Esdra 7 - ꞌRe Ihâimana Uꞌâsi Mono Zadawa Wasuꞌu

Zeruzalẽ u, Esdra iwisizé wasu'u

¹ Tawamhã wahub ahâ na we 're wahu mono pari, apito Artazesi Persia nhib'apito na 're hâimana mono ré, ma tô Esdra na aibâ nhisi hã Babilonia hawimhã mo, Zeruzalẽ u hã. Ta hã, Arã sasedoti isiré norĩ ma isa'ẽtẽ sipoto hawi a'uwẽ, Seraiaha 'ra, Azariaha nhihudu, duré Hilquiaha 'ra nhihudu.

² Ihi'rata norĩ hâiba amo hã ãne: Salu, Zadoqui, Aitubi,

³ Amaria, Azaria, Meraiote,

⁴ Zeraia, Uzi, Buqui,

⁵ Abisua, Finéa, duré Arãhã 'ra Eriaza, tisiré norĩ nhipai u sasedoti ipire uptabi.

⁶ Esdra hã rowaihu'u pese 'wa. Duré Uburé Danhib'apito, Izaraéu nhihudu norĩ te 'Re ihâimana u'âsi mono, Mozésihi ma, tinhimiroti na rob'ui'éré hã te te tãma isõmri waihu'u wẽ 'wa, te 're mo. Tawamhã ta hã ma tô apito Artazesihi u hã mo. Morĩ wamhã, ma tô uburé te te tiwi iwaptẽrẽzé hã tãma tisõ. E marĩ wa. Uburé Danhib'apito, Esdraha ma, iwẽ si te te tãma 're apisutu mono wa. Ãne ma tô ta hã Babilonia hawimhã mo, Zeruzalẽ u hã,

⁷ nima norĩ Izaraéu nhihudu norĩ 'remhã, sasedoti norĩ ré, levita norĩ ré, isõ're'wa norĩ ré, duré 'Re ihâimana u'âsi mono nhorõwa 'madâ'â'wa norĩ ré, duré taha 'ri 're, romhuri'wa norĩ ré. Ãne hã ma tô tiromhâiba, Artazesi hã dama i'rãnho'õmo na 7 na ãma iwahubzéb ãma.

^8-9 Tawamhã Babilonia hawimhã a'amo imorĩ'rata te na bâdâ isãna'rata hawi ma tô wairé. Tawamhã 'Re ihâimana u'âsi mono te te ipawaptob za'ra zéb zarina, ma tô Zeruzalẽ u hã oto aihutu, a'amo 5 na isi'utõrĩ ãma, bâdâ isãna'rata hawi.

¹⁰ Esdra ma tô morĩ wana ré hã sisõ tô, Uburé Danhib'apito nhimiroti na si te te 're romnhoré mono da, duré isarina si 're morĩ wẽ da, duré Izaraéu nhihudu norĩ ma, duré uburé te te ãma dama 're rowahutu mono da, isimiroti na hã.

Artazesihi nhimiromnhihâtâzé wasu'u

¹¹ Ã hã, apito Artazesihi nhimiromnhihâdâ, sasedoti rowaihu'u pese 'wa Esdraha ma te te isõmri, Uburé Danhib'apito, Izaraéu nhihudu norĩ ma, tinhimiroti, te te isõmri waihu'u wẽ 'wai ma:

¹² “Ã hã Artazesihi nhimiromnhihâdâ, ti'ab ré, ĩsiré apito norĩ ma, isipai'u za'ra ĩpire uptabi, wa sasedoti ipire Esdraha ma time, 'Re ihâimana u'âsi mono hâiwa ãma 're isãmra mono nhimiroti waihu'u pese 'wai ma, ãne: Wa hã wa ãma asawi.

¹³ Wa hã wa ãhã na ĩnhimiroti hã dama tihi, daro ĩnhimi'madâ'âzé mono bâ uburé Izaraéu nhihudu norĩ te te sima irowẽ za'ra norĩ hã Zeruzalẽ u ãma asiré si'aba'ré da, taré 're ihâimana za'ra mono a'uwẽ hã duré sasedoti norĩ hã, duré levita norĩ hã.

¹⁴ Wa hã apito, 7 na timreme na te te siwi 're ĩpawapto mono norĩ siré wa aima rob'ru, Zeruzalẽ u duré Zuda u aimorĩ da hã, ate 'Re ihâimana u'âsi mono tinhimiroti da'udâna te te aima isõmri hã da te 're wapari pese za'ra mono zô, da'azabu da.

¹⁵ Danhoprubzé ẽtẽ waipo pré oru na hã duré ẽtẽ waipo prã prata na hã, ma'ãpé ãma asiré duri, wa hã timreme na te te siwi 're ĩpawapto mono norĩ me, Izaraéu nhihudu norĩ te 'Re ihâimana u'âsi mono ma, wa te tãma sõmri za'ra da, wa te wasima iwẽ za'ra hã, Zeruzalẽ ãma tinhorõwa 'ri 're, 're isãmra mono ma.

¹⁶ Uburé te za ẽtẽ waipo prã prata 'manharĩ hã, oru 'manharĩ me hã idu, Babilonia ãma daza'rui wa'õtõ hawi iwaibu hã, Izaraéu nhihudu norĩ, tisiré sasedoti norĩ me Zeruzalẽ ãma tite 'Re ihâimana u'âsi mono nhorõwa ma da, te te isõmri za'ra hã.

¹⁷ “Ã hã rob'uiprazém na hã te za duré ãma ipibui pese za'ra wa'wa za, ãma uipra za'ra wa'aba da, powawẽ iba'õmore norĩ hã, pone'ẽrebâ zéré uzé norĩ hã, pone'ẽrebâ zéré mapure norĩ hã, amnho norĩ hã, duré uwa 'rãi wa'u isé norĩ hã, Zeruzalẽ ãma 'Re ihâimana u'âsi mono nhorõwa 'ri ãma danhoprubzé zata nomrizé nhisiwi, tãma ãma asõprub za'ra wa'aba da, izata na hã.

¹⁸ Tawamhã oru 'manharĩ, duré ẽtẽ waipo prã prata 'manharĩ si'atarẽme na hã te za a hã asiré norĩ me, tô marĩ hã ãma asima i'madâ'â ze za'ra wa'aba zéb zarina, marĩ siwa'ru asima ãma i'uipra za'ra wa'wa, ate za'ra wa'wa 'Re ihâimana u'âsi mono te te sima iwẽzéb zarina si.

¹⁹ Marĩ mono bâ, da te aima isõmri za'ra hã 'Re ihâimana u'âsi mono nhorõwa 'ri 're, marĩ 'manharĩ zéb da hã, te za a hã Zeruzalẽ ãma 'Re ihâimana u'âsi mono ma hã tãma isõmri za'ra za.

²⁰ Uburé marĩ ihâiba amo norĩ hã 'ri 're romhurizéb da, sô irobaba mono hã te za apito te rob'uiprazéb ubumrozém hawim na marĩ wa'âbâ mono hã tihâimana za'ra.

²¹ “Wa hã apito Artazesi, daza'rui wa'õno Eufrati bâtâ zasizém niwĩ ãma, rob'uiprazé 'madâ'â'wa norĩ ma, wa ãhã na hã tãma 'ru za'ra, sasedoti 'Re ihâimana u'âsi mono hâiwa ãma 're ĩsãmra mono nhimiroti waihu'u pese 'wa Esdraha ma, õne haré awa'awi te te tãma sõmri za'ra da isib'rata, uburé marĩ te te iwaptẽrẽ hã,

²² ẽtẽ waipo prã prata 3.400 na ipire pibuzéb u hã, amnho trigu 12.500 na ipire pibuzéb u hã, uwa 'rãi wa'u isé 2 miu litru u hã, azeitona wa'u to 2 miu litru u hã, duré dasaiwarĩrĩzé te te sima iwẽ zarina hã.

²³ Uburé te za ãma i'uwaimra, 'Re ihâimana u'âsi mono hâiwa ãma 're isãmra mono tinhorõwa 'ri na hã te te 're i'awaihu'u mono zéb zarina, ãne zarina niwa isiti'ruzé hã ĩzada hâimana tõ da, duré niwa apto'o ré ĩnhihudu norĩ da zama, hâimana tõ da, ĩ'uirĩ na hã.

²⁴ Uburé a norĩ wa'wa hã sasedoti norĩ wi, levita norĩ wi, isõ're'wa norĩ wi, 'Re ihâimana u'âsi mono nhorõwa 'madâ'â'wa norĩ wi, 'ri 're, romhuri'wa norĩ wi, duré dahâiba amoi u aimawi norĩ, 'ri 're, te te 're irob'ma'wamarĩ za'ra mono norĩ wi, dapawa'âbâ arĩ hã tiwi 're waptẽrẽ za'ra wa'aba mono õ di za.

²⁵ “Esdra, a hã, 'Re ihâimana u'âsi mono ai'rãi waihu te te aima isõmri dâ'âsina te za ida'apisu, da'madâ'â'wa da hã, duré da'ãma rowairébé'wa da hã daza'rui wa'õno Eufrati bâtâ zasizém niwĩmhã, uburé a'uwẽ te te 're 'madâ'â za'ra mono da hã, ate, 'Re ihâimana u'âsi mono nhimiroti tãma iwaihu'u pese norĩ hã. Tawamhã a hã, ã tãma iwaihu'u õ norĩ ma hã te za ãma tãma 're irowahutu za'ra mo.

²⁶ Ni'wa, ate 'Re ihâimana u'âsi mono nhimiroti duré dama i'rãnho'õmo nhimiroti te te wapari õ wamhã, te za õne haré awa'awi tãma rob'manharĩ ni. Ãhã wamhã, te za wĩrĩ ni, niha wamhã ti'ai wa'õtõ nho'õmo amoi u si morĩ da, te za dasiwi satõrĩ ni dasisiti. Duré niha wamhã, te za isimarĩ hã dasiwi tiwi waibu za'ra ni. Niha wamhã, te za dasiwi sẽrẽ ni, dazazéb 're.”

Esdra, 'Re ihâimana u'âsi mono ãma iwatazé wasu'u

²⁷ Tawamhã Esdra te ãne tinha: — Uburé Danhib'apito, wahi'rata norĩ te 'Re ihâimana u'âsi mono ãma, wa ãma ĩwata, wẽ uptabi wa, niha na apito pẽ'ẽ 'remhã rosa'rata na hã te te ãma tiwi saprĩ wa, Zeruzalẽ ãma Uburé Danhib'apito nhorõwa 'ri te te iwazézém na hã.

²⁸ Wa hã, Uburé Danhib'apito ĩsiré 're ihâimana mono zém na te ĩsina waihu'u wa, wa tô ĩnhiptete na ĩpahi ãna apito norĩ, timreme na te te siwi 're ipawaptob za'ra mono norĩ me, isiré norĩ siptete na dama roti'wa norĩ me, te te ĩwẽsãmri za'ra zé hã tãma ĩsina wazere za'ra. Ãne Uburé Danhib'apito, ĩte 'Re ihâimana u'âsi mono, ĩnhiptede te te ĩma isõmri zarina, wa tô Izaraéu nhihudu norĩ nhib'ihâ'a norĩ hã ahâ nherẽ ĩmreme na ãma ai'uté za'ra, ĩsiré si'aba'ré da apâ, wanhipti'a za'ra u hã.