharĩ zahuré. Tawamhã Izaraéu nhihudu norĩ ma tô sina hâ'â pe oto. Siptete na te oto 're hâimana za'ra.

²² Tahawa, apito Fara'o tinhib'a'uwẽ norĩ ma, ma tô ãne tãma roti za'ra: — Ma'ãpé asiwi ĩwapari aba! Izaraéu nhihudu norĩ 'watébrémi na 're poto za'ra mono wamhã, te za â 're isãmra aba mo, Nilu na pa nho'õmo nhisi ãma. Tane nherẽ, pi'õ na 're ipoto za'ra mono si, te za wẽ na 're prédub za'ra za.